رواية انا والشيطان الفصل الرابع عشر14 والاخير
الحلقة الرابعة عشر ( الاخيرة )
أنا والشيطان
ماما وخالي بصولي اوي وقالولي انتي اتجننتي يا بت !! انت قليلة الادب ومتربتيش .واعتذروا لحسن .لكن حسن كانت كرامته انجرحت فعلا واستأذن ومشي .وخلصت اخيرا من محاولاته انه يرجعلي .لكن المشكلة بدأت بعد انصراف حسن من البيت .
ماما وخالي حكموا عليا اني اسيب الشغل لانهم عرفوا اني رفضت ارجع لحسن علشان معتز .
وقعدت في البيت اكتر من شهرين وكنت مش بكلم ماما الا في اضيق الحدود .وكنت عاملة زي ما اكون في سجن وكنت بكلم معتز في اضيق الحدود من ورا ماما.
اللي كان تاعبني بجد اني كنت مش بشوف معتز خالص .ده غير ان كنت غيرانه عليه من مروة وكنت خايفة انها تسحبه للغلط تاني .
وخصوصا اني كنت بحس من كلامها انها بتغير عليه او بتحبه .
ولما كلمت معتز قولتله عاهدني انك عمرك ما هتخوني او هتبص لمروة دي تاني .معتز قالي انا عاهدت ربنا اللي احسن من اي حد اني مش هغلط الغط ده مرة تانية لاني ندمت بعدها .
ماما كان عندها عملية كبيرة لازم تعملها وكنت المفروض احجز لها في المستشفي اللي بشتغل فيها .
لكن هي رفضت وقالت انها هتعمل العملية في مستشفي تاني علشان نكون بعيد عن معتز .
وقبل ما ماما تدخل غرفة العمليات قالتلي انا مش عاوزاكي تزعلي مني يا هالة .كل اللي بعمله لمصلحتك .مش عاوزاكي تبقي مجرد نزوة للدكتور زميلك يتجوزك كام شهر وبعدين يرميكي ويرجع لمراته واولاده .كل اللي عاوزاه مصلحتك يا بنتي .
قلت لماما تريح نفسها وبلاش تفكر في حاجة دلوقتي لحد ما تخرج بالسلامة .
لكن للاسف ماما توفيت بعد العملية مباشرة قبل ما تفوق من البنج .
حسيت وقتها ان الدنيا اسودت في عنيا واني بقيت وحيدة خصوصا ان معتز بعيد عني ومش عندي ولا اب ولا ام ولا اخ ولا اخت .
خالي طلب مني اني اروح اعيش عنده مع عياله علشان مش هينفع اعيش لوحدي في بيتنا .
وفعلا قفلت شقتنا وروحت قعدت مع خالي وعياله .
طلبت من خالي اني اروح شغلي تاني لكن خالي قالي ان دلوقتي مش هينفع ان اخرج واشتغل واني هفضل قاعده في البيت لحد ما اتجوز .
معتز رجع واتقدملي تاني وكلم خالي في موضوع جوازنا .
خالي بعد موت امي حس بمسئولية كبيرة ناحيتي وكان عاوز يطمن عليا اضطر انه يوافق علي معتز .
كان اليوم ده اسعد يوم في حياتي .وخلاص قربت اني احقق امنيتي .
لكن خالي اتكلم مع معتز وقاله هتعمل اي مع مراتك واولادك ؟
معتز قاله انه هيصارح مراته انه هيتجوز ومش هيخبي عليها لانهم مش متفاهمين من الاساس .وانه هيسيب لها الاختيار بين انها تطلق او لا .
خالي قاله يا بني احنا مش بنبني بيوتنا علي خراب بيوت الناس .
معتز قاله ان حياته مع مراته كانت شبه منتهية من قبل ما يشوفني وان انا مش السبب انه يطلقها او يسيبها .خالي اقتنع بكلامه ووافق .
معتز قال لمراته انه هيتجوز وخيرها بين الطلاق او الاستمرار .
مرات معتز دخلت اطراف كتير من العيلتين وهددت انه لو هيتجوز لازم يطلقها .
معتز صمم علي موقفه انه هيتجوز .هنا مرات معتز عرفت ان افعالها وتصرفاتها معاه ضيعته من ايديها.
وكان عندها امل انه يتراجع عن الجواز ولكنه صمم علي موقفه .مرات معتز فضلت انها تستمر معاه علي امل انه يرجعلها تاني .ولكنها قالت انها هتستمر بس علشان الاولاد ولكن ما بينها وبينه هيكونوا منفصلين .
معتز فعلا خطبني رسمي ولما زمايله عرفوا في المستشفي وعرفوا ان انا العروسة اغلبهم استغربوا وقالوا ازاي تتجوز ممرضه دي اقل منك في المستوي الثقافي والاجتماعي !!!
معتز تحدي كل الكلام ده وقالهم ان انا انسانه محترمة واخلاقي عالية وان التفاهم والحب مابينا اكبر من اي فرق اجتماعي .
وبعد كل الظروف والتحديات اللي واجهتنا اخيرا اتجوزت انا ومعتز وتم زفافنا وجمعنا بيت واحد .
انتهي الجزء الاول والي اللقاء في الجزء التاني .
في الجزء التاني هنعرف .....
ماذا سيحدث بعد خروج فارس من السجن وهل سيواصل فارس مطاردة هالة بسحره وافعاله ؟
هل سيعيش معتز مع هالة حياة سعيدة هادئه ام ستكون حياة مليئة بالتحديات ؟
هل سترضخ زوجة معتز لزواجه من هالة ام انها ستحاول استرجاع معتز زوجها مرة اخري ؟
والكثير والكثير من المفاجأت في الجزء الثاني ...
