رواية احتواء قلب الفصل السابع والعشرون 27 بقلم عبير سليم
ما أصعب فواجع القدر و لكن اشدها وطئه على البشر أجمعين فقد الأبناء فهم من نعش لاسعادهم و لأجلهم نتحمل صعاب الحياه فمنذ انباتهم داخل رحم امهاتهم و نحن نبني لهم مستقبلهم و نعش معهم سنوات حياتهم و نتمنى لهم كل ما حرمنا القدر منه فإذا كتب القدر كلمته و استرد الله وديعته كانت الطامه الكبرى التي لا تفيد معها نصيحه و لا يخفف عنها كلام
لحد امتى بس يا فاروق حتفضل في الحاله دي سليم و ابنه راحوا للي خلقهم و هما اكيد في مكان احسن و ان شاء الله يكونوا في الجنه يا حبيبي سليم طول عمره طيب و فحاله و كل الناس كانت بتحبه و مش سايب غير كل ذكرى حلوة
فاروق : الظاهر ان الطيبين بقوا هما اللي بيفارقوا الدنيا اوام زي ما يكون ملهمش مكان فيها و لازم يروحوا لمكان احسن منها
جميله : الله يرحمهم و يجمعنا بيهم في الجنه يارب فوق يا اخويا عشان خاطري و عشان خاطر و لادك و مراتك الغلبانه اللي ملهاش غيرك يا فاروق انت سندنا و عكازنا يا اخويا كفايه وجع قلب بقى متوجعش قلوبنا عليك يا غالي
فاروق : وحشني وحشني اوي يا جميله مش قادر أصدق اني خلاص مش حشوفه تاني مش قادر اتخيل الحياه من غيره مش قادر كل مكان في البيت بيفكرني بيه كل ركن سايب فيه ذكرى
صورته مبتفارقنيش لحظه شايفه فكل الوشوش مش قادر يا اختي غصب عني سامحني يارب مش قادر
لا و راح واخد معاه ابنه كمان طب كان سابهولي كان سابلي حته منه تفكرني بيه لكن يروحوا هما الاتنين كده فغمضة عين هو و ابنه الصبر يارب
جميله : أيوة اطلب الصبر من ربنا يا حبيبي ده امر ربنا و اكيد ليه حكمه و احنا منقدرش نعترض على حكمته الله جاب الله خد الله عليه العوض
وحتعدي يا فاروق و الله حتعدي يا اخويا كله بيعدي مع الوقت
فاروق : كنتي انتي عديتيها يا جميله ده انتي لسه لحد دلوقتي فاكرة مش ناسيه
جميله : عمر الغاليين ما بيتنسوا يا فاروق اصلا مينفعش يتنسوا لكن بتمشي و بتعدي الدنيا مبتستناش حد يا حبيبي فاروق احنا مؤمنين بالله وبقضاءه وقدره و منملكش غير اننا نصبر عشان ناخد الأجر والثواب
البيت وحش من غيرك اوي يا فاروق طعمه وحش من غيرك يا غالي و غاليه تعبانه يا فاروق وانت عارف انك كل حياتها طول اليوم بتعيط احساسها بالعجز و انها مش قادرة تكون جمبك زود تعبها اكتر كفايه عليها وجع قلبها على ضناها و حفيدها متزودش وجعها انت كمان يا حبيبي
فوق يا فاروق فوق عشان خاطرنا و ارجعلنا بقى
فاروق : حاضر يا جميله حاضر
تستئذن الممرضه و تدخل عشان تديله علاجه و تخرج و تشرد جميله و يتردد في اذنها الصوت اللي سمعته
أدهم : سرحتي في ايه يا عمتي
جميله : تفتكر كنت بحلم و اللا كان بيتهيألي يا أدهم
أدهم : قصدك على الصوت اللي فكرك بيه
جميله : هو و الله يا أدهم انا عمري ما انسى صوت عبد الرحمن مهما طال الزمن و انا سمعته بنفسي كان جمبي بيتكلم
أدهم : أنا ماخدتش بالي و الله يا عمتي كنت ببص الناحيه التانيه
و بعدين حتى لو اللي سمعتيه بيتكلم صوته زي صوت زوجك الله يرحمه فأكيد صدفه يا عمتي
ينتبه فاروق : عبد الرحمن ايوة هو عبد الرحمن افتكرت و انا بقول سمعت الصوت ده فين قبل كده
أدهم : هو في ايه يا جماعه مالكم النهارده
فاروق : الشاب اللي شبه سليم الله يرحمه
أدهم : قصدك هادي
فاروق : أيوة هو مش انا قلتلكم ان صوته شبه صوت حد اعرفه وحاولت افتكر بس افتكرت دلوقتي هو صوت عبد الرحمن جوز عمتك جميله الله يرحمه
جميله :في إيه هو انتوا بتتكلموا عن مين متفهموني
أدهم : أنا حفهمك يا عمتي
يوصل هادي لشقة ناديه و يرن الجرس محدش يرد يجري على شقته و يرن الجرس الأول احتراما للي جوة و بعد كده يفتح الباب و يدخل و تقابله آلاء بفرحه : حمد الله على السلامة يا استاذ هادي
هادي : الله يسلمك يا الاء في ايه يا آلاء طمنيني و فين ماما و جنه
آلاء : ماما و جنه في اوضة النوم خير ان شاء الله و الله ادخل و انت تعرف كل حاجه
يخبط عالباب و يفتحه يلاقي جنه سانده ضهرها عالسرير و ناديه جمبها : سلام عليكم يردوا عليه السلام
هادي : جنه حبيبتي انتي تعبانه مالك في ايه يا حبيبتي
تبتسم جنه و متردش
هادي :الله هي ايه الحكايه مالها جنه ياماما في أيه
ناديه : هههههه انتي مكسوفه يا جنتي يعني مش عاوزة تقولي اقول انا طيب
هادي : لاء متقوليش اللي جه فبالي معقوله
ناديه بفرحه : الف مبروك يا هادي حتبقى أب يا حبيبي
هادي يفرح فرحه ملهاش حدود و يفضل يضحك و هو مش مصدق نفسه انه اخيرا حلمه اتحقق و حيبقى اب بيبكي من الفرحه و د.. موعه بتنزل على وشه مش قادر يمنعها و لا يتحكم فيها : بجد بجد الخبر ده انتي حامل يا جنه يعني انا حبقى اب انا حبقى اب
جنه : أيوة والله يا حبيبي حتبقى اب و مش اي اب احن اب في الدنيا كلها
يحضنها بشده و يبكي فحضنها
تسيبهم ناديه و تخرج و تقفل الباب وراها
جنه و هي بتمسحله د.. موعه : ياااه يا هادي للدرجه دي يا حبيبي
هادي : حلمي اللي عشت عمري كله بحلم بيه طول عمري وانا بحلم اكون اب و يبقى عندي ولاد و عيله و اخيرا الحلم اتحقق و حيبقى حقيقه
جنه : أيوة يا حبيبي حيبقى حقيقه
عارف يا هادي انا كمان عشت سنين و انا بحلم باللحظه اللي اسمع فيها كلمة مبروك يا مدام انتي حامل
كنت بحلم باللحظات الجميله اللي حعيشها و في جنين بينبض و بيكبر جوايا و بعد كده يخرج للحياه و يقوللي يا ماما يبقى ابني انا بتاعي انا افرح بيه و اخبيه جوة قلبي و اعيش عشانه عمري كله
هادي : ربنا يكمل فرحتنا على خير يا رب بس مقلتليش انتي رحتي للدكتور و اللا عرفتي ازاي
جنه : من وقت ما صحيت و انا برجع و تعبانه و لما آلاء حطت الاكل مقدرتش اشم ريحته و قمت رجعت ماما قلبها حس طلبت من آلاء تنزل تشتري اختبار حمل و عملته و طلع إيجابي وانا قلتلها تتصل عليك عشان مش عارفه حترجع امتى و انا مكنتش حقدر افضل قاعده كده من غير ما اقولك
هادي : أنا جه فبالي اي حاجه غير دي
يااه يعني انا حبقى اب حبقى اب انا مش مصدق نفسي
يا مانت كريم يارب لأ و من مين من أجمل حب فحياتي ربنا يخليكي ليا يا جنه يارب
جنه عشان خاطري مش عاوزك تتحركي من مكانك نهائي كل طلباتك حتبقى أوامر كل اللي نفسك فيه تقوليلي عليه و انا اجيبهولك فثانيه بصي عاوزك تتدلعي علية زي ما نتي عاوزة تقوليلي عاوزة اكل ده يا هادي نفسي فده يا هادي مش طايقاك و لا طايقه ريحتك يا هادي
جنه : هههههههه اهي دي بقى استحاله الا انت يا هادي ده انت اللي حققتلي امنيتي يا حبيبي انت اللي وهبتني الحب و الحياه و ادتني الحنان كله انت اللي بفضل وجودك فحياتي حبقى ام يا هادي انا لو علية مش عاوزاك تبعد عني و لا تغيب عن عيني لحظه واحده تفضل قاعد ادامي كده لحد ما اولد
هادي و هو بيبوس ايدها : وانا على أتم الاستعداد انا اسيب الدنيا كلها عشانك يا جنتي
جنه : يا حبيبي يا هادي ربنا يخليك لية يارب
هادي : نجلاء عرفت
جنه : اتصلت بية من شويه و قلتلها و فرحت اوي عقبالها هي كمان يا رب
هادي : يارب عقبالهم هما كمان ان شاء الله
جنه : هادي قمت ليه يا حبيبي خليك جمبي شويه
هادي : حصللي ركعتين شكر لله يا جنتي
يفرد هادي سجادة الصلاه و يصللي شكرا لربنا على فضله و نعمه الكتيرة عليه
..........................................
معقوله يعني في حد شبه سليم اوي كده و كمان صوته زي صوت جوزي الله يرحمه سبحان الله فعلا يخلق من الشبه أربعين انت خلتني عاوزة اشوفه يا أدهم
أدهم : هما هنا في الدور اللي احنا فيه حبص عليه و لو شفته حوريه ليكي
جميله : ياريت يا أدهم نفسي اوي اشوفه
ينهي هادي صلاته و يتصل على مسعد و مرزوقه عشان يبلغهم و يفرحهم
و يسمعوا صوت زغاريد مرزوقه في التليفون و الدنيا مش سايعاهم من الفرحه و يباركوا لجنه : الله يبارك فيكي يا ماما
مرزوقه : خللي بالك من نفسك يا جنه ده انتي متعرفيش فرحتنا النهارده اد ايه ياما نت كريم يا رب طول عمري بحلم اشيل ولاد هادي على أيدي ربنا يكملك على خير يا حبيبتي يارب
بصي انا حبعتلك البنات يعملولك كل اللي انتي عاوزاه و انتي متقوميش خالص
جنه : ربنا يخليكي يا حبيبتي يارب آلاء و ماما معايا و الله و لو احتاجت حاجه حقولكم هو انا لية مين غيركم
يقفلوا معاهم و هادي يتصل على اسماء اللي فرحتها مكنتش اقل من فرحتهم كلهم : الف الف مبروك يا هادي ربنا يكملها على خير يا حبيبي يارب
هادي : الله يبارك فيكي يا رب انا بس حطمن عليها و حاجي علطول
اسماء : لا و الله مانت جاي خليك معاها يا حبيبي خد مراتك فحضنك هي دلوقتي محتاجاك جمبها ربنا يخليكم لبعض يارب
هادي : لا مش حقدر انا ساعتين وجاي
أسماء : متتعبش قلبي بقى يا هادي انت معانا طول الوقت ملوش لزوم تيجي يونس في العنايه و انا معايا البنات ده انا حتى طلبت من فهد يروح يرتاح شويه ريحوا يا حبايبي انتوا تعبتوا معانا اوي ربنا يخليكم لينا يارب
و لو حصل حاجه حكلمك على طول المهم تخللي بالك من جنه و الف مبروك يا حبيبي
يسيب أدهم عمته مع باباه و يخرج يحاول يشوف هادي عشان يوريه لعمته باي طريقه لكن مش ظاهر خالص لحد ما يلاقيها هي خارجه من الأوضة او بمعنى أصح واحده منهم لانه حتى ميعرفش اسماءهم ايه فيروح ناحيتها : ازيك
جيلان : أهلا في حاجه حضرتك
أدهم : انتي نسيتيني احنا مش لسه كنا بنتكلم مع بعض من كام يوم
جيلان : انا حضرتك اتكلمت معايا انا بس انا اول مره اشوفك
أدهم : تبقى اختك بقى شوفتوا بقى يعني ينفع كده
جيلان : ينفع ايه هو حضرتك في حاجه
أدهم : لأ انا بس قصدي انكم شبه بعض اوي لغبطوتني
اسف و الله انا بس كنت عاوز اطمن على بابا كم
جيلان : الحمد لله بخير
أدهم : و هادي اخوكم هنا
جيلان : حضرتك تعرف ابيه هادي
أدهم : اعرفه عز المعرفه هو هنا
جيلان : لأ و الله هو مشى من شويه
أدهم : طب و مش حييجي دلوقتي
جيلان : لاء هو مش حييجي النهارده اصل مراته حامل و تعبانه و هو راحلها
أدهم : اه قلتيلي طيب خلاص ماشي
جيلان : في حاجه تحب اقولهاله
أدهم : لا خلاص بقى مش مهم اما اشوفه عن اذنك
يمشي و هو عمال يتلفت و يبص عليها : ده انتوا حاجه تعقد وربنا يخرببيتكم على بيت جمالكم
بعد مرور عدة أيام يخرج يونس من العنايه لحجرة عاديه و كلهم حواليه و يطمنوا عليه و يتكلم معاهم و الفرحه مالية قلوبهم ان يونس الحمد لله صحته أتحسنت و كلها كام يوم و حيخرج من المستشفى
و ييجي عمرو ومعاه همسه يزوروه و يبلغوهم كلهم انهم ما داموا اطمنوا على يونس حيحددوا معاد الفرح و الكل فرحان عشانهم و يباركولهم
و تتوالى الزيارات ليونس ييجي الأهل و الأقارب و بعض الموظفين بالشركه عشان يطمنوا على يونس : و الله اللي اسمه عدي ده ما عارف ج. نسه ايه
هادي : معلش يا عمرو كل واحد و عذره معاه
عمرو : عذر ايه و زفت ايه ده بني آدم ز. باله هو مش اللي تعبان ده ولي نعمته و هو صاحب النعم اللي هو فيها مش المفروض ييجي يزوره او حتى يطمن عليه ده بني ادم وا. طي انا عمري ما تخيلت انه كده ده كل الموظفين سألوا عنه و جم زاروه الا هو
هادي : كل واحد بيعمل بأصله يا عمرو و احنا مش حنحكم عالناس كل واحد يعمل اللي يريحه المهم دلوقتي طمني عليك و على همسه نويتوا على امتى ان شاء الله
عمرو : أول الشهر بأمر الله
هادي : ربنا يتمملكم على خير يا رب
عمرو : يارب يا هادي انا بجد مش قادر اتخيل لو مكنتش اتعرفت على همسه و دخلت حياتي و حبتها كنت حعمل ايه و لا كنت حكمل حياتي ازاي
هادي : تعرف يا عمرو انا من وقت ما دخلت بيتهم زمان و شفتها و انا حسيتها اختي الصغيره بنتي اللي نفسي اكون انا ابوها اللي افتخر بيها ادبها و أخلاقها و احترامها فوق الوصف يجبروك على حبك و احترامك ليها
عمرو : هو ده اللي حصل معايا و الله وعلى اد ما كنت بحب ميار و عنيه مش شايفه غيرها على اد ما حبيت همسه و بقت هي كل حياتي لدرجة اني مش مصدق ان قلبي كان فيه حد غيرها فيوم من الأيام
هادي : خللي بالك من همسه يا عمرو همسه تستاهل كل خير
عمرو : فعنيه يا هادي دي دعوة بابا و ماما لية ربنا يباركلي فيها يارب
هادي : ربنا يخليكم لبعض يا حبيبي يا رب
......................................
في مساء احد الايام و بعد انتهاء الحفل : آه انا تعبت اوي من الوقفه على رجلي طول الوقت
شهاب : بس انتي معجبتينيش الليلادي يا ذكرى
ذكرى : معجبتكش اللي هو ازاي يعني ده انا مقعدتش لحظه
شهاب : مقعدتيش لحظه فعلا اه مانا واخد بالي كويس بس مكنتيش مركزة مع اللي قلتلك عليهم كنتي مع واحد بس و اللا انا غلطان يا مدام
ذكرى : واحد مين ده انا رحبت بالكل شهاب : اشرف حسام الدين و اللا انا غلطان
ذكرى : عادي يا شهاب مش من المدعوين
شهاب : لا مش عادي يا ست ذكرى لما تسيبي الضيوف كلهم و كمان متقفيش مع الراجل اللي انا منبه عليكي تبقي زي ضله طول الحفله و اننا لازم نبلفه عشان يوقع معايا الصفقه و الراجل عينه تبقى حتطلع عليكي و انتي متعبريهوش و تروحي تقفيلي مع حتة واد ابن امبارح و لسه بيتعلم الشغل و جاي على حس الناس اللي معاه يبقى مش عادي يا
ذكرى
ذكرى : هو في ايه يا شهاب هو انت اشتريتني و اللا ايه انا حرة اقف مع إللي انا عاوزة اقف معاه و بعدين هو مش اشرف ده يعتبر من رجال الأعمال و ممكن يبقى لينا معاه بيزنس
شهاب : مع ده انتي هبله و اللا عبيطه ده مين ده اللي انا افكر يكونلي معاه بيزنس انا محطش ايدي غير في ايد الكبار يا هانم
ذكرى الكلام اللي اقولهولك اللي يتسمع و بس انتي فاهمه بلاش تشوفي مني الوش اللي عمرك ما شفتيه
ذكرى : أنا ماشيه
شهاب : رايحه فين
ذكرى : مروحه يا شهاب تعبانه عاوزة ارتاح فيها حاجه دي
شهاب : لا مفيهاش حاجة بس اياكي تفكري تلعبي بديلك من ورايا انتي فاهمه
تسيبه ذكرى و تمشي و تروح ناحية عربيتها تلاقي اللي بيكلمها : مروحه
تلف ليه و الابتسامه على وشها : أيوة
_تحبي نتمشى شويه بعربيتي
ذكرى : معنديش مانع
تروح معاه ناحية عربيته و تركب معاه و هو ينطلق بالعربيه ومتعرفش ان شهاب متابعها و شايفها : ماشي يا ذكرى اما وريتك اخد منك اللي انا عاوزه و بعد كده حتشوفي حعمل فيكى ايه
بعد مرور اكتر من ساعه يفتح باب شقته : اتفضلي ادخلي متقلقيش مفيش هنا حد غيري
ذكرى : شقتك دي يا أشرف
أشرف : أيوة لما بكون زهقان بحب اجي هنا استريح بعيد عن الدوشه
اتفضلي اقعدي
تقعد معاه ذكرى و يقعدوا يتكلموا مع بعض كتير في موضوعات تخص الشغل و الحياه و عن حياتهم الخاصه و يبدأ يعرض عليها يفرجها عالشقه لحد ما ييجي الدور على أوضة النوم اللي تدخلها معاه من غير اي اعتراض و هي مستسلمه ليه يقرب منها و ايده على وشها و شعرها و عيونه فعيونها : انتي حلوة اوي
ذكرى : انت أحلى يا أشرف
يلتقط شفايفها في قبله طويله و ايده بتتحرك على منحنيات جسمها وهي محاوطه رقبتها بدراعاتها وأيدها بتتحرك على شعره تايهه كأنها في دنيا تانيه متحسش غير بايده و هي بتفك سوستة الفستان و الفستان بيقع عالارض. يمر الوقت بيها و هي معاه
و مع ظهور اول شعاع لنور الشمس
ياااه معقوله الوقت جري بسرعه كده من غير ما احس
أشرف و هو بيبعد شعرها عن عينيها : هي دايما كده الأوقات الحلوة بتعدي بسرعه
تتحرك ذكرى من بين احضانه و هي بتلف نفسها بالملايه
أشرف : انتي حتمشي خليكي معايا شويه
ذكرى : معلش لازم أمشي
اشرف : حشوفك تاني
ذكرى : مش عارفه
أشرف : ذكرى عاوز اشوفك تاني
ذكرى : ليه
أشرف : معرفش بس انتي حركتي جوايا مشاعر متحركتش تجاه واحده ست قبل كده حسيت معاكي باحساس محستهوش قبل كده
ذكرى : صدقني لوقلتلك اني من فترة محستش بالاحاسيس الجميله دي
أشرف : من فترة تقصدي مين
ذكرى : اقصد طليقي نفس اللي كنت بحسه و انا معاه هو نفس اللي حسيته وانا معاك دلوقتي غير كده مفيش غير امتلاك و قرف و بس
اشرف : و لما هو كده ليه سيبتوا بعض
ذكرى : عشان انا واحده طم.. اعه مبشبعش دايما عاوزة الاكتر فكان لازم اسيبه و اشوف اللي يحققلي اللي انا عاوزاه
اشرف : و حققتي اللي انتي عاوزاه ذكرى : لسه
أشرف : معقوله انتي كده
ذكرى : أيوة يا اشرف انا كده
أشرف : بس الط.. مع آخرته وحشه و زي ما بيقولوا الط..مع بيقل ما جمع
ذكرى : لاء انا معايا كتير و حيكون معايا الاكتر
أشرف : في مثل كنت بسمع جدتي دايما كانت بتقوله يا مستكتر الزمن اكتر و ممكن اللي انتي فاكراه كتير ده يروح منك فغمضة عين
ذكرى انتي لازم تعيدي حساباتك كويس احنا اه بنشتغل عشان نوصل للي احنا عاوزينه لكن من غير ما نخسر نفسنا أي حاجه في الدنيا ممكن تتعوض الا البني ادم يا ذكرى
الحقي نفسك يا ذكرى وفوقي قبل ما تندمي
ذكرى : ليه
اشرف : ليه ايه
ذكرى : ليه مهتم انك تنصحني كده و انت متعرفنيش غير من كام ساعه
اشرف : معرفش بس يمكن لأني ارتحت ليكي بجد
ذكرى خللي بالك على نفسك و خللي تليفوني معاكي لو احتاجتي حاجه متتردديش انك تكلميني
ذكرى : ماشي يا اشرف
...........................................
في المستشفى بعد ما اطمئن الدكتور على صحة يونس و خرج من عنده و هادي خرج معاه : كده اقدر اقولكم الف حمد الله على سلامة البشمهندس
هادي : الله يسلمك يا دكتور انا متشكر اوي لحضرتك تعبناك معانا
الدكتور : متقلش كده يا استاذ هادي ده البشمهندس يونس من اكتر الناس المحترمين والف حمد الله على سلامته و على فكرة انتوا تقدروا تخرجوا من المستشفى فاى وقت
يشكره هادي و يلاقي اللي بيكلمه : صباح الخير يا استاذ هادي
هادي : صباح النور يا بشمهندس أدهم
أدهم : ازي الوالد دلوقتي يارب يكون بخير
هادي : الحمد لله و الله وخلاص احنا خارجين ان شاء الله
أدهم : بجد احنا كمان حنخرج النهارده اخيرا الحمد لله بابا صحته اتحسنت و حيخرج بس انا اسف و الله لية عندك طلب
أدهم : اتفضل
أدهم : بابا كان نفسه يشوفك قبل ما يخرج انت عارف
هادي : أيوة طبعا فاهم قصدك ربنا يصبر قلبه يارب
حاضر انا جاي معاك اتفضل
يدخل هادي معاه و وقتها كان فاروق قاعد و منتظر مراد ييجي ياخدهم يسلم عليه هادي و يقعد معاه و فاروق مش قادر يبعد عينه عنه و لا قادر يتحكم في نفسه : هو انا ممكن اخدك فحضني
ميحسش هادي بنفسه غير و هو بيترمى فحضنه و فاروق مش قادر يتحكم فنفسه و لا فمشاعره : ياااه نفس حضنه و نفس ريحته سبحان الله كأني شايفه ادامي كأنه عايش مراحش من بين ايدينا
هادي : ربنا يقويك و يصبر قلبك يا رب و يعوضك في اخواته خير
فاروق : يارب يارب
هو انت عايش هنا في القاهره يا هادي. هادي : أيوة انا عايش هنا وعندي شركه
فاروق : بتشتغل مع والدك يعني
هادي : لاء هو عنده شركه وانا عندي شركه
فاروق : ربنا يخليك ليه يا حبيبي يا رب و يخليلك اخواتك
هادي : ربنا يخليك يا حاج
يلاقي تليفونه بيرن فيستئذن و يفتح الخط : ايوة يا جيلان انا موجود يا حبيبتي جمبكم بابا عاوزني حاضر جاي حالا
معلش والله عاوزني
فاروق : روح يا بني و اشوف وشك بخير
هادي : هو انتوا معانا هنا في القاهره
أدهم : لاء من بنها
هادي : جمبنا يعني مش بعيد طب لو ممكن تديني رقم تليفونك وابقى اكلمك توصفلي العنوان و اجي اطمن عالحاج
أدهم : بجد يا ريت طبعا اتفضل يتبادلوا مع بعض أرقام تليفوناتهم على وعد أن هادي يزورهم
يسلم عليهم و يمشي
و بعد مرور عدة ساعات كلهم يخرجوا من المستشفى فوقت واحد
هادي و معاه يونس و اسماء و البنات
و مراد و أدهم و معاهم والدهم
مراد : البنتين دول حلوين اوي يا أدهم
أدهم : هما حلوين بعقل دول يهوسوا يا بخت اللي حيكونوا من نصيبهم
مراد : ماهما ممكن يكونوا مرتبطين
أدهم : و دي بردوا تفوتني بصيت في ايدهم مفيش حاجه
مراد : هههههههه طب ياللا بينا يا فالح
يتحركوا كلهم من ادام المستشفى و كل واحد فيهم رايح بيته عشان يرتاح
هادي يوصلهم الفيلا و فرحتهم برجوعهم و معاهم باباهم ملهاش حدود و الشغالات يزغردوا : لوووووولي لوووولي الف حمد الله على السلامة البيت نور برجوع حضرتك
يونس : الله يسلمكم ربنا يخليكم يارب
اسماء : الف حمد الله على سلامتك يا حبيب عمري
يونس : الله يسلمك يا حبيبة قلبي
بيسان : احم احم نحن هنا يعني ينفع كده يا بابي و احنا واقفين
يونس : بصراحه اه ينفع و على قلبي زي العسل
اسماء : سلامة قلبك يا حبيب قلبي
بيسان و هي بتمثل ان حيغمى عليها : ابيه هادي الحقني
هادي : هههههههه عسل وربنا يا بوسي يقعدوا يضحكوا و يهزروا
هادي : انتوا عارفين القعده دي كانت عاوزه فهد
اسماء : أيوة صحيح هو فين ده يادوب اتصل و قلتله اننا حنخرج كمان شويه و مبانش تاني
هادي : مش عارف والله دلوقتي حيبان انتوا عارفينه زي فرقع لوز
يضحكوا كلهم و هادي يقعد جمب يونس و يبوس ايده : الف حمد الله على سلامتك يا بويا الدنيا كلها نورت برجوعك يا اغلى الناس
يونس : حبيبي يا هادي ربنا ميحرمنيش منك يا حبيبي يارب
اتصل على فهد عاوزه
فهد يا فهوده
فهد : يا قلب فهود
نجلاء : بقولك يا عمري مش انت اطمنت خلاص على يونس باشا
فهد : لا لسه
نجلاء : فهد اتلم بقى
فهد : ييه حاضر حاضر يا زنانه
نجلاء : طب حتاخدني عنده امتى
فهد : ربنا اللي بياخد يا حبيبتي
نجلاء : بقى كده طب انا زعلانه
فهد : لا وانا مقدرش على زعل حبيبي يا ناس بس انا خايف
نجلاء : من ايه
فهد : تفتكري من ايه من ابوكي طبعا حاسس انه اول ما حيشوفني حيحدفني في البحر
نجلاء : هههههههه هههههههه
فهد : استني وطي صوت امك ده شويه هادي بيتصل : أيوة يابني
بهبب ايه عندي يعني حكون بهبب ايه عندي قاعد مع مزتي شويه حاضر حاجي سلام
ياللا يا اختي قدامي نطمنوا عالراجل الأول
نجلاء : ماشي يا حبي
تمشي تتمختر ادامه
فهد : لا بلاش اللعب بالاعصاب ده و الا و ربنا ما في مرواح في حته
في اليوم التالي نجلاء و فهد في العربيه مسافرين اسكندريه
نجلاء : فهد وقف العربيه مش قادره
يوقف فهد و تنزل نجلاء و ترجع
فهد ينزل وراها : مالك يا نجلا
نجلاء : معلش حبيبي بقالي فترة مسافرتش مسافه طويله و اكيد تعبت
فهد : أول كافيتيريا تقابلنا نستريح فيها شويه
نجلاء : ماشي حبيبي
بعد مرور حوالي ساعتين
رنات جرس متواصله
صلاح : حاضر ياللي عالباب حاضر هو في ايه
يفتح يلاقيها ادامه : حبيبي وحشتني
صلاح : نجلاء، مش معقوله ياخدها فحضنه : ياحبيبتي يابنتي وحشتيني اوي يا نور عين ابوكي
تعالي حبيبتي ياخدها و يدخل ويقفل الباب من غير ما يشوف اللي واقف مستني يحن عليه و يعبره
يقعد فهد عالسلم و يحط ايده على خده
صلاح : ياااه وحشتيني اوي يا نوجه البيت وحش اوي من غيرك مفيش حاجه ليها طعم من غيرك يا حبيبتي
نجلاء: يا حبيبي يا بابا انت كمان وحشتني اوي
تيجي مامتها و تجري عليها نجلاء و تحضنها
فاديه : الله امال فين فهد جوزك
نجلاء : بابا يا لهوي انت قفلت الباب في وش فهد
صلاح :ايه ده هو معاكي
نجلاء : أيوة طبعا يا بابا امال يعني حاجي لوحدي
فاديه : يا لهوي عليك و على عمايلك تروح تفتح الباب و تضحك على شكله و هو قاعد عالسلم : هههههههه تعالى يا فهد معلش يا حبيبي حقك علية انا عمك ما اخدش باله منك
فهد : حبيبتي يا ماما و الله انتي اللي فيهم
يسلم عليها و يدخل
صلاح و هو قاعد و نجلاء فحضنه : ازيك يا فهد حمدالله عالسلامة معلش نسيتك
فهد : الله يسلمك و لا يهمك يا بابا
صلاح : اقعد انت مش غريب الله مالك يا حبيبتي وشك بهتان كده ليه نجلاء انتي مبتاكليش هو انت مبتأكلش البنت
فهد : اه اصلي باكل اكلها الصراحه
نجلاء : لا يا بابا انا كويسه و الله بس تعبت من السفر
صلاح : يا حبيبتي طب تعالي استريحي في اوضتك شويه
فاديه : طب ياكلوا الأول و بعد كده يدخلوا يريحوا شويه
صلاح : مين اللي يدخلوا هي بنتي حتدخل اوضتها ترتاح و انا حقعد جمبها و ده خليه هنا قاعد هي سايبه و اللا إيه فرجيه عالمسلسل الهندي اللي بقالك تلت سنين بتتفرجي عليه و مبيخلصش و بنتي تدخل ترتاح شويه
فهد : استغفر الله العظيم ياربي بابا دي مراتي هاه شكل حضرتك كده نسيت
صلاح : مراتك في بيتكم لكن هنا لاء مفيش الكلام ده و إلا و ربي
فهد : و الله مانت مكمل خلاص اديني قاعد اهوه الصبر من عندك يارب
فاديه : هههههههه معلش يا فهد متزعلش منه ده بيحبك و الله بس بيحب يناغشك. فهد : يا لهوي على ده حب
تقوم فاديه و تحط الاكل : اما انا بقى عامله اكلة السمك اللي بتحبيها يا قلب ماما
اول ما نجلاء تشم ريحة الأكل تجري عالحمام و ترجع
يجري وراها فهد و امها و باباها : مالك يا حبيبتي
نجلاء : تعبانه مش قادره و تقع من طولها
يشيلها فهد بسرعه و يدخلها اوضتها و ينزل صلاح عالدكتور اللي ساكن معاهم في العماره و الدكتور يطلعلها بسرعه و يفتح شنطته و يخرج منها اختبار
و ياخد منها عينة دم و يعمللها اختبار :
الف مبروك يا استاذ صلاح نجلاء حامل
صلاح: ايه بجد يا دكتور مصطفى نجلاء بنتي حامل
مصطفي : أيوة و الله اهوه الاختبار شرطتين يعني حامل
فاديه : لوووولي لوووولي الف مبروك يا فهد الف مبروك يا نجلاء ياااه انا مش مصدقه نفسي انا حبقى جده الحمد لله يارب
فهد : الله يبارك فيكي يا ماما
صلاح : مبروك يا فهد لا طلعت فهد بصحيح
فهد : ما قلنا كده قلتوا اطلعوا من البلد
دكتور مصطفى : هههههههه الف مبروك اهم حاجه الراحه هي لسه في الاول يعني بلاش حديقة الحيوان دي لا فهد و لا نمر لازم ترتاح لحد الحمل ما يثبت و ياريت قبل ما تسافروا تعدوا علية في العياده نطمن اكتر و اكتبلها على شوية حاجات لازم تاخدها في الاول
فاديه : حاضر يا دكتور حجيبها لحضرتك
ييجي صلاح يحاسبه : عيب عليك يا ابو نجلاء دي فرحتنا كلنا والف مبروك
صلاح : ربنا يخليك يا دكتور مصطفى مننحرمش منك يارب
يوصله للباب و يلاقي فهد قاعد جمبها يقومه : قوم انت كده لو سمحت
فهد : في إيه
صلاح : انت مسمعتش الدكتور لسه قايل لازم ترتاح
فهد : و انا عملت حاجه
صلاح : و هو انت عاوز تعمل حاجه كمان
نجلاء : ههههههه هههههه
فاديه : قوم يا صلاح الله يهديك سيبهم يقعدوا مع بعض دي اول فرحتهم
صلاح : نعم هما مين دول اللي يقعدوا مع بعض على اساس انهم محرومين من بعض جايين يقعدوا مع بعض هنا لا بقولكم ايه و ربنا حخرجك انتي و هو برة الشقه و اقعد انا و بنتي لوحدينا اه انا محدش حياخدها مني سيبوني بقى اشبع منها شويه يا ناس
فاديه : ربنا يهديك يا صلاح يا رب
يقف فهد و هو بيتفرج عليهم
صلاح : ياااه انا مش مصدق نفسي معقوله كبرتي اوي كده و حتبقي ام يا نوجه
نجلاء : كبرت ايه بس يا بابا ده انا اتاخرت اوي ده صحابي ولادهم دخلوا المدرسه
صلاح : ربنا يكملك على خير يا رب
نجلاء : مبسوط يا بابا
صلاح : طبعا يا حبيبتي ده اعز الولد ولد الولد انا مش مصدق نفسي اني حشيل ولادك على أيدي ربنا يطول فعمري لحد ما تقوميلنا بالسلامه يارب
نجلاء : يا حبيبي يا بابا ربنا يخليك لية يارب
فاديه : معلش يا حبيبي بقولك ليه سيبك من جوز المجانين دول تعالى انا و انت ناكل السمك ده انا عامله شوية سمك و جمبري انما ايه يستاهلوا بوقك
فهد : سمك و جمبري و انا حعمل ايه بالجمبري بس يا ماما ما اديكي شايفه اهوه ده انا لو قربت منها مش بعيد الاقي نفسي بين الاسوار
فاديه : هههههه لا اطمن هو شويه كده و حيتقلب ينام و انا حدخلك عندها بالراحه من غير ما يحس تعالى بقى الأكل حيبرد
فهد : ماشي يا للا بينا الله الأكل شكله حلو اوي
فاديه : كل يا حبيبي الف هنا و شفا على قلبك يا ابو صلاح
فهد : صلاح مين لا الله يخليكي كفايه علية صلاح واحد آه ضربتين في الراس بتوجع.
فاديه : هههههه يا عيني الواد اتعقد الله يسامحك يا صلاح
