رواية امبراطورية بابا كامله وحصريه بقلم هنا محمد
" إمبراطورية بابا "
- باباااااااااااا مش عارفة اذاكر
- في ايه يا مجنونة
- ده كلام تقوله قدامي يا سليم
: فكرني المرة الجاية اقوله وراك بقولكك خدت الشاحن بتاعي وموبايلي فاصل وورايا ميتينج
- بت يا روان ادي لسليم الشاحن
- لا والله طب م انا ورايا امتحان ولازم احضر دروس اونلاين
: اشهد يا بابا
- اخلص
: فونها 80 ٪ فوني 0٪ مين اللي احق ياخد الزفت
- يا جزمة الفاظك
: اسف يا حج ها قول
- روان طبعا
- اهو شوفت
: شوفت ايه يا بابا احكم بالعدل ورايا ميتينج
؛ بابا صدقني لو مطردتش العيال دي برا البيت ده هسقط السنة دي بيتخانقوا على شاحن في اوضتي
- مش تقول يا حيوان ان احنا في اوضة مريم
~ بابا هاتلي فلوس عشان اروح اجيب ميكب
* وانا عايزة خمسمية جنيه عشان خارج مع صحابي
~ انا اللي طلبت الاول
* انا الولد على فكرة
؛ باباااااااااا
- اخرة اللي يخلف تمن عيال انا جزمة عشان خلفتكم يا ولاد الجزمة
8 عيال!! هفهمكم هما 3 من الزوجة الاولى و5 من الزوجة التانية والاتنين ميتين اصل غالبا محدش بيعمر مع "عبد الله "
مريم: عشان خاطري يا بابا انا في تالتة ثانوي وورايا امتحانات اطردهم برا البيت خالص انا مش مستحملة
عبد الله: اهدي يا مريم يا حبيبتي خدي الفلوس وروحي ذاكري في الwork space عشان انا ناوي اربي العيال النهاردة
مريم بضيق: يعني يوم ما تربيهم تربيهم ليلة الفيزياا الفيزيا يابابا
روان: ومالها الفيزيا يا اختي ده انا دحيحة فيها
مريم: اومالل ده انتِ بتذاكري في الصيف عشان ساقطة فيزيا يا ساقطة
روان: قلبي الصغير لا يتحمل هذه الإهانة
طارق وهو بيضربها على قفاها: تصدقي اتأثرت روحي ذاكري
عبدالله: بتضرب اختك قدامي
طارق بتوتر: هفهمك
عبد الله: بتضربهاا قداامي شايفني بقرون
سليم: عيب يا طارق المرة الجاية اضربها من ورا بابا عشان ميبقاش بقرون
عبد الله: تصدق كنت ناوي ابدأ بطارق بس جالي متعة ان ابدأ بيك انت
سليم: بهزر يا عبده ايه مبتهزرش
عبدالله: لا مبهزرش
جميلة: بابا لو سمحت اديني الفلوس وبعدين اضربه
طارق: فكرتيني بابا على فكرة انا متأخر على الخروجة
عبد الله: وعايز كام
جميلة: طب وانا
عبدالله: هديلك يا اخرة صبري عايزين كام
جميلة: هما ربعماية وتسعة وتسعين جنيه
طارق: يعني الجنيه هيفرق؟ عموما انا خمسمية
سليم في نفسه: خناقة هروح الحق الغي الميتينج عشان اتفرج
عبدالله بصدمة: يعني ادفع فيكوا في اليوم ألف جنيه يا كلاب ده انا هطلع عينكوا
وبدأ يقلع الشبشب بس جاتله لحظة ادراك ووقف اللي كان بيعمله
- انت يا حيوان لو قولنا على اختك ماشي الميكب غالي وهي بتحب الاوريجنل
جميلة: والله ميجبوش صباع روج
عبد الله: اسكتي انتِ.. عايز ليه خمسمية جنيه في خروجة شباب يا حيوان
طارق بتوتر: ايه متفشخرش قدام صحابي
عبدالله: قدام صحابك ولا قدام المزة؟
طارق: مزة ايه يابابا الكلام ده استغفر الله استغفرالله ملناش في السكة دي لاا يابابا انت بتظلمني جامد
عبدالله: تصدق اتأثرت ودمعتي فرت من عيني وعيني احمرت من كتر الوجع
طارق بتأثر: الف سلامة عليك يا بابا ان شاءلله جميلة
جميلة بصدمة: طب على فكرة يابابا الواد ده سمعته امبارح وهو بيكلم واحدة اسمها جيرمين وبيتفق معاها ولا بيقولوا باي يا جوجو اشوفك بكرا هقهق و انتِ من اهلي يا بيبي
مريم وهي بتلبس الشنطة وخارجة: انت معرفتش تربي يا بابا لما ارجع الاقيهم مطحونين
عبدالله وهو بيبوس راسها: حبيبتي العاقلة يلا خدي خمسمية جنيه شبرقي بيهم نفسك
جميلة وطارق بصدمة: ده ظلم
عبد الله: انا هوريكوا الظلم على اصوله يا كلاب.. بس هروح لاخواتكم التانيين الاول
جميلة: طب والفلوس
عبدالله: امشي يابت مفيش خروج ليكم انتوا الاتنين
جميلة: انا مالي بيه يا بابا
عبدالله بزعيق: كيفي كده بدل ما اقلع اللي في رجلي واضربكم بيه
بعدين قال لمريم بهدوء: يلا يا ميرو هوصلك في طريقي
مريم: ماشي يا بابا
بعدين ركبوا العربية وجاله اتصال ورد عليه
- ايوا يا نور يا حبيبتي.. ايه مالك بتعيطي ليه.. ايه!! ازاي يعمل كده.. وقدام العيال كمان.. طب هو فين دلوقتي.. اهدي وردي عليا يا نور انا في ضهرك.. طيب انا هروحله واشوف الحوار ده وعد مني هجبلك حقك يا حبيبتي يلا سلام
مريم: مش نور دي مرات إسلام؟ ايه اللي حصل؟
عبدالله: اخوكي يا ست هانم ضر بها جامد
مريم بصدمة: ضر بها ليه؟
عبدالله: انا مالي بالفعل انا ليا برد الفعل مهما كانت الاسباب مينفعش يمد ايده عليها
مريم: طب اهدى يابابا وحاول تفهمه بالراحة
عبدالله: متقلقيش هتكلم معاه بهدوء خالص
___________________________
اسلام بوجع: يابابا سيبني انت مالك بمراتي
عبدالله وهو بيضربه بالحزام: ما انا للاسف ولي امرك وللاسف ان انا ابوك وللاسف الاكبر انك ابني
ملك بملل: هو عمل ايه
عبدالله: البيه بيمد ايده على مراته
اسلام: مش لما تعرف عملت ايه الاول
عبدالله: والله امك خانتني يا استاذ ولا مرة ضر بتها عشان كده .. مراتك عملت ايه ها انطق
اسلام: يا بابا
عبدالله: عملت ايه من غير مقدمات
اسلام: شوفتها وهي بتتكلم مع واحد وبتضحك
عبدالله قعد على الكرسي واتنهد بضيق: وطبعا شكيت فيها وظلمتها وضر بتها واتهمتها بالخيانة ويطلع في الاخر حد قريبها او حد عادي بتتعامل معاه بتلقائية
اسلام: وهو عادي يعني تضحك مع اي حد في الشارع
عبدالله بغضب: انت تخرس خالص.. هسألك سؤال واحد بس وترد بصراحة سألتها ولا عملت الحكم على طول؟
اسلام بص للأرض بإحراج
عبدالله: يا ميلة بختك بولادك يا عبد الله
ملك: خلاص يابابا بلاش افورة هيروح يصالحها والموضوع يتلم
عبدالله: اه ما انا مش بأفور فعلا يا ملوكة اصل لو كانت مراته انتِ كنتي هتقولي عكس ده كان احتمال تفضحيه في السوشيال ميديا اللي مجننك ده
ملك ببرود: هروح اعمل ايس كوفي اعملك معايا
عبدالله بنفاذ صبر: غوري مش عايز من وشك حاجة.. مراتك طالبة الطلاق
اسلام: مستحيل اطلقها طبعا يا بابا هي بس زعلانة وبعدين ازاي حكيتلك على مشكلة بينا وهتتحل
عبدالله: انت كل ما بتتكلم بتنرفزني!! الهانم قاعدة في بيت أبوها مستنية حضرتك تيجي عشان تروحوا للمأذون تتطلقوا
اسلام: هحل الموضوع يا بابا متقلقش
عبدالله: اكيد انت اللي هتحل مش انا خليك راجل لمرة واحدة وحل انت.. اسمع يا حيوان انت انا ممكن اقبل أي حاجة تعملوها انتوا ال4 الا انكوا تزعلوا واحدة ست او تنيموها معيطة فاهم ولا لا؟ فين اخوك زين
اسلام: في الجامع اللي جنب البيت زمانه جاي
ولقوا حد بيدخل من البيت وكان زين: السلام عليكم
عبدالله: وعليكم السلام ياحبيبي تعالى تعالى شوف اخوك الكبير قدوتك عمل ايه
اسلام: هي زيطة يا بابا الله الله
زين بتعب: في ايه يا اسلام انت كل يوم بمشكلة
عبدالله: قوله ياكشي يفهم
زين: انت مالك مين اللي ضربك كده
اسلام شاور على ابوه بضيق وعبدالله ابتسم وشاور على نفسه وغمز بعينه
زين وهو بيكتم الضحكة: الصبر يارب.. عمل ايه يابابا
عبد الله اتكلم هو واسلام في صوت واحد: البيه بيمد ايده على مراته
عبدالله: انت بتتريق عليا يا ولد والله هقوملك
وجه يقوم زين وقف قدامه وقال: امسحها فيا انا يا حج اعتبره عيل وغلط
عبدالله: هو من ناحية عيل فهو عيل.. انت لسة قاعد انجز يا حيوان وقوم صالح مراتك أو طلقها ايهما اقرب وعدي عليا بكرا ومعاك احفادك عشان اصلح صورتهم القذرة اللي عملتها قدامهم.. انت لسة قاعد
وجه يقلع الجزمة اسلام جري وطلع برا البيت
عبدالله: احسن برضو معادش ليا صحة..ملك انتِ يا بت اعمليلي ايس كوفي معاكي الجو حر
ملك وهي جاية ومعاها كوبيتين: كنت عارفة انك هتقول كده فعملتلك
عبدالله وهو بيشرب: تسلمي يا نور عيني.. انت يا ولد
زين بنفاذ صبر: نعم يابابا
عبدالله: شايفة الاحترام والله انت اللي بيهم انت سندي انت حبيبي
زين: مش هتجوز يا بابا ريح اعضائك
عبدالله: انت اكبر حيوان في الدنيا واكتر واحد قارفني في الدنيا
زين: تسلم يا حبيبي
عبدالله: كنت هقولكم ايه تاني.. طلما الواد اسلام اتجوز وخلصت منه من زمان
ملك: مش هنعيش معاك يابابا ريح نفسك انا مبطيقش ولا روان ولا جميلة ولا حد منهم ومش متفاهمين مع بعض
زين: وبصراحة طارق وسليم مختلفين عني تماما فمش هنتفاهم احنا كده احسن
عبدالله: بس انا مش كده احسن انا عايز قبل ما اموت ولادي ال8 يبقوا حواليا
ملك: بابا انت هتدفنا اصلا واحد واحد فمتقلقش
عبدالله بصدمة: يخربيتك بتفولي عليا
ملك: بقول انت اللي هتدفنا مش العكس
عبدالله: وانتِ فاكرة ان كده احسن ده انا كده همو ت نفسي وراكوا انا ليا مين غيركوا
زين بضيق: بعد الشر عليك يا بابا متقولش كده بس قول اي حاجة غير ان احنا نعيش معاهم
عبدالله: ومين قال ان انتوا هتعيشوا سوا.. هتعيشوا في الشقة اللي فوقنا وبس
ملك: ايه اللي فرق يعني
عبدالله: اللي فرق ان صحتي بقت على قدي يابنتي مش هقدر اجيلكم كل مرة وانتوا تشكروا مبتفكروش حتى تيجوا تزوروني حتى لما دخلت المستشفى عملتوا زيارة ومشيتوا زيكم زي الاغراب بالظبط
زين: بابا انت عارف اني وقتها كان عندي شغل كبير والله ولو كنت سيبت الفرع الجديد من شركتي كان كل حاجة هتبوظ
ملك: اعمله تبرير براحتك يا زين بس انا مش هبرر لان ماشاءالله احنا ال3 مش مهمين عندك اصلا انت بتيجي عشان الواجب مش اكتر.. اللي معاك في المستشفى ال5حبايبك لكن احنا مش هنفرق معاك في حاجة
زين بحدة: اسكتي يا ملك
ملك بغضب: لا مش هسكت احنا ولاد الخاينة اللي خنتك مع صاحب عمرك لكن هما ولاد حب عمرك اللي هي اول حب واخر حب فمفيش داعي تعمل الشويتين دول عشان تبان الاب المثالي اللي مبيفرقش بين عياله
عبدالله بهدوء: وانا بفرق بينكم؟
ملك: ايوا بالدليل انك اختارت تعيش معاهم مش معانا واهتمامك الزايد بيهم.. مسألتش نفسك اسلام شك في مراته ليه؟ بسببك بسبب انك كل مرة بتفكرنا ان امنا خاينة
عبدالله: لحد هنا واقفي انا عمري ما شوهت صورة امكم قدام حد فيكوا انا اللي اتفاجئت انكوا عارفين اساسا والله اعلم عرفتوا منين مش انتِ اللي قولتي لاخواتك الصبيان برضو؟
ملك: ايه جو قلب الترابيزة ده
زين بحدة: ملك احترمي نفسك وانتِ بتكلمي ابوكي سامعة ولا لا مش هسكتلك كتير
ملك دخلت اوضتها ورزعت الباب وراها
زين قام وحضن ابوه: معلش يا بابا هي والله متقصدش هي بس غيرانة عليك منهم ملك بتحبك والله
عبدالله بدموع: انا عمري فرقت بينكم يا زين؟ ده انا اتمنى تقعدوا معانا وتعيشوا معانا والله بعملكوا انتوا ال8نفس الحاجة نفس الاهتمام وجيب ليكم أي حاجة تتمنوها على قد ما اقدر الفرق طريقة التربية مش اكتر لأن انتوا كل واحد بدماغ وكمان الجيل مختلف الفرق ما بين اسلام الكبير وروان الصغيرة 17 سنة يابني
زين: عارف والله يابابا
عبدالله ببكاء: لا مش عارف كنتوا هتعرفوا لو كنتوا عايشين معانا مكنتوش هتحسوا بالفرق ده
زين: خلاص يا بابا هنعيش معاك بس اهدى دموعك غالية عليا وربنا لاربي البت ملك دي
عبدالله بصوت عالي: لاااااا انا اللي هربيها والله لو شافت خطيبها ولا كلمته مبقاش انا وسجلت الكلمتين اللي قالتهم وهسمعها لخطيبها
زين: انت سجلت بجد
عبدالله: اكيد لا بس هقول لخطيبها برضو يشوف البر بالوالدين ياكشي تفسخ الخطوبة وتقعد في ارابيزي
زين بضحك: والله انت كائن غريب ياحج
عبدالله: اسمها كائن كريتيف.. يلا لموا هدومكم
زين بصدمة: دلوقتي
عبدالله: اومال فاكرني يا حيوان هجيلك الصبح وترفض تاني هستغل الفرصة طبعا يلا قوم
زين: ماشي
ودخل لملك يقنعها وصوتهم كان عالي وعبدالله كان قاعد يتفرج على التليفزيون وكان موجود عبد الحليم وشادية وواخد الشيبسي اللي لقاه في مطبخهم وحاطط رجل على رجل
وفي الاخر الاتنين طلعوا ومعاهم شنطهم وملك كانت بتبص للارض بضيق
عبدالله بفخر: قدامي انت وهي يا حبايبي
______________هنا محمـد _______________
روان: جماعة انا زهقانة ايه رايكم نعمل فشار ونتفرج على فيلم
سليم: هي فكرة حلوة بس يا حلوة خشي ذاكري يا ساقطة
روان: يوههه اعتبروني في بريك
طارق: بالظبط روحوا اعملوا الفشار واحنا هنظبط الفيلم على التليفزيون
روان: اشطا يسطا يلا يا جميلة
سليم: انا خايف يولعوا في المطبخ
طارق: متقلقش ان شاءلله تيجي سليمة
ولقوا خبط على الباب وروان جريت وهي بتقول: بابيشكوا جه وفتحت الباب وقالت: بابا مجاش لوحده
سليم وهو جاي: يعني ايه.. ايه ده ازيكم
زين باحترام: الحمدلله بخير
ملك: مش احنا مش هنعيش معاهم؟
عبدالله بضيق: يعني مش هتسلمي على اخواتك الاول
جميلة جت وحضنت زين: عامل ايه يا زيني وحشتني اوي
زين بابتسامة: وانتِ كمان يا جميلة الجميلات
جميلة هي اقرب واحدة لزين من ال5 فهي بطبعها لطيفة وبتحب اسلام وزين بس ملك الوحيدة اللي مش بتحبها لان ملك دايما بتعاملها ببرود وبتكبر وهي مش بتحب كده
جميلة: اومال فين اسلام مجاش ليه
زين: انتِ عارفة بقا مشاغل وكده
عبدالله وهو بيقعد على الكرسي: اخوكم هيتطلق
كلهم قالو بصدمة: ايه؟؟
عبدالله: بهزر بهزر بيصالح مراته مش اكتر
زين بص ليه بلوم وعبدالله قاله: ايه مش بخبي حاجة عن ولادي يعني انتوا عارفين وهما لا انا مش بفرق على فكرة وقال كلامه في الاخر وهو بيبص لملك بينما ملك تجاهلته
روان: ايه اللي حصل
عبدالله: يا حشرية هانم مشكلة بين اي زوجين وخلاص هيتصالحوا بس احفادي جايين ليا بكرا
طارق: يعني يونس ومروج جايين
عبدالله: افكورس هي ايه الريحة دي؟
جميلة: يلهوي الفشار بيتحرق
عبدالله مسك قلبه: المطبخ لسة معدله من شهرين يا كلاب
طارق وهو بيكتم الضحكة: اهدى يا ابويا اهدى
عبدالله: هو اللي يخلفكم يعرف هدوء يا حيوانات
ملك: ممكن نروح الشقة عشان نشوف احوالنا
جميلة وهي معاها طبق كبير فيه فشار: ايه مش هتاكلوا الفشار الاول ده احنا حتى هنتفرج على فيلم
ملك: ميرسي انا تعبانة ومش هقدر.. مش يلا؟
عبدالله: ماشي يلا بينا
جميلة: على اقل اقعد معانا انت يا زين
طارق: احم ايوا وهنجيب ليك رعب لو عايز
سليم: ايوا ده حتى في جوا سناكس من اللي بتحبه قومي يا روان جبيه
زين بابتسامة: لا بصراحة انتوا عرضكم مذهل اكيد هقعد معاكم
ملك: براحتك
وطلعت برا الشقة وعبدالله اتنهد بضيق بيحاول ميتعصبش عليها عشان الامور اللي بينهم متتعقدش اكتر وطلع وراها وفتحلها باب الشقة وهي جريت على اي اوضة وقالها بغضب مصطنع: ملك تعالي اقفي قدامي هنا
ملك راحتله بتوتر وهي باصة في الارض: نعم
عبدالله حضنها وهي اتصدمت من فعله بس حاولت متشيلش قناع البرودة اللي حطاه لكن اتهزمت مع كلماته: ملك انتِ غالية عندي اوي.. اسف اني حسستك بالاهمال وانك متفرقيش معايا بس والله انا مقدرش اعيش من غير واحد فيكم انا ميهمنيش انتوا ولاد مين على قد ما يهمني انكوا ولادي.. انا بحبك اوي يا بنتي لانك بنتي حتة مني لو اشحت كده محبش الا انتِ.. ولو حسستك بالتفرقة متكتميش في نفسك تاني وتعالي قوليلي وانا هعوضك عن كل حاجة انا غلطتي زمان اني ماجبرتكمش انكوا تعيشوا معايا بس كنت مش عايز اضغط عليكم كنت عايز اديكم حرية الاختيار وطلعت غلط.. بس انا اختارت اعيش معاهم هما مش حبا فيهم صدقيني بس هما كانوا محتاجين اكتر روان امها ماتت وهي بتولدها وهما كانوا صغيرين ميعرفوش يعملوا حاجة بنفسهم لكن صدقيني انتوا كلكم روحي
ملك عيطت جامد وعبدالله خرجها من حضنه ومسحلها دموعها وهي قالت: انا اسفة
عبدالله حضنها تاني: شش انا اللي اسف يابنتي
ملك مسحت دموعها وقالت بمرح: طب يلا ننزل زمانهم خلصوا على الفشار
عبدالله: ده بجد هتنزلي تقعدي معاهم؟
ملك: امم مش اخواتي
عبدالله ابتسم وقال: طب يلا يا اخرة صبري
ملك: انا بحبك اوي يا بابا وبجد مكنتش اقصد الكلام ده
عبدالله: عارف يا حبيبتي.. يلا الفشار هيخلص
ملك بابتسامة: يلا
