رواية يتيمة المشاعر الفصل الرابع عشر 14 بقلم الكاتبة نور ال زيادة
نورزان: من سمعنا كلام ام وسن أنصدمنا
اني ماكنت اعرف بتلفيق امير وكلامه....
وام وسن الحاقده ماقصرت بخت سمها بالوقت والمكان الصح،، من سمعنا الكلام امي وابويه سكتو ماردوها توقعت ماصدكوها لأن ردت فعلهم كانت هادئه ترخصوا ورجعنا للبيت..
اول مادخلنا البيت ماأحس ألا راشدي فر راسي
فر وحتى حلكي أنجرح وطلع دم.
ابويه ماخله حجايه ماحجاها ولاغلط ماغلطه عليه
وكل مااريد احجي وافهمه الموضوع تجيني
كفخه جديده وحتى شعري جره وتكطع بين
ايده ...وامي ماحاولت نهائيا تدافع عني بالعكس صارت تزيد النار حطب
ام زيد :لو مزوجيها لأحمد وخلصانين من عارها هوايه احسن
حسيت الدنيا ضاقت بعيني، اذا اهلي هيج
تعاملو ويايا وماصدكوني مااعتب بعد على الغريب..
حسيت وجهي نار بي من الضرب...حتى عيني عبالك جدحت من اجتها ضربه قويه ...
بس ألي شوطني صدك وخلاني اوكف واتمرد
لمن قرروا يحطمون مستقبلي
ابو زيد :تبطلين من الكليه وأول واحد يدك الباب نزوجج.
هنا شياطين الدنيا تربعت براسي كل شي ولا دراستي ...كلت عليه وعلى اعدائي
شكرا على هذا موقفكم بدال متسمعوني وتوكفون بوجه ألي يحجي عليه وعلى تربيتكم
صرتو ضدي حتى بدون ماتسمعوني...
لعد خلي اكلكم الحقيقه، ألي ادري بكل الاحوال
متهمكم لأن انتو تريدون عليه الغلطه والزله...
اصلا من اني وصغيره احس نفسي زايده عليكم
وتريدون تخلصون مني ومن مسؤوليتي لسبب للان مااعرفه
اميردائما يتحرش بيه ويضايقني من فتره طويله
واني اخاف احجي ألكم لأن اعرف بدال
متروحون تحاسبوا، تحاسبوني ألي ...
ومو بعيد تحملوني ألي المسؤوليه...
واعرف راح تصرفون مثل هاي التصرفات ويايه
ولهذا اني بعيده عنكم لأن بحياتكم ماتفهمتوني
ولاوكفتو ويايا،،، غيركم يدافعلي ويتصوب علمود يحميني...وانتو تصدكون اي واحد يحجي بأي تفاهه عليه ... صدكوني يوم ألي تسووها صدك وتقررون
تزوجوني غصب معناتها شلتو ذنبي...وتنسون عدكم بنيه اسمها نورزان
ام زيد: اي يطبج مرض فوك مرض تلصمين حلكج
لاافكس عينج هاي الطالعه..وكلامنا هو ألي يمشي وشتسوين سوي
نورزان: تأكدت الكلام ميفيد، اصلا لو يفيد كان فاد من زمان
كومتني ريام ورحت للحمام غسلت ورحت لغرفتي
وقبل لا اروح صاحني والدي اخذ موبايلي
والأغرب اخذ موبايل ريام هم ...
الضاهر بدت الحرب البارده مالتهم ضليت ابجي
على حضي الأغبر
بالليل سمعت اجوي بيت عمو نبيل
توقعت عمو رافي من يسمع ماراح يعوفني
اصلا هو املي وسندي الوحيد من بعد الله
لأن كل يوم اتأكد ماألي احد غيره ...
دخلت براء وأنصدمت بيه من شافتني
براء: هاي شصاير بيج ليش هيج؟
ريام: كله سبب ام وسن الله ياخذها ام البلاوي الحاقده ...ابويه ضربها وقرر يبطلها ويزوجها
براء:عزه تحجون صدك معقوله ؟!!!
نورزان: براء الله يخليج لتكولين لأحد ضربني
بابا ويريد يزوجني
براء: بس خالو رافي لازم يعرف حتى يشوفلج حل
نورزان: ماكو حل تدخله بس راح يزيد المشاكل
واهلي يعندون اكثر ....اصلا ألي صار ويا بسببي كلش كافي للان جرحه ماطاب...لهذا راح احلفج بروح ابوج متكوليله
براء: هاهيه مثل متريدين...
ريام جيبي ثلج خلي نخلي وجها بده يزرگ، هي بيضه وصار واضح...والله خالي لو يشوفج هسه ألا يكلب الدنيا هو درا بالصار عصب وتحلف لمرت عمو ...وكلش خاف عليج وكال مانام اذا مااروح لأبو زيد افهمه ليروح يسويلها شي
نورزان: ماأستغربت الكلام ولا خوفه عليه لأن طول عمره هيج ....ماأبالغ لمن اكول هو ألي اب اكثر من والدي الحقيقي
راحت براء وألي افتهمته مع الأسف ماكو شي أنحل وابويه قافل وهذا كله وزيد بعده ماجاي...
ومن يجي هم يكملها ويحرك عليه بدال مايحلها
الله يستر الضاهر الايام السوده بعد متفاركني
مرت الايام وخطيه كل كم يوم براء تجي تسأل...
امي تكابلنا وتكعد وكالبه وجها عليها
واللبنيه تاخذ على نفسها وتروح
هاي فوك وكفتهم ويايه ودفاعهم عني
****
سمر
_
ألي صار ويا نورزان ميسر لا عدو ولا حبيب
بسبب حقارت ام وسن ضاع مستقبل نورزان
والمشكله حتى من رافي وابويه حاولو يحلوها ماأنحلت ...
صار ايام مقهورين عليها ومنعرف اخبارها رافي وضعه الصحي رجع انتكس بسبب قهره على نورزان رحت لغرفته اطمئن علي .
--ليش هيج وضعك ياعيني، شوف شصاير بيك وجهك اصفر حتى اكلك ماعاجبني ارتاح لابد اكو حل
رافي: سمر شرتاح الخاطر الله ..بطلوها وضيعوا مستقبلها ...والله وأعلم شنو راح يسوون بعد بيها؟ كله سببي لو ادري من البدايه حاجي الحقيقه
سمر: ليش لعد ماكلتو حقيقة الصار؟
رافي: لأن اعرفهم واعرف تفكيرهم رأسن يرجعون
عليها ويحملوها كل المسؤوليه ...اصلا الموضوع ماكان انكشف لوما مرت عمي الحيه ...اخخخخ، لو ألكفها يمكن اطلع روحها ...بس رحت ومالكيتها بالبيت تتهزم ...وعمي لايحل ولايربط.كاعد ويبرر ألها
سمر: الله كريم ان شاء الله تنحل
رافي: ان شاء الله اكو شي أبالي راح اسوي
وراح اجازف والله كريم لازم اساعدها اعرف هي هسه منتضره مني الحل لأن تعرف مااعوفها بهذا الحال
سمر: شنو راح تسوي؟
رافي: يجيج الصافي، الخميس راح نجتمع
ونسوي كعده نحل الموضوع
سمر: الله كريم
*****
سيف
__
اليوم سوينا كعده حتى نحل موضوع رافي وامير
رافي اصر تصير يمنا و ابو زيد يحضر....
طلبنا منه يجي بس هو مارضه يحضر الكعده ....
رافي راح أله واصر وجابه ويا
اجتمع الكل وبعد السلام بلش النقاش
ابو امير :ياجماعة الخير احنه اليوم اجينا حتى نعتذر عن ألي بدر من ابني لحضة شيطان وطيش شباب وصار ألي صار وأحب اوجه كلامي واعتذاري بالتحديد من ابو نورزان هاي اللبنيه ألي تتثقل بالألماس موبس بالذهب مثال للشرف والعفه والاخلاق... والله ابني هواي يمدح بيها ويتمناها ويتمنى رضاها بس هي ابد مايوم نطته وجه لاهو ولاغيره...والله ياابو نورزان بنتك مثال للعفه والشرف اني بمكانك اكبر فخر بالنسبه ألي لمن تكون عندي بنيه مثلها....
والله لو مااعرف ابني مايستاهلها، هسه كدام الكل
اطلبها لأبني .واخليها اميره أبيتي واشيلها بعيوني بس مع الأسف ابني ميستاهلها
ابو زيد: اشكرك رحم الله والديك
ابو امير: اني اليوم جاي عتبان عليك صراحه زعلت هوايه من دريت مكعدها بالبيت
رافي: ابو زيد مامبطل بنته كعدها مؤقت لأن خاف
عليها وألا هو واثق منها ومن تربيتها...
ومن يبطلها معناها الكلام الطلع عليها صحيح
وان شاء الله من تفض السالفه كلشي يرجع
لمساره الصحيح
ابو زيد: كلامكم على عيني وراسي واني واثق
من بنتي واعرف شنو مربي ....بس ماعندي بعد ثقه بالناس .
ابو امير: لا خويه متنحل هيج الأمور ابني غلط ومستعدين لأي شي احنا وهو ماسوالها شي هو رادها وهي مانطته وجه وصارت مشكله بينهم.و لأن رجولته ماسمحتله بنيه ترفضه بهل طريقه تصرف وياها بهل طريقه
عمي من هل الدقيقه مستعد اتعهد امام الجميع ابني حتى متلمح خياله بأي مكان ...واذا خايف عليها وهل الخوف ابني كان سببه والله حتى حمايه اخلي ألها منا لما تتخرج واني الممنون ....ولااسمح احد يشيل خطية هل اللبنيه الذهب
ابوزيد: تسلم ماتقصر مو لهل درجه عاد ،،احنا نكدر نحميها
ابو رافي: لعد يااخويه خليها تكمل دراستها
حرام تنأخذ بغلط غيرها
ابو امير: ابو زيد اني اليوم مااطلع ألاتنطيني وعد ترجع بنتك ...لو اعرف اضل يمكم، ها وانتو تبتلون بيه وبحمايتي،،، هههههه
ابوزيد: ههه،،، هلا بيك شتريد اني حاضر
رافي: ها عمي يعني راح ترجعها؟
ابوزيد: ليش انتو انطيتوني مجال ارفض، هاهيه
امري ل الله
ابو امير: اريد وعد منك ابو زيد ترا هل الموضوع من يوم ألي دريت بي وهو متعبني وشاغل تفكيري ...مانريد نشيل خطيتها .
ابوزيد: هاهيه وعد وامام الجميع، بس بشرط تتعهدابنك ميوصل لبنتي لامن قريب ولابعيد وامام الجميع
ابو امير: وعد وهاي امام الجميع، بنتك تداوم معززه مكرمه وبالنسبه لموضوعه ويا رافي، شنو راح يصير ادري ابني غلط ويا وغلطته مو سهله
بس صدكوني اذا انسجن متنحل الامور
بالعكس تتعقد اكثر، ....اني قادر اطلعه بأي طريقه وتعرفون نفوذي ...بس اعرف بهيج حاله المشكله تكبر ماتصغر...فأني اليوم جاي ومتأمل ماتردوني...وشتريدون اني حاضر.
ابو رافي: هذا شلون حجي ابني راد يموت وانته بكل بساطه تريده يتنازل عن حقه؟
ابو وسن: ابن اخويه ميتنازل، اصلا هو لابيها ولاعليها ...صار ألي صار ويا بنيه وزميلها علاقه ماعلاقه همه بينهم ...واصلا للان مافهمنا الصدك من الچذب
سيف:(عمي صار يخوط بصف الاستكان وخبل
رافي وابو زيد صار يغلي)
رافي: اولا عمي الضاهر انته وغيرك لسه عدكم شك بهل الموضوع ولهذا صار الوقت تعرفون الحقيقه كلكم تعرفون اصل الموضوع وتشوفو بعينكم وبعد متعرفون وتشوفون مااسمح لأي مخلوق بشري منو ماكان يجيب طاري نورزان او هل الموضوع
سيف: طلع رافي التصوير مال يوم الحادث وشوفه
للكبار بس ماشوفه لعمي لأن ميستاهل واحد يحترمه...وطلع تسجيل الصوت سمعهم مضايقات امير ألها وردها أله ...
الكل مدحوا بنورزان ووكفوا وياها وهنئوا
ابو زيد على تربيته وعمي ضل بصخام وجها
رافي: هسه كلكم اتأكدتوا من الحقيقه وشفتوها بعينكم ....واني احتراما لجمعتكم الكريمه، راح اتنازل عن الدعوه...بس بشرط امير يطلع من الجامعه كلها وميشوف وجها ألنا ابد ...
واي شي يصير ألي لو لنورزان هو يكون المسؤول وأرجع افتح القضيه من جديد وهل المره مااتنازل لو توكف الدنيا كلها بوجهي
سيف: كلها تفاجأت والدي وعمي اعترضوا مارضوا على تصرفه بس هو اصر...
أبو امير وافق وتعهد وحتى قرروا يتعهدون بالمركز هم ينفذون الاتفاق، وبهيج حاله أنسد الموضوع
وترخص الكل ...
اول ماطلعوا الوالد بلش برافي
ابو رافي: انته شلون هيج تسوي وتكسر كلامي اني وعمك؟ دتلاحظ نفسك دتلعب بالنار لو لا ؟
رافي: ترا هو مينتضرنا اول وتالي يطلعه لأبنه
الفرق صار بالتراضي وبشروطنه احنا...
على الاقل نضمن انو نتصافه وتنتهي المشاكل
ابو رافي: ابني واعرفك واعرف مو هاي غايتك
وألي سويته اليوم لتتوقع اسامحك علي
ابو وسن: عوفه خويه هذا دماغه مغسول
عباله منعرف ليش أتنازل،...كله علمود هاي الزعطوطه...ليش هو لو غيره ألي راد يموت حتى يحميها
رافي: سبحان الله اول ماسمعت الكلام فكرت ويا نفسي كلت وين سامعه؟؟ تذكرت...
زوجتك قبل فتره كالته....، ياترى انتو متفقين على نفس الكلام ...لو واحد يردد كلام الثاني؟
اني اكول عمي انته وزوجتك هواي خالين بالكم يم هاي ألي تسموها زعطوطه...انتو المفروض اكبر من هل الشي...وكول لمرتك ماناسي تصرفها، متذكره كلش زين وكلها ترا هي عالت بيه مو بغيري
ابو رافي: انت صاير متحترم الاكبر منك
متلاحظ نفسك اليوم هوايه تجاوزت حدودك
رافي: العفو يابه اذا حسيتني تجاوزت حدودي وياك
بس اني مابقيت صغير كبرت صرت شخص مسؤول عن قرارتي
سيف: يله رافي اريدك بشغله امشي ويايا
ابو رافي: اي انهزموا عبالك مااعرف انتو طابخيها سوا، واحنا اخر من يعلم
سيف: اخذت رافي وصعدنه لغرفته وكلها لحكتنا فوك امي واحمد ومنال وبراء وغيث وسمر...
حتى مرت احمد ألي ضامه وجها وتستحي منشوفها بس على الاكل الفضول جابها وياهم
رافي: ولكم شنو السالفه صارت وليه عليه
شنو راح نحرر القدس اليوم واني ماادري؟
ام رافي: عوفنه من سوالفك وفهمني
رافي: بالبدايه انتي ويايا لو عليه
ام رافي: طبعا وياك، يرادلها سؤال
سمر: فهمنا ترا كل شي مافهمنه
رافي: شوفو هو اول ماشفت امير يسولف ويا نورزان عصبت وبعدين افتهمت منها ومن سيف انو هو يضايقها...
طلبت من سيف من يرجع يضايقها مره ثانيه يتدخل سيف بس ميسوي مشكله بس يحجي ويسجله الكلام ومضايقاته، ...واذا ماصارت يخلي نورزان هي تسجل
سمر: ليش مافهمت؟
رافي: هذا ابن مسؤول بالدوله يعني مو بهل سهوله نكدر نتعامل ويا لازم كل شي يكون بالدليل
حتى اذا ماكدرنالهم بالدوله نكدرلهم بالعشائر ويوم ألي رحت للجامعه وشفت موقفه ويا نورزان
ردت اهجم عليه واذبحه ...بس أتراجعت خطوتين وشغلت كاميرا وشفت حسن صحته وخليت حسن يصور وهجمت عليه وحسن صور كل شي
صح اني جيت على اللحضه الاخيره هو ونورزان
بس واضح بالتصوير انو ديتحرش بيها...
من امير لفق الكلام على نورزان وعليه
رحت وواجهتهم بي وهنا انقلب السحر على الساحر وموقفهم ضعيف لأن كل الأدله والشهود ويانا،،، بس ألي غير مخططاتي، مرت عمي الحيه
وأللي كالته، جبرتني اتنازل واقرر اطلع امير
علمود مستقبل نورزان..
.مثل كل مره اجه ابو امير يتفاوض ويايا عالموضوع وافقت بس بشرط .. يبرء نورزان ويحاول بكل الطرق يقنع ابو زيد يرجعها والمقابل اطلع ابنه
احمد: ها هسه افتهمت ليش اصريت يحضر ابو زيد؟
منال: يعني هسه انته تنازلت علمود نورزان
يعني كلام عمي صدك
سيف: تحجين صدك انتي ليش هو ابو امير راح يوكف علينا اول وتالي يطلعه...حتى لو يشتري القاضي والمحاميين ...على الاقل راح نطلعه بشروطنه أحنه وبرضانه وبعدين عمج الشفيه ألي يحجي ليش هو سبب منو تنازل مو من وره مرته الحيه
ام رافي: لا زين سوا مو مال مشاكل الكل تراضه وانتهت
رافي: ويكلولي ليش تحب امك يابا شوفو ام گلب الطيب والفاهمه
ام رافي: اي قشمر عليه بهل السوالف التعبانه مالتك بس اني هسه مو بحالك فرحانه لأن نورزان راح ترجع لدوامها هل اللبنيه متستاهل ألي يصيرلها
سيف: لا لهنا وكافي حتى انتي صرتي من معجباتها
اني اشيل راسي واهج احسن ألي
رافي: بلله هسه لو اكفخك منو يكلي ليش بابا انت منفصم...صارلك ايام اني وياك نخطط شلون نساعدها وهسه غيران منها...شنو هل التناقض؟
سيف: اني مو متناقض احبها واحترمها اي...
بس ترا اغار منها...وبعدين انته ألي تخطط واني كلت خطيه لوجه الله اساعدك اكسب بيك ثواب
كلها تضحك على مشاحنتنا وألي جوا صايرين نار
حتى مانزلنه يمهم
رافي: تدرون هسه شنو اتمنى
الكل: شنو؟
رافي: اتمنى اشوف ردت فعل نورزان على الخبر
براء: ولا يهمك هسه طلقه اروح اشوف الاخبار وأجي
سيف: ماكذبت خبر راحت وأحنا ننتضر نعرف
ياترى شنو ألي صار ببيت ابو زيد؟ وشنو ردت فعل نورزان على الخبر ؟!! وابو زيد ياترى راح يوفي بوعده لو يسوي غير شي؟؟