رواية قرية الاموات كامله وحصريه بقلم محمود الامين
تعرف لما تحس بالرهبة والخوف وانت داخل مكان.. قلبك يتقبض كده وتحس بعدم الراحة وتبقي عايز ترجع ومش عارف عشان خلاص بقي امر واقع.. جربت ده قبل كده؟
أنا جربته لما دخلت اعالجها من المس اللي عليها فبصتلي وقالت
_ مش هتعرف تعمل حاجه غير لما تسد الدين اللي عليك!!
_ قتلت عيالك ليه يا موسي؟... لازم ترد الدين عشان تعرف تواجهني مش هتعرف تخرجني مش هتعرف
...
وقتها رجعت بالزمن ٢٠ سنة ورا وافتكرت اغرب حكاية ممكن تسمعها في حياتك
أنا موسي أو الشيخ موسي زي ما بيناديني أهل البلد اللي انا منها.. كنت شاب في ال٢٠ من عمري اتربيت علي ايد الشيخ الرفاعي أبويا اللي كان شيخ الجامع وقتها.. أبويا هو الشخص اللي حببني في الدين والعلم وحفظني القرآن الكريم كامل وعشان هو كان محبوب وذو علم الناس اخترته يحكم ما بينهم بالعدل واللي كان عنده مشكلة شخصية او مشكلة مع حد كان بياجي لابويا.. وعشان أحنا من الصعيد اصلا اقدر اقولكم أن أبويا كان القاضي العرفي للبلد
..
ولما وصلت سن العشرين بدأت اتعلم حاجة تانية خالص.. اتعلمت طرق العلاج من المس والسحر بالقرآن الكريم.. لكن دخولي في السكة دي مكنش مريح ابويا.. وكان دايما يقولي
_ يبني مالك ومال السكة دي.. خليك مكاني انا سني كبر ومحتاجك جمبي.. لازم تبقي شيخ الجامع والقاضي العرفي للبلد دي
_ ربنا يديك الصحه وطولت العمر يا حج.. متخفش عليا انا فاهم السكة دي كويس وعاوز أكمل فيها.. وبصراحة ومن غير ما تزعل منى انا مش شايف نفسي لا شيخ جامع ولا قاضي عرفي
أنا مبسوط كده
_ بس يبني السكة دي مش سهلة انت هتواجه الجن بجميع صوره وانواعه وعشان تقدر عليهم محتاج تتعلم حاجات كتير
_ أنا بدرس من فترة يا حج واتعلمت طرق العلاج من المس والسحر بالقرآن الكريم
_ مش كفاية وطالما مصمم علي الطريق ده انا هبعتك للشيخ سالم ده صحبي من ايام زمان وهخليه يعلمك كل حاجه.. اصل الموضوع مش طرق علاج وبس لأ.. دي مواجهة مع الجن ولازم تكون جاهز
_ والشيخ سالم ده فين؟
_ في قرية جمبنا هنا.. هتروح وتقوله أنا ابن اخوك الرفاعي
_ ابن اخوك؟!!
_ اه ومتستغربش.. الشيخ سالم كان اكتر من اخويا وهتشوف لما يعرف انك ابني هيستقبلك ازاي؟
...
كان عندي شغف اني اتعلم كل حاجه واكون جاهز زي ما قالي أبويا
جهزت شنطتي واتحركت علي البلد اللي مش هقدر اذكر اسمها دلوقتي علي الاقل.. ساعة إلا ربع في عربية اجرة ماشية في طريق ضيق لحد لما السواق قالي
_ وصلنا يا أستاذ تقدر تنزل هنا وتمشي جوه الشارع ده هتلاقي القرية في وشك علي طول
شكرته ونزلت من العريبة وأتمشيت في الشارع ده لحد أخره بس مع كل خطوة كنت بسمع صوت صرخات وبتعلي مع كل خطوة.. دخلت القرية علي جنازة كبيرة وصوت الصراخ في كل مكان
كنت واقف قدام المشهد ده وبقول اه هي أول القصيدة كف'ر
الناس اتحركت علي المقابر.. أتمشيت لجوه شوية لحد ما وصلت لست كبيرة قاعدة على الأرض.. وقولتلها
_ سلام عليكم يا حجة.. بعد أذنك كنت بسأل علي بيت الشيخ سالم؟
_ هو ده اللي هناك يبني بس هو أكيد مع الناس في الدفنة دلوقتي
_ هو مين اللي مات يا حجة؟
_ قصدك تقول مين اللي لسه عايش يبني!!
_ يعني اي أنا مش فاهم؟
_ أحنا يبني كل يوم في الهم والغم ده.. كل يوم عيل من عيالنا ميت ومش ميت موتة طبيعية لا ده مقتول والقاتل مجهول يبني
_ طيب اي السبب؟.. أكيد يعني في سبب
_ السبب مجهول بس الكلام زاد علي مقبرة أثرية هنا في القرية وان الجن مش راضي لحد دلوقتي بأي دم اتقدمله وان التضحية دي هتستمر لحد ما الجن يرضي عنهم
بس ده خرافات يبني.. حتي الشيخ سالم بيقول انها خرافات
تعرف يبني احنا من كتر الاطفال اللي بتموت دي اتقال علينا قرية الاموات
...
سبت الست دي ومشيت وانا مش مقتنع بكلامها لكني ابتديت اقلق واخاف.. قربت من البيت اللي شورت عليه وخبطت.. شوية والباب أتفتح وشوفت بنت جميلة جداً كانت بتحسب ابوها رجع لكن لما شافتتي أنا رجعت لورا واستخبت ورا الباب وهي بتقولي
_ أنت مين؟
_ أنا موسي كنت عايز الشيخ سالم في موضوع مهم
_ بابا في الدفنة تقدر تستناه في الجامع وأنا هبلغه.. الجامع وراك اهو هناك
وقفلت البنت الباب.. رجعت عند الجامع ودخلت كان العصر بيأذن اتوضيت وصليت.. وقعدت أسبح شوية وسرحت.. فوقت علي صوت بيقولي
_ سمعت أنك بتسأل عني.. أنا الشيخ سالم أؤمر؟
_ أنا موسي ابن اخوك الرفاعي
_ الشيخ الرفاعي؟.. يا أهلا بابن الغالي بالحضن كبرت يا موسي ما شاء الله عليك
_ تسلم يا شيخ سالم.. ابويا حكالي عنك كتير وقالي انك تقدر تساعدني في اللي انا عاوزه
_ طيب مش هنتكلم هنا.. تعالي معايا البيت ناكل لقمة ونتكلم براحتنا
...
وروحت مع الشيخ سالم بيته وعرفت ان بنته اسمها فرحة.. جهزتلنا الغدا وبعد ما اكلنا وشربنا الشاي
بدأت أشرح للشيخ سالم انا عايز اي.. فرد عليا وقال
_عشان تقدر تواجه الجن لازم يكون ايمانك قوي.. اصل الجن انواع ودرجات منهم الشياطين والمردة والعفاريت وعشان تعالج الناس لازم تعرف انك ممكن تتأذي
الموضوع كبير مش صغير زي ما انت فاكر يا موسي
_ طيب ممكن سؤال.. هو اي حكاية موت الأطفال اللي في القرية دي؟
_ أممم انت اتكلمت مع مين يا موسي في الموضوع ده؟
_ ست كبيرة في السن بره في الشارع.. هو حضرتك قلقت كده ليه؟
_ لا أبداً بس كل الكلام ده خرافات.. هي جرا'يم قت'ل وان شاء الله القاتل يتمسك قريب
_ طيب وانا هقعد فين يا شيخ سالم؟.. معلش انت راجل عندك بنت ومش هينفع اقعد هنا
_ لا متخفش في بيت تبعي هنا هتقعد فيه..وانا هجيلك عشان اعلمك كل حاجه
...
خرجت مع الشيخ سالم لحد البيت وقالي هتقعد هنا يبني ولو عوزت اي حاجة كلمني علي الرقم ده
مشي الشيخ سالم وانا مش مطمن للبلد دي في حاجة غلط.. حاولت اني انام شوية لكن مفيش نوم
كلمت ابويا في التليفون وطمنته اني وصلت ومقيم دلوقتي في بيت تبع الشيخ سالم وحكتله علي تفاصيل اليوم.. بس
فاجئني لما قالي
_ واي رأيك في فرحة.. تعرف اني حاطط عيني عليها من زمان وعايز اجوزهالك.. اي رأيك لو اتكلمت مع الشيخ سالم في الموضوع ده
_ انا مش عارف ارد اقول اي.. انا مشوفتهاش غير مرة
_ طيب اسمع كلامي وانت مش هتخسر وفكر كويس
..
انا منكرش اني اتشديت ليها من اول نظرة بس مش لدرجة جواز.. فضلت افكر في كلام ابويا لحد ما قررت اني اخد الخطوة دي.. بدون الدخول في تفاصيل مش مهمة انا اتقدمت لفرحة وابوها وافق وفي ظرف ٣ شهور كنت متجوزها.. وليه رفضت اقول تفاصيل؟
عشان اللي جاي هو الاهم... فرحة كانت بتهرب من موضوع الخلفة كل ما كنت اتكلم معاها فيه كانت تتهرب من كلامي
كنت فاكر ان في عندها مشكلة لكن في يوم صحيت عشان اصلي الفجر خرجت من البيت عشان اروح الجامع لكني شوفت اللي خلاني اتجمدت مكاني شوفت علي الارض طفل بينازع المو، ت جسمه غرقان دم قربت منه وكان لسه في الروح.. ولسه هكلمه لقيته بيشاور ورايا لسه هتلفت ضربة علي دماغي وقعت علي الارض ولمحت واحد لابس جلبية وملثم بيجري وبعدها فقدت الوعي.. لكن لما فوقت شوفت... يتبع
