رواية يتيمة المشاعر الفصل الثالث عشر 13 بقلم الكاتبة نور ال زيادة
اليوم ألي تصوب رافي، ورحت للمستشفى، كان من اصعب ايام حياتي رافي أله معزه خاصه بداخلي ....ومن سمعت كلام حسن وطلب رافي منه، احترمته وقررت انفذه، لأن اعرف اهمية نورزان بالنسبه لرافي،لما بدا يصحى من البنج كنت اني الوحيد يمه ...وخلاني اتفاجأ مفاجأت حياتي!!!وشكوكي ألي صار فتره تدور براسي وأطردها واكول لاموممكن هل شي يصير، طلعت صحيحه....
سمر اول ماصحى يهذي بأسمها، وخايف عليها
صار يغلط على هذا امير، لهنا اوكي عادي
لكن صدمني من ضل يصيح
رافي،، --نورزان احبج ،،، لتعوفيني،، ،وينج راح اموت
كانت صدمه بالنسبه ألي حاولت ماأخلي أي شخص يفوت يمه الى ان يصحه حتى ليسمعون كلامه
ولج سمر هذا مو معجب مثل ماكنت مفكر
هذا يحبها ويموت عليها ومستعد يموت علمودها
سمر: لا سيف مامعقوله هو ألي رباها ويشوفها
بنته او اخته الصغيره ويحبها ويخاف عليها،لهذا
انت فاهم الموضوع غلط ...هو من قبل يخاف عليها ويهتم لأمرها...انت تعرف رافي اصلا ميؤمن بالحب نهائيا ويوم ألي يفكر يحب اكيد ماراح يحب انسانه متصلحله وفوكاها صغيره عليه لا مامعقوله كول غيرها يمعود
سيف: منو حدد وكال متجوزله شنو قابل محرمه
عليه لو هو عمها صدك؟ وبعدين قابل بكد ابوها هو ترا كل الفرق لو ١٠ او١١ سنه مو اكثر...يعني ماكو شي غلط بالموضوع ولاحرام
سمر: صح كلامك بس اكو مسائل نفسيه تمنع لأن هو ألي رباها ...وبعدين نضرة الناس ألي كلها تعرف شنوعلاقتهم وهي تصيحله عمو...
لتتوقع رافي يعوف كل هل الامور، ويخلي عينه عليها، وانت تعرفه هو شكد انسان عقلاني
وابد عواطفه متتحكم بي.
سيف: الايام تثبتلج كلامي، وان شاء الله اطلع
غلط، ...خلي اكوم ابدل واروح ويا للدكتور عنده مراجعه
سمر: اجي وياكم
سيف: احمد هم راح يجي، بس بكيفج كومي بدلي
رحنا للدكتور والحمد الله اطمئنينا عليه ووضعه تمام بقت بس المشكله لازم نحلها وابو امير يوميه
داز واحد يريد يطلع ابنه، ساعه يتوسل وساعه
يهدد...
من رجعنا البيت شفنا الوجوه موتمام ومتتفسر
وامي وابويه صايرين نار من الغضب اول مافتنا للبيت عمي توتر واخذ مرته وبناته وراح
اذا حضرت الشياطين غابت الملائكه
ميدرون ابليس سلم الرايه ألهم واعتزل
رافي: لعد بيت ابو زيد وينهم مو على أساس يجون؟
ام رافي: اي يمه اجوي وراحو
رافي: شعجب ماطولو صاير شي؟
سيف: من كال رافي هل الكلام امي وابويه واحد باوع بوجه الثاني بأرتباك ومنال خلت وطفرت للمطبخ
رافي: اني سألت سؤال، بس عيونكم وتصرفاتكم
جاوبت ألف جواب وانتو ساكتين وكلها متبشر بخير
ابو رافي: شنو يابه شنو استجواب؟، لو عالم روحاني كاعد تقرانه ؟ ماكو شي اجوي وراحو مستعجلين عدهم خطار على أساس يجيهم، وراحو
سيف: حسيت رافي ما أقتنع بالكلام نهائيا
عافنا وكام،،، اشرلي ألحكه فوك...صعدنه لغرفته .
رافي: انتبهت اكو شي ضامي،
سيف: مو شرط يجوز انته هيج حسيت
رافي: لا متأكد
سيف: يووه منك حتى النغ**ل تدور منو ابو
شكد تدقق انته
رافي: اتحداك،،، وهسه تشوف كوم احسن متحجي صيحلي براء كلها جيبي مي اريد اشرب دوا
سيف: صحت براء جابت المي وأجت
رافي: براء شنو صاير ورانه؟
براء: ماكو شي خالو كل شي تمام ليضل بالك
رافي: متأكده؟
براء: اي اكيد، يله من رخصتك اروح ادرس
رافي: ها شكلت، اخاف كان شك هسه صار يقين
سيف: شلون عرفت وشفتهمت منها هي كل شي ماكالت؟
رافي: عيونها كل شي حجت انتبهت باوعت على كل مكان بالغرفه وماخلت عيونها بعيني نهائيا بس توترها كافي حتى يثبت صاير شي
سيف: وهسه شلون راح نعرف شصاير، ؟
رافي: تبين اول وتالي
سيف: دكوم خلي نطلع شويه ماأختنكت من كعدت البيت امشي شويه برا...
طلعنا بالحديقه وراها صار العشا تعشينا
بس انتبهت فعلا الوجوه متتفسرواقتنعت بكلام رافي هههه شكد مخي ثكيل ألا واحد ينبهني يله انتبه...
خلصنا وطلعنا للشارع شويه نتمشه اجه غيث
يركض ورانا
غيث: خالي عندي حجي وياك
رافي: اي تفضل
غيث: المفروض ماانقل الكلام وأصلا مو من طبعي بس حسيت الأمر يستوجب انقله توقعت احد يوصلك بس الضاهر كلها تكتمت حتى لتصير مشاكل بس حتى لو هم لازم تعرف
رافي: لتخوفني واحجي اني اصلا حاس اكو شي
غيث: العصر بيت عمو اجوي وبيت ابو زيد هم
اكيد تدري ...بس ألي متدري بي، عمه ام وسن حجت كلام مو حلو بحق نورزان
رافي:(بعصبيه وخوف).... احجي يمعود شكالت؟
سيف: حجه غيث ألنا كل ألي صار...
، وهنا رافي من سمع الكلام تخبل ماانطاني حتى مجال انصدم ضل رايح راد
رافي: والله عرفت اكو شي وتوقعت يخص
نورزان هسه شلون ياترى شصار اهلها شنو سووا؟وهاي مرت عمي اااخ لو اشوفها هسه ألا اشرب من دمها وماارتوي
سيف: على كيفك قابل شيسوون ألها انته تعرف
ابو زيد شلون مدلل ابنه وبناته، اكيد ميسويلها
شي لتكبر الموضوع
رافي: مدللهم اي،،، بس نورزان ينتضر عليها الزله
ومتأكد وحاس راح يسويلها شي...امشي نروح على ابويه ونروحلهم نفهمهم الحقيقه ليسوولها شي
سيف: رجعنا للبيت ورافي ماقصر عاتب الوالد ومخله حجايه ماحجاها على بيت عمي...
ابويه بصعوبه قنعنا حتى نروح لبيت ابو زيد
رافي: براء، تعالي اتصلي على البنات خلي نشوف شنو الوضع قبل منروح
اتصلت براء وبعدها كالت ...
براء: خالو اتصلت كذا مره وطلع مغلق
رافي: مثل ماتوقعت، لعد امشي ويانا فوتي شوفي
شنو الأخبار لحد ما احنا نحجي ويا ابو زيد
سيف: اخذنا الوالد ورحنا لبيت ابو زيد سلمنا وكعدنا وبراء مباشرتا دخلت جوه
ابو زيد: الله بالخير
ابو رافي: الله بالخير، يابه ابو زيد أحنا جينا لأن الضهر من اجيتوا ...صار سوء تفاهم سببه مرت اخويه ...واجينه نحجي بالموضوع ونفهمك ألي صار
ابو زيد: جيتك على عيني وراسي
رافي: عمي ألي سمعته كله تلفيق وما أله صحه
ابو زيد: يعني الولد ماحاجي هل الكلام، ومرت عمكم جاي تتبلى على بنتي؟
رافي: عمي مو هيج السالفه مرت عمي فاهمه غلط الولد من أنحصر بالزاويه وما لكه مخرج لفق هل الكلام
ابو زيد: وشعنده ويا نورزان يلفق عليها اذا موضوعه وياك؟ ترا ماكو دخان من غير نار
رافي: لا عمي ماتوقعت هل اللحجايه منك...
وحتى ترتاح راح اكلك كل الموضوع ألي ضميته
لأن مااريد احد يجيب طاري نورزان لأي سبب من الأسباب
سيف: رافي حجه كل ألي صار بالتفصيل وحتى شهدني على مضايقات امير لنورزان
لكن استغربت من طلع تصوير يوم الحادث
ألي ماأفتهمت من وين جابه
من شافه ابو زيد صدك الكلام وماعاد اكو شك
بس كال كلام ماريحنه
ابوزيد: سمعت ومابقى عندي شك واشكرك جزيل الشكر لأن وكفت ويا بنتي وحتى حاولت تحل المشكله بدون متذكر اسمها...بس ياابني الباب ألي يجيك منه الريح سده واستريح
رافي: شنو قصدك عمي وضحلي؟
ابو زيد: ألي صار يكفي ويوفي وحتى اذا راح امير
يجي غيره....واني رجال اطلع من الصبح يجيبني
الليل اركض على رزقي حتى اوفرلهم حياة
مريحه ....ماعندي وقت لأي شي ولا للمشاكل والقال والقلت لهذا من الافضل انو تكعد بالبيت وماعاد اكو داعي للدوام
رافي: لا عمي الله يخليك هذا مستقبلها
وحياتها وسنين التعب ادري تكعد بالبيت شتسوي؟
ابو زيد: حالها حال هوايه بنات وأصلا هوايه جايها
خطابه بس نشوف المناسب نزوجها
سيف: اني اسمع كلامه واتكرضم، روحي طلعت
واباوع على رافي حتى وجه غده دم واوردت ايده من العصبيه برزت كلت راح ينفجر هسه على ابو زيد،،، حجه ابويه ويا حاولنا كلنا ماكو فائده قافل
ترخصنا وكمنا لأن تأخر الوقت...رجعنا ورافي اذا انطخه يمكن ينفجر اني ورافي ضلينه برا بالحديقه
رافي: تعالي براء فهمينا شكالت نورزان شلونها وشنو وضعها؟
براءارتبكت وصارت تلعثم بالكلام
براء: ماكالت شي بس ضايجه من الصار
عاط بيها رافي...
رافي؛ شنو زعطوط كدامج وتضحكين علي بهل كلمتين وأنتي اصلا تريدين تسفطيهن ماجاي يترتبن
سيف: على كيفك على ألبنيه يمعود شجاك اهدأ
رافي: براء احجي الحقيقه وألا انسي عندج خال اسمه رافي
براء: خالو والله مترضه نورزان حلفتني مااكول شي
رافي: شوفي بدا صبري يخلص اني ادفع كفاره بس فضيني لأن بدت اعصابي تفرط
سيف: يمعود رافي اول تالي انت اعصابك هيج تصير هاي عود انت الهادىء
رافي: انت اسكت لا اطلع ضيم گلبي بيك
سيف: عمي سكتنا
براء: خلص راح احجي عفيه بس لتتعصب وتصيح
رافي: فضيني، مو راح اروح لبيتهم واعرف
براء: خالو نورزان راح يبطلوها من الدوام
رافي: اي وبعد
براء: و. و بعد هم ابوها ضاربها وجها مزرگ وحلكها مجروح ...وحرم عليها طلعت البيت...
وقرر يزوجها.بأسرع وقت
رافي: ان*ل ابو لابو حتى امير، الله يكسر ايده على هل العمله
سيف: ولك رافي انتبه لألفاضك ألي جاي تحجي عليه بكد ابوك من شوكت صرت متحترم
رافي: عبالي ادمي مو يستقوي على بنته
سيف: الله كريم صدكني هسه اعصابه تعبانه فتره
ويهده وينحل الموضوع
رافي: شلون اذا ماغير رأيه شلون اذا سواها صدك وزوجها
سيف: براء هاي هيه سعيكم مشكور طبي جوه عندي كلام ويا خالج
براء: تمام، اصلا اليوم طيحتو حضي وخلو أبالكم
زعلت منكم يله باي
سيف: رافي انت وين تريد توصل من الاخر
رافي: شنو قصدك؟
سيف: تعرف شنو قصدي، انت ضايج لأن راح يبطلها لو لأن يريد يزوجها؟
رافي: وشنو الفرق؟ وشنو تلميحاتك ألي صار فتره، تلمح بيها؟
سيف: مو تلميحات راح اكولها، طك بطك
انت تحب نورزان مو؟
من كلت هل كلام اكلني بنضراته جاوبني بعصبيه
رافي:انته مين جايب هل الكلام؟وشلون هيج تكول ؟
سيف: مو اني ألي اكول أنته ألي كلت هيج
من جنت بالبنج هذا كلامك
رافي: انت تحجي صدك!!؟ ليش شكلت بالبنج اني
ومنو بعد سمعني؟
سيف: لتخاف بس اني سمعت...قبل كان عندي شك اتجاهك ...ومن صار الحادث اكدتلي شكوكي.
من كتله هل كلام ارتبك وتوتر
رافي: ماكو هيج شي انته فاهم الموضوع غلط
ولتنسى نورزان اني مربيها وتصيحلي عمو
وبعد لتحجي هل الكلام، ليسمعك احد
سيف: ميحتاج احد يسمعني ترا كلها شاكه...
انت مامنتبه لنفسك شلون شكلك يصير من تشوفها..بس لا عبالك مرت عمي وبناتها شادات وياها بالمعنى بالصدفه ...لا اصلا حتى لمحن للموضوع كذا مره
رافي: سيف هذا الموضوع سده وألي بالك ما أله وجود
سيف: يعني عادي هسه اذا تزوجت؟
اني كلت هل الكلام لو صار بارود جاوبني بعصبيه
رافي شنو تتزوج بعدها صغيره وتدرس ...
لاعبالك راح اسكت اذا راد ابوها يجبرها.
سيف: راح يصير ٢١عمرها يعني مو صغيره
وابوها اذا راد يسويها مينتضر احد وأحنا ماعدنا سلطه عليها ولا علي
رافي:انته ليش مصر اليوم تغثني وتشوطني
ترا ألي بيه كافيني
سيف: لا اغثك ولا هم يحزنون اني بس اريد
افهمك مشاعرك ألي انته نفسك مامقتنع بيها
وتحاول تداريها....يااخي لو تقتنع بمشاعرك وتواجه الدنيا علمودها وميهمك احد...
يااما تدفن مشاعرك وترجع كما كنت عمها ألي رباها وبس ...وانته بعد بكيفك ...
يله تصبح على خير.