رواية خيانة قاتلة الفصل الثاني 2 بقلم هنا عادل

رواية خيانة قاتلة الفصل الثاني 2 بقلم هنا عادل 

خيانة قاتلة

الجزء الثاني

قالت اسراء عن كتاب شمس المعارف

وده كان في وقتها مش معروف عنه تفاصيل زى دلوقتي مكانش عندنا كمبيوتر وكان اهتمام الشباب وقتها وحتى البنات لما يقعدوا في اي نت كافيه انهم يفتحوا الياهو او الهوت ميل والمثقفين اوى بقى كانوا بيستخدموا ال سكاي بي حاجات كده للمبتدئين وانا واخواتى كانت علاقتنا بالتكنولوچيا حصة الحاسب الالي

ولأننا كل حد فينا اشتغل علطول مكانش فيه وقت يخلينا ندور على تدخل التكنولوچيا في حياتنا

سألت يسرا: هو في ايه ي اسراء مالك بتجري بينا في الكلام كده ايه شمس المعارف ده وهنعمل بيه ايه حاجة زى كيف تصبح مليونير كده

وليد: لا يايسرا ده تقريبا كتاب ديني

اسراء: صح بالظبط كده هو كتاب دينى وفيه افادة كبيرة جدا

المهم انك يكون عندك قوة ايمان بيه

طبعا وليد ويسرا بيجمعوا المعلومات من اسراء اللي للاسف كلها كانت غلط

كملت اسراء: بصوا عندى زبونة في المحل من الناس اللي بنشوفهم في التليفزيون حاجة كده هانم اووى في نفسها وكلامها وعربيتها لما بتيجى المحل بتسيب تيبس ل كل بنت في المحل ٥٠ جنيه والبنت اللي تبقى واقفه تبيعلها بتسيبلها ب ال١٠٠ وال٢٠٠ جنيه دايما تيجي ومعاها واحدة بتشيل معاهت الشنط بتساعدها يعني ولما من يومين كانت عندنا وانا اللي وقفت معاها وهي بتتفرج على الهدوم حبيت اجر معاها كلام وعرفت انى تعليم عالى واعجبت اوى بتفكيري وشخصيتي ولقيتها بتقولي لو تحبي تشتغلى في حاجة احسن من هنا هسيبلك رقم تليفونى كلميني وفعلا كلمتها واتفقت معاية انى اروحلها اقابلها في بيتها امبارح ساعة الغدا بتاعى وروحتلها ياعيال ويالهووى على العيشة اللي عايشاها ايه الغنا ده لا سيبكم بقى من الحاجات اللي كانت بتبقى مع ولاد الجيران ونبصلها ولا عند حد من العيال بتوع المدرسة ويبقى نفسنا فيها ده احنا كنا مغفلين

ساكنة في عمارة على البحر علطول الشقة من جوة كأنها قصر مفروشة فرش قصور بجد مش ببالغ شبه التليفزيون كده عموما سيبكم من كل التفاصيل دى اللي خلتنى تنحت تعالو للمهم الست دى عايزانى اشتغل معاها سكرتيرة لأن البنت اللي بتشتغل معاها هتتجوز ومسافرة والست عايزة بنت تكون متعلمة ولبقة لأنها هتتعامل مع مستويات وشخصيات مهمة والمرتب هيبقى ٥٠٠٠ جنيه فى الشهر متخيلين غير ان كل هدومى هى هتجيبهالي زى ماكانت بتعمل مع السكرتيرة بتاعتها طبعا انا سمعت كلامها وفهمتنى ان شغلي بس تحديد مواعيد وترتيب ادوار العملا بتوعها مش اكتر من كده

فرحت جدا وقولت خلاص عدينا من الفقر نزلت من عندها وطلبت من السواق بتاعها انه يوصلنى وهي مستنيانى ارد عليها لأنى قولتلها هسأل اهلى وارد عليكي بس اللي حصل عندها كوم واللي جاي ده بقى كوم تاني خالص

ركبت مع السواق وعلشان انا رغاية زى ماانتم عارفين فتحت كلام مع السواق عن طبيعة شغلها و المرتبات الحلوة اوى دى اللي محدش بيدفعها

علشان اسمع بقى رد مكنتش اتوقعه..الست دى بتشتغل في الاعمال والسحر وهى اصلا كانت مش من هنا دى جاية من بلد تانيه تشتغل تساعد في البيوت وكانت ظروفها مدمرة خالص ومن حظها اشتغلت مع شيخ (دجال)بس كان معروف شواية وهو اللي علمها ده وقبل مايموت قالها لو عايزة توصل للي هو وصله تحافظ على كتابه شمس المعارف الكبرى قالها اقريه وصدقيه وبصى للعز والغنا وبس انسي اي حاجة تانيه

ومن بعدها والست بقيت حاجة تانية خالص هانم كده زى م انتى شوفتى

طبعا سألته وده ايه شمس المعارف ده اللي يخليها تتغني بالشكل ده

رد عليا انه تقريبا كتاب فيه ادعية معينة بتساعد على قضاء الحوائج ولها طرق واعداد واوقات معينة في استخدامها وقرائتها ده اللي انا اعرفه من وقت شغلى مع الله يسامحه بقى اصل انا اعرفها من ايام ماجت تشتغل عند الشيخ لأنى كنت السواق بتاعه مهانش عليه ينصحنى انا بالكتاب ولا يسيبهولي يلا بقى ارزاق وهى بصراحة مش مقصرة معاية كتر خيرها

رديت عليه: طيب ليه متجيبش الكتاب انت وتعمل زيها

رد السواق: اجيب ايه هو ده سهل يتجاب ولا سهل تلاقيه ولا انتى فاكرة انه رخيص ده سعره غالي جدا ومش سهل ابدا تلاقي النسخة الاصلية يعني ممكن اى حد ينصب عليا وبرضو مش هيجبلي النسخة الاصلية ده الكتاب ده بيتشال في الخزنة من ايام الشيخ كان بيقول انه الكنز بتاعه

انا بالنسبالي رضيت باللي ربنا قسمهولي بقى انا برضو عايش عيشة كويسة ومستورة معاية على الاخر هو بس البحر بيحب الزيادة لكن انا راضي اوى بحالي موظفين كتير في اماكن كبيرة مش بياخدو نص مرتبي يعني انا بيه برضو مش مجرد سواق

وضحكنا سوا ووصلت المحل وانا دماغى كلها هنجيب الكتاب ازاي واديني اهو قاعدة بقولكم لازم نشترك ونجيبه بس نتاكد الاول انه النسخة الاصلية هااا ايه رأيكم

وليد ويسرا قاعدين متنحين للكلام الاغراءات حلوة مفيش كلام

وليد: اسراء هو انتي فاهمة انتي عايزانا نعمل ايه سحر ايه واعمال ايه انتى هبله من امتى احنا بنفهم في الكلام ده ولا حتى اتكلمنا فيه ولا هنجيب فلوسه منين ولا الناس هتقول علينا ايه ده حوار كبير عايز ناس غيرنا يعملوه ياخسارة تعليمنا

يسرا: لا ياوليد بالعكس مش ياخسارة تعليمنا ده احنا فرصتنا احسن بكتير من الست اللي اختك بتحكى عنها

احنا مش هنكون مجرد ناس بتعمل اعمل لا احنا تعليمنا وثقافتنا هتخلينا نعرف نقنع الناس بينا اه في البداية هنشتغل على اللي حوالينا هنا ولا معارف الشغل لكن مع الطريقة والاقناع هنوصل بسرعه فكر فيها كده لو الحوار زى اختك مابتقول يبقى احنا لازم فعلا نجرب يمكن حياتنا تتغير

وليد: في ايه انتم بتهزروا ده موضوع كبير اوى علينا وبعدين الحكومة بتسمى الناس دى دجالين يعني ممكن نتحبس

اسراء: يعني خلاص هتيجي على عيال خيري اللي اول مايفكروا يعملوا شيوخ هما اللي يتقبض عليهم ايه الفقر ده بلاش احباط بقى ياوليد احنا بس الاول نوصل لحد يجيبلنا الكتاب ونعرف تمنه كام علشان نشوف هنعرف نوفره ولا لا وبعد مانجيبه نشوف هنبدأ ازاي بقى ها اتفقنا

يسرا: انا معاكى ي اسراء

وليد: انتم هتودونا في داهية انا حاسس بس مش هسيبكم لوحدكم معاكم طبعا

خلصت السهرة بعد م كل حد منهم سرح في لما يتغني حياته هتكون عاملة ازاي

يسرا: هطلع من المنطقة الفقر دى واجيب شقة في مكان راقي واتجوز جوازة بنت ناس كده وانسى ابوكم وقرفه

اسراء: ياخبر ده انا مش هسيب بلد مش هسافرها واروح اشترك في اكبر نادى فيكي يابلد واصاحب بقى الناس اللي بيقولوا عليهم كريمة المجتمع واجيب عربية تحفة واعمل شقة شبه بتاعت الست اللي روحتلها واحسن كمان لا لا ده انا هعمل البدع بس الاول هنبداء ندور فين وازاي ومحدش ينقل الفكرة لحد ماشي

وليد ويسرا: تمام محدش هيعرف نقوم ننام دلوقتي وبكرة نشوف هندور فين

كل حد راح ينام مكانه لكن يسرا اللي الموضوع علق معاها جدا لدرجة انها معرفتش تنام ده هى كمان فضلت قاعدة لحد ماصحيتهم الصبح قالتلهم انا عرفت هندور فين

وليد: في ايه يايسرا انتى سخنة كده ليه قولي صباح الخير

اسراء: احبك يايسرا وانتي متحمسة كده ها هندور فين

هندور في شارع....(مش بحب اكتب اسامى اماكن او مناطق علشان فيه ناس بتضايق معلش)

.اللي بيتباع فيه الكتب القديمة هناك بيكون فيه كتب من سنين السنين يمكن نلاقي هناك يلا قوموا بقى اجهزوا علشان ننزل

نطيت اسراء من مكانها بحماس وقالت قشطة عليكى يابنت اللعيبة انتى خمس دقايق هكون جاهزة

وليد: ياجدعان فكروا الحوار ده كبير مش سهل

يسرا: يلا ياوليد بقى بلاش تبقى فقر كده زى ابوك ياعم احنا هنسعى جت معانا تمام مجاتش عوضنا على الله

وليد: ايه يابنتى البجاحة دى انتي فاهمة يعني ايه شغل دجل واعمال احنا هنغضب ربنا

يسرا: لا احنا مش هنغضب ربنا دى بتقولك كتاب ديني واللي فيه ايات وادعية دينية يعني مش حاجة حرام شوف انا هدخل الموضوع ده ب اي شكل هي كبرت في دماغي المحاولة والتجربة مش هتخسرنا حاجة مفيش عندنا اللي نخسره اصلا هتبقى معانا تمام مش هتبقى معانا وتسيبنا نتعامل لوحدنا براحتك

وليد: ماشي يايسرا بس لو لقينا الحوار هيعملنا مشاكل بلاش منه

اتفقو على كده كانت اسراء جهزت فعلا وقام وليد ويسرا جهزوا نفسهم وقالوا لأمهم انهم نازلين يجيبوا طلبات للبيت وهيتمشوا شواية ونزلوا الشارع اللي يسرا قالت عليه وشافوا كتب كتير ومش لاقيين كتاب ب الاسم ده

لحد م واحد من اللي دوروا عنده سألهم انتم عايزين كتاب معين

رد وليد قاله اه عايزين شمس المعارف الكبرى النسخة الاصلية

اتفاجئ الراجل وقاله وانت بتدور عليه هنا كده عادى فاكر نفسك هتلاقيه ده تمنه يعمل المكتبة اللي قدامك دى كلها

يسرا: خلاص قول انه مش عندك وخلاص

الراجل : ولا هتلاقيه عند حد لكن اقدر اجيبهولك والنسخة الاصليه لكن تتقلو جيبكم

سألته اسراء: عايز كام يعني

الراجل: هاخد منكم عشر تلاف وده مش تمنه ده اغلى من كده لكن علشان اعمل معاكم واجب وتبقو زبايني

وليد: ايه ياعم اللي بتقولوا ده ولا حتى الف جنيه ليه وانت هتجيبلي شبكة الماظ لا طبعا

رد الراجل: انا هجيبلك كتاب لو لفيت سنة ودفعت اكتر من كده مرتين تلاته مش هتلاقي اللي يجيبلك النسخة الاصلية

وليد: هو ليه مكبرين الموضوع اوي في حق الكتاب ده ده انا مصاريف كتب دراستى كلها متكلفتش الرقم ده كتير اوى ياعم

الراجل: طيب بص دور ولو لقيت حد يجيبهولك برقم اقل من ده هاتلى معاك واحد ايه رأيك

رديت اسراء: طيب ينفع تعمل معانا واجب شواية كمان واصلا المبلغ ده كبير اوى علينا ف هتاخده مننا على ٣ مرات

رد الراجل بسخرية: ايه ده تقسيط كمان لا ياستى الله الغني هو في كتب بالتقسيط ليه فاكرانى مدير بنك

رديت يسرا: احنا هنسيبلك صورة من بطايقنا وممكن نمضيلك على ايصال بالمبلغ الباقي بمجرد مانخلصه تديلنا الايصال والبطايق قولت ايه

الراجل بتفكير: انتم للدرجة دى عايزينه

يسرا: اه جدا بصراحة

الراجل: ماشي موافق تعالولي يوم الجمعة الجاية اكون جيبتهولكم وهاتولي معاكم البطايق وحضرولي جزء من الفلوس

اسراء: بس النسخة الاصليه خلى بالك احنا عارفينها

( وهي ولا تعرف حاجه عنه اصلا)

سابوا الراجل ومشوا ووليد رافض الفكرة بس هو عارف اخواته لما بيحطو راسهم في راس بعض يبقى هيعملوا اللي في دماغهم فيكون معاهم احسن مايسيبهم يتصرفوا من وراه

فات الاسبوع واسراء ويسرا قدمو على طلب سلفة من المحلات اللي شغالين فيها ولأنهم موثوق فيهم اتوافق على السلفة اما وليد مرضاش يستلف علشان هيسد هو الدفعتين اللي هيكون الراجل عايزهم ف مش هينفع يتخصم من مرتبه حاجة بالعكس ده هيحاول يشتغل شيفت تاني علشان يزود المرتب الشهرين دول

راحو للراجل اللي عطالهم الكتاب ملفوف بعد مامضاهم على ايصالين واخد البطايق فعلا وجزء من فلوسه وهما ماشيين قالهم خلوا بالكم بقى وهستناكم اول الشهر

اسراء ويسرا هيموتوا ويفتحوا الكتاب ووليد قلقان لسه لكن حماس اخواته خلاه متحمس يعرف في ايه جوة الكتاب

رجعوا البيت على اوضتهم امهم كالعادة تعمل الغدا وتنضف البيت وتدخل تنام ابوهم ع القهوة

قفلوا الباب عليهم بالترباس ويسرا بلهفة قطعت الورق الملفوف بيه الكتاب واول مافتحت الكتاب لقيت الكاتب بتاعه في المقدمة بيذكر الله تعالى وانه سايب الكتاب ده لوجه الله وان كل اللي في الكتاب ده حاجات ربنا امرنا بيها وكل اللي فيه حاجات لها معنى قوى في الدين

طبعا هنا يسرا واسراء بصوا لوليد وكأنهم انتصروا عليه وبيقولوله علشان تصدق انه لا دجل ولا شعوذة اهو كلام ربنا ارتاحت

رد وليد : بصوا انا كده كده مش مقتنع بس احنا بدأنا وهنكمل بقى مضطرين كملي ياست يسرا

وفتحو اول صفحة اللي كان فيها رموز وكلمات مش مفهومة وقطعت الكهربا قبل مايعرفوا حتى يقروا المكتوب قدامهم.

يتبع

الثالث من هنا

تعديل المقال