رواية العابر الفصل الرابع 4 والأخير بقلم محمود الامين
الدم غرق الأرض في لحظة... بس اللي مكنتش عامل حسابه إن سمر بنتها تاجي في الوقت ده
قربت منها وهي واقعة على الأرض كنت هخلص عليها هي كمان، لكن واضح إن صوت صرختها سمع البواب بتاع الڤيلا ولقيته جاي يجري وهو بيقول ينهار اسود.. يا ست هانم يا ست هانم
يا وقعة سودة يا ولاد الست سوزان ماتت.. الست سوزان ماتت
وجري على سمر اللي كانت على الأرض يا ست سمر ست سمر فوقي أبوس إيدك... قومي ياست سمر
...
في الوقت ده تليفون خالتى سوزان رن.. وقام البواب بسرعة يرد على التليفون.. وفتح الخط وقبل ما يتكلم سمعت صوت خالى سليم بيقولها
صلاح عايش يا سوزان.. صلاح عايش
رد عليه البواب اللي كان في حالة من الذعر وقال
لا انا عوض البواب يا سليم بيه.. الست سوزان ماتت ماتت يا بيه في حد إبن حرام موتها يا بيه
والست سمر واقعة على الأرض ومش بترد عليا، الحقنا يا بيه الحقنا أرجوك يا بيه
خالى سليم كان بيسمع الكلام ده وأنا متأكد إنه بيعيش حالة من الصدمة دلوقتي... سبتهم في الوقت ده ومشيت ورجعت على المستشفى من تاني
بس المرة دي اتصدمت بجد.. عشان أول ما وصلت لقيت الممرضات بيجروا يمين وشمال ومكنتش فاهم حاجة لكن لقيت الدكتور بيقول جهاز الصدمات بسرعة
ولقيت الدكتور بدأ يضرب جسمي اللي علي السرير بصدمات الكهربا ومن الواضح إني خلاص هموت وروحي الهايمة دي هتختفي قبل ما تاخد حقها من الباقي
خرجت من المستشفى بمجرد ما القلب رجع ينبض من تاني وفرصة الأنتقام بتتجدد عشان أكمل
والمرة دي مع خالى سليم... اللي لما عرف اللي حصل لسوزان وبنتها قرر إنه يهرب من البلد خالص
لما وصلت بيته لقيته مجهز شنطته وداخل ياخد دش.. بس في معلومة محدش كان يعرفها عن خالى سليم غيري خالى سليم عنده ضيق تنفس ومش بيعرف يستحمي بمية سخنة عشان البخار بيسببله ضيق تنفس شديد ومن هنا قررت انى هموته بالشكل ده
وبمجرد ما نزل خالى سليم تحت المية الساقعة فتحت أنا المية السخنة على الأخر
متحملهاش على جسمه وفي نفس اللحظة كان بدأ البخار يملى الحمام... بدأ خالى سليم يكح بصعوبة وكل ما كان يحاول يقفل المية السخنة كنت ارجع افتحها تاني ووقع خالي سليم من ضيق التنفس علي حرف البانيو براسه اللي أتفتحت وبدأ دمه يتصفي
سبته ومشيت وروحت علي المستشفى لسمر اللي كانت في غيبوبة بسبب الصدمة العصبية.. بس دي مأخدتش معايا وقت خالص أنا كل اللي عملته إنى فصلت كل الأجهزة عنها وسبتها تنازع قدام عينيا لحد ما ماتت
...
خرجت من المستشفى على بيت عمي محفوظ لكن ملقتهوش هناك، لكن عرفت إن هو في المقابر دلوقتي قاعد بيعيط قدام قبر إبنه، لقيت في جروف الحفر قريب منه رفعته وهو سرحان في العياط والحرقة وفوق دماغه بكل غل وكره مرة وأتنين وتلاتة كنت حاسس اني بنتصر لنفسي عن كل اللي ظلموني
وقع عمي محفوظ على الأرض بعد ما راسه أتهشمت تماماً والدم غرق الأرض
وفجأة كل حاجة حواليا ضلمت ومكنتش فاهم حاجة
....
فتحت عينيا لقيت نفسي على سرير في مستشفى، إيوة أنا صلاح الصياد... أنا أخر حاجة فكرها إني عملت حادثة علي الطريق... وبعدها شوفت حلم طويل جداً.. شوفت نفسي وأنا بقتل عيلتي واحد واحد
بس اللي حلمت بيه إن عيلتي هما اللي ورا الحادث، بس أكيد ده مجرد حلم يعني
في الوقت ده دخل عليا الدكتور وقالى
حمدالله على السلامة يا بطل، أخبارك إيه دلوقتي؟
رديت عليه وقولتله
الحمدلله يا دكتور، هو مفيش حد سأل عليا
وقبل ما الدكتور يتكلم، لقيت الشخص داخل من الباب وبيقولي حمدالله على السلامة، في الحقيقة أنا معرفوش
بس هو عرفني بنفسه وقال
_ معاك الرائد حمزة، في الحقيقة أنا عندي ليك خبر مش هيعجبك
= خير يا فندم
_ عيلة حضرتك.. عمك محفوظ وابنه وخالك سليم وخالتك سوزان وبنتها كلهم ماتوا في ظروف غامضة
= ماااتوا؟!... إزاااى؟
_ الاستاذ محفوظ مات قدام قبر إبنه بعشرين ضربة جروف على الرأس، إبنه تامر مات متكهرب في لوحة الكهرباء الخاصة بمخزن الملابس
خالك سليم مات في الحمام بعد ما نزف كمية دم كبيرة وده بسبب إن دماغه أتخبطت في حرف البانيو
خالتك سوزان إدبحت في بيتها بسكينة حادة، وسمر بنتها فاتت بسبب فصل الإجهزة عنها وهي في العنايه المركزة من قبل مجهول
= مش فاهم، يعني هما أتقتلوا؟
_ للأسف إيوة، وعشان كده أنا جاي أسألك لو كان ليهم إي عداوات
=لأ معرفش حاجه عن الموضوع ده
_طيب هل في خطر على حياتك يعني ممكن نأمنك؟
= لا يا فندم... بشكرك جداً
...
كنت مصدوم من اللي حكاه الظابط، ده نفس اللى شوفته في الحلم.. إتحقق كأنى كنت بشوف اللي بيحصل، وبعد إسبوع واحد إتكتبلي خروج وإني أكتمل شفائي بالكامل
وعشان كده ولحد ما أعرف ده حصل إزاي؟!.. خدت قرار السفر.. عاوز أسافر عاوز أبعد عن هنا
جهزت نفسي عشان أسافر حجزت تذكرة لتركيا ذهاب بلا عودة... ويوم السفر كنت قاعد في مكتبي بخلص شوية ورق مهم.. دخل عليا عم عيد البواب وقالى
_ في حد جيه أداني الجواب ده لحضرتك ومشي
=مين ده؟
_ والله هو طفل صغير بس قالى لصلاح ومشي
...
أستغربت بس فتحت الجواب وكان مكتوب فيه الآتي
* صلاح أنا عمتك ورد أنا عاوزاك تقري الجواب ده كويس وتسامحنى ومعني إنه وصلك يبقي خلاص أنا قابلت رب كريم، الموضوع بدأ لما إنت طردت عمك من الشركة
عمك أجتمع بالعيلة كلها بما فيهم أنا وأتفقنا نخلص منك بس عشان كلهم كانوا ميعرفوش يعملوا كده
لجؤا ليا وفعلا ده حصل وأنا اللي دبرت ليك الحادثة في مقابل نص الثروة
ولما نفذت وقالوا إنك مت.. عمك قالى إمك في العش ولا طارت ملكيش جنيه عندي... الدم جري في عروقي وقررت أنتقم عشان كده عملتلك حاجه اسمها تناسخ أرواح كنت أتعلمتها من جدتك زمان.. وفعلا ظهر ليك شبيه في صورة شبح عابر من عالم لعالم العابر ده نفذ كل حاجة كنت عاوزاها وخلصت من العيلة دي كلها.. يعني مكنش حلم يا صلاح كل حاجه حصلت أنا اللي عملتها بس بعد ما خلصت حسيت بتعب شديد وإتنقلت للمستشفي وهناك عرفت إني عندي مرض نادر جداً وهموت خلال أيام.. كتبت ليك الرسالة دي وأتمني إنك تسامحني
عمتك ورد
****
مكنتش مصدق اللي قريته... مع الأسف مش هقدر أسامح حد فيكم مش هقدر
أخدت شنطتي ومشيت وركبت الطيارة وأنا بسأل نفسي سؤال.. هو كده دور العابر إنتهي بتأديته المهمة ولا لسه موجودة منى نسخة عايشة في مكان تاني؟
تمت
