اخر الروايات

رواية يتيمة المشاعر الفصل السادس عشر 16 بقلم الكاتبة نور ال زيادة

رواية يتيمة المشاعر الفصل السادس عشر 16 بقلم الكاتبة نور ال زيادة

سمر: نزلنه بسرعه ولكينه بنات عمي ماخذهن احمد يوصلهن،لبيتهم
رافي صار مثل التايه يفتر بمكانه وميعرف
شيسوي،،، اخر شي صاح على براء
رافي: برااااء، برااااء
براء: نعم خالو خير شنو صاير؟
رافي: بسرعه أتصلي على نورزان شوفيها وينها هسه
براء: اي حاضر
اتصلت بيها وأحنا على أعصابنا
رافي: ها،، بشري؟
براء: خالو جهازها مقفل
رافي: سيف وينه ؟
براء :طلع قبل شويه
رافي :بسرعه روحي انتي لعد لبيتهم شوفيها موجوده لو لا واني اوكفلج يم بابنا شوفيها وتعالي
سمر: طلعنا اني ورافي يم بابنا ضلينا ننتضر خبر من براء شويه وأجتي
براء: ماكو احد وأصلا البوب مقفله من برا
ودگيت الباب للتأكد هم ماكو
رافي: ياربي اني شسويت ....وين راحت ياألاهي
خلي اتصل على سيف يجي ندور عليها
وانتي براء، ضلي كل شويه اتصلي بلكي تفتح جهازها
سمر: اجي وياك رافي لأن انته كلش متوتر
رافي: ياريت،،، اصلا مااعرف شلون راح اسوق السياره
سمر: اتصلنا بسيف وكلناله يجي هو هم يدور كلمن بجها،، اني ورافي طلعنا على كيف نمشي بالسياره بلكي نلمحها
اتصلت على منال سألتها بلكي اتصلت على اهلها واجوي اخذوها للفاتحه لكن مع الأسف طلعت مو هناك،،، يعني مر اكثر من ساعتين وهي ماكو وين صارت؟
بدا الخوف والقلق والتوتر يسيطر علينه
اما رافي حتى وجها صار اصفر حسيته راح
يصير بي شي من القلق والتوتر طول الوقت يلوم بروحه ويغلط على نفسه
رجعنه من جديد لفرعنه حتى نسأل اي شخص نشوف بلكي احد شافها،،، سألنا ابو الاسواق ألي على الشارع وانصدمنه بكلامه !!
كال بنيه بمواصفاتها قبل اكثر من ساعه ونص، دعمتها سياره وصفها مثل مواصفات نورزان
رافي من سمع انتهى، طلع وكعد على الرصيف وخله راسه بين ايده اني بسرعه اتصلت على سيف يجينا كان قريب تقربت من رافي اهدئه لأن خفت من وضعه
_رافي حبيبي ليضل بالك ان شاء الله موهيه
هسه تشوف شويه ونلكاها ومابيها شي
رافي:اني السبب اذا صار بيها شي، اني السبب
سمر راح اتخبل راح اموت ...احس روحي مربط ومختنك،،،، شلون اذا طلعت هيه شلون فهميني؟
اجه سيف وسمع بالصار
سيف: رافي شد حيلك وكوم خلي ندورها بالمستشفيات
رافي: ماجاي اكدر، احس نفسي تربطت وماأكدر اتنفس
سمر: كول ياالله مابيها شي ان شاء الله
سيف: ابقوا هنا خلي أسأل باقي المحلات بلكي احد شاف، او سمع شي ونعرف وين أخذوها
سمر: راح سيف يسأل، ورافي على كعدته
احسه منهار، وفعلا متربط، وعلى ساعه يوكع
سيف: ابشركم سألت وكالو فعلا اكو بنيه اندعمت
بس حادث بسيط وراد صاحب السياره يوديها، مستشفى هي ماقبلت وقرر يوديها مستوصف قريب يله وافقت
رافي: سيف الله عليك كول الصدك خوما بيها شي؟
سيف: والله كالو بسيطه،.. بس شد حيلك وكوم ...
خلي ندور هنا هو كم مستوصف اكيد واحد منهن
بس كول ياالله وشد حيلك والله مااعرفك ولاشايفك بهيج حاله بحياتي كلها
رافي: اني السبب سيف....ألي صار بيها اني سببه
ردت ابعدها عن حياتي، ....ماتصورت راح تتأذى بسببي
سمر: يله امشي أندور وان شاء الله بخير نلكاها
دورنا اول مستوصف ماكو، والثاني فتنا ولمحتها من بعيد كاعده وأيدها ملفوفه وخاليلها مغذي...
تكلمت ملهوفه...
_رافي هاي نورزان شوفها
***
نورزان: اخذني الولد للمستوصف من شافوا ايدي مباشرتا كالوا محتاجه خياط،،، الجرح كبير وعميق ونزف هواي دم اني متت خوف، بس كنت مضطره لأن الدم ماوكف خطيه الولد ماعافني ولا ثانيه
خيطولي ايدي طلعت روحي ، لحد ماخلصوا
هاي وهمه خلولي بنج موضعي كلشي ماسوا
بعدها ضربوني ابره ضد الكزاز خلصت ردت اطلع انتهيت دخت اريد اوكف على رجلي مااكدر
دخلني للدكتور وبصعوبه فوتوني لأن عليه سره هوايه قاسلي ضغطي كان كلش منخفض واساسا نزفت دم هوايه، والحقيقه نفسيتي مو احسن من وضعي الجسدي،ألتمت عليه احس الدنيا ضاقت بيه
طلعنا من الدكتور كعدني الولد وراح جاب الدوا
ومستلزمات المغذي
المضمد استلم المهمه طبعا لحد ما لكولي وريد حتى يخلولي كانونه، ساعه الوريد اختفى زرفو ايدي بكل مكان صار بالنسبه ألي عذاب احس روحي بدت تطلع واني اصلا دايخه روحي ماعت وفقدت وعي
.
.
صحيت والمغذي بأيدي، ....وراها طلعوني برا كعدوني لأن اكوا هواي مراجعين ينتضرون دورهم
اي شخص بهيج ألم وتعب، يحتاج امه وابوه
اني اخاف حتى اتصل بيهم لأن يلوموني
ويأذوني بدال ميوكفون ويايا....
احتاجيته هو أتمنيت يكون ويايا، أتمنيت يجي يمي واشوفه اشوف الأهتمام والحنيه ألي دائما اشوفه بعينه قبل تصرفاته
، لكن مع الأسف انتهى كل شي ....خسرته مثل هوايه اشخاص خسرتهم بحياتي لسبب وذنب لليوم مااعرفه
اليوم اني رجعت يتيمه من جديد....، اهلي اموت لو اعيش ميهتمون لأمري ماكو شخص يهتم لأمري... بس هو وهو راح وعافني وحيده
كل هل الكلمات تتردد بذهني واني مرجعه راسي على كرسي من التعب منتضره المغذي يخلص بعد ماخلولي الثاني لان ضغطي ماصعد وخطيه الولد ماعافني نهائيا
حاولت افتح عيني التعبانه وأعدل كعدتي....
باوعت وشفت ألي كان شاغل فكري،....
ل لحضه بداخل نفسي، فرحت مثل طفله وتعورت بالمدرسه واجه والدها عليهه.....باوعت بعيونه من بعيد ...كدرت اميز كلش زين بيهم التعب والندم
والخوف وحتى وجها اصفر اي هو نفسه هو ألي يهتم لأمري ويخاف عليه
لكن من بين هل الافكار تردد كلامه الاخير بذهني،
وتذكرت اسلوبه ويايا، وهنا نضرتله ،نضرة عتاب ودرت وجهي عنه
اجت سمر تمشي سريع وبهمه
سمر: نورزان حبيبتي الحمد الله على السلامه
شصار وياج ياعمري؟
نورزان: مابيه شي ليضل بالج شغله بسيطه
سمر: يابسيطه دشوفي وجهج شلون صاير
وهاي ايدج الملفوفه، شنو بيها؟
نورزان: جرح وخيطوا ألي
الولد: اهلا اختي واسف على ألي صار والله مو بقصدي هي فجئه صارت كدامي والله ستر
سمر: يعني انت ألي دعمتها؟
الولد: اي اني وحاولت اوديها للمستشفى ماوافقت وجبتها لهنا، بس جرح ايدها چبير وعميق ونزفت هوايه دم الى ان خيطوا
والله ماعرفت شنو اسوي وهي ماقبلت تتصل بأحد ، وكملت عليه من ضغطها نزل واغمى عليها
سمر: نورزان تحجين صدك؟!! وتكولين كل شي مابيه ....ياعمري كل هذا وانتي وحدج ليش مااتصلتي علينه
نورزان: احجي ويا سمر واكو عيون تراقبني من بعيد بس ابد مااتقرب كلش واضح عليه الخوف والتوتر، لكن ماأتنازل يجي يمي ويسألني عن حالي...والله لو بس جاي يمي وحاجي وسائل على حالي كان نسيت كل الصار
اصلا اني حاليا اكثر واحد بالدنيا محتاجه قربه
بس هو مصر على موقفه وكلامه ماكان بلحضة غلط كان مقصود
اجه سيف يمي
سيف: نونو الحمد الله على سلامتج شلون صرتي؟
نورزان: الحمد لله زينه
سيف: لو تدرين شلون خوفتينا وشكد دورنه
عليج والله گلبنا مثل النار صار
نورزان: الحمد الله من اكو احد استفقدني واهتم
لأمري
سيف: لا نورزان لتكولين هيج ترا كلها تهتم لأمرج
واذا قصدج على هذولاك الناس ألي ضوجوج
ترا كل خوفنا بكفه ...وهو بكفه ثانيه..
والله انهار من درا انتي مسويه حادث...
تخبل عليج،،، لتشيلين بخاطرج منه...
لحضة عصبيه والله انتي كلش غاليه عنده
بس اكيد اكو سبب ورا هاي تصرفاته
نورزان: اكتفيت بالسكوت مااريد اعيد وازيد بالموضوع ولااعتب على شخص ماكلف نفسه
يجي يمي يطمئن عليه ميكفي خوفه بالنسبه ألي
الدوخه مافارقتني وتعبت اريد بس يخلص المغذي
اجه المضمد وكال خلص المغذي راح ارفعه
وتكدرون تطلعون ولتعرض الجرح للمي هل الفتره،، انطانا علاج الولد دفعله اجرته تشكرنا منه وقررنا نطلع الولد خطيه ضل يتعذر، ويبرر موقفه اخر شي كلت...
_اخويه قدر راد يصير واشكرك ماقصرت وماعفتني نهائيا روح الله وياك مابيه شي
الولد: اختي اي شي تحتاجي اني حاضر
اخذوا رقمي اذا تريدون
سيف: مشكور ألي عليك سويته هاي هيه توكل الله وياك، ماقصرت
نورزان: طلعنا وطلع الولد ويانا، ورافي واكف بعيد ابد ماتقرب من طلعنا صارامامي بس ماباوعت علي
رافي: الحمد الله على سلامتج
نورزان: رديت من غير نفس وماباوعت بوجها
_الله يسلمك... عفته ومشيت
طلبت من سيف يوصلني لبيتنا انتضر اهلي بالكراج لحد ما يجون لكن سمر شاطت عليه وحجت بعصبيه ...
سمر: كل عقلج نورزان اخليج تروحين وتكعدين هاي كعدتج برا وانتي بهل حال... والله اكلب الدنيا عليج وعلى رافي تجين يمي الى ان يرجعون اهلج بعدها هسه يله بدت تصير المغرب
وهمه ميجون ل ليل ....كل هل والوقت تضلين تنتضريهم كل عقلج؟؟ امشي ولتخليني ابتلي بيج
اسحلج سحل، شنو مطروده وهيج تحجين
نورزان: قابل كذب اي مطروده....لو نسيتي تلميحات اخوج بالكلام حتى بعد ماادخل بيتكم
سمر: لتستفزيني، وتعرفين رافي مو هذا قصده
واذا على كلامه يجي يوم وتفهمين اسبابه
وبوقتها تعذري
نورزان: لااعذره ولايعذرني،مااريد حتى اشوفه بعد
سيف: ها نورزان هيج صار الحجي ....من موقف تبيعين الاول والتالي هذا رافي العزيز هيج تحجين عنه ....ولج هذا لوتكليله موت علمودج يموت هيج صارت بينكم....، تعوذي من الشيطان وامشي ويانا لما يجون اهلج وبعدها شتسوين سوي
نورزان: صعدت ويا سيف، وسمر اجت ويانا
ورافي صعد بسيارته، رحت وياهم لأن فعلا ماعندي حل اخر وين اروح وحدي وأني
تعبانه ودايخه و بصعوبه واكفه مو مال اكابر
رحنه لبيت عمو نبيل، بس من ردت انزل
افترت الدنيا بيه
نزل سيف بسرعه عليه، ،لزمني قبل مااوكع واجت سمر تلكتني ودخلتني جوا
اسمع صوته بهمس يسأل سيف
رافي: شبيها شنو الصار وياها؟
سيف: داخت رادت توكع
نورزان: كلامهم صار بعيد عليه بعد مادخلتني سمر جوا دخلنا للصاله مال الضيوف كعدت بس بعدها الدنيا تفتر بيه، ادري معقوله ضغطي لسه نازل رغم المغذي؟
مددتني سمر على التخم وراحت جابت بطانيه
ومخده، بس خليت راسي، وارتاحيت صرت اغفي
ورا شويه اجت سمر جايبه عصير طبيعي
اني مابيه حيل لأي شي احس نفسي نعسانه، واريد بس انام لهذا بصعوبه شربت رشفتين منه
غمضت عيوني مونايمه لكن تعبانه، سمر طلعت
خلتني على راحتي، واسمعهم برا يحجون
سيف: ها بشري شلون صارت؟
سمر: تعبانه ونامت، المشكله الدوخه مافارگتها
رافي: شلون أخاف بيها شي نوديها للمستشفى؟
سمر: هسه تنام وترتاح ان شاء الله تكعد زينه
هاي من الهبطه، والدم ألي نزفته
رافي: لتخبليني سمر ليش شنو جرح ايدها هيج
كبير ونازفه هلكد دم ؟
سمر: اي ألي افتهمته عميق وكبير وطالعه روحها من مخيطي مأذيها لحد مامخلصين ومن مخلصين دايخه وطلع ضغطها كلش هابط، ومغمى عليها
رافي: صدك تحجين سمر!!!؟؟ يعني جرحها موبسيط،،،، ياربي اني شنو سويت؟ شلون هيج اذيتها ؟شلون ماحسبت حساب هل شي؟
امشي خلي نوديها للمستشفى يروح يصير بيها شي
سمر: رافي اهدى مابيها شي ان شاء الله
قابل بالمستشفى شنو راح يسوون اكثر من السوا الطبيب، ....بس شويه اهدئو خلي افوت اشوفها شلون صارت
نورزان: كل كلامهم اسمعه واني ماعندي حيل حتى افتح عيوني، مااعرف شنو صار بيه،،، استغربت كلامه وخوفه !!! ادري لعد ليش صار فتره هيج يعاملني؟ مامعقوله كرهني ومل مني ألي بينا عمر كامل، بس اكيد فعلا اكو سبب
اجتي سمر حجت ويايا مارديت عليها ماعندي حيل
وتعبانه غطتني عدل وطلعت ورا وقت مااعرف شكد حسيت صار جسمي نار،ارتفعت حرارتي ،،،تعبت حيل، اريد اصيح احد يجيني ميطلع صوتي فقدت حواسي بعدها حسيت ايد أنحطت على جبيني هاي الأيد اعرفها والنفس والعطر هذا أله هو تلمس جبيني،،سمعته يحجي ويا سمر بصوت اقرب للهمس
رافي: تعالي سمر شوفيها حرارتها مرتفعه صايره نار
نورزان: اجتى سمر شافت حرارتي،
سمر: اي والله مسخنه، خلي اسويلها، كمادات
بلكي تنزل
رافي: خلي نكعدها ننطيها خافض حراره، حرارتها عاليه، مو مال كمادات
نورزان: اسمعهم وماارد، كعدتني سمر بس ماعندي حيل، ولا طاقه حاولت، فتحت عيني وسديتها اجه سيف هم كعدوني وجلسوني بصعوبه
اجت زوجة احمد خطيه، هم وياهم وبراء شربوني
دوا ورجعت نمت
، بعد ماحسيت، ألا من سمعت صوت ريام يمي وامي وعمه ام رافي فوك راسي شويه بعد الدوا صرت احسن كدرت اكعد سألتني امي، على ألي صار
_رحت لصديقتي اخذ محاضراتي منها لأن اليوم ماداومت...بالطريق صار ألي صار
، ماكلت ألي صار قبلها والمشكله سيف وسمر باوعولي بأستغراب هزيتلهم راسي حتى يتفهمون الموضوع ويمشون ورا كلامي
ام زيد: ادري غير تنتبهين، انتي شلون بيج
تدورين المشاكل دواره
ام رافي: ام زيد كولي ياالله قابل قاصدتها
هذا قدر والله قدر ولطف...الحمد الله على سلامتج يمه ....هاي عين ماصلت على النبي من شافنج بالفاتحه خلن عينهن عليج
نورزان: مااستغربت كلام امي الحمد الله على السلامه ماكالتها
ريام: نونو حبيبتي لو ادري راجعه وياج
اني صوجي
سيف: يمعودين كولو ياالله مابيها شي ان شاء الله
هسه نضربها اربعين ابره تصير مثل الورد
نورزان: سيف تسكت لاابتلي بيك واطلع كل شي براسك،،، ادري عاضني چلب، حتى اربعين ابره
اضرب،؟
سيف: اي هسه اطمئنيت هاي نورزان الأعرفها
متسكت عليه، لازم ترد هي المشكله مو هنا المشكله، راحت عليه الباچه بعد أيدج متكدرين تسويلي
سمر: يووووه، والله هسه عرفت ماغيرك الفاك
حلكك عليها...ادري ابتلت على عمرها تعلمت تطبخ، ولج نورزان اذا طبختي بعد لأي أحد اني ابتلي بيج
نورزان: ضحكت على سوالفه، براء حبيبتي تباوع عليه دمعت عيونها،وريام من شافتها انقهرت وتكابلن هي وريام كلبنها مناحه اخر شي عاط بيهن سيف ....
سيف: يمعودات كلبتنها مناحه، راح تموتنها للبنيه
جوزن عنها
نورزان: صرت احسن خصوصا بعد ماشربت العصير وكمت على حيلي رجعنا لبيتنا، ومن هل الدقيقه قررت بعد ماافوت بيتهم ولا اشوفه، ولا حتى اخلي يلمحني كان قرار لابد انفذه حتى احفظ كرامتي تصورت بهل طريقه اعاقبه على تصرفه ويايا حتى ليكررها ماتصورت راح يسوي الأقوى و يغير كل حياتنا ويدمرها للأبد !!؟
تعليقات



حجم الخط
+
16
-
تباعد السطور
+
2
-
close