رواية انا والشيطان الفصل السابع 7
أنا والشيطان
بعد الجلسة بقيت محتارة في دكتور معتز !!!!!! ياتري هو ذئب في هيئة ملاك ؟ ولا ملاك وانا اللي انخدعت فيه وفكرت غلط انه ذئب !!!!!؟؟؟؟
خرجت من عنده ومروة جت قعدت جنبي وسألتني عن اللي حصل في الكشف .
حكيت لها علي كلام دكتور معتز معايا واني حكيت له عن الحاجات اللي تعباني وانه بصراحة لقيت منه انه انسان محترم جدا عكس ما كنت خايفه منه .مروة ابتسمت ابتسامه غريبة مش قدرت احدد معناها .
بعد الشفت بتاعي روحت البيت ودخلت نمت علطول من التعب .حلمت اني كنت راكبة مركب لوحدي والمركب كان في نص البحر وبعدين موج البحر علي اوي والمركب اتقلب في البحر وانا كنت بحاول اعوم ومش عارفة وكنت خايفة اوي ودعيت ربنا انه ينجيني وبعدين لقيت واحد معالم وشه مش واضحه جاي ينقذني في مركب تاني بيقرب مني واخدني في مركبه ومشي وفجأة طلع حيوان غريب من البحر وحاول يخطفني ويأذيني ولما الراجل اللي انقذني دافع عني وصده .الحيوان ده حاول يقلب المركب وضرب المركب من جنبها علشان تتقلب .........
وفجأة صحيت من النوم ....... حلم تاني مفزع يااااه .بس الحمد لله مش مفزع اوي زي قبل كده .
لما خرجت من اوضتي لقيت خالتي قاعدة مع ماما .بس اول ما خرجت سكتوا .
روحت سلمت علي خالتي وبعدين جهزت الفطار وقعدت فطرت معاهم. وبعدها خالتي مشيت .
سألت ماما عن سبب انهم قطعوا كلامهم لما خرجت عليهم .قالتلي ان خالتك طلبت ايدك لابنها فارس .
قولت ماما تاني هنعيد الكلام ده ؟!! مش هما طلبوا نفس الطلب قبل كده وانا قولت اني حاساه زي اخويا !!
ماما قالتلي بس الظروف دلوقتي اتغيرت وانتي يا حبيبتي بقيتي مطلقة يعني كويس انه طلب ايدك تاني .وهو مادام طلبك تاني للجواز يبقي بيحبك .
رديت عليها اني لسه عند موقفي زي ما هو .
ماما قالتلي ان خالتك ممكن تقاطعنا العمر كله لو رفضتي تاني .
سكت ومش رضيت ارد عليها ودخلت اوضتي .مسكت التليفون العب فيه شوية .
واثناء لعبي في الموبايل لقيت فارس ابن خالتي بيتصل بيا ...
كنت مترددة و مش عاوزة ارد عليه لكن في النهاية رديت عليه .
حاول فارس انه يبين ليا انه بيحبني من زمان وانه مش اتجوز لحد دلوقتي علشاني وعنده استعداد يعمل اي حاجه علشاني .
حاولت افهمه كتير اننا زي الاخوات مفيش فايده وقولتله ان طباعنا وحياتنا مختلفة نهائي واننا مش ممكن نتجح كزوجين .
فارس قالي انه ممكن يغير نفسه وطباعه علشان يرضيني وطلب اننا نعلن خطوبة وفي فترة الخطوبة لو انا مش لاحظت انه اتغير علشاني او زعلني في اي حاجة يبقي من حقي اني افسخ الخطوبة .
حسيت نفسي اني اتحاصرت وان مفيش حجة اتحجج بيها اني مش اوافق عليه .
وافقت علي الخطوبة وفعلا تمت الخطوبة وخالتي وفارس كانوا مش مصدقين نفسهم اني وافقت .
دكتور معتز عملي جلسة تانية في عيادته الخاصة وكانت اطول من الجلسة الاولي .
دكتور معتز سألني فيها عن طفولتي والحاجات اللي كنت بحبها وانا صغيرة والحاجات اللي كنت بخاف منها .
حكيت له كل حاجه وكنت بتكلم معاه وكأني بتكلم فيها مع نفسي .
اتكلمت معاه وحكيت له عن علاقتي بماما وبابا وانا صغيرة واني كنت دايما بلعب لوحدي لان مش عندي اخوات .
وعلاقتي بالمدرسين بتوعي في المدرسة وبزمايلي في المدرسة .
سألني عن اذا ما كنت اتعرضت للتحرش في فترة الطفولة او المراهقة من المدرسين بتوعي او من زمايلي .
اتكلمت معاه بكل صراحة زي ما اكون بتكلم مع نفسي وعدت عليا السنين دي زي ما يكون فيلم وانا قاعدة بتفرج عليه .
انتهت الجلسة وبعدها حسيت اني بتحسن اكتر والاحلام المخيفة انتهت ومش اتبقي الا شوية اصوات كنت بسمعها احيانا وانا قاعدة لوحدي بس .
ماما وخالتي فرحوا اوي بخطوبتي انا وفارس .
وبعد ما كانت خالتي بتشجعني دايما اني اروح لعم مندور قالتلي خلاص مشوار عم مندور مش له لازمة .
بعد الخطوبة لاحظت ان دكتور معتز بعد ما عمل ليا جلستين وكنت بدأت اتحسن والحاجات المخيفة اللي كنت بشوفها في الاحلام وفي الحقيقة مش بقيت اشوفها خالص .
كمان فارس يوم بعد يوم غير من نفسه كتير. وبطل الخروج والقعدات مع اصحابه وبقه كل اهتمامه بيا انا لوحدي .وبعد ما كان بيشرب وبيعمل حاجات كتير غلط بطل كل ده واتغير بجد او حاول يقنعني بكده علشان يتمم الجوازة .
بعد خطوبتي لاحظت ان دكتور معتز بدأ يتغير معايا او يمكن بيتهيألي مش قادرة اتأكد لدرجة انه بيتهرب من ميعاد الجلسة .
وفي يوم وانا في الشفت بتاعي وبعد ما مريت علي كل المرضي وقبل الفجر بحوالي ساعه تقريبا وكنت قاعدة لوحدي شوفت حد مش ممكن كنت اتوقع اني اشوفه في المستشفي ابداااا.
شوفت عم مندور داخل عليا وانا قاعده لوحدي وبيبتسم ابتسامه خبيثة اوووي .
