رواية شيطان من البشر الفصل الثالث 3 بقلم محمود الامين
ظهرت واحده كانت بتعيط معرفش مين دي؟... لقيت ام عوض بتبصلها وبتقولها حسبي الله ونعم الوكيل فيكى، انتى السبب في موت عيالي... الناس كانت واقفه مش فاهمه حاجه بس انا كنت فاهم
وفي الوقت ده دخل علينا راجل لابس جلابيه وشكله صعيدي وواضح انه ابو البنت دي، اول ما البنت شافته كانت هتموت من الرعب قرب منها وقالها حطيتي راسي في الرمل ليه؟... عملتي كده ليه؟
الناس كانت بتحاول تتدخل وتحاول تهديه عشان محدش كان فاهم حاجه اصلا... لكن في وسط ده الراجل خرج من جيبه سكينه وطعن بيها بنته كذا طعنه
الصراخ زاد والشرطه كانت في كل مكان، اما انا فرجعت البيت وكأني معملتش حاجه... بس المره دي لما رجعت البيت مسمعتش صوت في عقلي ولا حاجه لا، المره دي
ظهرلي بنفسه ظهر بشكل بشري عشان مخافش منه كان مبتسم وباين عليه الفرحه وأتكلم وقال
_ كل مره بتبهرني يا شيخ محروس، انت بتعمل اللي احنا عاوزينه واقدر اقولك انك تفوقت على الوالد انت اذكى منه
= انا عايز اعرف ايه المطلوب مني تاني، لو فضلت على نفس الاسلوب هتكشف وساعتها الناس دي مش هتسمي عليا
_ هو في الحقيقه انا ظهرتلك المره دي مش عشان كده، اقدر اقولك ان اننا داخلين حرب في شخص جاي وهيسكن في القريه دي، اسمه الشيخ طاهر وجوده خطر علينا وعليك انت بالتحديد
= مش فاهم وجوده خطر ازاي يعني؟
_ يعني الشيخ طاهر ده راجل متدين وعارف ربنا يعني لو اكتشف اللي انت بتعمله هيخلي الناس تقلب عليك
= طيب وايه الحل دلوقتي؟
_ طاهر ده لازم ميطولش في القريه، لازم تكره الناس فيه لازم تطلعوا نصاب او دجال المهم انك تقدر تعمل ده بسهوله انت الناس بتثق فيك وهتصدق كلامك المهم انك متوقعش قدامه في اي موقف يثبت من خلاله انك بتاذيهم مش بتساعدهم.. فهمت؟
....
واختفى المخلوق ده من قدامي.. بصراحه كنت قلقان من كلامه اصله طالما ظهر بنفسه عشان يبلغني حاجه زي دي يبقى معنى كده ان الشيخ طاهر ده مش سهل
عدى اليوم ده وتاني يوم الصبح، خرجت من البيت على صوت عربيه وواحد بيكلم شخص لابس جلابيه بيضة ودقنه طويله وماسك في ايده سبحه وبيقوله نورت البلد يا شيخ طاهر، قربت منه وقلتله
_ السلام عليكم ورحمه الله وبركاته، حضرتك ساكن جديد هنا
= وعليكم السلام ورحمه الله وبركاته، ايوه ان شاء الله حضرتك مين؟
_ انا الشيخ محروس شيخ الجامع وحضرتك مين؟
= انا اسمي الشيخ طاهر، انا معالج من المس والسحر كان مكلمني واحد من القريه دي ان في حاجات غريبه بتحصل وناس بتموت كتير في جرايم قتل بسبب فتن وعشان كده انا جيت اطمن بنفسي واشوف لو كان الكلام ده صح وربنا يقدرني على فعل الخير
_ بس انا موجود هنا واللي بيحصل عادي ده مقدر ومكتوب
= اكيد انا مش بقلل من وجودك بالعكس ده انا هستفيد منه جداً انت هتفيدني كتير يا شيخ محروس وايدنا في ايد بعض عشان نشوف ايه اللي بيحصل في البلد
_ ان شاء الله خير
....
دلوقتي بس فهمت ليه حظروني منه، ده مش مجرد واحد جاي يسكن ده جاي يشوف المشاكل اللي بتحصل في البلد الفتره الاخيره بس يا ترى هيعرف يتصرف ويمنع البلاوي اللي جاية في الطريق ولا لا
فات اليومين اللي كنت مديهم للست سوسن ورجعتلي تاني
كنت جهزتلها عمل عشان تاذي بيه مرات ابنها اخدته ومشيت بعد ما دفعت فلوس كثير، العمل المفروض اخره اسبوع هيخلي كل اللي في البيت يصابوا بسحر الجنون حياتهم هتتقلب خراب لحد ما هتوصل للقتل حد فيهم بقى هيخلص على التاني
نمت في اليوم ده وحلمت حلم غريب شفت الناس واقفين زي الاصنام وبيتحركوا باشاره من الشيخ طاهر ناحيه بيتي وكل واحد منهم معاه مشعل مولع كلهم في وقت واحد رموها على بيتي وشفتني وانا النار بتاكل في لحمي.... صحيت من النوم مفزوع باخد نفسي بالعافيه، الكابوس ده بيصدق على كلام المخلوق او خليني اقول بيصدق على كلام الشيطان اه الشيطان يا جماعه مستغربين ليه؟
ما هو اللي بيكلمني في عقلي ده وظهرلي من كام يوم وحذرني من الشيخ طاهر ده الشيطان اللي بيقول عليا اني تابع ليه
يومها بالليل خرجت من بيتي وشفت واحد من اهل البلد اسمه حسان داخل بيت الشيخ طاهر واضح انه حسان ده هو السبب ان الشيخ طاهر ده يجي هنا، قعدت على كنبه قدام البيت مستنيه يخرج لكنه خرج ومعاه الشيخ طاهر وراحوا على بيت سوسن، عرفت ان مفعول السحر اشتغل وانه حسان جايب الشيخ طاهر من بيته عشان يوريله اللي بيحصل... وبعد شويه رجع الشيخ طاهر على بيته وقفل عليه بابه، الساعه كانت وصلت واحده بالليل والدنيا فاضيه ومفيش غير حسان قاعد ناحيه الترعه بيشرب سيجاره بصيت حواليا واتاكدت ان مفيش حد شايفني وكتمت نفسه ايوه كتمت نفس حسان كان بيحاول وبيقاوم ولكن بدون فايده وبعد ما اتاكدت ان روح خرجت رميته في الترعه ورجعت بسرعه على بيتي
....
مكنتش عارف انا عملت كده ازاي؟ كل تفكيري ان اللي عمل كده يموت اللي جاب الشيخ طاهر البلد دي لازم يموت مكنتش بفكر في اي حاجه تاني.
وتاني يوم وكان يوم جمعه صحيت على صرخه جديده واهل البلد متجمعين عند الترعه عشان يخرجوا جثه حسان رحت وقفت معاهم وانا بقول لا اله الا الله انا لله وان اليه راجعون
جات الاسعاف واخدت جثته واهل البلد واقفين في سكون تام لحد ما بصيت على الشيخ طاهر واللي لقيته بصصلي بصه كلها شر وكانه عرف عني حاجه
بس في الحقيقه احنا ملحقناش نفوق من موت حسان عشان بعد ساعه بالظبط، الست سوسن ترمي مرات ابنها من الدور التالت وهي بتصرخ زي المجنونه وبتقول مش انا اللي قتلتها وفي عز ما انا واقف سرحان لقيت الشيخ طاهر في وشي وبيقولى... قتلت حسان ليه؟
رديت عليه وقلتله
_ انت بتقول ايه، انت ازاي تتهمني اتهام زي ده؟
_ انا واثق ان انت اللي قتلته.. زي ما واثق بالظبط انك انت اللي ورا كل حاجه بتحصل في البلد دي.. الست سوسن
قلتلى انك انت اللي اديتها العمل عشان تاذي بيه مرات ابنها والمشكله انها مش فاكره اي حطيته فين كانت مغيبه وهي بتتكلم معايا كانها اتجننت
= انا مالي باللي انت بتقوله ده اديك انت اللي قلت بنفسك ست مغيبه مكنتش في وعيها بتقول كلام وخلاص
_ نفسي اصدقك بس مش عارف، بس تاكد اني لو عرفت انك انت اللي ورا اللي حصل ده انا مش هسيبك
...
مشي من قدام الشيخ طاهر وقفلت الباب ولسه هدخل لجوه الباب خبط تانى ولما فتحت كانت الصدمه.. يتبع الجزء الرابع والأخير
....
