رواية حلال ام حرام الفصل الثاني 2 بقلم ايسو ابراهيم
زوجها راح لأخوها وزعقله وقال: أنت بتضحك على مراتي بكلمتين من بتوعك الخايبين دول وعشان عارف إنها طيبة عايزها تسيبلك حقك، اومال أنت راجل إزاي لما مش عارف تمشي أمور بيتك ورايح تشحت من أختك
بصله عابد بصدمة من كلامه وحق إيه اللي هياخده منها فقال: أنا مش فاهم حاجة؟
جابر بعصبية وزعيق: أنت كمان هتستعبط وتعملي نفسك مش عارف، خليني أصدقك وأقولك إن أختك عايزه تسيب حقها في البيت ليك
جابر بضيق: لا كلام تاني ولا تالت، ياريت تبعت لأختك حقها مش ناقص حاجة ولو رفضت ماتسمعش كلامها، لأن دا حقها وعيالها أحق بيه من عيالك احنا مش قاعدين بنوزع في جمعية للقريب والغريب، وياريت لو ميرنا ماتعرفش حاجة عن كلامنا دا
وسابه ومشي وهو واقف مكانه مصدوم من اللي سمعه وإنه قَل منه
بقلم إيسو إبراهيم
كانت زوجة عابد سامعة كل حاجة ودموعها نازلة بسبب الكلام اللي سمعته عن زوجها وظروفهم اللي هما فيها
طلعت طبطبت عليه وقالت: ماتزعلش وانسى كلامه رغم إنه صعب يتنسي بس عشانك وعشانا، أنت أحسن راجل شوفته في حياتي وعيالنا بيحبوك وشايفينك أحلى أب، ماتخليش كلامه يحسسك إنك قليل كفاية كفاحك وسعيك عشان تجيب لينا لقمة بالحلال وإن شاء الله ربنا هيفرجها علينا
رجع جابر لبيته وهو عنده أمل إن مراته هتاخد حقها حتى لو رفضت أخوها مش هيسمع كلامها عشان مش يبان إنه قليل قدامهم بعد لما سمعه الكلمتين بتوعه
دخل البيت لقى ميرنا قاعده بتقرأ وردها فقال: السلام عليكم
ردت السلام وقالت: أجهزلك العشا؟
جابر: أيوا
دخلت تجهزله العشا وهي بتدعي إن ربنا يهديه
حطتله الأكل وقعدت فقال وهو بياكل: اومال فين العيال؟
ميرنا: عند عمهم راحوا ياخدوا درس العربي معاهم زمانهم نازلين
جابر: ماشي، طب هاتي محفظتي من جوا عشان المستر ياخد فلوسه
راحت جابتها وطلع الفلوس وطلع عند أخوه بعد لما خلص أكل عشان يقعد معاه وبعدين يسأل المستر عن عياله ويعطيه فلوسه
عند ميرنا قررت تتصل على أخوها تطمن عليه وعلى زوجته وعياله
بعد لحظات لقت زوجة أخوها بترد عليها وهي بتعيط وبتقول: الحقيني يا أم رودي أخوكِ هيروح مني
اتصدمت من كلامها وقالت: في إيه اللي حصل ماسمعتش رد
شدت الاسدال ونادت على زوجها من عند أخوه ونزلت جري على بيت أخوها تشوف ماله وقلبها هيخرج من مكانه
طلع جابر من عند أخوه بخضة لما سمع صوت ميرنا وهي بتنادي عليه بعياط راح يبص لقاها مشيت
نزل بسرعة يشوف في إيه؟
