رواية بحر النسيان الفصل الخامس 5 بقلم ميمي علي

رواية بحر النسيان الفصل الخامس 5 بقلم ميمي علي

اريام زادت نبضات قلبها وبفضول قالت : عـادي !
مالك دخن وصغّر عيونه وقال : خليها يـوم تاني
اريام : علاش تجري بيا ؟
مالك ضحك : ما نجريش بيك ، خلي نتعرف عليها اني قبل
اريام رفعت حواجبها وقالت : هذا كله قاعد ما تعرفتش عليها ؟
مالك : حالياً قاعد نتعرف
اريام : باه يا سيدي براحتك
سكت مالك فـ قالت هي بإنزعاج : تصبح ع خير
مالك : تلاقي الخير
سكرت اريام الخط وهي تفكر في كلام مالك وقصده وتلميحاته
اما هو خـش للحوش وين مالقي امه مقعمزة تظفر في شعر اخته عائشة فـ ابتسمت وقالتله : شن شكلي بنجيب كنة
ابتسم مالك بإستهزاء وقال : وين بنسكنها في اسطبل الخيل اماله ؟!
زالت ابتسامة امه وناضت اخته ذات الـ 12 العام واتجهت للتلفزيون المربع القديم وقعمزت قدامه بإنسجام
شافتله امه وقالت : قتلك خليني نخدم نعاونك انت ماتبيش ، اني مقعمزة مقعمزة ياوليدي النهار كله فاضية وانت قريب تتقطع من الخدمة
قعمز جنبها مالك ع الفراش المتواضع وشافلها وقال : مايكتبهاش عليا ربي تخدمي واني حي
امه : حزارة بوك الله يرحمه
مالك تلفت للتلفزيون يلي كان ع الرسوم وقال: الله يرحمه
امه حطت ايدها ع ركبته وشافتله بحنان وقالت : اني نبي نفرح بيك ونشوف صغارك يا ولدي مزالك سنتين ع التلاتين
مالك شافلها وقال بجدية : يما ستين مرة قتلك انتم امي واختي ويالا ملحق علي مصروفكم تبيني نجيب مرا وبعد وقت تبي حق مراجعات مصحة ومرات عملية وبعدها صغار وشمالات وحليب وحوايج ومسؤولية صعـب صعب هلبا
رجع شاف للتلفزيون ، فـ نحت امه خراصات الذهب من وذانها وجبدتله ايده وحطتهم فيها وقالت : ما تردهمش عليا ، برا شوف كم يجيبولك واجر بيهم ولا خلص بيهم دين السيارة ولا دير اي راي
شاف مالك بإستغراب للخراصات الذهب ورجع شاف لـ امه وقاللها : يما خيرك مزال صغير والدنيا قدامي حسستيني وصلت لـ الاربعين
امه بحنية : لاحظتك قداش ليك متغير وتليفوناتك كاثرات ، عرفت انك لقيت بنت الحلال وحبيتها ، وكان قعدت هكي مش ح تلحق تخطبها وخايفة يخطبوها وتقعد تندب في حظك
سكت مالك ولبس امه خراصها وباش يطمنها قال : مـزال صغيرة حتى هي ، اماليها مش ح يعطوها توا
ومدلها الخرصة التانية وقال : ربي يطول في عمرك وتشوفي صغار صغارنا
في هذاكا الوقت كانت اريام مقعمزة ع زيانتها وفاتحة قجرها ومطلعة الوشاح الحرير امتع مالك وتجرب فيه ، وبعد محاولات عديدة انها تضبطته فشلت فـ قررت تستعين باليوتيوب ، وقطع ع كتابتها في مربع البحث اتصال سيرين يلي استغربت منه اريام وردت : الو
سيرين : اهلين اريام
اريام : شن الاخبار
سيرين : تمام كيف حالك انتِ ؟
اريام : الحمدالله كيف حال العيلة والبيبي وعبدو
سيرين : كويسين ، انتِ شن مدايرة بديتي خدمة ولا مزال ؟
اريام : لا والله مزال بابا معاش فضي بيا واني ما كلمتاش لأن قاعد مخاطريش نداوم الحق
سيرين : باهي يا ستي فرصة معناها ، غدوا تعالي انتِ وجنات هدرزو
اريام : امتى العشية ؟
سيرين : امتى ما يناسبكم صبح عشية ليل امتى ما تبو
اريام : خليها عشية وخلاص
سيرين : اوك تمام خلاص ، تقدري تتصلي بجنات غر اني ماعنديش رصيد وهي تعرفيها دوتها هلبا
اريام : اوك خلاص تو نكلمها ، سلامات
سيرين : تمام نتلاقو سلامات
سكرت اريام الخـط واتصلت بـ جنات يلي ردت في اخر رنة
جنات : الو
اريام : جنات اتصلت بيا سيرين توا وقالتلي باش تجي انتِ وجنات العشية تهدرزو
حنات : لاااا مانقدرش غدوا العشية بالذات
اريام : علاش ؟
جنات : بنتلاقا اني ورواد !
اريام : هذا يلي تعرفتي عليه في الانستا انشالله ؟
جنات : اي
اريام : قاعدة اديري فيه جو الفروخ هذا ؟!
جنات : اسكتي الولد شاريني
اريام : سجلي عندك الخازوق رقم واحد وعشرين
جنات بعتاب : خيرك هكي علاش تفاولي اريام ؟ اني متفائلة
اريام : اها اوك تو نشوفو جماعة النت بالذات ما تحاوليش تبني عليهم اساس لأنهم وهم
جنات بجدية : لا مش وهـم ليا ستة شهور نعرفه ونهدرزو يومياً ع التليفون وضايفاته حتى ع السناب والفيس والولد قنين ومعبي عريس لقطة يعني
اريام : اها زبطهم جماعة السيارات الفارهة والعضلات والدماغ مجوف
جنات : لالا عينك الولد رزين وعاقل
اريام : واضح رزين هلبا لدرجة مسميك ام ميدو وهو قاعد مشافكش ، يلا المهم حظ موفق وانشالله تشد
جنات : انشالله يارب
اريام : طمنيني غدوا شن يصير معاك
جنات : من غير ما توصي !
اريام : سلامات
جنات : باي.
وفات الوقت وفات اليوم اما ثاني يوم ، في احدى المقاهي وين ماكان مقعمز رواد الوسيم ع الطاولة ويشبح لساعته الماركة ويتستنى في جنات ، فرغ صبره وشد هاتفه واتصل بيها ، كان هداكا الوقت جنات كيف درست سيارتها قدام الكافي وطلعت مراية البودرة من الشنطة حتى تتأكد من مكياجها
رن هاتفها فـ ابتسم لما قرت اسمه وردت : ها حبيبي ؟
رواد بإنزعاج : وينك ليا ساعة الا ربع نراجي فيك !؟
جنات نزلت من السيارة : كيف خشيت اهو
رواد شاف للباب المرش وقال : شن لابسة ؟
جنات شافت لـ لبستها وقالت : سورية بيج ووشاح عنابي
وفعلاً شافها رواد وقال : اوك تمام شفتك
سكر الخط وساوا من هندامه لن وقفت عليه هي وقالت بسعادة : رواااد !
شافلها رواد وزالت ابتسامتها لما لقاها مش زي ما متوقع وقال بمجاملة : اهلين
سلمت عليه جنات وقعمزت وهو متفاجأ وقالت : واخيراً شفتك ، شكلك ع الواقع احلا من الصور عندك علم ؟
رواد بجفاف : عندي علم !
جنات عقدت حواجبها : خيرك ؟
رواد : قتلك تعالي من غير مكياج شن مزوقتيلي وجهك وجاية ؟
جنات انصدمت من اسلوبه وقالت : مكياجي خفيف !
رواد : هذا خفيف اماله كان تقيل كيف ؟ تي انتِ حتى الظلال مدايرتيهم
جنات : مش مدايرة
رواد : وديني مدايرة لون بيج ع اساس طبيعي وما يبانش لكن نزبط مش متكركب من البدو !
جنات : باهي اي مدايرة شن المشكلة يعني ؟
رواد بإندفاع : المشكلة انكم تحبو تغشو البنادم امنية حياتي نتلاقا مع بنت ما تحط في شي ع خليقتها هكي تغسل وجهها وتطلع وحق الله كان لقيتها لما نخطبها من ثاني يوم لكن شكلي مش ح نلقاها ، وراجي انتِ قلتيلي ان طولك 169 طلعتي شبر ونص تي كان نوقف جنبك توصلي لـ صرتي منظرنا زي رقم 10 لالا ما يمشيش الوضع هكي سامحيني ، وبعدين مش ع اساس عيونك عسليات ؟ كيف بنزبطهم وانتِ لابسة عدسات زيتونيات ؟ وسنونك في الصور يبانو ناصعات البياض خيرهم لونهم عادي هكي ؟ عندك حبة في ذقنك حتى مدايرة عليها الستوك باينة واني يلي نسحاب بشرتك حليب طلع فلتر كله
تعبو عيون جنات بالدموع من كلامه القاسي والغير المتوقع وقالت : انت حبيت شكلي ولا روحي ؟ ً
رواد بقسوة : كيف تبيني نحب روحك الكذابة ؟
جنات وعيونها يلمعو : ما كذبتش عليك في شي درت لمسات في وجهي زيني زي اي بتتلاقا مع حبيبها لـ اول مـرة بس !
رواد وهو يعد ع صوابعه : رموش ، عدسات ، شعر نصه ع الشارع مجبود ومصبوغ ، روج ، بودرة ، احمر خدود ، ظلال ، تي مكياج عروس هذا مش لمسات ، لالا ياودي شكله كمين سامحيني امسحي رقمي وانسيني ، ووقف وخدي هاتفه من ع الطاولة وطـلع ، فـ انهارت هي وحطت يديها ع وجهها وبدت تبكي ، لاحظوها الناس فـ ناضت من ع الطاولة وطلعت من المكان بـ قلب مكسور ومتحطم ، ركبت سيارتها واتصلت بـ اريام وهي تبكي
ردت اريام المقعمزة مع سيرين وقالت : الو
جنات وهي تبكي : اريااام
اريام تفاجأت : خيرك شن فيه
جنات : قاعدة انتِ في حوش سيرين ؟
اريام بخوف : ايه خير مصيبتك تبكي ؟!
جنات : تو نجيكم
اريام : غر خيرك !
جنات : نجي ونهدرزو
وسكرت الخط وولعت سيارتها وطلعت وهي تبكي بحرقة
وصلت للحوش فً فتحتها سيرين وخشت وهي حزينة ومكسورة
سلمت بحزن ع اريام وشافتلها بإستغراب : خير مصيبتك رغشتينا !
جنات يحزن : تلاقيت اني ورواد
قعمزت جنبها سيرين وقالت : شن صار ؟
جنات : ما خلا ما قالي يا بنات ، اني انصدمت ، تخيلو من اول ما خشيت وشافني كان مبتسم لما شافني تدريجياً تحولت ابتسامته لـ عصبية ، قالي انتِ غشيتيني وتوقعتك اطول
ضحكت سيرين وقالت : بجديات هكي قال ؟
شافلتها جنات بحزن وهزت راسها بالايجاب وقالت : تخيلي
اريام مسحت ع زناد صاحبتها بحنية وقالت : الخازوق رقم واحد وعشرين
سيرين : نسحابه التسعطاش !
اريام شافت لسيرين : لا فيه زوز خوازيق صارو بسرعة انتِ ماعندكش بيهم علم الباين !
جنات لمعو عيونها وقالت : خاطري نلقا حـد يحبني لـ شخصيتي لـ روحي لاني اني جنات ، مش ع خاطر اني حلوة ولا جسمي فتنس ولا ع خاطر انيقة
شافت لـ اريام وقالت : خاطري نلقا حد يخاف عليا، ينصحني، يساندني ، لكن شكلي ح نموت قبل ما نلقاه هالشخص !
خطر ع بال اريام مالك لما كلمها ع لبسها وهدالها حجاب ، يمكن فعلاً هو يحبها
شافت سيرين بشفقة ع حال جنات وقالت : خلاص جوجو معاش تزعلي روحك اكيد ربي ح يبعتلك هالشخص لكن في الوقت المناسب مش توا !
اريام شافت لجنات وقالت : جنات سامحيني بس انتِ بروحك تحكيلنا اكثر من مرة يبعتولك ولاد ناس وتردي فيهم بس ع خاطر حالتهم المادية وسياراتهم وشكلهم ، ربي ما يعطيش كل شي ، انتِ تبيه قنين وعضلات وسيارة فخمة وخريج وولد حسب ونسب ويحبك ويخاف عليك وطبعه حنين ومش متاع بنات تي وين هذا مكانش تصمميه وتخيطيه في التارزي !
ابتسمت جنات ومسحت دمعتها ع وشك السقوط من حافة عينها وقالت : خلاص تعرفو اني معاش بندير اي مواضيع ، يلي يبيني يجيني من الباب
سيرين ابتسمت : ايواه هكي نبيك زي صاحبتك
جنات شافت لـ اريام بحزن وقالت : سعدودك افتكيتي من سريبهم
ابتسمت اريام بـ مجاملة فـ قالت سيرين : سيورها وادير سريب حتى هي !
اريام شافت لـ جنات وسيرين ع التوالي وقالت : مش ح ندير سريب لأني مرتاحة هكي
سيرين تنهدت وقالت : لو كنت مكانك كنت ح ندير زيك ، حتى ني عبدو موترلي اعصابي هالفترة
شافو اريام وجنات لبعض ورجعو شافولها فـ قالت جنات : خيره ؟
سيرين : نحس فيه عنده موضوع ، تليفونه ديمة صامت ، وديمة ينوض نص الليل ويطلع للبلاكونة ويعطل كأنه يهدرز ، الحق هو اسلوبه عادي معاي مش متغير لكن تصرفاته بشكل عام مولية غريبه !
جنات : اصلاً عبدالله من يومه نسونجي ، تتفكري في ايام الكلية ؟
سيرين نزلت راسها بحزن وقالت : حسبت روحي ح نقدر نغيره
اريام : الطبع يغلب التطبع
سيرين شافت لصاحباتها : يا بنات مش متخيلاته يخون فيا والله نموت ، قبل ايام الخطوبة كبسته مرة يهدرز والله نار ولعت في قلبي وكنت بنفسخ مع انه حلفلي انها مجرد نزوة ومعاش ح يعاودها ، مبالكم توا ولده في الطريق وهو يهدرز عار اللقطة راه
إريام بتردد : باه لو قدر الله كبستيه مداير علاقة مرة ثانية ! كيف ح تتصرفي ؟
سيرين بحزن : نجيب ونطلق منه ، اني مش من النوعية النسوان يلي يتحملو
جنات : سيرين كلنا نعرفو عبدالله قداش يحبك ، حتى لو يهدرز عادي هلبا رجالة متزوجين ويهدرزو ومدايرين علاقات يفوتو بيها في الكساد
سيرين : ذكور يقصدك ! لأن الراجل الحقاني عمره ما يخون مرته ولا يشوف لـ غيرها
سكتو جنات واريام فـ قالت سيرين بعد ثواني : قولولي توا !؟ كيف نتأكد انه يخون فيا او لا ؟
اريام : فتشي تليفونه
جنات : تخيلي يطلع مداير تليفون تاني يهدرز بيه !
سيرين : اي نتوقع مداير واحد تاني
اريام : مافيش طريقة امـاله الا انك تكبسيه لما ينوض في نـص الليل يهدرز
سيرين : هذا هو ، الليلة ح نطلع وراه ونسمعه شن يهدرز
فـات الوقت وروحو البنات وفـات اليوم
وفي الليل متأخـر بعد ما تعشو كلهم واتجهو لـ غُرف نومهم ، كانت إريام مقعمزة ع لاب توبها وتكتب في خانة القوقل بـ حماس " كيف أعرف ان الشـاب يحبني ؟ "
وضغطت ع زر الانتر وهي متشوقـة تشوف أعراض الحُب عند الشباب كيف تكون ، وبينما كانت هـي تحـاول تكتشف مشاعر مالك اتجاهها هل حُـب او اعجاب او مجرد تعلق !
كانت سيرين هداكا الوقـت في سريرها ، تقلبت لجهه زوجها وبسبب الظلام مدت ايدها لـ جهة زوجها لما حست انه ناض وفعلاً لقاته مهناش ، نحت الورغان من عليها وقعمزت بصعوبة بسبب بطنها وظهرها ، لبست شبشبها الموبر ووقفت واتجهت للبلاكونة يلي كانت شبه مسكرة ، شافت زوجها من المرش كـ عادة واقف ومتكي ع الحديد وهو يضحك وشاد التليفون ، عقدت سيرين حواجبها استغراباً وانزعاجاً ونبضات قلبها زادت خوفاً أن يتحول شكها لـ يقين ويطلع يخون فيها
فتحت الباب ببطىء وحـذر ، اتجهتله بخطوات بطيئة وهي تسمع فيه يقول : والله مصارت يا عمري تي اني نفوت العالم كله ولا نفوتك
تعـبو عيون سيرين بالدموع وهي تشوف في حبها الوحيد يخون فيها ويتغزل في بنت غيرها مع انها قاعدة في ثاني سنة زواج ، وقفت وراه بالزبط ، ماحسش هو بيها وكمل تهدريزه وهو يقول : قتلك ما رديتش ع خاطر كانت جنبي .............لا أكيد انتِ أهم لكن مانبيش انديرها يعينها ونطلـع عافن قدام الناس تشهدر بيا بعدين !
يتبع .

السادس من هنا

تعديل المقال