رواية يتيمة المشاعر الفصل الحادي والعشرين 21 بقلم الكاتبة نور ال زيادة
نورزان: الليل كله اتفزز، اكعد ابجي شويه اتعب وأرجع انام ،،، كل كم ساعه احس بريام تجي تشوفني وتروح طلع الضوا واني مانايمه عدل مثل البشر افكار توديني وتجيبني، واكعد اتذكر، واكول ويا نفسي معقوله كل ألي عشناه وهم؟
نمت من التعب وماحسيت ألا ساعه ب١٢الضهر كوه فتحت عيني مورمه من البجي وراسي يوجعني، غسلت ونزلت مالكيت بالبيت غير بس ريام بالمطبخ
ريام: هانورزان شلونج اليوم؟
نورزان: بنص السعاده، شلوني يعني،،، اكلج وين امي؟
ريام: راحت
نورزان: وين؟
ريام: لبيت عمو نبيل
نورزان: يا ليش!!؟
ريام: يمعوده شبيج مو عمو كلها الباجر تجي الغرفه راحت تبارك
نورزان: والله مدا استوعب ألي ديصير احس دماغي راح ينفجر،،،، هسه لو يفتح جهازه افتهم منه گلبي ماراضي يقتنع، سوا هل شي
ريام: نورزان اسكتي امي اجت
ام زيد: ها بنات صباح الخير اليوم طولتن بالنومه
انتضرتجن تكعدن بس ماكو
ريام: اي مو البارحه سهرنه عندي امتحان الباجر
ام زيد: وليش اليوم ماداومتن؟
ريام: حتى ادرس ونورزان ماعدها محاضرات
اي ماكلتي جابوا الغرفه لو لا؟
ام زيد: جابوها من الصبح هسه يله كملوا شدها
ماشاء الله تخبل،
ريام: هيه وسن مين ألها ذوق
ام زيد: لاذوق رافي مو وسن
نورزان: هو وينه حتى يختار؟
ام زيد: لاعلى الموبايل دازيله صور ومختار
اني هناك واتصل بأبوه
نورزان: اول ماحجت هل الكلام كلت اجه الفرج
بس بعدين خابت امالي
ام زيد: حجيت ويا وباركتله، عبالي ضايج
طلع فرحان، الضاهر اقتنع وسن نصيبه
وهيه اللبنيه صدك تحبه
ريام: يعني حجيتي ويا متأكده؟
ام زيد: هاي شبيج اشو صايره ثوله شفتيني احجي هندي اي باركتله، بس ألي افتهمته ماكو هناك شبكه بصعوبه يتصل على اهله سمعته يكول لأبو مشتري قوط للعرس، لأن ميلحك بعد من يرجع
نورزان: هنا خلص بعد ماكو شك، خلص تأكدت
الاخ ديحضر لعرسه واني الغبيه ألطم عليه
ام زيد: نورزان فكرتي بالموضوع، اني اكول وافقي
خوش قسمه
ريام: شتغير من البارحه لليوم مو ماكنتي موافقه؟
ام زيد: اي صح بس فكرت وبالنسبه للخطابه
ألي اجوها هذا احسن واحد،،، منخصر شي خلي نجرب كلام زيد، اذا متراهمتوا وماعجبج كلمن يروح بطريقه،احنا منجبرج على شي
نورزان: بعد خيبة الأمل ألي عشتها، ردت
انتقم لكبريائي وكرامتي وخطيت اكثر خطوه غبيه بحياتي، وكلفتني حياتي
جاوبتها....
_ماما اني موافقه ردوا خبر للناس
ريام: نورزان انت شتحجين، كل عقلج؟
نورزان: هو هذا الصح
ام زيد: انتي لتدخلين، مو صايره مصلح اجتماعي
عوفي اختج، هو هذا القرار الصح
نورزان: عفتهم وصعدت، ولحكتني ريام
ريام: هاي شسويتي شنو هل الثول ادري ليش تعالجين الغلط بغلط ثاني ؟
نورزان: ليش غلط واحد شاريني وكاتل روحه عليه
وواحد باعني علمود وحده تافهه...ألمن اختار، ؟
ريام: ادري رافي خلص انتهى من حياتج
بس شفتهمتي ووافقتي على هذا واني اعرف مامقتنعه بس حتى تغيضين رافي وتفهمي تروح انته يجي غيرك ماراح تتوقف حياتي من غيرك
صح لو اني غلطانه ؟
نورزان: يجوز صح كلامج ويجوز احب هذا ألي اسمه حسام لأن مشاعره صادقه ومتمسك بيه
ريام: كلامج صح مااكول غير الله يسعدج
وتكدرين تنسين ألي صار
نورزان: وافقت واني بداخلي رافضه بس ماعاش ولاكان ألي يكسرني يارافي راح اشوفك منو نورزان وشلون تضحك عليه وتبيعني
للعصر اتصلت سمر تبرر لأخوها وتكول مااعرف شنو صار وشلون وافق ومن هل الكلام
كلتلها....
_شكو بيها بنت عمه والله يسعده
كملت كلام وسديته ماانطيتها وجه
هي هم ضحكت عليه تكلي فسخ الخطبه
وهو ديحضر للزواج
اجتي ام الولد واتفقنه وثاني يوم اجوي اشترينا ذهب، حتى الجمعه تصير هي مشيه وقراءة فاتحه هي تلبيس نيشان الولد شكله مستعجل
من طلعنه هو بس يحاول يحجي ويايه
وأكلني بنضراته بس اني بغير عالم
حتى ذهب امي اختارت ماألي اي نفس
وراها امي عزمت الكل حتى اهل ابويه صالحتهم خصيصا حتى تعزمهم الضاهر عاجبها تتباهى
بمجرد وصل الخبر لبيت ابو رافي اجاني اتصال
من سمر مارديت وراها اجتي براء، سويت نفسي نايمه ماطلعت شويه وراحت، ماعبرت احد
حقدت على الدنيا كلها
الخميس رحت حفيت ورتبت حاجبي، وكملت احتياجاتي وحضرت اموري والجمعه من الصبح رحت للصالون رتبوني بس مخليتها تسويلي مكياج اوفر...
لبست بدله ساك عدله لون وردي فخمه بس مو نفش، ماردت ابالغ وأصلا روحي طالعه
ورا الضهر اجوي اهل العريس سدوا الشارع بسياراتهم مامخلي شخص ماعازمه لاضباط ولااقرباء عالكها، قروا الفاتحه وبدت الهلاهل
عماتي وخالاتي وبيت عمامي كلها اجت وعمو نبيل وام رافي وبراء ومنال بس سمر ما حضرت
بس خلصوا قراية الفاتحه شغلو الدي جي،
ودخل العريس كان كاشخ وطالع حلو
بيت عمامي ضلو يتهامسون،
اما اني الفرحه طافيه عندي مو هو هذا ألي ردت تنقري فاتحتي اله، اااخ ياگلبي شراح يصبر
دخل حسام باس راسي وكعد يمي
تقرب يمي وهمس باذني....
حسام: مبروك خطيبتي وحبيبتي وان شاء الله ام بيتي
نورزان: الله يبارك بيك
حسام: شبي الحلو عابس؟
نورزان: جاوبته (بابتسامه مصطنعه)
مابيه شي...
جابت امه الذهب وبلش التلبيس لبسنه حلقات
والطقم ألي اشتريناه، بس اتفاجئت
من طلع قلاده قران لبسها ألي،
حسام: هذا قران يحفضج من العين
نورزان: كان تصرف حلو منه حتى الحاضرين
ضلو يحجون بهل شي
ام حسام: حقه هو كتل روحه لحد ما صارت أله
يخاف عليها،
ام زيد: الله يسعدهم
نورزان: تفاجأت بأمي من حجت هل الحجايه بغيظ
وباوعت على ام رافي ألي من اجت لسه ضايجه
ضليت أتسائل معقوله امي تدري بالسالفه؟
جابوا الكيك والعصير وبلشت فقرت الصور
واني على اعصابي كومونه ركصونه شويه
صارت مو خطوبه اريد بس تفض ومافضت ل ليل تعشوا الكل وراحو اهل العريس، وبيت ابو رافي هم بقن خالاتي وعماتي واولادهم راح يباتون
يبوووه،،، اني ردتها بس تفض شلون بالله هسه
بدلت وسبحت ونزلت اني اكل ماماكله من الصبح
خطيه ريام جابتلي لفه وعصير بس مااكدر لااكل ولاتنبلع اللكمه عبالك غصه ببلعومي
ريام: شجاج ليش متاكلين؟
نورزان: متنبلع اللكمه، ريام شكلي ورطت روحي
مااعرف شبيه
ريام: لتفكرين حبيبتي كولي يالله،والله اليوم من شفت الولد وشلون متلهف عليج غيرت رأييي بي
مبين شاريج ومستعد كلشي يسوي حتى يرضيج
ولج كلهن تراجفن من شافنه شلون يعاملج
نورزان: كلام ريام صح بس مااعرف شبيه،
واسأل نفسي ياترى سمع شنو سوى لو مااهتم؟
عفت الهوسه وصعدت لغرفتي ومن التعب والتفكيرنمت وماحسيت بعد
الصبح كعدت لكيتهم يتريكون همه وهوستهم
اريد اكل هم متنبلع اللكمه ياربي شجاني،؟؟
خلصنه ورا الريوك بدوا الخطار يروحون
واجاني اتصال من حسام ألي مااعرف مين اخذ رقمي
حسام: صباح النور يااحلى نورزان
نورزان: صباح الخير شلونك؟
حسام: شلوني من الفرحه للان منايم
نورزان: ههههه هاي شنو مسويها صدك
حسام: حقج متدرين شنو شعوري لعبتي بحالي لعب يله وافقتي،بس يله يلوكلج تتعززين عليه
نورزان: ضل يحجي ويتغزل واني ارد مجامله
بعدها تحججت اكو خطار وسديته
ضل كل يوم يخابر وحتى للكليه هم اجه
كلها سمعت انخطبت حتى بالجامعه
بس الغريب سيف لاسلام ولامباركه ولاوصل يمي هاي فوكاها همه الضايجين
ورا اسبوع من الخطوبه طلعت من الجامعه
مااشوف ألا سيارة رافي تفاجئت هذا شجابه!! ؟
****
سمر
_
بعد ماالوالد تكلم ويا رافي فوك ماافتهمت على شنو بعدها سافر، لكن الغريب اتصل بي يطلع جهازه مغلق
للعصر رحت على الوالد سألته كلي...
ابو رافي :اتصل بيه ماكو شبكه هناك، وكلي وصل ليضل بالكم
سمر : اطمئنيت بس بنفس الوقت گلبي مامرتاح
ثاني يوم صدمنه ابويه من كال راح نبلش نجهز لعرس رافي، هنا صار لازم ادخل
، كتله...
_يابه بكيفك تجهز وهو رافي رافض الزواج؟
ابو رافي: اني قبل ليسافر حجيت ويا صح مامقتنع بس كلي خلص موافق اهم شي رضاك
سمر: يابه تحجي صدك رافي رافض رفض نهائي
عن ياموافقه تحجي؟
رد عليه بعصبيه
ابو رافي: انتي لتدخلين هسه عرفت منوألي يحرضه على بنت عمه شدعوه هل الحقد ليش تكرهيها؟
سمر: ليش هيج تكول، وانته تعرف ابنك الرافض مو اني
ابو رافي: لعد لتدخلين، قنعته ووافق وكلي جهزوا لحد ما ارجع وحتى كلي احجز قاعه
اني صراحه مااقنعت بكلامه نهائيا، وشكد حاولت اتصل برافي جهازه مقفل وضليت بين رافي وكلام ابويه بدوا يجهزون امي هم مامقتنعه، بس صار امر واقع وضليت بشك ياترى صدك رافي ترك حبه لنورزان بهل سهوله واستسلم لقرار الوالد؟
لو شنو السالفه ؟ ابويه ميتجرء يخطو هيج خطوه
ويعرف رافي ماراح تمشي عليه الضاهر رافي متكلم ويا نورزان ورافضته وهيج سوا
ماألها غير هل التفسير
قررت اتصل على نورزان واقطع الشك باليقين
اتصلت على نورزان مبين من كلامها مامهتمه وباركت أله حاولت افهمها ماانطت مجال
هنا ايقنت انو تفكيري صح هاي رافضته الله يعينك يارافي يجوز لهذا قافل جهازه الله واعلم شنو حاله
بس الصدمه مو هنا الصدمه من عزمونه على خطوبة نورزان تخبلت عزه هذا اذا رافي سمع شنو راح يصير؟!
اتصلت بيها ماجاوبت شنو ألي ديصير مداافهم،؟
ورا اسبوع اجه رافي اجه متلهف سلم علينه اباوع على وجها مستغربه وضعه!!
رافي: ها سموره شبيج شمضيعه بوجهي
بيج شي؟
سمر: ها لا الحمد الله عالسلامه
رافي: الله يسلمج، خلي اصعد اسبح وابدل متت تعب
سمر: صعد رافي، دقائق ونزل شايط
رافي: هاي شنو غرفة النوم غرفتي وينها؟
شنو ألي ديصير؟
سمر: لا هنا تأكدت رافي كل شي ميدري
ام رافي: يمه هاي غير غرفة عرسك
رافي: مافهمت ياعرس؟
منال: يمعود هاي شبيك فقدت الذاكره مو الخميس عرسك
(صاح بصوت هز البيت)
رافي: تريدون تخبلووووني ياعرس هذاااا؟؟؟
ام رافي: غير عرسك انته ووسن
رافي: وسن قبل لااروح فسخت الخطبه وياها
بعد مين اكو عرس وجايبين غرفه
سمر: رافي لتخبلنه مو انته ألي كايل لأبويه جهزوا
واشتروا الغرفه وحجزوا القاعه حتى من ارجع اتزوج؟
رافي: كل عقلج هاي وانتي تعرفين كل السالفه
ام رافي: يعني شنو ابوك ضحك علينه!!؟
رافي: لالهنا وكافي طلعها من ماعونها،
اكول ابويه ومااريد اغثه بس مو يتخذ قرارات تخص حياتي وينفذها نيابتا عني هذا موحال
ابو رافي: ها رافي اشو طالع حسك، خير؟
رافي: ياخير يابه ياخير،
يعني اسافر ارجع ألكي محددين عرسي؟
ابو رافي: ليش شعندك بعد تنتضر، كلشي جاهز
تزوج وفضها
رافي: ابويه على عيني وراسي، وساكت لأن مريض
بس مو رافي ألي يتخلى بهيج موقف، وينفرض عليه شي
وهسه تأكدت حتى سفري ورا لعبه لأن ماكو اي مشكله بالمشروع بس يوميه يأجلون ويماطلون وبالاخير يكولولي ماكو شي والوضع تمام
معناتها وصلك خبر فسخ الخطبه وخططت انته واخوك وبنته، الحيه ألي تريدون تكربسوها براسي
ام رافي: هاي تاليتها يانبيل، تضحك علينا
وتسوي هيج بأبنك، كله علمود ترضي اخوك وبنته
ابو رافي: شسويتوها قصه قابل كفرت شبيها وسن قابل شناقصها واعيه وعاقله مو احسن من الزعطوطه ألي تريدها
رافي: شنو قصدك؟
ابو رافي: قصدي واضح،،، نورزان، ،،،شعبالك نايم على اذني،تدور وحده زعطوطه ومربيها على ايدك حتى الناس تاكل وجهنا ويكولون رباها وخلى عينه عليها
رافي: يعني تعرف احبها ورحت تريد تزوجني وسن
ومافكرت بمشاعري
ابو رافي: لو وحده غيرها اوافق،بس مو نورزان عيب عليك اصلا
رافي: وسن مااخذها لو حتى تتبرى مني
ونورزان ماعوفها، لو تنطبك السما على الارض
وهاي الزعطوطه احبها ومااخذ غيرها
سمر: سمعت هل الكلام ودموعي اني وامي نزلت
باوع عليه رافي ونضرت الخوف اعتلت ملامحه
رافي :شكو شنو صاير؟
ابو رافي: اني اكلك شنو صاير ألي مستعد تكسر كلمتي علمودها وبعت بنت عمك ألي شاريتك وتحبك،صارت لواحد غيرك
رافي: شنوووو!!! ؟انته شتكول ؟لامستحيل!!!!
سمر :باوع عليه بنضرت توسل...
رافي :سمر ابويه يريد يغثني موو ؟ كولي صح ؟
سمر: يحجي ويايا واني مااعرف شنو ارد
وشلون راح يكون موقفه،يحجي وياي وگلبه محروگ، وشايط من شافني مارديت عاط بيه..
رافي: جاوبيني شنو صاير، فضينيييي؟
سمر: قبل اسبوع نورزان انخطبت
رافي: اي يعني اجوها خطابه مثل كل مره مووو؟
سمر: لا، وافقت وانقرت الفاتحه ولبسوا حلقات
باوعت بوجه رافي اتغير من الصدمه حسيته
مامستوعب الأمر، حسيت عيونه صارت دم وشكله صار يخوف، ماكال غير...
رافي: وين سيف؟
سمر: بالكليه
رافي: اريد موبايلج ،
سمر: اخذه جهازي وطلع ضليت اصيح ورا ماسمعلي طلع مثل الأعصار امي ضلت تتعارك وياابويه، وتلوم بي
*******
نورزان: وكف سيارته امامي كان شكله ماادري شلونه عينه حمره، وشكله واحد يريد ينفجر من الغضب وفعلا كلي بعصبيه واسلوب امر
رافي:اصعدي
نورزان: ماكو داعي منتضره ابو الخط
عاط بيه صوت فززني....
رافي:اكلج صعددددي يله فضيني
نورزان: صوته عالي وخفت تصير مشكله
ترددت وبعدين كلت قابل شنو راح يصير
صعدت بس بتردد
شخط السياره ومشه، بس شنو اول مره بحياتي
اشوفه بهاي العصبيه فعلا خفت منه
كتله واني متردده.... شتر،، شتريد مني؟
رافي: شريد منج مووو؟ هاي تاليتها نورزان اسافر كم يوم اجي الكاج مخطوبه
نورزان: اي وشنو يعني، وبأي حق تسألني هل السؤال،؟
جاوبني بصوت مرتفع...
رافي: هسه صرت ماألي حق عليج؟ هسه صار رافي، لازم ميدخل بأمرج موووو؟هذا جزائي؟، لج شسويتلج حتى هيج تسويين بيه،جاوبينيييي ؟
نورزان: اني ماكلت مسويلي شي بس هذي حياتي الخاصه، واني حره بيها يايوم تدخلت اني بحياتك؟
رافي: ومنو مانعج تدخلين، كتلج بس ارجع عندي كلام مهم وياج،معقوله مافهمتيني،؟؟معقوله ماحسيتي بيه كل هل وقت،؟معقوله ماحسيتي بحبي ولهفتي عليج؟
نورزان: من تكلم هل الكلام باوعت علي بنضرة عتب وجاوبته... وألي يحب هيج يسوي؟
يحب وحده ويروح يخطب ويتزوج وحده ثانيه؟
لا وفوكاها جاي تحاسبني..
تكلمت هل الكلام وكف السياره بشارع هادىء، واندار عليه جر نفس يهدء نفسه
رافي: والله احبج انتي وبس ومافكرت ولاراح افكر اتزوج غيرج، شلون هيج تفكرين؟
نورزان: رافي انته تضحك على نفسك لوعليه؟
ترا باجر الحنه مالتك وبعدها عرسك
رافي: ياحنه ياعرس كل عقلج؟، اصلا قبل لااروح فسخت الخطوبه،، هاي السالفه كلها من تخطيط ابويه وهذيج الحيه هيه وابوها
نورزان:انصدمت من كلامه ضليت اباوع علي احاول استوعب.... يعني شنو مراح تزوج؟
رافي: لاأكيد اتزوج بس مااتزوج غير بس الانسانه ألي حركت مشاعري، وغيرت كياني، وحبيتها الى درجة مااشوف بعيني بعد غيرها
نورزان: نزلت دموعي جاوبته ....
انته مو قبل ايام حجيت ويا ابوك وسلمت على امي وباركتلك وانته كنت فرحان لأن راح تتزوج وسن ؟
رافي: شوكت هذا الكلام؟ ما صار هل شي ؟
، اصلا من رحت منا جهازي اختفى مااعرف وين صار، وللأن ماادري عنه،،، نورزان معقوله ماكنتي حاسه بمشاعري؟ بس رحت ماصدكتي ووافقتي وانخطبتي؟
نورزان:اني ماوافقت بالطريقه ألي انته مصورها
رافي :شلون يعني ؟
نورزان :بعد سفرك اجه عمو نبيل وتكلم ويايا وكال حسام رايح علي
رافي: ياحسام ياصخام، قصدج هذا خطيبج؟
نورزان: اي
رافي: كملي، كملي ،اريد اسمع المصايب
نورزان: رايح عليه وطالب منه يتوسط يمنه وفعلا اجه وحاول يقنع اهلي ويقنعني وكلي متلكين احسن منه ويحبج وشاريج وانصحج تاخذين ألي شاريج ومن هل السوالف،
اني كنت رافضه رفض نهائي، بس فاجئني من كلي حتى تصير الفرحه فرحتين لأن الخميس يصير عرس رافي وحجزنه قاعه وجهزنه
صح ضجت بس مااقتنعت، ولهذا اتصلنا على براء
وبراء اكدت كلام عمو نبيل، وهم ضل اكو شك بگلبي كلت لا ميسويها،بس ثاني يوم جابوا الغرفه وامي راحت بعد ما شدوها للغرفه رجعت وكالت خابر رافي وباركتله وفرحان، اكدت على امي وكالت اي قابل اكذب عليكم حتى كال لأبوه راح اشتري القوط من اربيل لأن بعد ماألحك ليوم العرس هنا ماضل عندي شك،...
اعترف تسرعت وتصرفت بغباء من وافقت على الخطبه بس مااعرف شنو ألي صار بيه
رافي: يعني ضجتي لأن سمعتي راح اتزوج ووافقتي؟
نورزان: لو بمكاني شتسوي؟
رافي: لو بمكانج اشوف بعيني يله اصدك زين هسه فهميني شنو راح اسوي منا ألي سوا بيه ابويه
ومنا گلبي المحروك واني اشوفج مخطوبه لشخص ثاني وحلقته بيدج
نورزان اسألج سؤال بس اترجاج جاوبيني بصراحه ولتشلعين گلبي لأن والله تعبان ماعندي صبر اتحمل بعد كوليلي لو اي لو لا صرتي تعرفين مشاعري وحبي ألج، بس اريد اعرف اني شنو اعنيلج؟
نورزان: باوعت بوجهه وصرت مااعرف احجي من الخجل
رافي: ها ماجاوبتي، ؟ زين راح اسألج بطريقه ثانيه...انتي عندج مشاعر حب اتجاهي، لو لا؟
نورزان: ياربي هسه شنو اكله احس وجهي صار طماطه من الخجل، نزلت راسي
مد ايده على حنجي ورفع راسي،
رافي: نورزان ادري تخجلين بس اترجاج بردي گلبي
على الأقل بعد ألي عشته اليوم اريد شي، يحسسني ماخسرتج، حتى اعرف شنو اتصرف بعدها
نورزان:جاوبته بتردد وخجل..... رافي اني هم مشاعري مثل مشاعرك
رافي:سألني بلهفه،،،، يعني هم تحبيني مثل مااحبج؟
نورزان: اي
بعدني بس كملت الكلمه جرني وحضني حسيت عضامي راح تتكسر،وبنفس الوقت حسيت بأمان وراحه بحياتي ماحاستها وعيت على نفسي وابتعدت خجلانه
_رافي شدسوي منا الشارع اخاف احد يشوفنا
رافي: اسف حبيبتي والله من فرحتي ولهفتي لو
تدرين شكد صارلي انتضر هل اللحضه
نورزان: رافي لتنسى اني هسه مخطوبه لشخص ثاني حتى لو مامقتنعه ومااحبه
رافي: انتي ليش مصره تأذيني، ليش هو شنو ألي مشوطني غير هل شي،
نورزان: اني من صارت السالفه اقترح زيد اوافق واذا ماارتاحيتله ومااقتنعت افسخ الخطبه لهذا ماعقدنه خليناها بس قراءة فاتحه
جاوبني بفرحه وكلي...
رافي: صدك!!!؟ يعني ماعاقده؟
، اي هسه هذا الحجي الزين، يعني تكدرين تفسخيها بسهوله؟
نورزان: اي اكيد،،،، بس انته نسيت شي حتى لو انفصلت، يبقى اهلك واهلي والضاهر اثنينهم رافضين ننجمع والدلاله اتفقوا علينه وسووا هل لعبه
رافي: صدكيني بعد ماتأكدت من مشاعرج، متهمني الدنيا كلها، لو اعرف اوكف بوجهم كلهم، واخذج من عيونهم بس المهم انتي بالنسبه ألي
شكلتي تخلين ايدج بأيدي، ونكمل، مشوارنا وحياتنا سوا
نورزان: افسخ الخطبه واجاوبك على هذا كلامك
ميصير ارد واني مخطوبه
رافي: حقج ما ألومج راح اصبر، بس نورزان
عجلي بالسالفه لأن مجرد فكرة انتي لابسه حلقة غيري متخلي عقل براسي
نورزان: ابتسمتله ابتسامه تخلي يهدء ويطمئن
لأن حسيته كلش، مأذيته هل السالفه وكل كلامه بحرگة گلب حسيته خايف
ومع الأسف خوفه كان بمكانه !!!