رواية شيطان من البشر الفصل الرابع 4 والأخير بقلم محمود الامين
= حضرتك الشيخ محروس مش كده؟
_ اه انا الشيخ محروس في ايه؟
= حضرتك عندك امر ضبط واحضار.. ويا ريت تتفضل معانا من سكات ومن غير شوشرة
_ طيب ممكن افهم بس في ايه؟
= هتفهم في قسم الشرطه
...
خرجت معاهم وانا قلقان البلد كلها كانت واقفه تتفرج حرفيا، ركبت معاهم البوكس واتحرك بيا على القسم
لما وصلت هناك دخلوني لشخص قاعد على مكتب من الواضح انه رائد شرطه، طلب من العسكري يخرج بره واتكلم وقال
_ انت عارف انت هنا ليه يا شيخ محروس؟
= في الحقيقه لا مش عارف.. واحب اعرف؟
_ انت هنا متهم بالتحريض على الفسق والفجور وكمان التحريض على القتل والسرقه يعني مجموعه تهم كده توديك ورا الشمس
= في دليل على كلام حضرتك ولا مجرد كلام مرسل؟
_ في شهود عليك منهم مثلا مخلص اللي انت طلبت منه انه يسرق المحل عادي وقلتله ده حقك وانه مش حرام وكانت النتيجه انه سمع كلامك ولما حاول صاحب المحل يبلغ عن السرقه مخلص قتله بالغلط لكنه جه امبارح واقر بكل حاجه، وعلى الاساس ده بدأ التحقيق، مع كل الناس اللي حصلت عندهم الجرايم الفتره الاخيره والنتيجه إن كلهم اتهموك ان انت اللي حرضتهم على افعالهم سواء كانت سرقه او قتل او انتهاك عرض
= الكلام ده محصلش، ده كدب وتلفيق وانا عارف مين اللي وراه
_ مين اللي وراه بس خلي بالك لو هتجيب سيره حد بشكل رسمي لازم تجيب سيرته بدليل
= في الحقيقه انا ممعيش دليل، بس هو الشيخ طاهر اللي جه البلد عشان ياخد مكاني واكيد هو اللي حرض الناس عليا
_ طيب تعرف ان الشيخ طاهر نفسه بتهمك بقتل حسان اللي لقيوه غرقان في الترعه
= محصلش يا باشا، وبعد اذنك انا هطلب محامي طالما اتهامك ليا رسمي
....
وبعد ما طلبت المحامي الظابط أمر بحبسي اربع ايام على ذمه التحقيق لحين عرضي على النيابه... ودي كانت اول مره ادخل الحجز طبعا مش عايز اوصف الوضع جوه كان عامل ازاي؟
لكني قعدت مع نفسي بفكر هعمل ايه؟
لكن فجأة انوار المكان بدأت ترعش الناس كلها اللي في الحجز حصلهم زي حاله اغماء، ولقيته واقف قدامي من تاني ايوه الشيطان واقف قدامي ببدلته الشيك وهيئته البشريه وأتكلم قال
_ متخافش على محروس، مفيش حد هيقدر يعملك حاجه انت في امان بس انا عندي ليك عرض لو قبلته اوعدك هترجع البلد مرفوع الراس والشيخ طاهر مش هيكون ليه وجود، وبدل ما انت متبهدل انت هترفع على الاعناق والناس كلها هتهتف باسمك
= وده ازاي واكيد اهل البلد كلهم دلوقتي عرفوا انا هنا ليه؟... بس قول ايه العرض بتاعك؟
_ مفيش حاجه بسيطه خالص مقابل حريتك هتسجدلي بس!
= نعم!!... انت بتقول ايه مستحيل طبعا، انا مش ممكن اعمل كده مش ممكن اغضب ربنا
_هههههه، ضحكتني مش ممكن تغضب ربنا، وكل اللي عملته ده كان ايه يا ابني انتوا عديتوا الشيطان بمراحل انتوا البشر بقيتوا خير معلم للشياطين
= حتى لو كنت عملت حاجات كتير غلط فده كان بسببك وممكن اتوب عادي
_ تتوب.. هو انت فاكر الموضوع سهل كده لا انت لسه مشفتش وشي الثاني
....
فجاه شكله البشري اتحول لمسخ دميم جلده تحول لللون الازرق شعره كله وقع اسنانه بقت اشبه بالدبابيس وطلع منه صوت اجش وقال اوعى تفتكر اني هسيبك تتحبس لا انت هتخرج بس هتواجه الناس اللي شبهك الناس دلوقتي اللي مستنيه خروجك عشان ينهشوك لانك السبب في كل حاجه حصلتلهم كان قدامك فرصه انك تكون من اتباعي على الارض وتعيش في جنه على الارض بس كالعاده انتم اغبية وفي وقت الجد مش معاكم غير الشعارات رغم انكم بتعملوا ذنوب كتير ومش بتتعلموا
..
واختفى من المكان والناس كلها فاقت وهي مش فاهمه حاجه تاني يوم اترحلت على النيابه والمفاجاه ان كل الناس رجعوا في اقوالهم والنيابه اخلت سبيلي
ورجعت على البلد حرفيا كانت كل الناس بتبصلي باستحقار، مكنتش قادر ابصلهم دخلت بيتي وحاولت اني متكلمش مع حد لكن الباب خبط لما فتحت لقيت اهل البلد كلهم قدام الباب واتكلموا وقالوا
_ اسمع يا جدع انت احنا عرفنا كل حاجه وانك انت اللي ورا كل حاجه حصلت الفتره اللي فاتت وعشان كده هنديلك فرصه تمشي وتسيب البلد دي والا هتكون انت اللي اخترت نهايتك او بمعنى صح اخترت موتك
= يا جماعه يا جماعه انا ندمان، والله ندمان على كل حاجه عملتها ارجوكم سامحوني وساعدوني اتوب انا في النهايه بشر يخطئ ويصيب
_ الكلام ده مينفعش معانا، احنا مش هنصدقك تاني عاوزنا نصدق شيطان طب ازاي؟... قدامك يومين يا تسيب البيت يا الا استحمل بقى اللي هيجرالك
...
قفلت الباب وانا سامع صوت ضحكوا من ورايا، بصيت ورايا لقيته واقف وبيقولى
_ انت بجد عاوز تتوب بعد كل اللي عملته وفاكر الناس هتغفرلك انسى قدامك يومين يا تنفذ اللي قولتلك عليه وتبقى من اتباعي وساعتها هرجع الناس دي كلها تحت طوعك يا الا تكمل في طريق التوبة ده وساعتها محدش هيرحمك
= بعد كل اللي عملته عشانك بتبيعني خلاص انا مشيت وراك في كل حاجه طلبتها مني قتل سرقه تحريض على علاقات محرمه كل ده وجاي في الاخر تبيعني
_ لا لا محروس متشيلنيش ذنبك انا بريء منه كل واحد منكم عارف الصح من الغلط والخير من الشر والحلال من الحرام وانتوا اللي بتختاروا مش انا انا مجرد وسواس ممكن تسمع كلامي وممكن لا هو مش انت ربنا ميزك بالعقل اخترت تمشي طريق الشر ليه ودلوقتي جاي تلوم عليا وتقولي انت السبب
...
سبته وخرجت ورحت على بيت الشيخ طاهر خبطت على الباب وفتحلى وقلتله
_ انا عايز اتوب عايز ارجع عن طريق المعصيه بس هو مش سايبني في حالي اعمل ايه عشان اتوب
= ده بجد ولا ملعوب من الاعيبك؟
_ والله العظيم بجد انا ندمت على كل حاجه عملتها انا كنت ماشي في طريق الشيطان وندمت بعد كل حاجه عملتها عشانه بيقولي انا برئ من ذنبك
=ماهو ده الشيطان يا ابني؟.... ربنا قال في كتابه العزيز
بسم الله الرحمن الرحيم
كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ
صدق الله العظيم
_ عندك حق يا شيخ طاهر بس ارجوك ساعدني انى اتوب
...
الشيخ طاهر اخدني ورحنا على الجامع اتوضينا وصلينا ركعتين لله وقالى ادعي لربك انه يغفرلك وتوب اليه توبه نصوحه وربك بيغفر الذنوب واعزم انك لا تعود للمعاصي مره اخرى
****
السلام عليكم انا الشيخ طاهر اخر مره شفت فيها محروس كان معايا في الجامع وكان ندمان على كل حاجه عملها وتاب ورجع لربنا واتكلمت مع الناس واقنعتهم انه يكمل في القريه وانه مش هياذي حد لكن بعدها سمعنا صوت صراخ عالي جاي من بيته ولما رحنا هناك ملقتش محروس اللي انا اعرفه واللي لسه كان معايا من ساعات، لقيت شخص مجذوب لابس جلابيه مقطعه دقنه كبيره شعره منكوش ماسك في ايده صفاره وعمال يقول انا مين انا محروس انا مش مجنون، الله اعلم العهد اللي كان بينه وبين الشيطان كان ايه عشان يوصله انتقامه منه ومن توبته بالشكل ده، في النهايه احب اقولكم انه فعلا هو بيحاول يخلي ليه اتباع كتير في الارض لنشر الفساد لكن صدقوني احنا اقوى واحنا اللي على حق وهيجي يوم وهينتصر فيه الخير على الشر وهتكون دي النهايه الابديه.
تمت
