رواية احتواء قلب الفصل الرابع والعشرون 24 بقلم عبير سليم
هل السعاده عمرها قصير كما يقول البعض ام هذه مقوله يتوارى وراءها من يفرحون بلهفة البدايات و لكن سرعان ما تتبدل مشاعرهم و يدعون انها حال الحياه
و لكن الحقيقه ان من يحب حقا فلن تزول السعاده من قلبه و لن يضل صاحيه سبيلها مهما كان
يفتح الباب و هو يحدثها : ادخلي برجلك اليمين يا مزتي
فترد عليه : إيه ده انت مش حتشيلني يا فهد
فهد : لا بقولك ايه انا شيلتك بما فيه الكفايه لما ضهر امي انقطم ارحميني بقى شويه
نجلاء : بقى كده طب انا زعلانه
فهد : يا عبيطه ما انا بعمل كده لمصلحتك خليني احافظ على صحتي و اهو كله حيرجعلك في الآخر لكن لو شطبتي علية بدري حنقعد في البلكونه نلعب طاوله
نجلا : هههههههه اه يا قليل الادب ماشي اقنعتني
فهد : قلبي يا نوجه
نجلاء : فهد
فهد : يا عيون فهد و قلب فهد
نجلاء : عاوزة اروح لبابا وحشني اوي
فهد : يا لهوي و مستعجله عالنكد ليه بس و بعدين هو مين ده اللي وحشك امال لو مكنش كان بيكلمنا عشرين مرة في اليوم صوت و صورة كنتي قلتي ايه
نجلاء : مليش دعوه يا فهد انا عاوزة اروح لبابا وماما وحشوني حتوديني و اللا اتصل على بابا اقوله انك مش عاوز توديني عنده
فهد : لا وعلى ايه الطيب احسن حاضر يا ستي حوديكي بس نرتاح يومين يا نجلا و كمان بابا و ماما عاوزين ييجوا يشوفونا
نجلاء : حاضر يا جوزي يا حبيبي
فهد : أيوة بقى احبك وانتي مطيعه يا وزتي بقولك ايه انا جعان اوي ادخلي شوفي الاكل اللي ماما عاملاهولنا في التلاجه و هاتيلنا حاجه احسن عصافير بطني بتزقزق
نجلاء : من عيوني يا سي فهد
فهد : هههههههه اللهم صل عالنبي ده شكلها حتبقى ليله يا عمده
نجلاء : كل ليالينا حتبقى ليلة من الف ليله وليله يا عيوني
فهد : عارفه يا بت يا نجلا بمناسبة الف ليله وليله دي نفسي فايه
نجلاء : نفسك تبقى شهريار و اللا إيه يا فهودتي
فهد : شهريار حريمه كانوا كتير يا بخته
نجلاء : بتقول ايه يا حبيبي سمعني كده
فهد : بقول اني مينفعش يكون معايا غير واحده و بس مزتي القمر نوجه انتي عارفاني مبحبش الرمرمه
نجلاء : على يدي بأمارة البنات الأجانب اللي عينك كانت حتطلع عليهم
فهد : يا عبيطه ده انا ببص عليهم عشان أحمد ربنا عالنعمه اللي معايا
نجلاء : حبيبي يا فهد دايما بتعرف تثبتني يابن الايه بس بردو مقولتليش نفسك في ايه بقى
فهد : نفسي اقعد كده عالأرض بالجلابيه بتاعة جدي الله يرحمه و قدامي الشيشه و انتي بقى تلبيسيلي الجلابيه البلدي بتاعة هند رستم في فيلم باب الحديد
نجلاء :اللي كان اسمها هنومه
فهد : اه هو ده
نجلاء : واللي كان يوسف شاهين اسمه قناوي وبيحبها و ودوه مستشفى المجانين
فهد : جن لما يركبك يا شيخه ايوة هو ده بالظبط و انا ان شاء الله ححصلله متستعجليش
نجلاء : هههههههه عسل يا جوزي بس دي كانت بتفتح ازوزة للركاب في القطر
فهد : مانتي حتفتحيلي انا بردو
نجلاء : افتحلك ايه ان شاء الله ده انا حقول لبابا يبجي يفتح نفوخك انت عاوزني افتحلك ايه يا فهد لا يا حبيبي ده انت واخدني من بيت محترم ده بابا لو عرف حييجي يطين عيشتك
فهد : اكتر من كده طين صبرني يا رب
نجلاء : بقى هي دي اخرتها يا فهد ايوة أظهر وبان على حقيقتك هنومه بتفتح ازوزه وانت عاوزني افتحلك المحر.. مات مش كده
فهد : إلهي تحرم عليكي عيشتك يا شيخه ده كان يوم منيل لما حبيتك يا بت افهمي ده انتي حتفتحيلي ازازة البيبسي اللي فالتلاجه
اخس عليكي كده تظني فية الس. وء بقى انتي تعرفي عني كده
نجلاء : ده انت كده بعينه يا حبيبي
فهد : فقريه سيبيني أكمل الحلم بقى
نجلاء : قول يا فالح
فهد : و بعد كده بقى تلبسيلي الجلابيه و ترقصيلي على اغنية يا عيني يا ليلي يا مسهر عيني في نهاري و ليلي
نجلاء : طب ايه رايك بقى اني عندي الجلابيه دي بس هو انت بتشرب شيشه
فهد : يعني على خفيف كده اما بقعد مع حد عالكافيه اللي ادام المحكمه بروق على نفسي بنفسين
نجلاء : اسم الله عليك يا حبيبي
فهد : مش بقولك هاه حتلبسيها
نجلاء : امال انا جايباها لمين لو مكنتش حلبسهالك يا نور العين تؤمرني بحاجه يا سيدي
فهد : اه عاوز اكل بقى
نجلاء : عيوني يا راجلي
فهد : العب يا باشا اهو ده الكلام اللي يفتح النفس
نجلاء : ده انت تؤمر و جاريتك زمرده تنفذ يا مولاي
فهد : جاريتك بت يا نجلا اوعي تكوني بتاخديني على اد عقلي
نجلاء : لا عيب عليك دي ماما محفظاني ضرورة طاعتك في كل اللي تقول عليه
فهد : يا حبيبتي يا فاديه و الله ماما دي هي اللي فيكم الله يكون في عونها و يعينها على ما بلاها
نجلاء :انت قصدك ايه
فهد :مقصدش
نجلاء :اه بحسب طب بقولك ايه صحيح اتصل على هادي وجنه شوفهم وصلوا و اللا لسه
فهد : اه صحيح فكرتيني
يتصل عليه : حبيبي وصلت
هادي : أيوة وصلنا منحرمش منك يا حبيبي واحنا عند ماما ناديه و بتسلم عليك خد اهيه عاوزة تكلمك
تكلمه ناديه و تسلم عليه هو و نجلا و تقفل معاهم و تكلم جنه : طمنيني عليكم يا حبيبتي انبسطتم
جنه : أوي أوى يا ماما احلى اسبوعين عشتهم فحياتي كلها
هادي : والله يا ماما انا قلت لجنه لو حابه نقعد شويه كمان نقعد بس هي اللي مرضتش
جنه : يعني دلوقتي يا ماما كانوا بيتصلوا بيه من الشركه عشرين مرة في اليوم عشان الشغل و انا اقولله خلينا طب وشغله وشركته مش ليها حق عليه بردو
ناديه : جنه عندها حق يا حبيبي شركتك لازم تخللي بالك منها محدش حيصونها و لا يحافظ عليها غيرك
هادي : مانا كان نفسي افرحها و مقصرش معاها
جنه : حبيبي انت فرحتي اللي ياما اتمنتها و حلمت بيها و ان شاء الله كل أيامنا تبقى شهر عسل
ناديه : ربنا يهنيكم يا حبايبي يارب و ميحرمكمش من بعض ابدا صحيح مقولتوليش هو انتي يا جنه حتنزلي الشركه تاني
هادي : لا شركة ايه انا اصلا الشركه دي كنت واخدها حجه عشان تبقى ادام عيوني لكن دلوقتي عاوزها تبقى ملكه في بيتها و بس
ناديه : هههههههه يا حبيبي يا هادي ربنا يسعدكم يا حبيبي يارب طب ياللا قوموا روحوا شقتكم و ارتاحوا شويه من السفر عشان بالليل الكل جاي ليكم
هادي : أنا مانا عارف دي حتبقى السهره صباحي
ماشي يا ماما عن اذنك يا حبيبتي
ياخدها ويدخل شقتهم و اللي لأول مرة حيتقفل بابها عليهم لوحدهم : ياااه انا مش مصدقه نفسي ربنا كريم اوي يا هادي
هادي : ربنا أكرم الأكرمين يا جنتي
جنه : دي شقتي انا وانت يا حبيبي ربنا يقدرني و اخليهالك جنه تلاقي فيها دايما راحتك و امانك يا حبيبي
هادي : قصدك مملكتنا يا ملكة قلبي اللي ان شاء الله حتتملى بالحب و الود و الإخلاص
جنه : ان شاء الله يا هادي ربنا يخليك ليا يا حبيبي يا رب نفسي ربنا يقدرني واكون الزوجه المطيعه ليك اللي تكون دايما راضي عنها
هادي : حبيبة قلبي يا جنه انتي وجودك فحياتي ده دليل على رضا ربنا عني فهل انا مش حرضى جنه انتي بالنسبه لي مش مجرد زوجه لاء يا جنه انتي موطن و سكن و امان انتي روحي و عمري كله يا جنه انتي احلى جنه في الدنيا كلها تعرفي انا بحلم بإيه دلوقتي
جنه : بتحلم بإيه يا حبيبي
هادي : بحلم اني راجع من الشغل و الاقيكي منتطراني بضحكتك اللي بتنسيني الدنيا و شايله جنه الصغيره على ايدك و اخدها و احطها على رجلي و انا باكل و تنام فحضني
جنه : اه و بعد كده حتاخدها هي فحضنك و انا اتركن على جنب و تبقى هيا صاحبتك بقى و حبيتك صح كده
هادي : هههههههه حبيبي حيغير من دلوقتي اطمني يا جنه انا عمر ما حيكون لية أصحاب غيرك و لا عيون حتاخدني من الدنيا دي كلها غير عيونك انتي
عارفه اغنية هاني شاكر اللي بيقول فيها
أصاحب مين، أنا أصاحب مين
وأنا من يوم ما شفت عينيك ماليش غيرهم صحاب تانيين
وأكلم مين، أنا أكلم مين
وأنا من يوم ما كلمتك لقيتني بغني للعاشقين
عيونك هما أصحابي وعمري وكل أحبابي
وصوتك لما تتكلم يدوب قلبي في بحر حنين
يا أحلى عيون بدوب فيها وأعيش فيها ودايما يا حبيبي بقول
أحب عينيك تسهرني، أنا أحب عينيك تحيرني
ده فيهم سحر مش معقول
أصاحب مين وغير حبك ماليش أصحاب
وأكلم مين وغير قلبك ماليش أحباب
عيونك هما أصحابي وعمري وكل أحبابي
وصوتك لما تتكلم يدوب قلبي في بحر حنين
وأصاحب مين وأكلم مين
يا كل العمر يا عمري يدوب عمري
ولا يغلى يا روحي عليك
بحبك لو قريب مني، وأحبك لو بعيد عني
وأحب أسهر ليالي هواك، وأحب أنده لبكرة معاك
وتوحشني وأنا وياك
وأصاحب مين وأكلم مين
جنه و هي بتحضنه : الله صوتك حلو اوي يا حبيبي
هادي : عشان حاسس بكل كلمه و انا بقولها يا جنتي
جنه : بحبك
يبص فعنيها : بحبك
يقبلها بحب و هيام و يحملها بين ذراعيه ليعيش معها لحظات من العشق و الغرام
و يمر الوقت و يحل الليل اللي يتجمع فيه الكل اللي جايين يباركوا للعرسان يونس وأسماء و مسعد و مرزوقه و بناتهم و ولادهم و كلهم جايبين معاهم هدايا
هادي : يا خبر ايه الحاجات دي كلها يا جماعه ده كتير اوي
مرزوقه : كتير ده فين اللي كتير انت الدنيا كلها متكترش عليك يا حبيبي و فدا تراب رجليك
هادي :يا حبيبتي يا أمي ربنا ميحرمنيش منك يا رب
يونس : الف مبروك يا حبايبي ربنا يهنيكم يارب
جنه : شكرا يا اونكل
اسماء : ياللا اتجدعنوا بقى عاوزين بيبيهات صغننه كده نلعب بيها
ناديه : ياااه ده منى عيني اشوف ولاد جنه حوالية
هادي و هو ماسك ايد جنه : يارب ده اليوم اللي انا عايش طول عمري احلم بيه
آلاء : الاكل جاهز عالسفره يا جماعه
مسعد : لاء انا مش حقدر و الله
هادي : ازاي يا حج و الله ما حيحصل
رقيه : هو بعد كل الحلويات اللي اكلناها دي لسه فيها اكل لا وربنا ما حقدر
جنه : لاء بصوا و الله انا اللي حزعل انتوا مش ضيوف بنعزم عليكم انتوا أهلنا و ده بيت ابنكم يعني تقوموا من غير عزومه
هادي : يا للا يا جماعه
يقوموا كلهم و يقعدوا ياكلوا و هما بيتكلموا و هادي بيحكيلهم على فهد و حركاته و اللي كان بيحصل كل لما صلاح يكلمه و كلهم مش قادرين يمنعوا نفسهم من الضحك
هههههه هههههه
فهد : يا سلام كل ده ضحك ضحكتوه علية
يونس : بصراحه يا فهد هادي حكالنا مواقف ليك خلتنا كنا بنضحك بهيستريه
نجلاء :يا عيني يا انكل و الله حالته كانت صعبه اوي
مرزوقه : ده فهد ده عسل و الله يا بنتي ربنا يهنيكم يارب
نجلاء : يا حبيبتي يا طنط ربنا يخليكي يارب و الله متعرفوش مجيتكم دي عندنا فرحتني اد ايه
فهد : ليه وانتي كنتي عاوزاني اعرف ان اللمه الحلوه دي كلها كانت عند هادي امبارح و انا مجيبهمش عندي النهارده و اللا إيه
مسعد : ربنا يجبر بخاطرك يا بني يارب وربنا العالم غلاوتك عندنا من غلاوة هادي و احنا و الله كنا جايينلكم من غير ما هادي يقول لنا احنا بس قلنا نسيب الوالد و الوالده يجولكم الأول و بعدين نيجي
فهد : بابا و ماما جايين بكرة ان شاء الله
نجلاء : و بعد كده توديني عند
فهد : حوديكي والله العظيم حوديكي
يضحكوا كلهم و يقضوا سهره جميله لليوم التاني عند فهد و يرجعوا بيوتهم و هما فرحانين باليومين اللي قضوهم عند هادي و فهد
صراحه يا ماما سواء فهد و اللا هادي ربنا رزقهم باتنين ميتخيروش عن بعض سواء جنه و اللا نجلاء ادب وأخلاق و جمال و تربيه
مرزوقه : بنات أصول با بنتي
خديجه : لاء وشفتي لما نجلاء نادت علية عشان اساعدها في تقديم الحلويات و خلتني افتح العلب معاها و احط الحاجه بنفسي في الأطباق صراحه كنت حاسه انها بتعاملني كأني اختها
رقيه : وجنه ربنا يهنيها يارب هي كمان كانت شايلانا من عالأرض شيل لاء و ماسكه فينا و عاوزانا نبات عندها
خديجه : لاء وشفتي لما هادي ابني نام و شالته و نيمته على سريرها فاوضة النوم و موضتش ابدا تنيمه عالكنبه
فاطمه : مش اللي منها لله و ربنا يجيب حق هادي منها يارب اللي عمرها ما عبرتنا و لا استعنت بينا
مسعد: خلاص يا بنتي اهي الحمد للله راحت لحالها و ربنا نجا هادي منها وعوضه خير باللي تستاهله و تستاهل قلبه الطيب
مرزوقه : ربنا يسعدك يا هادي يا بني يارب و يرزقك بالذريه الصالحه يا قادر يا كريم يا ضنايا
بعدها بيومين همسه و عمرو يروحوا لهادي و جنه و يباركولهم و جنه كانت مبسوطه اوي بزيارتهم : عقبالكم ان شاء الله يا حبيبتي
عمرو : ان شاء الله قريب
همسه : أنا مبسوطه اوي علشانكم جنه خدي بالك من ابيه هادي انتي عمرك ما حتلاقي فحنيته و أخلاقه
جنه : اطمني يا همسه هادي فعنيه
هادي : يا حبيبتي يا همسه ربنا يطمن قلبي عليكي يارب و لو اني مطمن عليكي ما دمتي مع عمرو
عمرو : همسه دي احلى حاجه حصلتلي فحياتي ربنا يخليهالي يارب
هادي : ربنا يخليكم لبعض يارب
.................................
في داخل إحدى الشقق تجلس معه و تتحدث إليه : يعني هو كان لازم تصمم اننا نيجي هنا مكنش ينفع نقعد في أي مكان عام و نتكلم براحتنا و تديني الورق و نخلص
عدي : و ليه متقعديش معايا هنا يا ذكرى حيجرى ايه لو قعدنا مع بعض براحتنا شويه
ذكرى : لاء طبعا مفيش حاجه بس
عدي و هو بيقرب عليها : بس ايه يا ذكرى انتي متعرفيش انا طول عمري بحلم باللحظه دي ازاي طول عمري كل املي في الدنيا ليله واحده اقضيها فحضنك و بعد كده يحصل اللي يحصل
ذكرى : عدي في ايه مالك
عدي : معقوله مش عارفه مالي يا ذكرى و بعدين مش انتي بتقولي انك بتحبيني يبقى المفروض تكوني مشتاقه لية زي مانا مشتاق ليكي مش كده يا ذكرى
ذكرى : أيوة طبعا يا حبيبي اكيد طبعا مشتاقه ليك بس مش وقته يا عدي
عدي : و هو الحب ليه وقت و اللا معاد يا ذكرى
ذكرى : عدي معلش انا مش جاهزة لأي حاجه دلوقتي و بعدين مش حينفع قبل ما نتجوز انا مش حعمل حاجه غلط
عدي : خلاص يبقى أجيب الماذون و نتجوز دلوقتي حالا
ذكرى : مأذون
عدي : أيوة يا ذكرى ده لو عاوزة تثبتيلي انك فعلا بتحبيني
ذكرى : وانت فين اثبات حبك لية ياعدي فين الأوراق اللي قلتلي انك حتجيبهالي
عدي : الأوراق موجوده يا ذكرى و مش الأوراق دي و بس لا ده اكتر مما تتخيلي كمان و اي حاجه انتي محتاجاها انا حجيبها
ذكرى : طب هات الورق
يقوم عدي و يوريها الورق يعنيها
ذكرى :، برافو عليك يا عدي ايوة بقى هو ده الشغل
عدي و هو بياخد منها الورق تاني : هاتي بقى مش شفتيه
ذكرى : طب انت عاوز ايه مش انا اديتك جزء من المبلغ و دلوقتي حالا حتاخد بقية الفلوس عاوز ايه تاني
عدي : عاوزك يا ذكرى عاوزك انتي قبل أي حاجه
ذكرى و هي بتحاول تبعد نفسها عن قبضته : عدي مش وقته عدي مينفعش كده ابعد عني يا عدي
كانت بتحاول تبعده عنها لكن عدي مغيب تماما مش حاسس غير انه عاوزها و بس
........................................
فهد و نجلاء قاعدين في شقتهم مع باباه و مامته اللي جم عندهم عشان يباركولهم : ياااه الحمد لله اخيرا شفتك متجوز و فبيتك يا حبيبي
فهد :على اساس اني طول عمري مش فبيتي يا ماما
عارف : و هو انت كان حد قالك امشي مش انت اللي قررت تعيش لوحدك و قال ايه عاوز استقل
فهد : اه في دي الصراحه معاك حق
إلهام : طول عمره باباك معاه الحق يا فهد و مبيقلش غير الحق
فهد : طبعا و مين يشهد للعروسه
إلهام : و مشهدلهوش ليه مش جوزي حبيبي و روح قلبي و عشرة عمري كله
نجلاء : هههههههه و الله حضرتك عسل اوي يا ماما
إلهام : والله ده انتي اللي حتة سكرة بس بقولك ايه ما بلاش ماما دي كفايه البني آدم ده بيقوللي ماما انا عاوزاكي تناديني باسمي
فهد : معلش يا نجلا يا قلبي اصل ماما مبتحبش اللي يكبرها قوليلها الهام لولو وريحيها
نجلاء : حاضر يا لولو
الهام : حبيبتي يا نجلا بقولك ايه بقى انا طول عمري نفسي لما فهد يتجوز ابقى انا و مراته صحاب مش عاوزين نتعامل حما و مراة ابنها دي خالص
نجلاء : ياريت و الله يا ماما قصدي يا لولو
إلهام : هههههههه عسل يا نوجه عاوزين بقى انا وانتي ننزل مع بعض نشتري حاجات نتمشى نروح النادي سوا ايه رايك
نجلاء : طبعا يا لولو يا ريت
فهد : منور يا ابو فهد
عارف : طمني عليك يا فهد عامل ايه مع مراتك
فهد : تمام اوي اطمن
عارف : يعني مالي مركزك كده و اللا تكون
فهد : اكون ده إيه عيب عليك لما تسأل سؤال زي ده ده انا ابنك يعني المفروض تكون واثق من ده
عارف : وانا حثق ازاي ان شاء الله هو انا كنت كشفت عليك قبل كده
فهد : هذا الشبل من ذاك الأسد يا والدي العزيز
عارف : طب اسكت خالص عشان انت عنيك جابتنا الأرض يا فقري
فهد : إيه ده لاء متقلش معقوله لا و الله ده انا ازعل الا انت يا بابا ده انت حبيبي
الهام : متصدقهوش يا حبيبي ده بيقولك كده عشان انت كل شويه تنوء عليه ده باباك ده هههههه لا بلاش اتكلم ميصحش
عارف : تصدقي اني بعد كده مش حقولك حاجه تاني
الهام : ليه وانت عاوزني اخبي على ابني حبيبي و اللا إيه
عارف :ماهو كله عشان مصلحتك هو انتي مش شايفاه نازل نء علينا كل شويه و الله انتي اللي حتزعلي في الآخر
نجلاء : هههههههه هههههههه و ربنا انتوا عسل ده فهد بيحبكم أوي يا بابا و الله بس هو اللي بيحب يناغشكم
عارف : فهد انتي حتقوليلي على حبيبي ده فهد ده مش ابني بس يا نجلا ده حبيبي و صاحبي و فرحة عمري كله
فهد : حبيبي يا عارف تصدق صعبت علية و ربنا
خلاص يا سيدي ليكم علية مش حنوء عليكم تاني بس انتوا فضوا نفسكم شويه عشان تعرفوا تهتموا بعارف الصغير لما يشرف
الهام : إيه ده بجد انتي حامل يا نجلا نجلاء: انا
فهد: هههههههه حامل ايه بس يا ماما هو احنا لحقنا و اللا احنا جايبينه مع العفش انا بقول على اعتبار ما سيكون
عارف : خلاص يبقى لما ييجي بالسلامه عاوزنا بقى نعمل ايه لغاية ما ييجي
فهد :تحافظوا على صحتكم عشان تعرفوا تربوا الواد
عارف: مش كفايه ربيناك كمان حنربي الواد
ولما احنا نربي الواد انتوا حتعملوا ايه
فهد و هو بياخد نجلاء فحضنه : حنعمل كل خير ان شاء الله يا والدي وبعدين ميجيش السؤال ده منك يا ابو فهد
يضحكوا كلهم و نجلاء مبسوطه بالمناغشه اللي بين فهد و باباه حساهم كأنهم اتنين صحاب مش اب و ابنه اما الهام فدخلت قلبها و حست اد ايه هي انسانه جميله و طيبه و روحها حلوة اوي
قضوا معاهم وقت جميل و نجلاء مبسوطه بالكلام معاهم و حستهم كأنهم فعلا أهلها و فضلت تتحايل عليهم ميمشوش و يقعدوا معاهم لتاني يوم و وافقوا عشان خاطر نجلا
فهد : عشان خاطر نجلا بس يا لولو
الهام : اه عشان خاطر نجلا بس و اللا انت عندك مانع
فهد : لا عندي مانع ايه و انا اقدر اتكلم الحقني يا بابا دول شكلهم حيتفقوا علية
عارف : يا ضنايا يا بني تعالى لحضن ابوك يا حبيبي
نجلاء و الهام : هههههه هههههه
......................................
واقفه قدام المرايه بتلبس هدومها و بتسرح شعرها تلاقيه بيحضنها من ضهرها و بيبوسها من خدها : ياااه اخيرا حلمي اتحقق مش قادر أصدق نفسي انك كنتي لسه فحضني وبين ايدية
ذكرى : ارتحت كده يا سيدي
عدي : أنا مش حرتاح غير لما اطمن انك بقيتي لية و لوحدي يا ذكرى امتى بقى تبقي مراتي يا حبيبتي امتى بقى
ذكرى : ياااه للدرجه دي يا حبيبي بتحبني
عدي : واكتر مما تتخيلي يا ذكرى انا طول عمري ما بحبش غيرك سيبتيني و اتجوزتي هادي و انا مقدرتش احب و لا اتجوز غيرك
ذكرى : معقوله الحب ده كله كان جواك لية و انا مكنتش شايفاه يا عدي
عدي : طول عمرك مسيطرة على قلبي و مشاعري مكنتش قادر اتقبل فكرة انك اتجوزتيه هو كنت تعبان اوي مش قادر اعيش حياتي وانتي مش فيها عشت سنين صعبه لحد ما خلاص كنت يأست و استسلمت للواقع اللي لازم ارضى بيه لحد ما جيتي و حييتي الأمل جوايا من تاني
ذكرى : خلاص يا حبيبي و احنا حنبقى مع بعض علطول مفيش حاجه حتفرق بينا تاني وانت كل ما تظبطنا أمورنا احنا كمان حتتظبط و وقتها انا بنفسي اللي حقولك ياللا بينا يا حبيبي حنتجوز خلاص
عدي : وانا مستعد اعمل اي حاجه في الدنيا كلها عشان تبقي معايا و فحضني علطول يا حبيبتي
يبدأ عدي يعبث بصوابعه في زراير البلوزة و يفتحها : إيه ده انت بتعمل ايه تاني
عدي : بزمتك منبسطبش
ذكرى : هههههههه بصراحه انبسطت اوي مكنتش اعرف انك جامد اوي كده يا ابن الايه
عدي : يبقى ياللا بينا
ذكرى : ياللا بينا ده ايه لا مينفعش انا لازم امشي دلوقتي حالا
عدي : مش حتجيبي بقية الفلوس
ذكرى و هي بتفتح شنطتها : اتفضل يا سيدي
عدي : متغيبيش علية حتوحشيني اوي
ذكرى : مقدرش اغيب عنك تاني يا عدي
عدي : يبقى تعملي حسابك في أقرب وقت حنكون متجوزين
ذكرى : اه طبعا يا حبيبي اكيد
عدي : ذكرى اياكي تكوني بتلعبي بية و اللا تكوني بتعملي ده كله عشان تاخدي اللي انتي عاوزاه و بس
ذكرى : العب بيك معقوله بردو تقول كده يا عدي امال لو مكنتش كنت لسه حالا معاك و بين ايديك كنت حتقول ايه
عدي : ماشي يا ذكرى و انا حصدقك بس بردو مش حرتاح غير لما تبقي مراتي
ذكرى و هي بتبوسه من خده : حيحصل متقلقش يا للا سلام بقى
يوصلها لباب الشقه و يقفل وراها الباب و يبص للفلوس و يضحك
تمشي ذكرى من عنده و تتصل على شهاب يروحلها الشقه عشان ياخد منها الورق : برافو عليكي هو ده الكلام
ذكرى : عشان تعرف بس
شهاب : و ادي الشيك بالمبلغ اللي وعدتك بيه
ذكرى : كل ده علشاني يا حبيبي يا شهاب انا بحبك اوي
شهاب : اه مانا عارف
اه صحيح مقولتليش احمد لاشين محاولش يتصل عليكي
ذكرى : لاء على فكرة ده شكله مش سهل خالص و كلامه تقيل اوي و بيرد بالعافيه و شكله كده مش حعرف اجيبه معايا سكه
شهاب : يعني معقوله جمالك ده كله مأثرش عليه
ذكرى : اللي حصل بقى و بعدين اذا كان عالجمال فانا شفت في الحفله اللي احلى مني بكتير ده انا مجيش فيهم حاجه سيبك منه شكله كده ملوش في الليله يمكن يكون هههههههه
شهاب : ذكرى مش عارف ليه كلامك مش مريحني اوعي تكوني بتلعبي بديلك من ورايا
ذكرى : انت تصدق اني اعمل حاجه من وراك ده انت استاذي و انا تلميذتك يا حبيبي
شهاب : ماهو احيانا التلميذ بيتفوق على استاذه و على رأي المثل علمناهم الشحاته سبقونا عالابواب
ذكرى : هههههههه توء، توء حبيبي مقدرش اخبي عنه حاجه و بعدين مانا عارفه انك حتفرح بأي خبر حلو اجيبهولك و عالعموم اطمن لو ده لو يعني حصل جديد حقولك فورا
شهاب : ذكرى الراجل ده مهم اوي بالنسبه لي تتصلي عليه انتي فاهمه و إلا
ذكرى : حتصل حاضر بس مش عارفه بقى
شهاب : ماشي يا ذكرى سلام
ذكرى : انت رايح فين مش حتقعد معايا شويه
شهاب و هو بيحط ايده على العلامه الزرقا اللي برقبتها : هههههههه لا واضح انك انتي تعبتي اوي النهارده كفايه عليكي كده اخاف على صحتك يا مزتي مانتي مراتي بردو
ذكرى : شهاب لا يا حبيبي متفهمش غلط صدقني ده هو اللي حاول معايا عشان يرضى يديني الورق لكن انا اخدته منه بطريقتي انا مراتك يا حبيبي
شهاب : مصدقك يا حبيبتي وهو انا بردو اقدر ما صدقكيش بس لما تحبي تلعبي ابقى عارف هاه محبش اللعب اللي من ورا ضهري ياللا سلام دلوقتي واشوفك بعدين
يخرج من عندها و هي تبص على رقبتها في المرايه : ييه بقى اكيد فهم ان حصل بيني و بينه حاجه
طب ما يفهم يعني هو مش عارف ان عدي بيحبني و هو اصلا اللي قاللي أفهمه اني حتجوزه عشان يوافق يديني الورق هو فاهم و عارف كل حاجه بس بيستعبط
سيبك منه المهم اني اخدت منه الشيك اللي كنت عاوزاه كده بقى اقدر اشتري العربيه اللي كان نفسي فيها : واووووو
......................................... ....
أصوات موسيقى عاليه وأغاني هابطه صوتها في العماره كله : إيه الصوت المزعج ده يا شعبان
شعبان : هههههههه معلش يا بيه ده الاستاذ فهد المحامي و عروسته معلش اصلهم لسه عرسان و فرحانين بقى
_جتهم خيبه غيرهم كان اشطر بكرة بدل الاغاني دي حنسمعهم وهما صوتهم اللي ملعلع في العماره
شعبان : معلش بقى خليهم يعيشولهم يومين
_على رأيك المهم جبتلي الطلبات اللي قلتلك عليها
شعبان : أيوة يا بيه جبتها كلها اتفضل حضرتك
يديله الطلبات و ينزل و هو بيضحك على الاغاني اللي صوتها في العماره كلها : يالهوي عليك يا استاذ فهد و ربنا انت عسل ربنا يهنيك يارب
تدخل عليه بالجلابيه و الايشارب على رأسها و عامله حسنه فخدها و اللبانه فبؤها و حطه روج احمر ملعلع و هو قاعد عالارض و قدامه الشيشه : اتفضل يا سي فهد اما انا بقى جبتلك حجرين إنما ايه عنب
فهد : هو ده الكلام يا مزتي بس ايه الحلاوة دي يابت يا نحمده
نجلاء : هيهيه دي اقل حاجه عندي وحياتك يا سي حنفي
فهد : طب ياللا بقى هز يا وز
نجلاء : بس كده من عيوني يا راجلي
فهد : العب يا ملعب
نجلاء : طب بس بقى يا فهد
فهد : وانا عملت ايه بس مش بطبلك
نجلاء : مش عارفه اندمج مع كلمات الاغنيه من صوت الطبله ده
ما هو يا الاغاني يا الطبله
فهد : خلاص اتفضلي ارقصي و وريني ابداعاتك
يصقف لها و هي بترقص و تتمايل عليه و هو يحطلها فلوس في صدرها و يلزقها على جبينها : أيوة يا معلمه
ايه الحلاوة ديه يا بركة دعواتك يا اما
و فجأة ينتبهوا على صوت التليفون اللي بيرن رنات متواصله
نجلاء : يا لهوي ليكون بابا
فهد : وايه يعني يابت
نجلاء : افرض قاللي افتحي الكاميرا عاوز اشوفك اعمل ايه دلوقتي لو شافني كده يا كسوفي
فهد : ما يشوفك كده وانا بقى عاوزه يشوفك كده عشان يهبط شويه
نجلاء : فهد احترم نفسك
فهد و هو ماسك التليفون : اتهدي ده مش ابوكي ده البشمهندس يونس بس بيتصل ليه دلوقتي خير يارب وطي الصوت ده
يفتح الخط :مساء الخير يا بشمهندس
_الحقني يا فهد الله يخليك انا بتصل على هادي مبيردش و مش عارفه اتصرف الحقني بسرعه
فهد : في إيه حصل ايه
_يونس يا فهد يونس
