رواية حدوتة زين كاملة وحصرية بقلم سمية عبدالسلام
استنى يا زين! انا عايزة اعرف انت مودينا فين وسايبين الناس اللي المفروض جاية عشان تحضر كتب كتابنا"
"خاطفـ.ـكِ"
"الجنون معاكِ هو عين العقل"
بطلت ضحك واتكلمت جد وانا مش فاهمة هو بيعمل ايه ده كتب كتابنا كان من ساعة و اول ما المأذون خلص سحبني من ايدي من وسط الناس وركبني العربية و اول ما استوعبت اللي عمله كان شغل العربية وبعدنا عن المكان.
"يا زين بجد احنا رايحين فين انا مش بحب المفاجأت"
"كنت ناوي لو موافقتيش تتجوزيني اخطفـ.ـكِ وبما انك وافقتي من غير اي اكشن او حوارات قلت اخترع انا الحوارات و اخطفـ.ـكِ"
بصيت قدامي للطريق وهمست بصوت هو سمعه كويس:
"بس انت خاطـ.ـف قلبي من زمان"
وقف العربية ولف راسه وقال وهو بيبص ليا جامد وبيقول:
"يعني اي"
كشرت وقلت:
"يعني انك واحد غبي ومش بتفهم و.."
"من غير شتيمة لو سمحتِ، عشان انا لساني اطول من شارعكم"
"زعلتك غبي، بس انت مش غبي يا زين انت جلنف، لوح تلج كنت بشوفه بيتحرك قدامي"
"يابنتي هو انتِ لسه واخدة قرص ألماني في الشتيمة وحالفة تطبقيه عليا"
"يعني لما كنت بلم الغسيل من بلكونة شقتنا اللي فوق شقتكم وكنت بوقع المشابك عندكم عشان انزل اخبط عليكم وعارفة ومتأكدة انك انت اللي هتفتح الباب عشان انت ابن امك..احم قصدي وحيد أمك ده كان ايه"
"اه انتِ قصدك على المشابك اللي بتحدفيها فوق راسي وانا قاعد في البلكونة واللي بسببها دماغي اتفتحت مش كده "
لفيت بعيني في كل مكان و اتوترت شوية بس داريت ده وانا بقول:
"يــوه يا زين، ما تدخلناش في تفاصيل دلوقت، طب فاكر كل مرة باجي عندكم ادي طنط حقنة الأنسولين و اقول لها و انت واقف ما هو لازم تتعبي من السكر و انتِ عايش معاكِ الحلويات دي كلها، هي كانت تضحك وانت عليك تكشيرة اسوء من تكشيرة شفيق اللي في سبونج بوب"
"واحد امه تعبانة وعندها السكر و ممكن تدخل في غيبوبة كنتِ عايزاني اعمل ايه اتحزم و أرقص"
"سيبراليكس"
"ده ايه ده كمان"
"ده مهدئ حلو اوي هيخليك في الروقان عشان بقيت نرفوز اوي يا زين وشكلنا هنكمل حياتنا مع بعض بيه "
ضحك و بعدين فتح باب العربية:
"طب انزلي"
نزلت وانا لسه مش فاهمة حاجة، بصيت على المكان كان كافيه بس كافيه قديم شوية اول ما تشوفه تحس انك رجعت زمن التمنينات من تاني، ورق جرايد على الحيطة،و صور لفنانين زمان زي شادية واحمد رمزي وشكري سرحان ده غير الكلام اللي مكتوب على الحيطة بطريقة عشوائية بس شكله جميل، المكان كان هادي ورقيق بالرغم ان فيه ناس بس هدوءه كان غريب، والانوار كانت بسيطة وفي الخلفية اغاني الست، حسيت اني جيت هنا قبل كده بس مش فاكرة.
"من حوالي 3 سنين كنتِ انتِ قاعدة على الترابيزة دي وانا جيت وقعدت على الترابيزة اللي قدامك كنتِ بتشربي شاي وبتقرأي كتاب وكان واضح اوي حبك للكتاب عشان كنتِ مركزة اوي، جه الجرسون و سألني اشرب إيه لقيت نفسي بشاور عليكِ و بقوله هاخد زيها"
حاولت افتكر، بس للاسف الذاكرة خانتني و لقيت نفسي ساكتة عايزة اسمع بقية الحكاية.
"فضلت باصص عليكِ وغصب عني ما عرفتش اغض بصري رغم انكِ تباني عادية بس اللي حسيته من ناحيتك اول ما عيني وقعت عليكِ ماكنش عادي"
كنت بسمع وانا مش مصدقة، زين هو اللي بيقول الكلام ده وبيقول لمين ليا انا، اللي كنت بتشحتف اسمع منه كلمة حلوة بدل التكشيرة اللي كان مصدرهالي طول الوقت لحد ما خلاص صدقت انها جزء من شخصيته.
"يابنتي رحتي فين انتِ معايا"
"ها ايوة يا زين ها وبعد العادي اللي مش عادي اللي حسيته من ناحيتي حصل ايه"
ضحك وهو بيكمل:
"جيت ادفع حساب الشاي لقيت اني نسيت المحفظة في العربية و العربية مع صاحبي"
"يا استاذ طب وانا ذنبي ايه حضرتك لازم تدفع الحساب"
"انا ماعرفش ازاي نسيت المحفظة بس حضرتك ممكن تستنى لحد ما صاحبي يوصل وهتاخد الحساب"
"مش هينفع انا الشيفت بتاعي خلص ولازم اسلم كل حاجة قبل ما امشي وانا عايز اروح مش هينفع استنى صاحبك ده"
"خلاص انا ممكن ادفع الحساب مافيش مشكلة"
بصيت عليكِ ورفضت ده بس للأسف اول ما طلعتي الفلوس الجرسون خدهم منكِ عشان ماكنش شايف ان ده وقت رجولة او كرامة عشان أعترض إني اخلي ست تدفعلي الحساب، حتى انتِ كمان مشيتي من قبل ما اشكرك جريت عشان الحقك بس لقيت نفسي ماشي وراك لحد ما وصلتي بيتك وعرفت انك ساكنة هنا، بعدها جبت والدتي و اجرنا الشقة اللي تحتكم"
أخيرا افتكرت الموقف بس ماكنتش اعرف ان الشخص اللي ساعدته ده يبقا زين!
"كنت بقف في البلكونة ازرع النعناع عشان عارف انكِ ما بتحبيش تشربي الشاي من غيره، و التكشيرة اللي كنتِ بتشوفيها على وشي دي كان عشان قبلها كنت ببقا شايفكِ واقفة مع ابن عمتك الملزق"
"و ليه ما اتكلمتش يا زين ليه استنيت 3 سنين وانا كل يوم بليل اعيط و اقول اني هنساك و هشيل حبك من قلبي و اول ما اشوفك تاني يوم الصبح اضحك زي الهبلة"
"عشان ماكنش ينفع اوعدك بحاجة انا ماكنتش هقدر اوفي بيها وقتها"
شكل انا اللي طلعت غبية مش هو.
"طب مش يلا نرجع بقا لناس اللي مستناينا دي"
"من 3 سنين جت بنت زي القمر دفعتلي حساب الشاي عشان نسيت المحفظة وانا لازم ارد الدين ده"
"يعني ايه؟!"
"يعني تشربي معايا شاي بالنعناع"
"زين هي الناس مالها بتبص علينا ليه؟ هو الفستان فيه حاجة"
"زي عادتكِ شايفة نفسك حد عادي، وزي عادتي لسه شايفكِ احلى حد
الثاني من هنا
