رواية عذاب الارواح الفصل السابع 7 بقلم هنا عادل
عذاب الارواح
الجزء السابع
رئيسة بقيت مش عارفة تسأل عن ايه الاول
واحدة ان عيالها اللى فى بطنها بقوا ملك ليهم
والتانية فريال منامتش مع جوزك
لكن لان رئيسة جوزها عندها اهم من عيالها اللى هى شايلاهم جواها
ولأنها مقتنعة انها عندها بدل العيل 8 لكن هو اللى فى حياتها راجل واحد بس
ومتجوزة راجل واحد بس
طبعا هو مش ده العادى ولا الطبيعي
بس الشخص لما يكون جاحد وانانى مبيشغلش نفسه غير بشهواته ورغباته وبس
رئيسة فاتحة عنيها على اخرها.جوزى منامش معاها
اومال مين اللى نام معاها يا ستنا
وليه قولتيلى كده
نجاح.محدش نام معاها
السحر الاسود اللى هى شربته صورلها اللى انا قولتهولك
لكن ولا حد دخل عليها
ولا حد كان على سريرها
ولا حد لمسها
واللى قولتهولك انتى مصبرتيش تفهميه
لسانك اشتغل قبل نفوخك
وسيبتك علشان اعرفك اللى بيغلط معايا جزائه بيكون ايه
رئيسة.يعنى انا جوزى مجاش جنبها
نجاح.بقولك ولا جوزك ولا غيره
ده شغلى انا
واللى عايزاها تشوفه وتحس بيه هتشوفه وتحس بيه
حتى لو محصلش ولا حتى فى بالها
بس خلى بالك يارئيسة
انتى جحودك خلاكي تسألى عن جوزك من غير ما تسألى يعنى ايه اللى فى بطنك بقوا ملك ليهم
رئيسة بتركيز.اااه يا ستنا
صحيح
انا ازاى مخدتش بالى من الكلمة دى
بس هقولك ايه بقى
اصل يعنى هو راجل واحد اللى حيلتى
ولا راح لغيرى
مين هياخدنى وانا ام لأورطة عيال
بس الا هو يعنى ايه بقوا ملك ليهم
نجاح.انتى ولية قادرة وجاحدة
الراجل عندك اهم من ضناكي
ماشى يا رئيسة
اللى فى بطنك روحين
عيلين
ودول بيكون لسه دمهم طاهر ونضيف
يعنى بيكونوا مطلوبين
لخدامنا
الاستحواذ على ارواحهم افضل من الاستحواذ على روح راجل ولا حرمة سنهم كبير
العيال شفافين
والجن محتاجين للأرواح دى
يعنى عيالك دول هيعيشوا فى بيتك لكن ارواحهم تخص اسيادنا
هما اللى هيتحكموا فيهم
رئيسة.مش فاهمة حاجة ياستنا
يعنى ايه ارواحهم هما اللى هيتحكموا فيهم
نجاح.هفهمك مع انك المفروض متفهميش
بس انتى عندك عيال
والجن عندهم عيال
وعلشان هما عايزين سلالتهم تكون عايشة فى وسطنا وبينفذوا المطلوب منهم بطرق خفية وعلنية
دايما بيدوروا على ان تكون ارواحهم موجودة فى اشخاص حوالينا
مش هيتشك فيهم
يعنى طفل صغير بيعيط
هتقولى مغص
هتقولى حاجة وجعاه
بيكلم نفسه
عادى هيتقال عيل صغير بيلاعب نفسه
لكن فى الحقيقة
بيكون بيتكلم مع الجن
او بيكون الجن بيمارس عليه طقس من طقوسه
وده اللى بيخليه يعيط
لكن علشان البنى ادم بيبقى سهل يشتكى او يحكى
يبقى سهل انه يروح يدور على العلاج
وده بيعطلنا عن اشغالنا
وانتى برغبتك ورضاكى
قبلتى تسلميهم لنا
وعاهدتى على ده
الارواح اللى معاكى فى البيت هتكون ارواح اسيادنا
لكن اجسام عيالك
رئيسة فاتحة عنيها على اخرها وبتسمع وحاسة انها مفهمتش اى حاجة.امين يا ستنا
اللى انتى شايفاه صح
بس قوليلى بقى اعمل ايه مع الواد ياسر
هو فاتحنى فى الجواز وانا رميتله كعب
بس لسه مقولتش مين اللى عليها العين
نجاح.ولا هتعملى حاجة سيدك اللى هيعمل
زى م فريال طلبت منك تتجوز
سيدنا هيخليه هو اللى يطلب يتجوزها هى بالذات
بكيفه ومزاجه
وعنيه كمان هتطلع عليها
بس انتى الليلة هتدخلى الحمام وهكتبلك ورقة تحرقيها فى الحمام وتخطى عليها 7 مرات فى الضلمة
واللى جاى بعد كده هتيجي تبوسى ايدي ورجلى عليه
رئيسة.انا هبوسها من دلوقتى
ده كفاية انك ساعدتينى كده من غير طلبات
نجاح استغربت من الكلمة.من غير طلبات
وارواح عيالك دى مش طلبات يا رئيسة
رئيسة بأستهانة.لا يا ستنا طلبات
بس انتى مصعبتهاش عليا
عيالى عايشين فى بيتى
كان ممكن يتولدوا ميتين
مين عارف
لكن انتى بتقولى هيبقوا معايا
يبقى ايه الصعب فى اللى طلبتيه بقى
مدام اقدر على تنفيذه
يبقى هين عليا
نجاح الدجالة المشعوذة كانت مستغربة جحود رئيسة على عيالها
بس اللى زى دى الشغل عليها بيكون اسهل بكتير
وطيت رئيسة على رجل نجاح اللى كانت مداها قصادها علشان تدلكها
وباستها وهى بتضحك ومبسوطة ان جوزها مجاش جنب فريال
ومسكت ايديها وباستها
وقامت وقفت.هتعوزى مني اى حاجة يا ستنا
نجاح.استنى اكتبلك الورقة
طلعت نجاح الورق اللى بتكتب عليه
وكتبت ايات قرأنية من الشمال لليمين
ومديت ايديها لرئيسة وهى بتقولها
اللى هتعمليه الليلة دى فى الحمام بالورقة دى يا رئيسة
هو طلب منك لملوكنا انهم يقبلوا ارواح اللى فى بطنك
ولما يجيلى ردهم على طلبك ده
هيبقى فيه حاجات تانيه هتنفذيها
والليلة دى ياسر هييجى يقولك انه عايز فريال
مديت رئيسة ايديها واخدت الورقة وهى بتبوسها
ونجاح الدجالة عنيها هتطلع من مكانها على الفجر اللى فى رئيسة
رئيسة.تسلم ايديكى ياستنا
انا هرجع بقى على البيت
انا من الصبح وانا فى الشارع
نجاح مرديتش لكن شاورت براسها لرئيسة على الباب اللى اتفتح من قبل ما تمشى ناحيته
رئيسة خرجت وهى فرحانة
كل حاجة هى عايزاها هتحصل
مش بس كده
ابتديت رئيسة تكلم نفسها.عيالى هيبقوا من الجن
يعنى هيقدروا يغيروا حياتنا دى كلها
هينسونا الفقر بقى والعيشة الضنك دى
هينفذولى اللى هعوزه
وابقى انا ست الستات
وتيجي نجاح لحد عندى وانا اللى اخليها تدعكلى رجليا
وتوطى عليها تبوسها زى ما خلتنى اعمل معاها
هى فاكرة انى هزعل لما اربى الجن فى بيتى
ده انا هعرفها ازاى ومين اللى هى خليتها تبوس ايديها ورجليها
راحت على بيتها فتحت الباب ودخلت
كانت فريال جوة
فريال.ايه يا رئيسة فينك ياختى من الصبح
قلقت عليكي تكونى تعبتى فى الشارع ولا حاجة
رئيسة.لا متقلقيش انا زى الفل
بس روحت قعدت مع واحدة جارتى
قولت اتسلى بدل م انا قاعدة لواحدى فى البيت زى قرد قطع
العيال نايمين
وكلكم فى اشغالكم
اقعد اعمل ايه بقى
فريال.انا طلعت قولت احصل فلوس البضاعة اللى اتباعت ياختى
كل م اروح لواحدة تقولى طيب استنى يومين كمان
اقولهم عايزة ارجع اجيب شغل جديد واجيلكم تانى
احاول ازغلل عنيهم علشان يدفعوا
ابدا
كل واحدة بحجة
رئيسة.بس قوليلى يابت يا فريال مفيش حاجة غير الشغل حصلت معاكي
فريال اتوترت قلقت تكون رئيسة عرفت اللى حصل بينها وبين طرابلسى
وهى اصلا مشافتهوش من ساعة ما خرج من الاوضة
فريال.لاء ياختى هيكون فى ايه
كل اللى انا فيه على يدك
العيال وحشونى
ووافقت اتجوز
وعايزة الم فلوسي
رئيسة بخبث.الا يعنى مفيش حاجة كده ولا كده حصلت معاكى
فريال حسيت ان دماغها سخنت.حاجة ايه بس ياختى
بتلمحى لأيه
رئيسة.هههه ولا حاجة
بس انتى امبارح تقولى موافقة على الجوازة
والواد الصبح يصحى يقولى اتجوز
ورجعالى بليل بعد نص الليل
قولت تكونى قولتى تجربيه تشوفيه هينفع معاكى ولا لاء هههههى
فريال مصدومة.ايه اللى بتقوليه ياولية ياعايبة ده
بقى انا يارئيسة اعمل حاجة زى دى
ليه ياختى من امتى انتى شوفتى عليا حاجة تخليكي تقولي كده
اخص عليكي
رئيسة.انتى اتقمصتى
بقيتى بتزعلي بسرعة اوى انتى يا فريال
ياولية بهزر معاكى
وبعدين يعنى حتى لو حصل
ماهو هنجوزكم ونصلح اللى اتكسر هههههه
فريال.ياختى ملعون الحوجة اللى خلتنى اقعد فى بيتك وسمعتنى كلام فارغ زى االلى بقيت بسمعه منك صبح وليل
كفايا بقى يا رئيسة
انا ياختى مبقيتش مستحملة سم بدن
وكمان هتتكلمى فى شرفي
لاء ازعل منك ورحمة ابوكى وابويا
رئيسة بتضحك.خلاص ياقماصة انا مش هتكلم معاكى تانى
وبعدين الواد جاى بليل
وهنتكلم فى الجواز
هنشوف ايه اللى هيتم
لانه عايز ياخد حوش برة مش عايز يفضل قاعد هنا
فريال.واخوكى هيقدر على كده يارئيسة
الواد لسه عضمه طرى
رئيسة.لاء متقلقيش انتى بس على عضمه
خليكي بس انتى فى نفسك كده اتزوقى بقى ودلعى نفسك شوية
وهطلعلك كام جلابية من عندى كده مشخلعين
زغللى بيهم عين الواد
حسسيه انك اصغر من اى صبية ممكن تشاغله
فريال.شوفى بس هتعملى معاه ايه وبعدين نتكلم
رئيسة.انا داخلة اوضتى اغير ياختى واطلع ناكل لقمة سوا انا ميتة من الجوع
فريال.طيب هدخل احضر الفطار
دخلت رئيسة اوضتها وشافت نجاح قاعدالها على السرير
رئيسة بصوت واطى.خير ياستنا فى ايه
نجاح بصوت رجولى مخيف.هاتيلى بنتك البكرية يا رئيسة
