رواية كبرياء ابنة الخادمة الفصل الثالث 3 بقلم سحر السحرتي

رواية كبرياء ابنة الخادمة الفصل الثالث 3 بقلم سحر السحرتي

كبرياء ابنة الخادمة

حلقة ٣

*ثاني يوم قدام باب المدرسه كانوا نازلين من الباص .... شافوني كنت لابسه ترنج و مسيبه شعري .... اول ما نزلوا لميت شعري ديل حصان و شمرت كم الترنج استعداد للخناقه

*هم حسوا .... حاولوا يلموا الدور وسلموا عليا صافي البنت اللي كانت مستقصده هنا

: ازيك يا حلا خساره مشيتي من هنا مفتقدينك

:ما انا جيت لما حسيت اني وحشتكم

:طب ايه رايك نتقابل ونخرج سوا بعيد عن المدرسه

:افهم من كده ان دي معاهده سلام .... وانا موافقه بس عارفه اني مش هخرج لوحدي معايا هنا

:اكيد يلا يا هنا ندخل الطابور هيبدا

: ادخلي يا هنا وانا هروح ولو احتجتي حاجه كلميني مينت و هكون عندك ....خلي بالك منها يا صافي اوعي حد يزعلها

*بصيت لها بحده :انت عارفه زعل هنا من زعلي وانا زعلي وحش قوي سلام

*ومشيت حسيت ان البادي جارد بتاع هنا احساس لطيف اني بدافع عن حد خصوصا لو كانت اختي ..... يا خبر احسن شاهنده هانم تسمع افكاري وتقول لي انسي انها اختك

بقلمي سحر السحرتي

*اتقابلنا وخرجنا .... بابا اداني فلوس عشان احاسب زيي زيهم وما يبانش ان هنا هي اللي بتصرف عليا رفضت لان لسه معايا فلوس من شغلي على طرابيزه البنج محوشاهم ومحافظه عليهم .... لكن هو اصر

*الخروجه كانت حلوه مع البنات و اتصالحوا مع هنا وهي اندمجت معاهم .... وهم حبوني قوي لاني كنت بخليهم يعملوا حاجات مجنونه مش متعودين عليها ..... وكل خروجنا بيكون ضحك

*المدرسه عندي اعلنت عن مسابقه رياضيه في تنس الطاوله قلت اشترك ليه لا ما انا كنت مقطعه العيال في الحاره هيحصل ايه يعني وقد كان

*تفتكروا ايه كسبت ولا خسرت

*اكيد كسبت ما انا قرده زي ما خالتي بتناديني او عفريته زي ولادها ما بيقولوا وطلعت الاولى على المدرسه والثانيه على الجمهوريه في تنس الطاولة

*شوشو مرات ابويا تسكت ابدا .... مش عارفه هي حاسه اني بنت ضرتها ولا ده طبعها

*اشتركت لهنا في لعبه بنت الناس الاغنياء تنس ارضي لان تنس الطاوله بتاعه اولاد الحواري زي ما قالت لهنا

*اتبسطت هنا فعلا وبقينا نواظب على مواعيد التمرين في النادي ليها

*شافني كابتن تنس الطاوله و اتعرف عليا واقترح اني انضم لفريق النادي لما عرف اني محترفه ما فيش حد بيدربني

*يا حظك يا مرات ابويا ده ممكن تولع فيا

*رفضت طبعا لاني عارفه حجم المشاكل اللي هقع فيها لكن المدرب عمل شملول وكلم محمد بيه بما اني يتيمه وهو بيتولى رعايتي

*اللي افترضته حصل ومدام شاهي خسفت بكرامتي الارض لان اكيد شجعت المدرب ... طبعا اللي وقف معايا هو سامح اللي كلمها بهدوء و اقنعها ان لي فضل على هنا في تحسن نفسيتها وتركيزها غير انها صحيا بقت احسن لان نفسها اتفتحت وبقت تاكل بشهيه

: وما تنسيش يا ماما ان البنات اللي كانوا بياذوا هنا بقوا اصدقاء ليها وده اللي ما قدرناش نعمله طول سنين المرحلة الابتدائية ... لكن حلا قدرت فمش كثير عليها تلعب مع هنا في نفس النادي لعبه مختلفه ومش هتكلفنا حاجه لانها بتروح معاها والمدرب اشركها مجانا

: بس يا سامح دي بنت الداده المفروض تتعامل على ده الاساس .... انما بتاكل وتشرب وتلبس زيها زي اختك

:يا ماما احنا كان ممكن نصرف اكتر من كده على الدكاتره النفسيين و مكانوش هيعملوا نفس النتيجه .... وانت متاكده من كده

:خلاص يا سامح عشان خاطرك بس بلاش تدخل لها تاني لازم تحس انها مش مننا و مقامها غير مقامنا

: يا ماما هي عارفه حدودها كويس وعمري ما حسيت انها طلبت حاجه ..... كمان لما بتخرج مع هنا بتدفع ثمن طلباتها و بتطلب ارخص شيء .... يعني مش عايشه عيشتنا

:مين قال لك

:انا كنت بتكلم مع هنا ولما بتكون الخروجه هتبقى اعلى من مصاريفها بتعتذر وياما عرضت عليها فلوس انا وهنا كانت بترفض

: كويس انها عارفه انها مش قد مصاريف ولاد الناس

*ولاد الناس هي حاسة اني بنت الكائنات الفضائيه

بقلمي سحر السحرتي

*وافقت بأعجوبة وده كان اول لقاء بيني وبين حب طفولتي ومراهقتي ادم

*ادم من سني بيلعب نفس لعبتي .... لكن للاسف مش بيسمع لكن بيقرا حركه الشفايف

*اول لقاء بينا اتصدمت فيه وانا داخله صاله التمرين وللاسف ما اعتذرش

*اظن حفظتوني اسكت

:مش تفتح انت يا اعمى ..... ما تقول حاجه هي القطه اكلت لسانك

*شاور لي بايده انه اسف فهمتها واعتذرت وانا زي فرده الجزمه اني شتمته و زعقت له

*خلال اسبوع كنت متعلمه لغه الاشاره كان فرحان وسعيد لان زمايلنا في التمرين ما حدش كلف نفسه يتعلم كلمه واحده عشانه ...... وكان بيضطر يكتب لهم هو عايز ايه بقينا اصحاب و بنتكلم كثير في التليفون رسائل طبعا

*مامته كانت مهتمه بيه جدا اكثر من اخواته بسبب حالته فرحت جدا انه لقى حد يصاحبه

*كنت بستنى يوم التمرين عشان نلعب مع بعض أو ضد بعض لاننا اوقات كنا بنلعب رباعي

*مرت الايام والسنين وبقيت في تانيه ثانوي و مشاركتي في اي بطوله داخل الجمهوريه فقط لان شوشو هانم رفضت اني اشارك في اي بطوله دوليه ما هو مش معقول بنت الداده تسافر دول مش من مستواها .... ما زعلتش قلت عادي هو انا كنت اطول العب في نادي كبير دى انا كنت بلعب في الحارة على طرابيزة عم سيد ورضيت ... لكن ربنا عوضني ادم بعدين اعترف لي بحبه ووعدني ان بعد الثانويه هيتقدم رسمي ويطلب ايدي ... وطلب مني اجتهد واجيب مجموع كبير عشان ندخل كليه مع بعض ..... هو حلم حياته يبقى مهندس وانا كان حلم حياتي ابقى دكتوره او صيدلانيه لاني بقيت اعمل تركيبات من مواد طبيعيه للبشره والجسم غير العطور اللي ريحتها تجنن و ابيعها لاصحاب هنا

*هما اه بقوا اصحابي انا كمان وصافي بتحب تفضفض معايا اكثر واحده بس بحس ان في فجوه بينا لانهم ما يعرفوش اني بنت الدادة .... ويوم ما يعرفوا هيبقى التعامل مختلف

*في يوم دخلت على سامح في غرفته

: سامح بيه فاضي ممكن اتكلم معاك شويه

: وانا مش قلت لك اسمي سامح بس

:ما ينفعش مدام شاهي ممكن تسحلني

: هههههه ايه تسحلك دي

: ما تدقش

:طب خليها سامح بيني وبينك خير

: عايزه اسافر مع خالتي المصيف و خايفه اطلب من مدام شاهي

: رايحين فين هما

: راس البر

:راس البر طب ما احنا بنروح الساحل و بناخدك معانا احلى و انضف

:عايز الصراحه مش بتبسط

:ليه ده مصيف راقي

:عشان كده عشان فقرية بحب اروح معاهم بركب عجل و اتسابق مع اولاد خالتي و بنركب مركب و بندخل سينما صيفي الهوا يلفحنا واحنا قاعدين

: هههههه كل ده احلى من البيتش باجي وبنانا بوت

: اه احلى بالنسبه لي لانها عيشتي ممكن تجيب لي الاذن

:حاضر من عيني بس كده ايه رايك اجي معاكي انا وهنا وتفسحينا زي ما حكيتي

: مش هينفع لان الشقه اللي خالتي اجرتها صغيره

:لا ما في هناك فنادق و نحجز احنا فيها و عازم خالتك بس مش هنقول اننا رايحين معاها هقول عندي شغل هناك و هاخذكم تغيروا جو احنا مش قد زعل مدام شاهي هههههه

بقلمي سحر السحرتي

*فعلا اتبسطوا قوي معايا ومن الخروجات البسيطه .... و اصر سامح انه يتكفل بكل مصاريف المصيف ليا و لخالتي

*هنا ما اتبسطتش قوي لانها كانت بدات تتغير وتعيش زي صافي واصحابها ... وانا بدات ابعد عنهم واكتفيت بادم وحبه

*بعد ما رجعت وادم شاف الصور اتخانق معايا كله بالاشاره فما حدش في التمرين كان فاهم حاجه

: ازاي تتصوري كده مع اولاد خالتك

:مالها الصور

: انت مش شايفه واحد منهم شايلك على ظهره

:وفيها ايه يعني كنا بنلعب وخطف الكوره جريت عشان اخدها وطلعت على ظهره

:انت مش شايفه انه عيب

: لا طبعا وانت زعلان قوي كده ليه

:لاني بحبك وبغير عليك

*ودي كانت اول مره يعترف بحبه ليا وكنت مبسوطه قوي لكن مشي و سابني .... قبل ما يعرف مني انه مش بس ابن خالتي وكمان اخويا في الرضاعه

*حاولت اكلمه كثير رفض يرد علي بعثت له رساله و وضحت فيها انه اخويا واعتذرت اني مش هقدر اكلمه ثاني لانه رفض يسمعني وعملت له بلوك

*قرا الرساله و اتجنن انه ظلمني و استنى ميعاد التمرين لقيته جايب ورد يصالحني بيه ... قبلته وكنت مبسوطه قوي

*هنا شافت الورد و شافت ادم واهتمامه غيرت معاملتها معايا ما قدرتش افسر هي غيره ولا مستكتراه عليا

*بدات ثانويه عامه شوشو هانم اتكلمت مع هنا بعد ما لاحظت معاملتها الجافة

: حبيبتي انت لسه محتاجه حلا تبقى معاكي

: ليه يا مامي

:اصلك داخله على ثانويه عامه ومحتاجه تركيز فبقول ترجع تعيش عند خالتها ايه رايك

:اللي تشوفيه يا مامي انا خلاص بقى عندي اصحاب ومش محتاجه بنت الداده في شيء

*نزلت دموعي لان هنا اعتبرتني بنت الداده مش صديقه او اخت

*اللي زعلني أكثر ان شاهنده كانت متعمده تتكلم مع هنا جنب الملحق وتعلي صوتها

*سامح عاتب والدته

:انت عارفه ان حلا لما ترجع عند خالتها مش هتعرف تذاكر وتجيب مجموع كويس .... وانت عارفه كمان ان حلمها تدخل طب

: مش مسؤوليتي اللي ناقص اولاد الخدامين يدخلوا طب و يبقوا دكاتره يكشفوا علينا هي كانت هنا لمهمه محدده وخلصت ... اقفل الموضوع لانك عارف لو زاد حلا مش هتمشي لوحدها

:قصدك ايه هتمشي دادة فاديه وتروح فين بعد العمر ده كله

:سامح انا قلت اللي عندي وانت عارف كلامي بيتنفذ

:حاضر يا ماما بس خليني اكلمها انا ممكن

:ماشي هدي لك الفرصه دي

الرابع من هنا

تعديل المقال