اخر الروايات

رواية يتيمة المشاعر الفصل الثامن عشر 18 بقلم الكاتبة نور ال زيادة

رواية يتيمة المشاعر الفصل الثامن عشر 18 بقلم الكاتبة نور ال زيادة



نورزان: حسيته انصدم من سمع صوتي الضاهر فقد الأمل بعد ادخل بيتهم
كعد على حيله مصدوم
رافي: نورزااان؟؟؟، مامصدك عيوني! !!
نورزان: البقاء لله
رافي: (نزل راسه وتنهد تنهيده طويله) ونعم بالله ولا أله ألا الله
نورزان:الله يرحمه ويصبرك
تنهد وفرك عيونه وجاوب..... أمييين
نورزان: شلونك؟
رافي: عايش على الله، انتي شلونج؟ ليش واكفه تعالي كعدي
نورزان: كعدت أمامه ضل يباوع عليه ، وماحجه ولاكلمه وكأنما مضيع شي ويدوره بوجهي حتى خجلت من نضراته، نزلت راسي هو الضاهر انتبه، ونزل عيونه،قطعت هل الصمت وهل توتر وتكلمت....
_عمو انته اول واحد علمني شنو ايمان، وشنو صلاه وصوم وحتى علمتني مساعدت الاخرين،
علمتني القضاء والقدر،،والموت حق ،، صح لو اني غلطانه؟
رافي: صح، وانتي كنت تلميذه شاطره
نورزان: لعد ليش ماجاي تطبق ألي علمته ألي؟
ادم استشهد وراح عند رب كريم، والله بشر الشهداءبالجنه،، ياريت احنا هم الله يبلغنه الشهاده ونصير ويا، هذا حزنك لاراح يرجعه، ولايغيرمن قدره شي،ألي دتسوي قلت ايمان، واعتراض على حكم رب العالمين، واني اعرفك انته شخص مؤمن، شنو ألي تغير، ومسوي هيج بحالك؟
رافي: بحياتي ماأعترضت على حكم رب العالمين
بس الفراق صعب، وبالنهايه اني بشر
نورزان: لتزعل مني بس اني مااحب اشوفك هيج
حقك تحزن، امنت بالله، بس مو من حقك، تخلي حزنك يأثر على حياتك وحياة الأخرين
رافي: مامأثر على احد
نورزان: لا مأثر،،، مأثر على صحتك وعلى اهلك وعلى اهل صديقك، ألي حزنك اخذك منهم
ومافكرت شلون تعوض غياب ادم،وانته تعرف كلش زين اخوته مو اوادم هو من كان عايش ماقدمو شي أله ولا لأمهم، مو هسه ومات، وترك بعده ايتام...ادم ميريد حزنك، يريد توكف ويا عائلته، بعد ماهو راح
رافي: كلامج صح فعلا حزني ماخلاني افكر بهل
الموضوع
نورزان: روح شوف ام ادم وأكيد انته ماراح تقصر وياهم، اساسا ماقصرت فد يوم ويا احد،
وسويله صدقه جاريه على روحه يمكن ألي راح تسوي مينسيك بس على الاقل انت ترتاح، وروح ادم هم ترتاح
رافي: ان شاء الله راح اسوي كل شي يخلي
روح ادم ترتاح فعلا حزني نساني هواي اشياء
اما بالنسبه للراحه فالضاهر بعد مااشوف طعم الراحه
نورزان: ليش هيج تحجي؟انت شخص قوي ومو بسهوله تنهز، ليش د اشوف حالك متغير
رافي: نورزان اني تعبان و وحيد الدنيا كفختني من كل الجوانب بس مشاكلي وهمومي كافيه وحتى تكمل ويايا ، بفتره قصيره خسرت اصدقائي الوحيدين،وأقرب اثنين ألي ماكو احد فهمني بكدهم ، واحد انتقل الى رحمة الله...والثاني تركني ونساني ولغى وجودي من حياته
نورزان: من كال هل الكلام، فهمت شنو يقصد
وحسيت شكد متأثر لأن كلامه كان بحزن وتعب
جاوبته....
بس الثاني ماتركك انته ألي ردت يطلع من حياتك
لأن الضاهر كان مضايقك
رافي: اعرف بوقتها جرحتج واذيتج بكلامي،
بس وداعتج غصبن عني، يجوز ماراح اكدر افهمج السبب على الأقل حاليا بس لتصدكين في يوم من الايام افكر ابعدج عن حياتي، او اغثج، انتي كلش عزيزه عليه ومقربه ألي صدكيني فراگج ماكان سهل بالنسبه ألي، بس الضاهر انتي كان فراقي سهل،عندج نسيتي رافي بسهوله ومحيتي من حياتج
نورزان: تدري وين المشكله، ؟الضاهر صرنا بعاد عن بعض وبطلنا واحد يفهم الثاني، لهذا صارت فجوه بينا، انت تعاتبني وتشوف نفسك صح
واني اعاتبك واشوف نفسي هم صح
رافي: من عاتبتج مو لأن اني صح بالعكس غلطت بوقتها واعتذر ولو اعرف الاسف،والاعتذار ماراح يغير شي، بس صدكيني لو يرجع الوقت مااسوي ألي سويته
اني اعاتبج، لأن غيابج وقسوت گلبج كان عقاب، صعب وقاسي عليه، ماتوقعت منج هيج تتصرفين ،
معقوله ماذكرتي شي زين لرافي يشفعله،؟على الأقل من اجيت لبيت جدج تطلعين تسلمين عليه،وانتي تعرفين بالحقيقه اجيت علمودج معقوله لهل درجه ماصرت اهمج، مااشتاقيتي ألي؟ ماأشتاقيتي لأيامنه الحلوه؟
نورزان:(كلامه اثر بيه واني ألي كنت مصوره عايش وناسي نورزان نهائيا، دمعت عيوني)
_صدكني ماسويت اي شي من گلبي،ولا نسيت فد يوم افضالك، بس حسيت انته متريدني بعد بحياتك وكلت يجوز مل مني ومن مشاكلي،
وخصوصا هو خطب وصارت عنده مره ويجوز، متوافق على وجودي بحياتك
رافي: انتي تحجين صدك ؟؟؟! اني الدنيا والناس كلها متكدر تمنعني، عنج،صح بلحضة عصبيه غلطت بحقج ماانكر هل شي لكن كل عقلج، امل منج، ومااريدج بحياتي؟
نورزان ألي بينا مو يوم ويومين احنا بينا عمر ،،،لا وسن ولا غيرها يكدر يبعدني او يمنعني عنج
كتلج سابقا ألا اذا انتي طلبتي ابتعد عن حياتج
او جرحتيني جرح مااكدر اتحمله ابعد عنج
وهم مااشيل ايدي منج، لحد مااموت
نورزان: انته كلتها اذا تنجرح مني تبتعد
لعد ليش تلومني من ابتعدت، وانت تعرف
كلامك شكد جرحني؟
رافي: نورزان شنو اسوي حتى تنسين ألي صار
معقوله ٧ اشهر ماكفت حتى تنسين ؟
نورزان: صدكني عمق الجرح يقاس بعمق معزت الشخص ألي يجرحنا
رافي: هيج اني عزيز عليج وتأذيتي مني لهل درجه؟
نورزان: باوعت بوجها، واكول ويا نفسي لو بس تدري معزتك وشلون مرت الايام بغيابك
ماعرفت اجاوبه، وشنو اجاوبه اكتفيت بالصمت، قطع صمتي
رافي: مااعرف شكد معزتي عندج بس اعرف كلش زين شنو انتي بالنسبه ألي صدكيني أنتي اخر انسانه بهل دنيا اريد اخسرها،،،،
سامحيني،...سامحيني وانسي ألي صار، اذا ألي خاطر عندج
نورزان: صدكني سامحتك من زمان، بس كبريائي
وكرامتي منعتني اشوفك
رافي: ماعاش ألي ينزل من كرامتج، وعد ميتكرر
وانتي هم اريد تواعديني، متسوين هيج ويايه مره ثانيه وتغيبين كل هل الغيبه وتشعوطين گلبي
نورزان:جاوبته بابتسامه.... تمام
تراضينا بعد العتاب، ورغم حزنه وشكله التعبان
لكن حسيته فعلا فرح بشوفتي
_زين هسه تراضينه والحماس خلاني اجوع اروح للبيت اكل وأجي
رافي: وين تروحين بعدني ماشفتج زين
نورزان: قبل شويه رجعت من الدوام وماأتغديت
رافي: اتغدي هنا شكو رايحه؟
نورزان: بس انتو متغدين واني اضوج اكل وحدي
رافي: لا اني مامتغدي بعدني، نتغدا سوا
نورزان: اعرفه ما ماكل وعمه تكول صار فتره اكله موزين حجيت هل الكلام حتى اخلي ياكل
_ زين لعد خلي نكوم أنشوف عمه شمسويه غده
رحت للمطبخ شفت عمه كاعده تحشي الطرشي
على الميز غمزتلها، ابتسمت وفهمت كلامي، كلتلها...
_عمه اليوم راح اتغدى يمكم تستقبلوني؟
ام رافي: انشيلج بعيونا، هسه اصبلج
نورزان: تسلم عيونج ،،لا عمه كعدي كملي شغلج اني اسخن الأكل وأصب
ام رافي: هذا تمن مسويه وتشريب لحم
نورزان:دخل للمطبخ من سمع شنو الأكل صار يتحجج حتى مياكل
رافي:ليش مسوين التشريب ويا تمن. أبيض؟
نورزان:.عمه اسوي ويا تاجينه ؟
ام رافي: اي ليش لا هسه اطلع المواد
نورزان: طلعتلي المواد وهو كعد على الميز
حمست الشعريه وخليت عليها سوب لحم
وقليت بتيته وخليت كشمش وبزاليا وجزر
وبهارات، وطلعتلي لوز هم خليت ويا الحشوه
لحد ما سخن الاكل سألته....
_راح اسوي دليميه وادري تحبها مو تكول مااكل
رافي: صرتي تعرفين تسوين دليميه والله زين
هاي سوالف الحجيه مو؟
نورزان: اي بيبي علمتني،
رافي: يله خلي نشوف شلونها الدليميه مالتج
تسوى لو لا
نورزان: هل عندك شك؟
رافي: هههه لا ماعندي بس ألا أتأكد بنفسي
نورزان: اي عبالي
رافي: ههههه،،، تحتاجين مساعده؟
نورزان: اي قطع خبز بالصينيه، حتى اخلي عليه سوب
قطعه الخبز واخذته خليت علي سوب اللحم وخليت التمن فوكا والحشوه مال تاجينه ورتبت عليه اللحم
اجتي مروه زوجة احمد سلمت عليه، بطنها كبرانه اخذ مني الصينيه وعمه طلعت ألنا طرشي ولبن وزلاطه رحنا لغرفة الطعام هي مفتوحه على المطبخ مباشر
كعدنا ناكل وأجت مروه اشتهت الأكله، وكعدت ويانا هو يشيل ويحط الأكل كدامي واني اصر علي
حتى هو ياكل، وعمه من بعيد تباوع علينه وفرحانه
صح مااكل هوايه بس المهم اكل، خلصنا اكل مروه اصرت تغسل المواعين اني سويت جاي وصبيت
رحنا للصاله كعدنا، نزلن البنات منال وسمر، وبراء
تفاجئن وفرحن من شافني، حسيت الكل متلهف
لشوفتي، وفرحانين لأن رجعت دخلت بيتهم
عمه نعست راحت لغرفتها تاخذ قيلوله
ضلينا نسولف وكل مااريد ارجع للبيت يمنعوني
بعدها، اجى سيف من الدوام اول مافات وشافني
انصدم!!!
سيف: معقوله مامصدك نورزان يمنا،؟!! اشرقت وانورت...البيت نور نورزان خانم
نورزان: اشكرك
رافي: مو اليوم هوايه متاخر،؟
سيف: اي طلعنا اني واصدقائي،،، اي، نورزان شلونج عاش من شافج؟
سمر: اشو عايش الدور ادري انته مو تداوم وياها معقوله متشوفها؟
سيف: لا عيني مو متدرين اني أنشملت بالعقاب
صرت مااشوفها
نورزان: شنو السالفه عقاب ماعقاب، اشو سويتوها عليه صدك ، انته واخوك متفقين على نفس الكلمه
رافي: قابل كذب يعني ماچنتي تعاقبينا؟
نورزان: ماعجبني الكلام رفعت تك حاجب
باوعت عليه وكتله.....
اي استاذ رافي ومنو السبب بهل العقاب؟
حسيته انصدم، لكن بعدها ابتسم،
وهنا وعيت اني جفصت فخجلت ونزلت راسي
سمر: ليش خجلتي؟
نورزان: لا هيج نسيت نفسي
سمر: لا مانسيتي نفسج هو هذا الصح وأصلا كلمة عمو ماعاد الها معنى بينكم
نورزان: مافهمت ليش شنو ألي تغير؟
سمر: ألي تغير انتي كبرتي و ترا اخويه بعده شاب كوه مكبرته ومسويته عمو، اني كل مره اريد اكلج واخاف تتحسسين، بس هسه مازال طلعت منج معناها حتى انتي شفتيها بعد مترهم
نورزان: بس اني متعوده، مااكدر،وبعدين انتي حجيتي وجهت نضرج يجوز هو عنده غير كلام؟
رافي: تريدين الصدك، ماعندي غير كلام، يكون احسن، اصلا من تكوليلي عمو احس روحي شايب
نورزان: شنو السالفه، اتفقتوا عليه،؟
سيف: لا عيني نورزان خانم حابه تبقى بيبي
زغيرونه وتصيح بابا وعمو، عود اني بعدني صغيره
نورزان: هيج الحجي سيف موو؟، الله كريم
واني كلت خطيه خلي اكوم اسويله دليميه
بس طلعت متستاهل
سيف: منو ألي ميستاهل، ؟ لا نونو انتي العزيزه الغاليه، اصلا المفروض تكولين لرافي جدو مو عمو هو ألي مسوي نفسه اغو
الكل: هههههه
رافي: ايا طايح الحظ علمود بطنك تبيع حتى امك
وابوك،،،، نورزان خلي يولي كل شي لتسويله
سيف: الله كريم اصعد ابدل وانزل، ويصير خير
سمر: عود يهدد التافه،،،،، ها نورزان شكلتي؟
نورزان: على شنو؟
سمر: على الكلام ألي حجينه بي قبل شويه
نورزان:(حسيت هوايه ركزو بالسالفه عبالي درتها وخلصت) جاوبتها ...
_مااعرف انتو شتكولون؟
رافي: اني اكول كلام سمر صح
نورزان: هيج كلمة عمو كانت مضايقتك،؟
رافي: لا بالعكس كلش كنت افرح من تكوليها ألي
بس هسه انتي كبرتي،ومااضن اكو هذا الفارق الهائل بالعمر ألي يخليج تستمرين بيها ألا اذا انتي تشوفيني شايب؟
نورزان: مااعرف ليش حسيت ورا كلامه مغزى
_صراحه اني مااشوفك كبير بالعمر، بس اكول هل الكلمه احترام، واذا متريدوني بعد اكولها فعادي ماعندي مانع
سمر: الاحترام مامحتاج رسميات يعني اني اكبر من رافي تكوليلي سمر وتحترميني، شنو يعني عادي مااحب احد يكبرني
نورزان: تمام، خلص، راح اكله رافي منا وجاي
باوع عليه وابتسم
رافي :وهسه اني عمو لو رافي
نورزان: ترددت وابتسمت،... رافي
ضل يباوع عليه ومبتسم استغربت كمية فرحه من كلت هل الكلمه،، قطع الصمت، سيف من نزل
سيف: ها نورزان الله ماهداج عليه؟
براء: نورزان اي عفيه اني هم ماتغديت زين مااحب التمن الابيض ويا التشريب، بيبي ولاتجوز من هل السالفه
منال: ولج يولي تروح تسمعج بيبيتج وتزعل
خطيه تطبخ وتتعب وانتو تتمندلون عليها
هذا يعجبكم وذاك لا وبعدين مو عيب عليكم نورزان صار اشهر ماطابه بيتنا ومن تطب تجيبون وتصخرون بيها،، انتو صايرين متستحون فد مره
سيف: ليش هي خطار،؟شحال لوما تربت بهل بيت حالها حالنا، هي ام البيت،
يله نورزان دللناج هوايه صار اشهر شايله ايدج كومي للمطبخ انتي وبراء صبيلنا غذا
رافي: ولك اشو انته تتامر عليها،،وبعدين مو چنت دايح ويا صديقك ليش مااكلتو لو تخاف على فلوسك
سيف: عفوا منك اللورد رافي،،، اسمحلي اكلك انت معليك،، مو معتكف ومتاكل، احنا ناكل وبعدين مااحب اكل برا البيت،، أنته ضل بدون اكل وعوفني بحالي
نورزان: لا تغدينه اني ويا ومروه
سيف: مممم،،،، هنا الكلام اليوم اكو تطورات والاخ شابع بطنه ويحجي بزوده، واكيد سوتلك دليميه واني ابن العبده من يمي وتخافون تشغلوها
نورزان: يمعود شسويتها قصه والله راح اكوم اسويلك بس اسكت فضحتنه علمود بطنك
سخنت الأكل ورتبتلهم نفس الترتيب وهو وبراء تكابلو على الأكل من خلصت قررت ارجع للبيت
_ياجماعه اني راح اروح للبيت
رافي: وين هو أحنا شفتهمنه منج
سمر: نورزان ضلي ب الليل عود روحي،خلي نسويلنه سهره، حلوه وندز على ريام هم
نورزان: غير مره عندي دراسه
رافي: مو نعرفها غير مره والروحه روحه
نورزان: ههه،،، لا لتخاف ان شاء الله اجي
رافي: يله لعد امشي اني اوصلج للبيت
نورزان: سلمت وطلعت بالكراج،،باوع عليه
رافي: نورزان بعد لتكطعين، ارجعي مثل قبل،
نورزان: تمام ارجع مثل قبل، وانته شوكت ترجع؟
رافي: شسوي يعني؟
نورزان: عوف الحزن ميلوكلك، ارجع لحياتك، واذا سمعت بيك تارك الأكل ازعل عليك
رافي: ان شاء الله
نورزان: وصلني لبيتنا، وسلم على امي وراح
وامي استلمتني تحقيق، تريد تعرف شنو الصار بينا اني ورافي جاوبتها...
لو عندي شي مااحضر الخطوبه بس مره تلاغينا اني وبنات عمهم لهذا صرت اضوج ادخل بيتهم
اكيد مااقتنعت بس انغلق الموضوع
بيومها كنت كلش فرحانه، كل شويه ابتسم ويا نفسي، وريام تضحك عليه
****
سمر
_
بعد جيت نورزان لبيتنا رافي من السعاده ماشايلته الارض
اني وسيف رحنا ورا لغرفته نستفسر عن الصار
سيف: اليوم اكو ناس الله ربها، اكلت وانتعشت والوجه تفح،وورد هاي هيج تاثير بعض الناس يسوي،؟ادري لعد احنه شبينه منأثر؟
سمر: اي طبعا بس ذوله مو اي ناس، ذوله، لبة الگلب
رافي: ههههه والله عرفت راح تبلشون بيه
بس لتخافون اليوم مااعبر احد ولااضوج من احد
سمر: الله يسعدك ويفرحك دوم ويجبر خاطرك
رافي: اميين، شكرا على هل الدعوه الحلوه
والله ياسمر ماادري شلون اوصف فرحتي
للان مامصدك اجتي وتصالحنا، بعد ماايست
حتى اشوفها
سمر:موكتلك يجي يوم وتحن،
رافي: شكد فرحت بشوفتها، بس ألي طير عقلي
من كالتلي،،، رافي،،، ماابالغ اذا اكول، گلبي راد يطلع من مكانه حسيت ولأول مره اكو بينا امل
سيف: مااريد اطير فرحتك بس لتنسى نفسك
انته خاطب
رافي: لتخاف ماناسي،وان شاء الله اجه الوقت اخطي خطوه اغير بيها حياتي لأن بعد ألي عشته صرت متأكد مليون بالميه مااكدر اعيش بدون نورزان، ولهذا مستعد اوكف بوجه الدنيا كلها علمودها ومن هل الدقيقه، راح اتقرب لنورزان
واحسسها بمشاعري، وادعولي، هيه هم تحس بيه
اذا صار هل شي، معناها، بعد ميهمني احد
سمر: ان شاء الله هذا التفكير الصح، واحنا واكفين وياك وبالنهايه حتى لوانته ربيتها تبقى محلله ألك
***
نورزان: بعد يومين اتصلت براء عليه
حجيت كلمتين وياها،بعدها اختفه صوتها اجاني صوت رافي بدالها
سلم عليه وضل يسولف ويسأل عني وعن دراستي وصار كل كم يوم يسوي نفس، الشغله وحتى للكليه اجه كذا مره ودائما يذكرني انو اتواصل ومااكطع عن بيتهم احسه ماصدك تصالحنا، صار اقرب بعد من قبل كنت خايفه خطوبته تبعدنا، طلع العكس صرنا اقرب، وعلاقتنه صارت مريحه
اكثر وبعيده عن الرسميات والتكلفه وكأنما كلمة عمو من راحت شالت وياها هوايه حواجز،
حتى بديت انسى فارق العمر صرت اشوفه بعمر سيف،لكن المشكله مو هنا،، المشكله اني ماادري شنو بيه اذا مااتصل او سأل يوم واحد اضوج،وأتنحس وأشتاقله يعني بدون اي شي، اني من قبل متعلقه بي، هسه صار التعلق اضعاف،
تجي اوقات ننسى نفسنا من نسولف سوا مااحس بالوقت
رجعت ادخل بيتهم ، كذا مره رحنا ورجعنا افضل من قبل وبنات عمه هم شفتهن لكن ماتغيرت تصرفاتهن ويايا اما اني صرت اتلافى اي مشاكل وياهن حاولن كذا مره، يسون مشكله بس اني صرت اعرف غايتهن
،مااعرف ليش وسن للأن تغار مني رغم أخذت ألي تريده وهل شي زرع بداخلي فضول بديت اتابع علاقتها هي ورافي كانت علاقتهم غريبه وكأنما اعداء مو رجل وأمرأه خاطبين يمكن قبل كانت علاقتهم احسن من هسه اني اعرف رافي ميؤمن بالحب يعني ميحب وسن ولا غيرها بس من اختارها تكون زوجه أله على الاقل يكون
ود وتفاهم واحترام بينهم، لكن هل شي ماشفته بعلاقتهم
قررت اسأل،عن السبب لكن اعرف سؤالي، راح يوصل أله، فكلت ليش اسأل شخص ثاني اسأله أله شخصيا خصوصا احنا علاقتنه، صارت بعيده
عن الرسميات،
اتصلت براء وكالعاده كلمتين وهو كمل عنها
رافي: هلو نورزان، شلونج؟
نورزان: الحمد الله وانته؟
رافي: بخير ملتهي بهل الشغل، كله حرگان دم
نورزان: هو اكو شي بالعراق ميحرگ الدم؟
رافي: اكلج اشو بعد مااجيتي اخاف بنات عمي
هم سمعنج كلام؟
نورزان: من جاب طاريهن كلت خلي افتح الموضوع توقيت و فرصه مناسبه
كتله...
_حتى لو حجن بعد ميهمني، لأن صرت اعرف غايتهن
رافي: اي عفيه، ماانلام من اكول عقلج كبير
شوفي هنه اكبر منج بس عقلهن صغير
صدك مو بالعمر
نورزان: بس خلي نكون واقعيين حقها وسن
بالنهايه انته خطيبها، وأكيد تغار عليك
رافي: على شنو حقها، ؟ هاي في حال احنا خاطبين بطريقه مثل باقي البشر عود تدور حقوق
نورزان: ممكن اسأل سؤال ولو مو من حقي يمكن
بس كلامك سوه عندي فضول
رافي: ميحتاج تسألين افتهمت، وراح اگلج اني وسن ماردتها ولاخطبتها ولامقتنع بيها
نورزان: تفاجئت بكلامه...، شلون يعني مافهمت؟
رافي: من اول ماشبيت والدي وعمي يلمحون على زواجي من وسن ومره اجاني والدي وبصريح العباره عرض عليه اخطب وسن وصار يكلي هي بنت عمك وتحبك من قبل واحسن من الغريبه ومن هل الكلام رفضت ورفضي ماعجبه ضل فتره يلح عليه، واني ارفض لأن وسن مو الأنسانه ألي مستعد اكمل وياها باقي عمري اني دقائق مااتحمل وجودها
ضل يلح واني مصر على قراري الى ان اجه يوم وتعارك ويايا وهنا انجبرت اغير اسلوبي بالرفض وخصمت الموضوع من كتله...
_ لو تبقى اخر وحده بالدنيا وسن هم مااتزوجها واذا تضل تلح اعوف العراق وأسافر
تصورت كلامي هذا راح ينهي الموضوع لكن صار العكس وگلب كل الموازين
نورزان: ليش شنو صار؟
رافي: ألي صار الوالد تخربط، وصل للموت وعلى اثرها نقلنا للمستشفى، ،كانت عنده بداية
ذبحه، ووضعه سيء
وبمجرد ما طلعنا من المستشفى، رجع فتح الموضوع حاولت اتلافاه، او ائجل النقاش بهل موضوع الى وقت اخر لكن هو كان مصر، وخفت عليه ومع ذلك كلت لابد اكو حل
قررت اروح لبيت عمي وحجيت ويا وسن وفهمتها بأحترام وجهت نضري وكلتلها اعتبرج مثل اختي وفهمتها اصرار والدي ووضعه الصحي مو زين ومجبور ألبي طلبه، بس من اجي اخطبج انتي ارفضي، حتى والدي ليتأذى
نورزان: اي خوش فكره
رافي: البنات هم وافقني الرأي،،، رحنا خطبناها لكن صدمتني من وافقت، هنا ماضل عندي عقل
هيج بشر ماعنده كرامه ماشفت رحت وتعاركت وياها وكان مبررها لهل تصرف...
وسن: احبك واريدك وما اكدر اعيش من دونك ومن نتزوج متأكده راح تحبني
_بأختصار كان مبررها اسخف من فعلها
نورزان:خلي نكون واقعيين يجوز صدك سوت هل شي لأن فعلا تحبك بالنهايه انته شخص متؤمن بالحب ومتعرف شنو مشاعرها
رافي: شنو انتي تدافعين عنها ؟
نورزان: لا طبعا، ماكو مبرر للشي ألي سوته
بس منعرف شنو بداخلها
رافي: نورزان، اني يجوز قبل مااؤمن بالحب
بس هسه صرت اعرفه كلش زين واعرف تصرفها مو نابع عن حب وأنما انانيه وحب تملك
نورزان: استغربت كلامه، ادري اجيت ارضي فضولي صار عندي فضول اتجاه شي اكبر شنو قصده يعني يحب غيرها لو شنو ؟
رافي: ها وين صرتي، ؟
نورزان: وياك
رافي: الضاهر نعستي، اني اعرفج تصيرين متستلمين الكلام روحي نامي، بعدين نسولف
نورزان: تسالمنا، وراح،هو عباله نعست ميدري اني الفضول كتلني
نفضت الأفكار من راسي وأنبت نفسي على فضولي ادري اني شعليه حب ولاماحب، ليش اني مهتمه،أله غير كلت هل كلام حتى انسى هل مره ضليت احوس وأفكر لحد مانمت
ضلينا فتره على هل الحال، واني صراحه
ارتاحيت اكثر خصوصا من عرفت وضعه هو ووسن
مؤقت لأن كال فتره من يصير والدي زين افسخ الخطوبه صح اني ميخصني الموضوع بس مااعرف
ليش ارتاحيت، عبالك الغصه ألي بداخلي راحت
دوامي مستمر وحياتي مستمره وصار رافي اهم شي بيها دائما يجيني للكليه حتى يشوفني لكن بدت صديقاتي بالجامعه في كل مره يجي بيها يسألن علي وانتبه لنضراتهن أله وهل شي بدا يضوجني صرت كلش اضوج من سؤالهن، مااعرف ليش احس بالتملك اتجاهه، مشاعر غريبه صارت تجتاحني، ماحاسه بيها قبل قربي منه، ولد عندي اشياء غريبه ماأعرف اذا تقربنا سوا هل شي لو بعدنا هذيج الفتره هو ألي غير نضرتي اله
مره خلص الدوام واني وساكار طلعنا ودعتها ومشيت حتى اطلع وقفتني وحده من زميلاتي سلمت عليه كانت وياها أختها من غير قسم اختها بكل صلافه سألتني...
_ منو هذا الشاب الحلو ألي يجي دائما عليكم انتي واخوج تكعدون يمه
استغربت تدخلها وسؤالها واني حتى مااعرفها
ماعبرتها اكتفيت انو اودع زميلتي وامشي
ماكو هيج بشر تحجي وتتموع شله مال زواحف
امشي وادردم ويا نفسي عثرت وكعت حقيبتي رفعتها من الأرض شفت شخص، عسكري
وويا جماعته يباوع عليه ويبتسم خزرته ومشيت
شلون فشله ضحك عليه كله من ورا هل حقيره استفزتني وخلتني اتوتر
اجتني لحضه ادراك حسيت نفسي شايفته لهل شخص وين ياترى مااتذكرت نفضت الافكار وكملت طريقي وياريت لو مركزه وعارفته ماكنت اعرف بهل لحضه قابلت كابوس حياتي !!
تعليقات



حجم الخط
+
16
-
تباعد السطور
+
2
-
close