رواية خطأ بالخطأ كاملة وحصرية بقلم شيماء مشحوت
_مالك يا ريم، بتعيطي ليه؟ ردي عليا أرجوكِ.
= إتقدم ورفضته يا مي، عُمر جالي وأنا رفضته، آآه.
= مش قادرة قلبي هيوقف، عُمر حلم عُمري جالي، شوفت في عينه أحلامي بس دفنتها بإيدي، طلع بيحبني من زمان شوفتي بقا، كان مستنيني أخلص ويكون جهز، وجهز! ودفنت أحلامنا قبل ما تتبنى.
_ليه؟ ليه عملتي كده؟
=نسيتي بابا!
عايزاني أكون ماما تاني!
عايزاني أجيب نسخ زيي تاني وأسيبها تتبهدل وامشي؟
_ بس هو بيحبك.
= حتى ماما قالتلي إن بابا كان بيحبها، وكان راسملها أحلام كتيرة، وأدينا أهو
وهي بتتكلم سمعت صوت تكسير طلعت تجري لقت والدها بيضرب أختها الصغيرة بالحزام جريت عليه وهي بتحاول تبعد أختها عن إيده.
_أرجوك يا بابا خلاص، معلش سيبها، طب إضربني أنا مكانها بس هي هتموت كده.
زقها في الأرض ونزل عليها مع أختها بالحزام وهي بتحاول تبعد أختها ومعظم الضرب على جسمها هي.
جريت صاحبتها على السلم وهي بتفتح الباب وبتصرخ وتنادي الجيران ينقذوهم.
دخل اتنين وهما بيشدوه بعيد عنهم لحد ما قدرت تاخد أختها وتجري على الأوضة وتقفل الباب.
بعد ما مشيوا الناس دخل الأوضة وهو بيشدها هي وأختها وبيرميهم على السلم
_روحوا لخالكم بقا خليه يعدل التربية اللي أمكم معرفتش تربيها، وأنتِ وهي لو مش هتتعلموا تصرفوا على نفسكم مش عايز أشوف وشكم أنا مش هلاحق عليكم.
=بس يا بابا حضرتك عارف إني لسه في أولى جامعة وهي تالتة إعدادي مش هنلاقي شغل.
_ يبقا خليكم عنده.
خرجت وهي بتحاول تتسند على الحيطة وأختها في حضنها كأنها بتتمنى تبعدها عن كل العالم، أو تشيل عنها الأحزان؛ كأنها بتقولها خليكِ بخير، أنا هنا.
وصلت لبيت خالها اللي هي عارفة ومتأكدة مِن رد فعله وصدمتها مكنتش كبيرة لما قال.
_ أبوكم مش قادر يصرف عليكم بعتكم ليا؟
= معلش يا خالو، أنا هشتغل ونرجع بس شهد متعورة أوي عايزة نلحقها الأول.
_ سيبيها تستاهل كان حقه يموتها.
= ليه ؟هي عملت إيه علشان حضرتك تقول كده؟
_ إتفضلي إحكي لأختك يا محترمة
وكانت.. ......
