رواية التل الفصل التاسع عشر19 بقلم رانيا الخولي

رواية التل الفصل التاسع عشر19 بقلم رانيا الخولي 

 

 

الفصل التاسع عشر

…………….

في الصباح

استيقظت توليب مرغمة على يد يزن الذي يجبرها على الاستيقاظ

فتحت عيونها بتثاقل وتمتمت بنعاس

_ ايه يا يزن عايزة أنام

دلفت سلوى على ذلك المشهد ويزن يصر على ايقاظها فقالت بسخرية

_ قومي يا هانم عشان تغيري بقيتي أم قبل أوانك.

فتحت توليب عين واحدة تتأكد من وجودها ثم تنهدت بتعب واعتدلت قائلة

_ وبعدين معاكي يا ماما لزمته ايه الكلام ده.

ردت سلوى بحنق

_ ملوش انا بس بنبهك مش اكتر.

زفر توليب بيأس وقد طار النوم من عينيها وقالت بهدوء

_ انتي مش كل اللي يهمك إني اكون مبسوطة؟

ردت بتسويف

_ هو انا عايزة ايه من الدنيا غير كدة؟

نهضت لتحمل يزن وتقربه منها وهي تقول ببهجة

_ بذمتك مش يتحب بعينيه الملونة دي وخفة دمه.

اشاحت بوجهها بعيدًا وقالت بانكار

_ انا مقولتش حاجة بس أنا مستغربة ايه اللي جابرك على مسؤولية زي دي، انتي جميلة وبنت ناس وأي واحد يتمناكي.

تعبت توليب من الجدال معها وخرجت من الغرفة وهي تنادي نعمة التي أسرعت إليها وسألتها بعبوس

_ فين ياسمين؟؟

_ تحت في المطبخ بتساعد البنات.

ناولتها يزن الذي اعترض في البداية لكنه وافق عندما قالت بابتسامة

_ انزل معها لعمته لحد ما اغير هدومي وهنزل افطر معاك.

نظرت لنعمة وقالت

_ خلي ياسمين تغيرله لبسه وانا جاية حالاً

عادت إلى الداخل وأغلقت الباب خلفها ووقفت أمام والدتها وتمتمت بحزم

_ شوفي يا ماما عشان الموضوع ده مش هفتحه تاني.

ضغطت على كل كلمة تنطق بها

_ أنا بحب جواد مش بس لما جيت هنا لأ ده من سنتين وأكتر كمان قبل ما يعمل الحادثة وهو كان لسة متجوز ولما رجعت حبيته أكتر وأكتر

وتقدري تقولي مش شايفة حد غيره ولا هسمح لحد أنه ياخد مكانه، وانسي تمامًا إنك تقدري تأثري عليا بكلامك ده

لو عايزة سعادتي متقفيش بينا وبلاش تجرحي جواد بكلامك لإني مش هسمح بده.

زمت سلوى فمها بغيظ وغمغمت بحدة

_ بكرة تندمي وهفكرك.

خرجت من الغرفة وهي لا ترى أمامها من شدة الغضب

اما توليب فقد أغلقت الباب وهي تشعر بالضيق من نفسها بسبب طريقتها الفظة مع والدتها ثم دلفت المرحاض كي تستعد للنزول

في الأسفل

تجمعوا في بهو المنزل بعد تناولهم وجبة الإفطار ونزلت توليب لتجلس معهم وتتقابل نظراتهم في حديث ابلغ من الكلام

اليوم سيتم عقد قرانهم ويتحقق حلم العمر

وينتهي أخيرًا ذلك الشقاء الذي أرهق كلاهما

غمز إليها بمكر

ثم أخرج هاتفه من جيبه وبعث إليها برسالة مقتضبة

"عملك مفاجأة"

انتبهت لوصولها وفتحت الرسالة لتقرأ محتواها وقد انشغل الجميع بالحديث

"ايه هي"

"ثواني وهتعرفي"

ثم اغلق الهاتف ووضعه على الطاولة الصغيرة أمامه كي يمنع احتجاجها الذي رأه على عينيها.

انشغل معهم بالحديث حتى تفاجأت هي بدخول أدهم وإلين فلم تصدق ما تراه

_ إلين؟

دلفت إلين بمرحها المعتاد

_ الندالة مش بتيجي غير من الصحاب

نهضت توليب لتحتضنها بسعادة وهي لا تصدق أنها تراها

_ بصراحة متخيلتش انك هتيجي.

نهضت ياسمين التي تفاجأت أيضًا بمجيئها

_ انا كمان متخيلتش إنك هتيجي.

رحب الجميع بأدهم وصعدت البنات إلي غرفة توليب كي يكونوا بحريتهم.

___________

في غرفة توليب

جلس ثلاثتهم بسعادة غامرة بعد ذلك الغياب الطويل وسألت إلين توليب

_ قوليلي الأول وقعتيه ازاي.

ردت ياسمين بدلاً منها

_ لا وحياتك هو واجع من زمان لما كنتو هنا في فرحي.

تحدثت إلين وهي تقلد لهجتها

_ ايه ده! إزاي محدش خبرني، لااا انتو لازمن تخبروني كل حاچة بالتفصيل.

شرحت لها توليب كل شيء باستثناء ذلك الحادث فقالت إلين بتأثر

_ بصراحة قصتكم كلها وجع بس جميلة اوي والحمد لله إنه كرمكم وجمعكم في الحلال

امنت توليب خلفها

_ الحمد لله.

بغتت إلين عندما لاحظت وجومهم وقالت بامتعاض

_ هو احنا هنقلبها نكد ولا ايه النهاردة الحنة ولازم نفرح

نهضت من الفراش وذهبت إلى حقيبتها واخرجت منها حقيبة صغيرة ورفعتها أمامها

_ تعالي بقى شوفي الهدية بتاعتي.

سألتها توليب وهي تنهض لتتقدم منها بابتسامة

_ هدية؟ هدية ايه يا قلبي.

فتحت إلين الحقيبة واخرجت منها ثوب هندي(ساري) فتشهق توليب بصدمة

_ ايه اللي انتي جيباه ده؟

حركته بين يديها وهي تجيب ببساطة

_ ساري اشتريته امبارح مخصوص عشان تلبسيه في الحنة

تقدمت توليب أكثر لتمسك الجزء العلوي بعدم استيعاب لمدى قصره وقالت بصدمة

_ انتي فاكرة إني ممكن ألبس اللبس ده؟

وضعت على كتفها فتجد انه لم يصل إلى بطنها ثم نظرت إليها وهي تقول بغيظ

_ انتي اتجننتي يا إلين، ده كمان بحملات.

رفعت إلين الجزء السفلي وقالت

_ ليه بس المهم إن الچيب واسعة وطويلة ومتنسيش الشال، وبعدين احنا هنكون لوحدنا ومامتك وخلاص

نظرت إلى ياسمين وتابعت

_ مش كدة ولا أيه؟

رفعت ياسمين يدها وهي تقول

_ انا مليش دعوة استأذني جواد الأول.

تحدثت إلين بامتعاض وهي تجلس قبالة ياسمين

_ وهو هيشوفنا فين بس احنا هنكون لوحدنا وهو مع الرجالة بره ولما ييجي يدخل…

قاطعتها توليب

_ تلفوني بملاية.

ضحكت ياسمين بعلو صوتها لكن إلين اغتاظت منهم وقالت بحدة

_ تعرفي انا عملت ايه عشان اجيبه؟ والله لتلبسية.

تنهدت توليب بيأس منها ونظرت إلى ياسمين التي هزت كتفيها باستسلام.

______________

خرج وهدان من الغرفة فيجدها تخرج من غرفة أطفاله

فتقدمت منها بابتسامة وهو يسألها

_ عايزة حاچة جبل ما امشي.

هزت راسها بنفي وقالت بابتسامة

_ عايزة سلامتك، وحاول متأخرش.

طبع قبلة على جبينها وقال بحب

_ هرچع بعد كتب الكتاب على طول، بس من ناوية تغيري رأيك وتاچي معايا؟

هزت راسها بإحراج

_ مش هجدر ابص في وشه بعد اللي حصل.

ملس بأنامله على وجهها وقال

_ جولتلك هو بنفسه اللي جالي وبصراحة أني محتاچك معاي.

تنهدت باستسلام ثم سألته

_ والبنات؟

_ متجلجيش هخلي ام محمود چارتنا تجعد معاهم لحد ما نرچع.

قالت بتردد

_ بس…

قاطعها بجدية

_ مفيش بس انتي من وجت ما اتچوزنا وانتي مخرچتيش من الدار، ادخلي غيري هدومك لحد ما انادي لام محمود.

وافقت حياة ودلفت غرفتها كي تبدل ملابسها ثم خرجت لتجده دالف مع أم محمود وهي سيدة طاعنة في السن تركها اولادها وظلت هي وحيدة

تقدمت منها لتصافحها

_ كيفك يا خاله؟

ردت المرأة بطيبة

_ بخير يا بنتي

قال وهدان

_ معلش يا خالة هنتجل عليكي.

_ مفيش تجل ولا حاچة اديني جاعدة معاهم بدل الجاعدة لوحدي امشوا انتو ومتجلجوش عليهم.

خرج وهدان مع حياة وتوجهوا لمنزل جواد.

______________

وقف عامر امام المرآة يلف عمامته وهي جالسة على الفراش تنظر إلى فرحته التي لم يستطيع اخفاءها وقالت بسخط

_ ومالك فرحان إكدة كأنه أول مرة يتچوز.

انتهى عامر مما يفعله وقال بفتور

_ ومفرحش ليه؟ ولدي الوحيد ودي ليلة فرحه من اللي جلبه أختارها.

نهضت لتقف أمامها والحقد يتآكلها

_ وبنتي اللي ماتت في عز شبابها ايه اتنست خلاص.

جلس على المقعد ليرتدى حذاءه وقال بثبوت

_ سنة الحياة زيك بالظبط لما اتچوزتي بعد موت أخوي بسنة واحدة.

_ بس أني كنت مجبرة.

_ اتچوزتي وطالبتي بحجوجك يبجى متفرجش كتير.

خرج من الغرفة وهو يبتسم بتشفي وتركها تنظر إليه بسخط

مر بغرفة والده وطرقها حتى سمح له بالولوج

دلف الغرفة ووجد والده يجلس على مقعده بنفس الجبروت، تقدم منه ليسأله بفتور

_ هتاچي ولا غيرت رأيك؟

رفع حسان بصره إليه وتحدث بقوة

_ واني من ميتى بغير كلمتي؟

_ أني جولت اسألك لو عايز تاچي معاي دلوجت.

ضرب بعصاه الأرض وتحدث بتسويف

_ روح انت واني هاچي على كتب الكتاب

اومأ له عامر وهو ينظر إليه ببرود

_ اللي تشوفه.

ثم تركه وغادر

زم حسان فمه وتحدث باحتدام

_ هترچع يا ابن عامر سواء برضاك أو غصب عنيك

ذهب عامر إلى المزرعة واثناء قيادته للسيارة رن هاتفه فعلم هوية المتصل قبل أن يراه

امسكه ليجيب عليه

_ كيفه الچميل اللي مالي جلبي

_………

ضحك عامر بسعادة

_ مين ده اللي كبر وعجز متخلهاش تطلع في دماغي وأجي اعرف مين اللي كبر وعجز.

_……..

_ ماشي يا ستي مجبوله منك، المهم أني هجفل دلوجت لإني وصلت المزرعة ولما ارچع هكلمك.

_…….

هز رأسه بيأس

_ تاچي فين انتي اتچننتي.

_………

_ طيب اجفلي ولما أجيلك الاسبوع الچاي هنتحددوا تاني، سلام.

_______________

لم يستطيع مراد الذهاب من دونها وقرر أخذهم معه كي يحسن من نفسيتها

اتصل على سلمى اثناء عودته وأخبرها بضرورة ذهابهم معه

في منزل مراد

دلفت سلمى غرفة نور فوجدتها تقرأ في إحدى الروايات التي جلبتها معها فأخذتها منها سلمى وقامت بوضعها على المنضدة وهي تقول بأمر

_ سيبي اللي في ايدك ده وقومي

اندهشت نور وسألتها بحيرة

_ ايه يا سلمى في ايه؟

قالت سلمى بسعادة

_ قومي غيري هدومك بسرعة عشان هنروح حنة توليب.

رغم فرحتها بذهابها إلا إنها قلقت على طفلها فقالت بوجل

_ مينفعش انتي عارفة الدكتور مانعني من الحركة

جذبت الغطاء من عليها وقالت بإصرار

_ إن شاء الله مش هيحصل حاجة اطمني وقومي يلا.

نهضت نور وأخرجت لها سلمى ثوب فضفاض يتناسب مع حملها وحجاب مناسب وساعدتها في ارتداءه

كانت نور تنظر إليها بدهشة من ذلك الإهتمام

فهي تعد ضرة لها حتى لو لم يكن زواج حقيقي وبعد الانتهاء قالت برقة

_ متشكرة اوي يا سلمى.

ابتسمت سلمى وردت بصدق

_ متقوليش كدة انتي زي اختي.

ربتت على ذراعها وأردفت

_ يلا هروح أنا كمان أغير وأجهز لبس لمراد وانتي ارتاحي لحد ما نجهز.

عادت إلى غرفتها لتبدل ملابسها واحضرت لمراد ملابسه

وعندما عاد مراد أخذ حمامًا سريعًا وهو يستعجلها

_ هاتي اللبس بسرعة ونادي على نور واستنيني تحت.

دقائق وكان كلاهما داخل السيارة وانطلق بها إلى المزرعة.

____________

في غرفة توليب

صرخت بصدمة عندما نظرت لانعكاس صورتها في المرآة و جدت نفسها بذلك الثوب الذي جعلها تبدو بتلك الفتنة وشعرها الذي استرسل على ظهرها بسلاسة في هيئة تسلب الأنفاس وقالت بصدمة

_ ايه ده؟ انتو اكيد اتجننتوا.

كانوا ينظرون إليها بانبهار وقالت ياسمين بعدم استيعاب

_ يا عيني عليك يا جواد، الولد جلبه مش هيجدر يتحمل.

زمت فمها بغيظ وغمغمت بتوعد

_ ماشي أنا بقا هخليه يطربقها على دماغكم.

رفعت إلين لعبة أمامها وقالت بمرح

_ آخر حاجة الحنة

هزت يديها امام وجهها باستسلام

_ لااا ده فعلاً جنان رسمي، انا هغير هدومي والبس اي فستان تاني.

طرق الباب فذهبت ياسمين لتفتحه فوجدت حياة تقف أمامها وتمتم بإحراج

_ ازيك يا ست ياسمين.

رغم استياءها من فعلتها إلا إنها لم تريد احراجها وقالت بترحيب

_ الحمد لله يا حياة اتفضلي.

دلفت حياة على استحياء منهم وعندما لاحظت توليب ذلك تقدمت منها وهي تقول بفرحة

_ حياة ازيك كنت هزعل اوي لو مجتيش.

رفعت حياة عينيها بدهشة من ذلك الترحيب التي قُبلت به مما جعلها تشعر بالثقة وتمتمت برهبة

_ بصراحة كنت خايفة آچي

حاوطت ياسمين كتفيها من الخلف ثم نظرت إليها بعتاب

_ طبعاً ليكي حج مـ انتي رفضتي تعزمينا على فرحك.

ازداد حرجها بتلك المقابلة وردت بروية

_ صدجيني مكنش فرح ولا حاچة كانت حاچة إكدة على الضيج.

قالت توليب

_ خلاص يا ستي مسامحينك

عاد طرق الباب وعادت إليه ياسمين وتجد سلمى أمامها وخلفها نور

_ ازيك يا سلمى تعالي اتفضلي

دلفت سلمى ودخلت نور خلفها وقد ازدادت سعادة توليب بمجيئهم

ساعدتها سلمى على الجلوس وقد انبهرت نور بجمال توليب

_ انتي جميلة أوي يا تولي والساري هينطق عليكي.

ردت إلين قائلة

_ قوليلها يا بنتي لأنها مصرة تقلعه

سألتها سلمى بدهشة

_ ليه كدة انا شايفة إنه استايل جميل اوي ولايق عليكي ده اللي يشوفك يقول دي بنت هندية أصيلة.

رفعت إلين الحناء

_ لا ولسة لما نحط الحنة الهندي دي.

ابتسمت توليب وهزت راسها بيأس من صديقتها التي لم تترك شيء إلا وفعلته.

قالت حياة وهي تفرك يديها ببعضها

_ واني بعرف ارسم زين.

تحدثت إلين بفرحة

_ تمام وانا هنزل صور من النت وتعملي زيها.

____________

فتحت البوابة الرئيسية على مصراعيها عندما تقدمت منها سيارة حسان ووقف الجميع رياءً أمام السيارة حتى وصل إلى المنزل

أسرع السائق بفتح الباب وترجل منها بكل شموخ والجميع ينظر إليه إجلالًا لكن قلوبهم تفعل عكس ذلك

تقدم من المنزل ودلف للداخل وعينيه تبحث بين الجمع عن حفيده

كان واقفًا ينتظر هو قدومه بشموخ ورثه عنه

بل ورث منه الكثير حدة الطباع وقسوته على اعداءه لكن لين قلبه يطغي على كل ذلك وهو ما يود التخلص منه

تقدم منه وهو واقفًا بين أبيه وعمه وبجوارهم المأذون

وقف أمامه لينظر إليه باعتزاز وقال بقوة

_ مبروك يا جواد، طلبتني وچيتلك.

مازال كما هو موقفه منه واضحًا لن يتغير ولن يعود مهما حدث.

دنى منه أكثر وقرب فمه من أذنه وتمتمت بخفوت

_ لو عايز براءتها دلوجت اجدر أجبهالك بس زي ما جولتلك.

تطلع إليه جواد بتعالي وتحدث بجسارة

_ طول عمرك جدها وإن ضاجت بيا هرچعلك.

أراد فايز فض ذلك التحدي وقال بترحيب

_ أهلاً يا حاچ اتفضل.

جلس حسان على الأريكة واشار للجميع بالجلوس فأطاعوه ثم أمر المأذون ببدأ القران

في غرفة توليب

بدأت حياة برسم الحناء باتقان اذهل الجميع

لكنهم توقفوا عندما سمعوا صوت الزغاريد بالأسفل فقالت ياسمين

_ كدة المأذون كتب الكتاب استني بقا يا حياة متبدأيش في الإيد اليمين لحد ما تمضي

توقفت حياة ما إن طرق الباب وذهبت ياسمين لتفتح فوجدته تميم وهو يحمل الدفتر

_ ازيك يا ياسمين، ممكن ادخل؟

_ أهلاً يا تميم ثواني

وضعت إلين شالاً كبيرًا على كتف توليب ثم سمحوا له بالدخول

انبهر بدوره رغم أن الشال يخفي ثوبها وتقدم منها قائلاً بحب

_ مبروك يا قمر

ردت بابتسامة مشرقة

_ الله يبارك فيك يا حبيبي عقبالك.

غمز لها بعينيه

_ بصراحة فتحتي نفسي بس المهم تكون حاجة من الآخر زيك كدة.

ضحكت بسعادة بالغة فقال بيأس وهو يناولها القلم

_ يلا بقا ايدك اليمين يا عروسه

رفعت يدها اليمنى لتأخذ القلم لكنه منعها

_ بقولك ايدك اليمين

_ اه معلش اتلغبط

رفعت يدها اليسرى فيضحك الجميع على دعابته وحينها لاحظت أنه يداعبها فقالت بغيظ

_ انت بتشتغلني؟

حاول منع نفسه عن الضحك

_ بهزر يا رمضان انت مبتهزرش.

امسكت القلم باليمني وبدأت تمضي وإلين وياسمين يسجلون تلك اللحظة بالصور وبعد الإنتهاء قبل جبينها وتمتم باحتواء

_ ألف ألف مبروك يا قلبي.

ردت برقة

_ الله يبارك فيك يا حبيبي.

خرج تميم وعادت حياة لعملها حتى انتهت أخيرًا

فقالت ياسمين

_ طيب يلا بجا ننزل تحت عشان نحتفل زين

نزلوا جميعاً للأسفل وقد أبعد جواد رجاله عن ذلك الجانب من المنزل

وبدأت الفتيات بالاحتفال بها وشاركتهم عاملات المنزل بأغانيهم الصعيدية الأصيلة

وسلوى جالسة بعيدًا عنهم ولم تشغل توليب نفسها بها فهذه لحظة لن تعوض وقد قررت ان تعيشها بكل كيانها

نظرت نعمة لوالدتها وهي تقول بسرور

_ دي حلوة جوي يا أمه، دي ولا البدر في تمامه.

نظرت إليها ام نعمة بحب وقالت

_ دي عوضه عن اللي شافه في دنيته، دي الوحيدة اللي جدرت تغيره بعد ما اتعلم الجسوة وشربها من اللي أذوه.

توقف الجميع على صوت إلين وهي تقول

_ باااااس خلصت فقرة الرقص وفاضل فقرة الشبكة يلا يا ياسو ابعتي للعريس

شهقت توليب بصدمة وقالت بتعنيف

_ هو ده اللي كنت عاملة حسابه مينفعش طبعاً يدخل عليا وانا كدة.

قالت ام نعمة

_ ليه يا بنتي ده خلاص بقا جوزك وبكرة فرحكم على الأجل تتعودوا على بعض.

هزت راسها برفض

_ مستحيل طبعاً

تحدثت نور باقتراح وهي جالسة على المقعد

_ طيب انا عندي حل.

انتبه الجميع لها ينتظر اقتراحها وتابعت

_ هي طريقة غربية بس هنعدل فيها شوية حاجات كدة

قالت إلين برجاء

_ قولي إلاهي يسترك

_ هنطفي النور وياسو تروح تاخده من على الباب وتقربه منها وتناوله الشبكة وهو يلبسها

قالت ياسمين بعدم تصديق

_ بتهزري.

تحدثت سلمى بتأييد

_ هو فعلاً انسب حل لأن لازم العريس يلبسها الشبكة بنفسه

قالت توليب

_ خلاص هتولي ازدال

_ طيب ما جبلك لحاف احسن

قالتها إلين بيأس ثم نظرت إلى ياسمين وقالت

_ رني عليه ونعمل زي ما قالت نور

جالسًا مع أصدقاءه لكن عقله معها هي

ماذا تفعل الآن ؟

هل تشعر بما يشعر به؟

هل بنفس السعادة؟

بنفس الاشتياق.

انتبه على يد مراد التي صفعته على كتفه

_ انشف يا عريس متخلكش طري إكدة.

نهض فايز وقال بهدوء

_ الف مبروك يا ولدي ربنا يتمملك على خير إن شاء الله.

رد بصدق

_ متشكر يا عمي.

تلاه عامر الذي نهض أيضًا

_ مبروك يا ولدي ويارب جدمها جدم سعد عليك.

اومأ جواد له ثم ظل ينظر إليهم وهم يخرجون من المنزل وقبلهم جده

رن هاتفه وكانت ياسمين

ابتعد قليلا كي يرد عليها

_ ايوة يا ياسمينا محتاچين حاچة؟

_ انت ناسي يا استاذ الشبكة تعالي عشان تلبسها

ظهرت ابتسامته وقال موافقاً

_ بس إكدة چاي حالًا

_ استنى لول تعرف الحكاية

بدأت ياسمين تشرح له ما قررت توليب فعله

لكنه قال في النهاية

_ طيب اسمعيني زين……..

طرق الباب ورفرف قلب توليب عند سماعه

ها هو حبيبها يطرق بابها كي يكمل رحلة سعادتهما

تقدمت ياسمين من المقبس وقامت بأغلاقه ثم فتحت الباب ليدلف أخيها

والذي دخل وهو يتعسر في مشيه مما جعل توعده لها يزداد

كانت الغرفة مظلمة وقد حرصت على ألا يدخل اي ضوء من النوافذ فقامت بأغلاق الستائر باحكام مما جعل الوضع بذلك السوء فلتتحمل نتيجته

سارت ياسمين أمامه وهو خلفها تجنبًا الاصتدام بأحد حتى أوصلته لها ووقف أمامها

يتخيل هيئتها

كان تنفسها عاليًا وقد وصل لمسمعه

قالت ياسمين

_ نبدأ بالدبلة مدي ايدك يا تولي

مدت يدها رغم أنها لا تعرف من أين ستأتي انامله حتى اجفلت عندما وجدته يمسك يدها بيده الحانية واليد الأخرى وضعت الخاتم بيدها

ازدادت وتيرة تنفسها وقلبها يهدر بعنف من تلك المشاعر التي تعيشها لأول مرة

أما هو فحدث ولا حرج وقد تلاشي كل شيء من حولهما في لمسة يدها والذي يحتويها بعشق متملك وكأنه يخشى عليها من الهرب

تبدلت الأدوار ووضعت ياسمين دبلته في يدها لكنها لم تستطيع تميز مكان الخاتم إلا ان تتحسس بدورها يده

حاولت لكن فشلت وهو لا يساعدها على ذلك مما جعلها تمسك يده وتتحسسها وهو يكتم انفاسه حتى وصلت لمبتغاها.

حان دور الأسوارة وقد ازداد العذاب وهو يمسك رسغها ويثبت به الاسوارة ثم عاد يحتل يدها.

زادت نسبة العذاب عندما جاء دور الطوق وهي مضطرة للاستدارة كي يستطيع غلقه من الخلف

وبيده الممسكة بيدها لفها حتى جعلها تستدير وتقدم منها خطوة كي يضع الطوق حول عنقها

لف يديه حول عنقها بالطوق وهم بغلق لكن عرقله شعرها ذو الملمس الناعم وهو مسترسل على ظهرها بحرية

فترك طرف الطوق بتعمد كي يرفع شعرها ويبعده عن عنقها

وساعدته هي بذلك ورفعت خصلاتها حتى ينتهي ويا له من عذاب وهي تشعر بأنفاسه تلهب بشرتها الناعمة

وخاصة عندما وجدته يتحسس عنقها كي يصل للطرف الأخر فحاولت منعه لكنه همس بجوار أذنها

_ شششش

حبست أنفاسها كي تتحكم في ذلك الشعور الذي راوضها لأول مرة

وصل للطرف الآخر وقد ازدادت وتيرة انفاسه وهو يشعر بقلبه يرفرف بسعادة غامرة لم يشعر بمثلها من قبل

وظل على حاله حتى انتهى أخيرًا

تنفست توايب الصعداء وهمت بالابتعاد لكنه أمسك كتفيها الشبه عاريتين يمنعها ثم طبع قبله ناعمة على عنقها ولم يكن باستطاعتها الاعتراض كي لا يشعر أحد بشئ وبعدها أداره أمامه وانفتح الضوء لتشهق هي وتأخذ منه أنفاسه وهو يراها بتلك الهيئة

لم ينتبه لتصفيق الجميع ولا لأهتزاز عينيها كل ما يشغله هي تلك الحورية التي تقف أمامه الآن

أخذ صدره يعلو ويهبط من شدة تأثيرها عليه

وهو لا يصدق تلك الفتنة المرتسمة أمامه.

أما هي فقد نظرت إليه بعتاب ثم أسرعت بالهرب من أمامه لتخرج من الغرفة

وياليتها لم تفعل

فقد أخذت خصلاتها تسارعها في السباق وذلك الشال الخاص بالثوب سقط عن كتفيها فأصبحت أمامه حورية سقطت عليه من السماء

لم ينتبه لهمهمات الجميع وضحكاتهم وكم ود في تلك اللحظة الإسراع خلفها وينعم بذلك الجمال الذي أذابه

 

 

العشرون من هنا 

تعديل المقال