اخر الروايات

رواية يتيمة المشاعر الفصل الثاني والعشرين 22 بقلم الكاتبة نور ال زيادة

رواية يتيمة المشاعر الفصل الثاني والعشرين 22 بقلم الكاتبة نور ال زيادة



نورزان: بعد الكلام والاعترافات ألي دارت بيني وبين رافي،حاولت اهدئه واطمنه انو كلشي راح ينحل، بس هو يعرف واني اعرف مو بهل سهوله راح تنحل امورنا،الضاهر جمعتنا اصعب من ماكنت اضن،،، اني ادري بي يحبني واني هم احبه
بس من حجاها حسيت بشي مختلف شعور من اجمل مايكون،وهو هم حسيته فرح حتى اكثر مني من سمع بمشاعري اتجاهه وصلني للبيت وراح
******
سمر
_
ضليت خاله ايدي على گلبي وخايفه والمشكله حتى موبايل ماكو حتى اتصل واعرف شنو الصار
وامي وابويه تعاركوا، وضلت تلوم بي وهو ولايمه السالفه مقتنع بالشي السوا
اخذت جهاز براء واتصلت على جهازي مارد عليه
بعدها اتصلت على سيف، رد
_ها سيف بشر شفت رافي؟
سيف: ماشفته بس اتصل سأل على نورزان
وبعدها سده بوجهي وكل مااتصل ميرد
سمر: اي اني هم ميرد عليه الله اليستر
سيف: فهميني شنو الصار؟
سمر: سولفت لسيف كل ألي صار
سيف: معقوله ابويه هيج يسوي،؟شلون هيج يسوي برافي، شلون يخلي بهيج موقف؟
سمر: رافي من سمع هرج البيت بصياحه ومن طلع شكله ماعجبني وعيونه حمره والله خايفه عليه،خايفه ليسوي شي
سيف: ان شاء الله ماكو شي لتخافين رافي واعي
وعقله كبير
سمر: هذا رافي بالأوقات الطبيعيه بس من الموضوع بي نورزان ميضل عنده عقل
وانته تعرف هل شي زين
سيف: صح كلامج يله راح اوصل للبيت سدي،،، باي
سمر: نهيت الأتصال ويا سيف وضليت انتضر على نار،، اجه سيف، وبعدها اجه احمد ومروه من الدوام
احمد: شكو شنو الصاير، اكو توتر بالبيت؟
سيف: ابونا مبدع كول شنو ماصاير
احمد :ياستار ،،خير؟
سمر: سولفنه لأحمد ألي صار
احمد: شلون هيج يسوي بي وبأي حق يحدد اذا نورزان تفيده لو لاء وبعدين شناقصها ومتفيده؟
مروه: والله حسيت يحبها، صح كلتوا هو مربيها
ولهذا متعلق بيها، بس لا ،،حسيت تعلقه مو طبيعي، وخوفه ولهفته واضحه
سمر: هسه السالفه مو هنا لو شايفين شصار بي من سمع بيها مخطوبه، الله اليستر ليسوي شي
احنا ونتكلم دخل رافي للبيت مثل الاعصار بدون سلام ولا كلام صعد فوك،ورا ثواني سمعنه صوت تكسير، وتفليش، صعدنه كلنا نركض، لكينه باب غرفته مقفول ضلينه ندك بالباب
احمد: رافي شدسوي افتح الباب لخاطر الله
رافي:(بصياح) روحو منا عوفوني بحالي
سمر: صرنا نسمع بس صوت تكسر وكزاز،ضلينه ندك الباب ونتوسل يفتح، ماكو مافتحها
اخر شي كلناله راح نكسر الباب يله فتحها ألنا،طلع الشعر مخربط والوجه احمر من العصبيه وايده مجروحه كلها دم وتنزف بقوه
اباوع الغرفه مكسرها مامخلي شي بيها صاحي صايره خرابه
سمر: شسويت ؟هاي شنو ايدك متروسه دم
طلعنا من الغرفه واخذنا لغرفة سيف مروه راحت جابتله مي وامي خطيه حيلها يرجف
ام رافي: ليش يايمه هيج تسوي بحالك وبيه؟
سمر: مارد علينه بس يهز برجله وجسمه كله يرجف داوينه ايده بس جرحها كبير
احمد: امشي رافي هاي يرادلها خياط جرحك عميق
رافي: عوفوها مابيها شي بس لفوها، قابل شيصير ازيد من ألي صار
باوع عليه وكلي ...
_سمر لميلي هدومي وغراضي كلها ماضل بهل البيت بعد دقيقه وخلي يفيده اخو وبنته
ام رافي: يمه استهدي بالرحمان وين تروح
رافي: لو الجهنم هم ماابقى هنا ، لو بس لاعب عليه ومسوي ألي سوا هم بيها مجال بس
مو يطلع لاعب على نورزان هم ورايح قانعها
توافق على هذا ألي خطبها
سمر: يااا!!!! شوكت هل الحجي!!؟
رافي: ابوج لاعبها على مستوى ،،، تدرين
هو ألي قانعها توافق، ومفهمها اني راح اتزوج وموافق على وسن وابشرج حتى امها داخله باللعبه، وقانعتها ومن مأيسه مني وعرفت اني بعتها وافقت على الخطوبه
سمر: والله عرفت اكو لعبه وردت احذرها بس هي الله يسلمها ماردت عليه
ام رافي: وين راح تروح؟
رافي: لتخافين يمه، راح اسكن بالبيت مالتي ألي بنيته
ام رافي: شلون تسكن بي وهو فارغ؟
رافي: اكعد هل يومين بفندق الى ان اجيب اثاث حتى لو مو كله أئثثه حاليا بس استقر بي ارتبه
سمر: لمينه اني وبراء كل ملابسه وغراضه أخذهن هو وسيف وطلع من البيت
****
نورزان: من رجعت للبيت وصعدت غرفتي اجت ريام عليه وسولفتلها كل ألي صار
ريام: مدااصدك يطلع كل هل شي من عمو نبيل
هو يحبج ويحترمج ليش هيج سوا؟
نورزان: مشكلته مو شخصيه ويايا اهم شي رافي ياخذ بنت اخو
ريام: نورزان خلي أبالج جمعتكم انتي ورافي كلش صعبه، واحتمال مستحيله
نورزان: اعرف ومتأكده من هل شي بس مابيدي غير انتضر رحمت رب العالمين ألي زرع هل الحب بداخلنا اكيد اله بيها اراده وألا منو كان يتصور، في يوم من الايام احب الشخص ألي رباني وكنت اصيحله عمو وهو يشوفني مجرد طفله، وصايرلها اب ويعلم بيها
ولج لو تدرين اليوم شلون شفت الحب بعيونه
ادري بي عنده مشاعر اتجاهي، بس مو لهل الدرجه
ريام: الله يجمعكم ويسعدكم ان شاء الله
نورزان: امييين،،، الله يسمع منج
سبحت ونزلت تغديت، وكعدت اقرا حسام اتصل عليه كذا مره مارديت عليه، اخر شي ارسلتله رساله محتواها...
( عندي امتحانات هل فتره مااكدر ارد)
بالليل اتصل عليه رافي، رديت عليه
رافي: شلونج حبيبتي؟
نورزان: فرحت بداخلي، رديت....
_الحمد لله وانته شلونك؟
رافي: زين الحمد الله
نورزان: حسيت صوته تعبان
اكلك رافي شبي صوتك احسك تعبان؟
رافي: مابيه شي ليضل بالج لتنسين اليوم اجيت من طريق طويل وكملت عليه من أجتني صدمه ورا صدمه
نورزان: حقك، بس عفيه لتغث روحك ليصير بيك شي
رافي: ليش تخافين عليه؟
نورزان: اكيد، اني قبل كنت اهتم لأمرك واخاف عليك مو عاد هسه
رافي: ياعمري انتي والله كل كلمه اسمعها منج
تحسسني اني صدك عايش،كوليلي شلون اكدر اعيش من دونج؟ شلون راح اتحمل فكرت انتي مخطوبه لشخص ثاني؟واكيد يشوفج ويتصل بيج ويتغزل،،، تدرين شعوري شنو هسه ؟
اااخ لوتعرفين شنو احس،،، شوكت تفص نورزان شوكت؟
نورزان: ياعيني، لتضل هيج تفكر والله حتى اتصال ماارد عليه، كتله عندي دراسه، بس انتضر كم يوم واتكلم ويا والدي وافهمه مامتقبلته،وأنهي الخطوبه اذا احجي هسه يكلي انتي شفتهمتي منه حتى بهل سرعه تريدين تفسخين
رافي: صدكيني مو بيدي صدكيني اول مره بحياتي احس بالخوف اكو غصه بداخلي تمنعني ارتاح
اني ادري بيج قويه ومينخاف عليج وراح تكدرين تقنعين اهلج وتتخلصين من هل الخطوبه
نورزان انتي قويه وتنفذين ألي تكولي واعرف راح تفسخين الخطوبه بس اذا ماصار هل شي راح افهم انتي ألي اختاريتي تغدرين بيه وتبقين ويا خطيبج وتكونين بعتيني واختاريتي واذا صار هل شي معناها انسي شي اسمه رافي بحياتج
نورزان: ليش هيج تحجي رافي، ؟ فهمتك الصار واعترف غلطت من وافقت والسبب عبالي انته راح تتزوج بس انته بهذا كلامك دتشكك بيه وبمشاعري
رافي: اسف حبيبتي أعذريني والله موبيدي اعرف حجيت بطريقه غلط بس انتي متعرفين حاليا شنو ألي بداخلي وشنو جاي احس
نورزان: اعرف صدكني اعرف بس كلي شسوي حتى تطمئن وترتاح
رافي: مااريد اي شي بس تواعديني انو ماراح تخذليني وتكسريني، وتمشين ورا اهلج
لأن اذا سويتي هل شي معناها جنيتي عليه معناها تموتيني
نورزان: اموت ومااخذلك واخلي شي يصير بيك
رافي: اني هسه اتمنى اغمض عيني وافتحها ألكه هل الكابوس انتهى وصرتي ألي
نورزان: الله كريم ان مع العسر يسرا، ارتاح ولتفكر الله كريم
نهينا اتصالنه وهو احسه كلش تعبان بس يكابر
****"""
سمر
__
بعد ألي صار طلع رافي من البيت وسيف هم راح ويا استقر حاليا بشكل مؤقت بالفندق الى ان يرتب بيته
امي خطيه تعبت موهين عليها ألي صار ،وخصوصا هي كلش تحب رافي
كلمن راح لغرفته ينام واخيرا راح ينتهي هل اليوم الصعب والمليان مشاكل
نايمه وسمعت رنة موبايلي فتحت عيني فزيت
اباوع ساعه٣ بالليل، وسيف يتصل عليه
نشف دمي من الخوف كلت اكيد صاير شي وألا شعنده يتصل عليه بهيج وقت، رديت عليه مفزوعه
هااا سيف خوما صاير شي؟
سيف: على كيفج ماكو شي يمعوده بس ردت اسأل سؤال
سمر: بربك بدينك مفززني هيج وقت حتى تسال سؤال
سيف: باعي سمر من الأخر رافي حرارته مرتفعه صاير نار ويون ويهلوس من الحراره مااعرف شنو اسوي أله
سمر: يااا !!!!وتكلي ماكو شي شجاا؟ شصار؟
سيف: ماصار شي كان طبيعي طول الوقت حتى شفته طلع اتصل و حجه ويا نورزان، كل شي مابي صح عشا ماتعشى بس كان كلش طبيعي بعدها نمنه كعدت ساعه ب..: ٢ على صوته يون ويهذي
شفته صاير مثل النار كعدته يفتح بعينه ويسد
سألته شبي جاوبني بصعوبه يحجي يكول كل شي مابيه وهسه مااعرف شنو اسوي
سمر: هو هذا رافي مو تعرفه لو ديموت يكول كل شي مابيه الضاهر جرح ايده ألتهب
ااخ من عناده مينفذ غير ألي براسه وحتى هذيج نورزان هم مثله نفس العناد متشوفهم توالموا،
سويله كمادات منا للصبح اكعد احمد وأول ميطلع الضوا نجي عليكم
نهيت الاتصال واني بالي يمهم حتى ماكدرت انام
اول ماطلع الضوا رحت على احمد كعدته خطيه فز
سولفتله الصار بدلنه وطلعنه رحنا عليهم
دخلنا للفندق ولكينه سيف بالريسبشن ينتضرنا كان خطيه واضح عليه السهر والتعب وجها ذبلان
سيف: والله كرهت نفسي لا وردت ادخل كلية طب
هو دوا مادبرت أنطي
سمر: ميخالف هاي لأن اول مره تصير بهيج موقف صعدنا للغرفه لكينه رافي نايم ووجها اصفر
سيف: كل شويه بحال مره يسخن مره تفكه الحراره ويغدي مي ،كل شي ماافتهمت
سمر: كعدنا واخذه احمد للحمام يغسله لأن حرارته هواي مرتفعه من صحى شويه وشافنه يكول ليش اجيتوا كل شي مابيه
بطران هو مشي يمشي مثل السكران
سبح وبدل وجبرنا نروح للمستشفى ساعه نتوسل بي وهو قافل طلعها لروحنا، اخر شي جبرنا
اول ماشاف ايده الدكتور صار يحجي علينه وبمعنى اصح رزلنه رزاله ناشفه
الدكتور: الجرح ملتهب وكان المفروض يتخيط من البارحه وفوكاها عميق، شنو هل الأهمال وبعدين لازم يضرب ابره مال كزاز وينكم عنه لو ألا يصير بي شي يله تجيبوا
يوووه صارت قصه، ورافي يكول موكلتلكم مااجي
اخر شي الدكتور رزله أله
الدكتور: طلعت انت المهمل واني صار ساعه احجي على اخوتك شلون تعوفها هيج اصلا غلطت عفته للجرح وخليته يلتهب
بقه يمه احمد واني وسيف طلعنه
سيف: تدرين جوعان اثاري السهر يجوع
سمر: هههه والله انته فلا تصيرلك جاره
هسه نخلص ونروح نتريك، اصلا صارت ساعه ٨ ونص هم ياله
شويه ورن موبايل رافي الجديد ألي كان عندي
سيف: منو؟
سمر؛: نورزان
سيف: گلب والده حست بي بنت الحلوه
سمر: مو وقت استهزاءك وماراح ارد بعدين هو يحجي وياها
سيف: يمعوده ماراح تبطل تدك ردي عليها
سمر: لا
سيف: جيبي اني اريد احجي وياها اريد اغثها
سمر: لا سيف مو مال هل السوالف ويجوز رافي ميريدها تدري بالوضع
سيف: حتى لو ميريد اريد اغثها، هي هم ألها دور بلي صار، شو جيبي
سمر :اخذ الجهاز مني ورد عليها
سيف :الو ،،،هلو نورزان
نورزان: صباح الخير شلونك سيف؟
سيف: صباح الخير، ولو مانايم حتى اصبح
نورزان: خيرك خوما صاير شي؟
سيف: سلامتج
نورزان: الله يسلمك،،، اكلك وين رافي ليش مو هو رد على اتصالي ؟
سيف: ميكدر يرد أحنا بالمستشفى
نورزان: شنوووو!!؟ شبي شنو الصاير؟
سيف: لتخافين شي بسيط
نورزان: الله عليك سيف بداعت كل غالي احجي الصدك شصاير ويا؟ ياربي والله حسيت من الليل كان موطبيعي حسيته تعبان
سيف: اي ومنو سبب تعبه
نورزان: الله يخليك مو وقت ملامه، وكلي شنو بي؟
سيف: البارحه بعد ألي صار عصب وفلش الغرفه ألي على اساس يتزوج بيها وكزاز جرح ايده داويناها بس الجرح كان محتاج خياط وهو ماوافق
لحد الليل ارتفعت حرارته صار نار وللصبح اني مانايم ويا بس يون ويهلوس اجه علينا احمد وسمر وجبنا للمستشفى طلع الجرح ملتهب كلش، وهسه راح يخيطوا
نورزان: ليش انتو وين حتى اجه احمد، وسمر عليكم؟
سيف: رافي ترك البيت واني رحت ويا
نورزان: معقوله !!ماادري ماكال، زين هسه كلي خيطو ايده؟
سيف: لا بعد
نورزان: سيف اخاف بي شي ثاني وضام عليه؟
سيف: يووووه شورطني ورديت، ادري لو بي شي عادي كاعد اسولف وياج وعايفه دروحي هسه وبعدين اخلي هو يخابرج
نورزان: تمام راح اروح بس عفيه لتخلون بالي من اتصل ردو عليه
سيف: تمام
سمر:نها الاتصال وانطاني الجهاز
_خبلتها للبنيه
سيف: تستاهل، ليش هي قليل ألي سوته
، راحت تركض وافقت وخلته يشوط خلي هي هم تشوط شويه
سمر: هههه يعني تعرف رافي ماعنده گلب يشعوطها ويعاقبها على سوايتها فكلت اني اسوي
دنحجي وهمه طلعوا......ها بشروا؟؟
احمد: خيطوا الجرح بس حتى من خلة بنج مو كلش اشتغل لأن الجرح ملتهب ولهذا تأذى ، وهاي ابرتنضرب بالكانونه لأن قويه لازم ويا محلول
سمر: ها رافي حبيبي شلون صرت اكيد يوجعك؟
رافي: مابيه شي،، زين بس خلي نرجع
سمر: رجعنا للفندق وتريكنا، وهذي نورزان كل شويه متصله
رافي: ملحتها غريبه هي مره تتصل اذا ماارد متتصل بعد
سيف: هاا،، موهيه درت بيك
رافي: ليش كلتلها منو صخم وجهك؟
سيف: كلت وخلص ولترجع عليه وجاوبها ترا ضل بالها
****
نورزان: اني بالكليه ومن سمعت بالشي الصار ضليت ألوب، اخر شي اتصلت لأن انتضرت وماكو احد طمني،
اول ماانفتح الخط تكلمت بلهفه... ها سيف بشر شلونه رافي؟
رافي: اني زين مابيه شي
نورزان: رافي !!!الحمد الله والشكر ياربي بشرني
شلونك؟؟ شلون صرت؟ متت خوف عليك ليش هيج سويت بنفسك؟
رافي: مابيه شي ياعيني ليضل بالج هذا سيف مبالغ هو مجرد جرح بسيط وخيطنا وانتهى
نورزان: من البارحه حسيتك تعبان وتكلي مابيه شي وحتى تارك البيت وماحجيت لا وتكلي لتضمين عليه شي،وانته عادي تضم مو،، ليش هيج تخلي بالي عليك؟
رافي: انتي بالجامعه مو؟
نورزان: اي، وانتو بالمستشفى لو طلعتو اريد اجي اشوفك
رافي: احنا طلعنا وصدكيني المكان مو مناسب تجين بي ، لأن اني بالفندق ومااريد تجيج حجايه
اني هم اريد اشوفج، بس حاليا مترهم بهل مكان
اخلص كم شغله عندي و أجي عليج للكليه
نورزان: الله كريم، ديربالك على روحك، لخاطري
رافي: لخاطرج كل شي اسوي بس لتضلين تفكرين
نورزان: اذا بيك ماافكر لعد بيمن اخذ راحتك صوتك تعبان بعدين من ترتاح اتصل بيك
تسالمنا ونهينا الاتصال صح من سمعت صوته اطمئنيت بس ضليت خايفه عليه
ثاني يوم سيف داوم امتحن وساعه بال١٠ راد يطلع
واني من شفته لكيتها فرصه
_سيف اجي وياك ورجائا لتعترض اريد اشوف رافي
سيف: يمعوده، اليوم جابو الغراض للبيت ومخبوصين الباجر اخذج ويايا
نورزان: مااكدر باجر عفيه، اريد اشوفه وهم حتى اساعدكم
سيف: امشي امري ل الله
نورزان: وصلنا يم بيت تصميمه كلش حلو
دخلنا بس هوسه استقبلتني سمر، ودخلت للداخل دخلتني للصاله لكيت رافي متمدد على التخم، وبيده كانونه موصوله بمحلول والثانيه مربوطه بلفاف طبي
اول ماشافني تفاجا!!!، سلمت ورحت عليه
_شلونك؟ شلون صرت؟
رافي: زين الحمد الله شنو هل المفاجئه الحلوه؟
نورزان:ابتسمتله ....ضل بالي تدريني ماارتاح ألا اتأكد بنفسي انته بخير
رافي: اني زين وصرت هسه احسن
سيف: لا عيني خلي اطلع من يمكم احسن ألي
اني منا حديقه ونفسيتي تعبانه مو حمل رومانسيات
رافي: ليش احنا شنو حاجين لو انته تحب تعيش الدور
براء: هلو نونو شلونج
نورزان: هلو، هاي انتي هم هنا؟
سيف: ليش اكو شي متخلي راسها بي
براء: اني صوجي جايه اساعدكم، ولو صدك اني مجايه عليك ولاأبيتك جايه على خالو حبيبي
رافي: ههههه هيج احسلك ألا تفشل روحك ،،البيت بيتج حبيبة خالو
براء :تسلم ،،وعلى عناد المضغوطين
نورزان: اجه احمد وجايب ويا غدا رتبنا الأكل اني والبنات وكعدنه نتغدا، وبعد الغدا والچاي بلشنه ترتيب البيت
اني رحت ارتب غراض المطبخ كل غرض بمكانه مااحس ألارافي يمي همس يم اذني
رافي: حبيبتي دترتب غراض بيتها اليوم
نورزان: من هسه صار بيتي بعدنه ماكلنه ياالله
رافي: اي من هسه اصلا من صممته وبنيته كنت بكل تفصيل افكر شنو يعجبج واسوي
نورزان: هاي شنو، لعد من شوكت وانته تفكر بيه؟
رافي: من اول يوم رجعت للعراق وشفتج
صح ماعرفتج وماعبالي انتي كان كل تصوري بعدج نونو الصغيره ماتخيلتج كبرتي
من شفتج شفت وحده مااعرفها سحرتني بجمالها
وكل شي بيها، ومن عرفت انتي نفسها نورزان تفاجأة حاولت اشيلج من بالي بس ماكدرت
قاومت هوايه سنه واني اناقض نفسي وأكول مجرد اعجاب الى ان اجه يوم وگلبي تمرد عليه وصار من يشوفج يريد يطلع من مكانه ويروحلج
نورزان: بالبدايه ابد ماحسيت عليك، بس من خطبت وسن وحضرت شفت بعيونك ونضراتك ألي هواي كلام، حسيت بنضرتك عتاب وحب ولهفه وحزن
رافي: فعلا كل ألي كلتي كان بداخلي،
وضجت وأنغثيت من وسن كالت يوم الألج وكلتيلها وانتو حاضرين اااخ لو تدرين شصار بيه ،ماتقبلت مجردالفكره وحتى من لبستها الحلقه تمنيتج انتي بمكانها
نورزان: ولهذا بوقتها من خلصت باوعت عليه؟
رافي: اي صح،،،
نورزان اني بوقتها مجردكلمه كلتيها ردت انفجر ماتخيلت مجرد خيال تصيرين لغيري وهسه مخطوبه ولابسه حلقة غيري
نورزان: ليش رجعت تفكر بهل موضوع؟
رافي: هو اني نسيته ثانيه وحده حتى اتذكره
نورزان: هانت ان شاء الله نخلص وتصير سوالف
يله عيني روح ترا انته جاي تعطلني عن شغلي، خلي اخلص حتى ارجع للبيت
رافي: ههههه هاي طرده رسمي كلنه بيتج بس مو من اول يوم تطردينه
نورزان: ضحكنا اني ويا، وهو راح وكل شويه يجي يذبله كلمه ويروح،وسيف ميقصر كاعدلنه بالمرصاد
خلصت ورجعني سيف للبيت ورا كم يوم فتحت الموضوع ويا والدي وكتله..
_بابا اني مامرتاحه ولا متقبله حسام نهائيا ومااريد اكمل ويا
بس كلت هل جمله امي وابويه أنفجروا بوجهي
ابو زيد: بعدج شفتهمتي منه حتى تحكمين عليه
ام زيد: بطلي رعونيه وأنطي فرصه للولد أنتي حتى اتصالاته متردين عليها مين بعد تعرفي وتتقبلي
نورزان: ليش موهذا كلامكم كلتوا من تشوفين نفسج مامتقبلته افسخي شنو ألي تغير من الأخير حسام مااريده ومااكمل ويا وهاي حياتي
حجيت كلامي وعفتهم وصعدت واني اسمع غلط امي وتجاوزها عليه كلت اخابر حسام واكله وشيصير خلي يصير قبل لا اتصل اجاني زيد للغرفه
زيد: نورزان حبيبتي معليج بأبويه وامي اني وياج بقرارج حقج ومحد يكدر يجبرج على شي انتي متريدي اني اقنعهم
نورزان: شكرا زيد هو هذا ألي اتعشمه منك انته اخويه وأكيد سندي
زيد: عندي طلب يمج وارجوج لترديني
نورزان: تفضل، كول واذا اكدر اكيد مااقصر
زيد: نورزان تدرين بيه احب بنيه بس تفاجأت من عرفت بيها تصير اخت حسام من صارت الخطوبه اجتي وعرفت بهل شي،انتي هسه اذا فسختي الخطبه أكيد اهلها يرفضون ينطوها ألي من اتقدم،
رجائي منج تنتضرين فتره جدا قصيره لحد مااخطبها واعقد عليها حتى اضمن تصير ألي
وبعدها حتى لو انفصلتي عن حسام ماكو بعد أحد يكدر يحجي شي لأن عاقدين،
نورزان: زيد كلامك مو مقنع وانته تعرفني مو غبيه
هسه عرفت لهذا قنعتني اوافق على حسام مو؟
زيد: لاوالله صدكيني ماچنت اعرف
نورزان: انته من البدايه كلت خوش ناس وأعرفهم كانو جيرانا يعني اكيد تعرف اهل اللبنيه ألي تحبها
شلون دبرتها وهسه تكول مااعرف؟
زيد: صدكيني ماچنت اعرف تعرفت عليها بالجامعه ومااعرف تفاصيل عن اهلها، وتفاجأت من شفتها بالخطوبه، نورزان ساعديني اول مره اطلب منج شي، فتره قصيره لحد ماتخلصين امتحانات وتجي العطله بعدها افسخي الخطوبه اكون بهل فتره ضبطت وضعي واني اوكف وياج ضد الكل
ها شكلتي؟
نورزان: افكر واردلك جواب
زيد: على راحتج بس صدكيني اذا ساعدتيني
ماراح تندمين،
نورزان: راح زيد، وأني افكر بكلامه، شويه واتصل رافي، رديت عليه...
رافي: بشريني حجيتي وياهم وشنو ألي صار
نورزان: حجيتله كل ألي صار
رافي: اني مامرتاح لكلام اخوج، اني هذيج الايام بصعوبه صبرت على اعصابي، اتحملت وهسه يريدج بعد تبقين للعطله،وهذا يطب ويطلع عليكم واحتمال يريد يكعد ويسولف ويستفرد بيج
نورزان: رافي ليش ماعندك ثقه بيه قابل من يجي شراح يسوي؟
رافي: نورزان انتي صح ذكيه بس خام ماعندج معرفه بهواي امور يعني خاطبج وجاي يشوفج تتوقعين راح يكعد، وكل شي ميسوي وخصوصا هو كاتل روحه عليج؟؟
نورزان: خجلت من كلامه اول مره يدور بينا حوار جريء
كتله.... والحل شنو؟
رافي: حاولي ويااهلج مره ثانيه، ترا مامقتنع ومامرتاح لكلام اخوج
نورزان: ومنو كلك اني مقتنعه لو مصدكه كلامه
بس ماعندي حل هو الوحيد يكدر يأثر على اهلي
يسمعون كلامه، واذا على حسام اتحجج بالأمتحانات وماشوفه منا الى ان تجي العطله
رافي: مامرتاح نهائيا،
نورزان: زين الباجر ارجع افتح الموضوع ويااهلي وألح عليهم واذا نفس الكلام اكون مجبوره
اخلي ايدي بأيد زيد لأن ماكو حل
رافي: شنو أريد اكول قابل ،هي سالفه مين منفرها
عويصه وكله سبب ابويه لو بس اعرف شنو استفاد من ألي سوا؟
نورزان: ضليت احجي ويا واحاول اطمنه، بس هو قافل ومامرتاح ثاني يوم عدت المحاوله ويااهلي وكان ردهم قاسي ورفضهم قاطع
هنا تأكدت اهلي ضحكوا عليه وماألهم نيه افسخ حتى لو مااريده لحسام ولامتقبلته رادوا بس يخلصون مني ويزوجوني ماضل ألي طريق غير اوافق على اتفاق زيد بالنهايه هو اخويه اكيد ماراح يضرني
بدت الأمتحانات وحسام يتصل من جهه ورافي بجهه ثانيه ميخلوني ادرس اخر شي ثنينهم كلتلهم اريد ادرس، احترمو قراري، وابتعدوا
لكن رافي يخلي براء تتصل على ريام حتى يعرف اخباري
اضحك على سوالفه وافرح من اشوف تعلقه وأهتمامه بيه
خلال هل الفتره زيد خطب، وعقد شيخ،
خلصت الامتحانات واجت العطله وكلت صار الوقت انهي كل شي،
تكلمت ويا زيد بالموضوع وكتله نفذت اتفاقنه وصار الوقت عليك الدور
جاوبني، جواب كان صدمة حياتي!!!
تعليقات



حجم الخط
+
16
-
تباعد السطور
+
2
-
close