رواية احبها فتزوجني الفصل الثاني 2 والاخير بقلم اسراء ابراهيم

رواية احبها فتزوجني الفصل الثاني 2 والاخير بقلم اسراء ابراهيم 

الجزء الاخير

فجأة ريان حض*ن سارة بدون سابق انذار

ريان بتوهان /وحشتيني اوي اوي ،، متعرفيش انا كنت حاسس بأيه وانتي بعيدة عني ومش شايفك ،،كأن روحي كانت مفارقاني ورجعتلي بوجودك معايا دلوقتي

سارة بصدمة وهي بتحاول تبعد عن ريان/ انت اتجننت يا ريان ،، ايه اللي بتقوله ده ،، انت ازاي تعمل كدة وازاي تفكر في كدة اصلا ،،انا مش فاهمة حاجة

ريان وهي مركز في عنيها / هششش متفكريش في اي حاجة وخلينا بس في اللحظة الجميلة اللي بتجمعنا سوا ،، وانك اخيرا معايا وبقيتي ليا اي حاجة تاني مش مهم

سارة بغضب/ انت بتقول ايه يا بني ادم ،، انت بتتكلم كأننا فعلا لسة متجوزين جديد وعن قصة حب كمان ،،انت مجنون ،، انت عارف انت كنت بالنسبالي ايه وبعاملك علي انك ايه ؟

ريان بدون وعي قرب من سارة ومسك ايديها وكانه في عالم تاني

ريان بتوهان/ انتي ليه مش مصدقة اني بحبك واني عمري ما هنساكي ،، ليه مش قادرة تصدقي اني مكنتش قادر اعيش من غيرك ،،كنت بشوف وشك في كل مكان ،، نيرة انا ما صدقت انك رجعتيلي تاني

صدمة شلت كيان سارة ،، كانت كلمة نيرة بتتردد في عقلها وهي بتستوعب كلام ريان وبتحاول تفهم كلامه ووقتها عقلها نبهها ورددت بتهتهة وهي بتبصله بخوف

سارة بصدمة / نيرة؟،، انت قولت نيرة ؟

ريان بتلقائية/ ايوة يا حبيبتي ،،انتي ليه مش قادرة تصدقي اني لسة بحبك ،، نيرة انتي رجعتيلي تاني ومش هتسيبيني صح ؟ قولي انك مش هتسيبيني تاني ؟

ريان كان بيتكلم بطريقة غريبة خلت سارة تخاف وتبص حواليها برعب ،،قربه منها خلي جسمها يتنفض فكان رد فعلها انها ضر*بته بالق*لم علي وشه وهي بتبصله بدموع نازلة من عنيها زي الشلال

سارة بانهيار/ فوق يا ريان ،،انا مش نيرة ،، انا سارة افهم بقي

قالت كلامها وجريت علي اوضة فرح وقفلت الباب عليها بخوف ووقفت ورا الباب وبقت تعيط بحر*قة وبرة كان واقف ريان وحاطط ايديه علي وشه بصدمة والدموع نازلة من عنيه بصمت وهو بيستوعب اللي حصل

.........................

تاني يوم كانت واقفة نيرة مع فرح في المطبخ وبتعملها فطار وكانت كل شوية تبص علي باب المطبخ بخوف وقلق

سارة بحب/ ها ،،ايه رأيك بقي نفطر في البلكونة انا وانتي

فرح ببراءة / ماشي موافقة

سارة ابتسمت واخدت فرح البلكونة وفضلو قاعدين سوا وكانت بتضحك وتهزر مع فرح لحد ما سمعت صوت ريان

ريان بابتسامة/ انتو صاحين من بدري بقي وكمان فطرتو من غيري

فرح ببراءة/ اه يا بابي ،، مامي فطرتني وكمان لعبنا سوا

اتوترت سارة من كلمة مامي اللي قالتلها فرح وخافت احسن فرح هي كمان شايفاها نيرة اختها

ريان بابتسامة/ واضح انك حابة طنط سارة اوي مش كدة ،، عشان كدة بتقوليلها يا مامي

فرح بتأكيد/ ايوة ،،هي كمان شبه مامي فانا هقولها يا مامي ،،ممكن يا سارة ؟

سارة بتهرب/ طبعا يا قلبي ،، يلا تعالي نروح نغسل ايدينا واغيرلك هدومك

ريان بهدوء/ فرح روحي انتي اوضتك علي ما اتكلم مع سارة في كلمتين

مشيت فرح علي اوضتها فقامت سارة بخوف حسه ريان فغمض عنيه بحزن وبعدين فتح تاني وهو بياخد نفسه بجدية

ريان بجدية / سارة لو سمحتي اقعدي ومتخافيش ،،انا والله عمري ما هأ*ذيكي

سارة بحد*ة/ والله كويس انك اتأكدت اخيرا اني سارة ،، وبعدين انا بعد اللي حصل لازم اخاف منك ،، انت متعرفش انت حسستني بإيه

ريان بحزن/ انا اسف يا سارة ،، بس غصب عني ،، انتي عارفة ان نيرة كانت كل حاجة في حياتي ،، غصب عني مش قادر اتخيل حياتي من غيرها

سارة بسخرية/ تقوم تتجوز اختها توأمها عشان توهم نفسك انها ممتتش وانها لسة جمبك ،، بس انا ذنبي ايه ،، ذنبي ايه في كل ده ،، انا في يوم وليلة بقيت مسئولة عن بيت وزوج وطفلة وحياه مش حياتي ،، وكمان المفروض اني اتعامل مع الشخص اللي كان جوز اختي انه جوزي وزود عليهم كمان انه الاقيه بيتعامل معايا علي اني هي ،،وكأني خلاص مبقاش ليا وجود في الحياه وانا عايشة ،، انا عاذراك يا ريان وعارفة انت قد ايه كنت بتحب نيرة وانا كمان عمري ما هشوفك غير جوز اختي وعشان كدة بقولك اني هكون موجودة بس عشان فرح ولما هي تكبر شوية وتقدر تعتمد علي نفسها ويكون ليها حياتها المستقلة هطلقني لو سمحت وياريت من هنا لحد ما ده يحصل متحاولش تتعامل معايا غير في اللي يخص فرح وبس

ريان بتنهيدة/تمام يا سارة ،، انا بس مش عاوزك تزعلي مني علي اللي حصل امبارح ،، انا كل اللي فاكره هو اني كنت عايز احس بوجود نيرة في حياتي من تاني

سارة بثقة/ وعشان كدة كنت مستعجل علي جوازنا وعشان كدة كل تصرفاتك كانت غريبة ،،دلوقتي فهمت كل حاجة ،، بس احب اقولك انك غلطان ،، لاني شكل نيرة اه بس مش هي يا ريان ،، بعد اذنك

ريان كان متابع سارة بعنيه وهي بتبعد واتنهد بحزن وحيرة وهو مش عارف اخرة اللي هو فيه ده ايه وهتبقي ايه نهايته

...........................

عدي شهر علي الاحداث اللي حصلت كانت سارة بتتعامل مع ريان بحدود وبتشوف كل طلباته وطلبات فرح من غير اي احتكا*ك بريان او انها تتعامل معاه غير باللي يخص فرح ،،بس طول الوقت ده مكنش بيخلي من تصرفات ريان الغريبة احيانا واللي كانت بتلاحظها سارة زي انه بيغلط في اسمها كتير ويرجع يعتذر واوقات كانت بتحس انه بيعاملها علي انها نيرة وبيبقي واثق جدا انها هي وده كان بيخليها تخاف منه اوي وتبقي حزينة من جواها متعرفش ليه بس كانت بتقنع نفسها ان ده بس عشان هي حاسة انها ملغية وانها عايشة معاهم بصفة اختها وشكلها كمان وده خلاها تقرر تروح لدكتور نفسي وخصوصا انا حست ان ريان حالته بتسوء وده مأثر عليها

سارة بحيرة/ انا كل اللي حكتهولك ده يا دكتورة حاجة بسيطة اوي عن اللي بيحصل ،، انا وصلت لدرجة اني احيانا بشك في نفسي واني ممكن اكون نيرة اختي ،، تصرفات ريان معايا بتخليني منهارة وتعبت اوي من اللي بيحصل رغم انه بيصعب عليا اوقات كتير

الدكتورة بعملية/ اللي انتي حساه ده طبيعي يا سارة ،، اي واحدة مكانك كانت هتحس بكدة ،، بس المشكلة دلوقتي مش في ريان فيكي انتي

سارة بصدمة/ فيا انا ،،طب ازاي ،،بقولك هو اللي بيفتكرني نيرة اختي يبقي انا المشكلة ازاي ولا قصدك يعني عشان شبهها

الدكتورة بتركيز /مش بالظبط كدة ،، بصي يا سارة ،، انتي كمان عندك مشكلة وهي انك حاسة بالظلم وتأنيب الضمير مع بعض ودول هما اللي مخلينك مضغوطة اوي كدة ،، بمعني اوضح انك حاسة بالظلم لانك قررتي تنهي حياتك وتسيبي احلامك عشان خاطر حياة بنت اختك وواجبك تجاها كخالتها وتأنيب الضمير لانك حاسة نفسك انانية عشان بتفكري في نفسك احيانا وان ده مش مكانك صح كلامي ؟

سارة بحزن /انا منكرش اني فعلا احيانا بفكر كدة ،، بس خلاص انا دلوقتي بقيت ام لفرح و مش عايزاها تطلع معقدة لما تشوف باباها بيعاملني علي اني امها

الدكتورة بقصد/ يبقي ده هيتحل بيكي انتي ،، انتي لازم تصدقي انك سارة ولازم ترضي بأمر واقع وهو ان ريان خلاص جوزك حتي لو ده كان مستحيل يحصل في يوم من الايام بس خلاص حصل ،،يبقي لازم ترضي بالواقع ووقتها بس انتي اللي في ايدك تنقذيه من اوهامه وتخليه يشوف سارة مش نيرة

سارة بسرحان / واعمل ده ازاي يا دكتورة ده مستحيل

الدكتورة بابتسامة/ هقولك

.............................

كانت قاعدة سارة جمب فرح وهي بتتفرج عالكارتون وسرحانة في كلام الدكتورة ليها وانها لازم تصدق ان ريان بقي جوزها وتتعامل معاه علي الاساس ده ووقتها بس كل حاجة هتتظبط وفعلا من وقتها عدي حوالي شهرين وهي بتتعامل مع ريان بطريقة مختلفة بتتعامل بطبيعتها وبتحاول توصله دايما انها سارة في كل تصرفاتها يمكن ريان يفوق لنفسه وهي كمان تتقبل موضوع حياتها الجديدة وتتأقلم عليها واكدت لنفسها انها بتعمل كدة عشان خاطر فرح بس ،، انتبهت لصوت ريان اللي جه من الشغل

ريان بابتسامة / وحشتوني اوي ،، شوفي جبتلك ايه يا فرح الشيبسي اللي بتحبيه وانتي كمان يا سارة جبتلك الشيكولاتة اللي بتحبيها

سارة بهدوء/ هروح احضر السفرة

دخلت سارة المطبخ من غير ما تاخد الشيكولاتة من ريان فدخل وراها هو بيها

ريان بابتسامة/ انتي مش هتاخدي الشيكولاتة بتاعتك

سارة بقوة/ بس انا مبحبش الشيكولاتة يا ريان ،، انا عندي حساسية منها

ريان بحيرة/ بجد اسف انا افتكرتك بتحبيها

سارة بحزن/ نيرة هي اللي كانت بتحب الشيكولاتة ،، لكن انا لا ،، انا سارة يا ريان

ريان باسف/ اسف يا سارة ،،بجد اسف ،، انا بس عشان مش عارف عنك حاجة فعشان كدة يعني

سارة بمقاطعة/ حصل خير ،، ريان ايه رأيك لو نخرج نغير جو ،،انا زهقانة اوي من قاعدة البيت

ريان بحماس/ طبعا موافق

سارة بفرحة / بجد ،، طب ثواني واكون جاهزة انا وفرح ،، شكرا يا ريان اوي

قالت سارة اخر كلامها وهي بتقرب من ريان وبتحض*نه بس فجأة حست باللي عملته فخرجت وهي مكسوفة اوي

سارة بخجل/ اانا اسفة اوي بجد

ريان ابتسم وكان حاسس احساس حلو اوي من جواه

ريان /متعتذريش ،، انتي ناسية انك مراتي ولا ايه

سارة قلبها دق ومشيت بسرعة من قدام ريان اللي كان بيبص لاثرها بحيرة واستغراب وكأن عيونه بتكتشف واحدة تانية غريبة عن اللي هو عارفها وحبها

.....................

كانو قاعدين في المطعم وبيضحكو وبيهزرو سوا لحد ما دخلت عليهم واحدة كانت زبونة سارة في المعرض

البنت / هاي سارة ،،اذيك

سارة بابتسامة مجاملة/ هاي ديدي ،، انتي اخبارك ايه

ديدي بدلع/ كويسة ،، يا تري مين دول ؟

سارة بقصد/ ريان جوزي وفرح بنتي

ديدي باستغراب/ ايه ده ،،انتي لحقتي اتجوزتي وخلفتي امتي ؟ انا اخر مرة كنا فيها سوا كنتي سنجل

سارة ببرود/ لا ما هو احنا في عصر السرعة بقي

ديدي بدلع / طب ممكن اقعد معاكم لحد ما صحابي يجو ،، ياريت مكونش عاملة ليكم ازعاج يعني

ريان بابتسامة / اتقضلي طبعا حضرتك منورانا

ديدي بدلع/ ميرسي اوي كلك ذوق حقيقي

كل ده وسارة كانت قاعده هتفر*قع ،،كانت مضايقة اوي وبتبص لريان بغضب لان ديدي كانت عمالة تتكلم معاه وهو بيرد عليها وهي ولا اكنها قاعدة

سارة وهي بتقوم / مش يلا بقي ،، فرح شكلها بتنام كفايا كدة

ريان قام هو كمان / طب تمام يلا بينا ،، اتشرفت بمعرفتك مدام ديدي

ديدي بدلع / الشرف ليا يا استاذ ريان ،، حقيقي سعيدة اني قابلتك

سارة بعصبية/ مش يلا بقي

قالت سارة كلامها واخدت فرح ومشيت فمشي ريان وراها باستغراب من انفعالها اللي ملوش مبرر

.......................

اول ما دخلو الشقة كانت سارة هتدخل اوضتها بس وقفها ريان بصوته وهو بينيم فرح عالركنة في الصالة

ريان بسرعة/ استني يا سارة ،، ممكن اعرف انتي زعلانة من ايه او ايه اللي حصل مني ضايقك اوي كدة

سارة بغضب/ يعني مش عارف يا ريان ،، انت اصلا ليه قولتلها تقعد مع اني اصلا مردتش عليها لا وكمان بتقولها اتفضلي انتي منورانا نينيني

ريان بتبرير/ انا مغلطتش انا رحبت بضيفتك وبعدين ما هي اللي طلبت تقعد معانا

سارة بعصبية / ماهي لقت حضرتك مرحب وكمان نازل رغي معاها ولا كأني موجودة ولا اكنك عاملي اعتبار وان مراتك قاعدة يعني تحترمها

ريان وهو بيقرب / انا اسف بس حقيقي انا مقصدش خالص اقلل منك

سارة بحزن / انت مبتعملش حاجة من وقت ما اتجوزتني غير انك بتقلل مني يا ريان ،، حتي قدام الناس مش معترف بيا اني موجودة اصلا

ريان وهو مركز في عيون سارة وبيمسح دموعها بايديه / والله اسف ،،وانا عمري مااقدر اقلل منك ،،انتي الوحيدة اللي وقفت جمبي ورجعتلي تاني شغفي للحياه بعد ما كنت فقدت الامل في كل حاجة

فرحت اوي سارة بكلام ريان وحست ان فعلا تصرفاتها جابت نتيحة وانه فعلا شايفها سارة لاول مرة وبيكلمها علي انها سارة بس للاسف فرحتها مكملتش

ريان بتوهان/ انا اسف علي كل حاجة حصلت مني قبل كدة واوعدك اني احاول دايما اسعدك زي ما بتحاولي تسعدينا يا نيرة

دموعها اتحجرت في عنيها وهي بصاله ومش مصدقة ان كل الكلام اللي قاله ليها مكنتش هي المقصودة بيه اما ريان فخد باله من اللي قاله وقبل ما يتكلم كانت زقته سارة ودخلت تجري علي اوضتها وهي بتعيط بحرقة علي و*جع قلبها ،، كانت حاجة جواها بتتمني انه يكون شايفها فعلا وحاسس بيها ،، لانها من جواها مكنتش بتساعد ريان عشان بس يخف ،، للاسف كانت بتساعد نفسها كمان عشان قلبها يقتنع انه بقي جوزها وانهاردة اتأكدت انها فعلا حبته بس للاسف اكتشفت ان هو لسة زي ماهو وانها معملتش حاجة غير انها ورطت قلبها بِحُبُه

.......................

تاني يوم كانت سارة واقفة بتبص لعيونها المنفوخة من اثر العياط طول الليل وحاولت تداريهم بالميكب وبعدين فتحت الباب وخرجت فلقت ريان في وشها ،، عنيهم اتقابلت وكانت بتقول كلام كتير لاحظ هو عنيها وعرف انها كانت بتعيط وهي كمان شافت عيونه التعبانة وعرفت انه منمش طول الليل

ريان بهدوء/ سارة ممكن نتكلم لو سمحتي

سارة بجدية/ ملوش داعي يا ريان لو سمحت عديني خليني اشوف فرح

ريان دخل القوضة وقفل الباب بالمفتاح ولف وبص لسارة بابتسامة

سارة بتوتر/ ريان ،، لو سمحت افتح الباب ده وخليني اخرج

ريان بنفي/ مش قبل ما تسمعيني يا سارة

سارة بدموع/ انا سمعت بما فيه الكفاية فلو سمحت بقي سيبني في حالي

ريان باصرار/ يبقي كملي جميلك واسمعيني لاخر مرة يا سارة

سارة بحزن/ مش هتفرق وانا عارفة انت هتقول ايه وانت شايفني مين فملوش داعي

ريان بهدوء/ صدقيني كل كلمة قولتهالك امبارح كانت من قلبي ما عدا حاجة واحدة هو اسمك ،، انا غلط في اسمك لاني كنت دايما متعود انطق اسمها بس ده مش معناه اني كنت شايفك هي ،، سارة انا بعترف اني قبل ما نتجوز كنت بدور عليكي وهتجنن واتجوزك عشان انتي شبهها ،، كنت مريض بفراقها وقولت اني هرتاح لما احس انها عايشة معايا حتي لو بشكلها بس ،، بس انتي خلتيني بشخصيتك اتأكد ان ممكن الحياه تديني فرصة تانية وتخليني اعيش الحياه بطعم تاني ،، بعد ما كنت مستحيل اتخيل اني ممكن احب غيرها او اقدر اعيش بعدها ،،بقيت بحب بطريقة عمري ما تخيلت نفسي احب بيها،، عيشت معاكي احساس عمري ما حسيته قبل كدة ،، سارة انا بحبك وبقولهالك وانا واثق من كل حرف،، بقولهالك وانا شايفك سارة وبتمني تقبلي تكوني شريكة حياتي اللي باقية

سارة كانت بصاله و بتبكي من غير صوت ،، مش متخيلة انه فعلا طلع حبها هو كمان وان مشاعره ناحيتها بقت حقيقية

سارة بدموع/ في الاول كنت حاسة اني تايهة واني عايشة حياه مش بتاعتي بس مكنتش اعرف ان القدر ليه رأي تاني وان اللي ربنا كاتبه لينا بيكون اجمل من اللي احنا بنبقي عايزينه

ريان بابتسامة وهو بيفتح ايديه / يعني موافقة تبقي معايا يا سارة

جريت سارة عليه واترمت في حض*نه وهي بتقوله بحب/ موافقة

ريان بهمس/ بحبك علي فكرة

سارة بخجل / وانا كمان علي فكرة

تمت

تعديل المقال