رواية عشق الادهم الفصل الثالث عشر13 بقلم ماهي عاطف
روايه عشق الادهم ..
الحلقه الثالثه عشر ...
طلع النهار ليوم جديد ادهم صحى ومسك تليفونه واتصل بهمس
همس كانت نايمه صحيت على صوت الموبيل جابته بنوم وما شافتش الاسم وردت على طول
همس بنوم : الو
ادهم كانت وحشاه قوى قالها بصوت مشتاق : الو عامله ايه ياحبيبتى وحشتنى قوى .
همس فاقت وقامت اعدت على السرير وبصت للتليفون لقيته ادهم قالت لنفسها :هو انا سمعت صح ولا من اثر الحلم الى حلمته
ادهم لما سكوتها طال ابتسم وعرف انها بتكلم نفسها : الو همس انتى نايمه
همس : ها انا لا اه قصدى صحيت هو انت كنت بتقول ايه اصل مسمعتش
ادهم ولسه مبتسم : بقولك حور حبيبتى عامله ايه وحشتنى
همس باحباط : اه حور الحمد لله كويسه انت عامل ايه
ادهم : الحمد لله كويس طول مانتوا كويسين انا بتصل افكرك باتفقنا
همس : اتفاق ايه معلش لسه مش مجمعه
ادهم : انى هاجى اخد حور وادم
همس : اه افتكرت انت فعلا جاى تخدهم بصراحه كنت فاكرك بتقول كده قدمهم وخلاص
أدهم بضيق : انا عمرى ماقول كلام وخلاص وبدال وعدت عمرى مااخلف وعدى ابدا
همس اخدت بالها انه زعل : ادهم انت زعلت انا اسفه مقصدش والله
إدهم حب نبرة صوتها وهى بتصلحه وكان نفسه تكون قدامه ويشوف ملامحها وهى بتكلمه وفضل ساكت يتخيلها
همس لما طال سكوته افتكرت انه زعلان ومش عايز يتكلم : أدهم انت زعلان قوى كده
أدهم انتبه لصوتها انها هتيعيط : لا مش زعلان ولا حاجه انا بس سرحت شويه
همس : بجد مش زعلان طيب هتيجى تاخدهم امتى
أدهم كان نفسه يقولها تيجى معاهم بس طبعا مينفعش : انا هكلم اسر اقوله برده واهجى على الساعه ٤ كويس
همس : كويس ! أدهم انا اسفه مره تانيه ومتشكره قوى على الى بتعمله مع عيالى
ادهم :انا قولتلك قبل كده متشكرنيش انا بعتبرهم عيالى وربنا عالم انا بحبهم ازاى
همس : هما كمان بيحبوك قوى خلاص هستناك مع السلامه
أدهم : سلام
وقفل وفضل يفكر ويفكر وحس ان خلاص معتش قادر يصبر اكتر من كده هو بقى متاكد انوا بيحبها لا ده بيعشقها اليوم الى بيعدى من غير مايسمع صوتها او يشوفها بيموت ميت مره فيه
قام راح لناديه كانت اعده كالعاده قدام مسلسل تركى اعد جنبها
أدهم : ناديه ممكن تركزى معايا شويه
ناديه وهى مركزه مع المسلسل : معلش ياأدهم الحته دى حلوه عايزه اركز معاها
أدهم : ناديه انا عايز اتجوز
ناديه لفتله بسرعه : قولت ايه هو انا سمعت صح ولا المسلسل اثر عليا
أدهم وهو بيلعب فى شعره : لا سمعتى صح انا عايز اتجوز
ناديه بفرحه : اخيرا الف مبروك طيب هنروح امتى نطلب اديها
أدهم : مش لما تعرفى مين هى
ناديه بثقه : طبعا عارفه هو انا نايمه على ودانى همس طبعا
ادهم باستغراب : و انا باين عليا قوى كده
ناديه بضحك : قوى ياحبيبى ها هنروح امتى
أدهم : مش لما توافق الاول
ناديه شهقت : هى رفضت ياأدهم
أدهم : لا انا اصلا لسه مقولتش لهمس
ناديه : ليه مستنى ايه طيب
أدهم بزعل : انت عارفه رئيها فى الجواز تانى وخايف اقولها ترفض وابقى خسرتها
ناديه : أدهم اسمعنى كويس لو انت بتحب همس حارب علشانها واوعى تيأس من اول مره همس شافت كتير واتحرمت من الحب كانت عايشه والسلام الاهم من كل ده انت فكرت فى العيال هتقدر تتحمل مسئوليتهم
أدهم : انا بحبهم جدا ياناديه بحس انهم عيالى وكفايه انهم عيال همس علشان احبهم
ناديه : بتحبها ياأدهم
ادهم : اول مره فى حياتى احب بجد مش قادر اتخيل حياتى من غيرها علشان كده خايف اقولها ترفض وتبعد عنى وابقى خسرت حتى انها جنبى
ناديه : متقلقش سبها عليا لو رفضت المهم تكلمها الاول وتشوف رئيها
أدهم : ربنا يسهل اول لما القى وقت مناسب هكلمها
ناديه : ربنا يكتبك الخير ياأدهم يارب
أدهم : يارب اقوم انا اروح اخد العيال علشان هخرجهم
ناديه ابتسمت : روح ياأدهم ربنا يسعدك
مشى ادهم وناديه فضلت تفكر هتعمل ايه لانها متاكده ان همس هترفض حتى لو بتحبه اتصلت بحنين علشان تفكر معاها وفضلوا يرغوا الاتنين
______________________
عند نور دخل جاسر يعد معاها قبل ماينزلوا يجيبوا الشبكه
جاسر : عروستنا بتعمل ايه
نور : ولا حاجه بقلب فى الفون شويه تعالا
جاسر دخل اعد جنبها : هتنزلوا امتى
نور : اسر وهمس هيجوا على الساعه ٧
جاسر : قوليلى صحيح هو جوز همس مجاش معاها ليه
نور : همس مش متجوزه
جاسر : نعم ياختى اومال العيال الى معاها دول ايه
نور : ياعم قصدى ياعنى مطلقه
جاسر سرح : وده مين مجنون يطلق واحده زى دى
نور بغمزه : مالك ياجسوره الصناره غمزت ولا ايه
جاسر : غمزت ايه يابت كل الحكايه مستغرب ازاى دى تطلق اكيد جوزها ده غبى
نور بزعل : والله ياجاسر هى اصلا ماكنتش بتحبوا والى عرفتوا ان الطلاق بسبب انه حب واحده وهما لسه متجوزين واول لما همس طلبت الطلاق واطلقوا راح اجوزها
جاسر : معقوله !!مش بقولك غبى بكره تلاقى الى يقدرها
نور : المشكله انها رافضه فكرة الجواز تانى خالص دانا امبارح بقولها عقبالك كانت هتقلب عليا
جاسر بتفكير : مش يمكن لو حبت تغير رئيها
نور : ياريت ياجاسر دى لسه صغيره وحرام تكمل حياتها لوحدها بس قولى بجد انت مهتم كده ليه عجباك ولا ايه
جاسر : بصراحه اه حاسس انها فيها حاجه مختلفه غير ان فى وشها برائه مشفتهاش فى واحده غيرك
نور بضحك : طيب كويس انك شايفنى كده بس اقولك على حاجه ياجاسر انت اخويا واتمنالك الخير كله وهمس مافيش زيها بس بلاش ياجاسر مش عايزاك تعلق نفسك بيها وهى ترفض كعادتها وقلبك يكسر
جاسر : ماتخافيش على اخوكى انا ضابط جيش يعنى اتعلمت ازاى اسيطر على نفسى وبعدين الله اعلم الايام مخبيه ايه
نور : معاك حق ياعالم بكره فيه ايه
_______________________
أدهم اتصل على اسر
ادهم : الو
اسر : ادهم باشا واحشنى ياراجل انت فينك ياعم
أدهم : موجود ياحبيبى اخبار ايه ها هنفرح بيك امتى
اسر : كمان اسبوعين انشاء الله الخطوبه وهنكتب الكتاب كمان
أدهم : الف مبروك ربنا يفرحك يارب
اسر : عقبالك يارب
أدهم : انشاء الله بس ادعيلى العروسه توافق
اسر فهم أدهم قصده مين : وما توفقش ليه انت راجل مافيش زيك قولى هى مين وانا فى ضهرك
أدهم : لما اشوفك ونعد نتكلم انت فاضى امتى
اسر : بكره بليل كويس
ادهم : تمام هكلمك بكره وهعدى عليك اخدك المهم دلوقت انا كنت بكلمك استاذنك اخد حور وادم اخرجهم علشان كنت وعتهم
اسر بابتسامه:مافيش مشكله ياحبيبى قولت لهمس
أدهم : اه بس قولت اقولك انت كمان انا هعدى عليهم كمان نص ساعه
اسر : ماشى ياأدهم هستناك
اسر قفل معاه وراح لهمس
اسر : هموسه بتعملى ايه
همس : تعالا يااسر عايز حاجه
اسر : عايز سلامتك (وبصلها بنص عين) بقولك أدهم كلمنى هيجى ياخد العيال كمان نص ساعه هو كلمك قالك
همس بتوتر : ها اه اه كلمنى وقالى فمرضتش اكسفه
اسر بيحاول يعرف شعورها ايه من نحيته : كويس انك مرفضتيش أدهم راجل محترم وبيحب العيال جدا
همس بتحاول تهرب من عيون اخوها : اه فعلا بيحبهم جدا وهما كمان
اسر بلؤم : ياريته يفضل جنبهم بس بكره يجوز هو هيفضل
كده
همس بصتله قوى وفكره ان أدهم يجوز وجعت قلبها ومن غير ماتفكر ردت عليه : هو قالك انه هيجوز ياعنى بيحب حد وهيجوز
اسر اتاكد ان همس بتحب أدهم : يعنى مش كده بس اكيد هيجى عليه يوم ويتجوز انت خوفتى كده ايه
همس :هاا انا لا ابدا وهخاف ليه يعنى وانا مالى
اسر قرب منها ومسك ايدها : همس ياحبيبتى بلاش تعندى على نفسك وعلى قلبك عيشى حياتك اطلعى من الدايره الى دخلتى نفسك فيها عمرك لسه قدامك بلاش تضيعيه من غير ماتعيشى السعاده الى طول عمرك محرومه منها
همس : قصدك ايه يااسر بتقولى كده ليه
اسر : انتى عارفه كويس قصدى ايه وهنا (شاور على قلبها )فيه ايه
همس : هنا مافيش حاجه يااسر ولو فى مش هينفع خلاص عيالى اهم من اى حاجه
اسر بنرفزه : انت كدابه ياهمس والعيال الى عمالهم حجتك هما اكتر حد محتاجين لاب يراعيهم
همس : وهو فى جوز ام بيراعى عيال مراته اذا كان الاب مش هموا عياله يبقى الغريب هيهموا
اسر بصلها قوى : اه ياهمس الغريب هيهموا عموما انتى حرا
وسابها وخرج وهى فضلت مكانها التفكير هيموتها بس قالت لنفسها انها اكيد صح
ادهم الساعه اربعه بالدقيقه كان تحت عماره همس اتصل بيها وقالها انوا طالع يخدهم طلع وفتحله اسر
اسر : تعالى ياأدهم ادخل عامل ايه ياحبيبى
أدهم : الحمد لله مبروك ياعريس
اسر : الله يبارك فيك يا غالي عقبالك
أدهم : انشاء الله قريب المهم العيال جهزوا
همس كانت خارجه من الاوضه بالعيال وسمعته وهو بيقول قريب قلبها وجعها وكانت عايزه تعيط بس مسكت نفسها
حور وادم اول لما شافوا أدهم جريوا عليه
حور: عمو أدهم وحشتنى قوى
أدم : عمو أتهم حستنى
أدهم اخدهم فى حضنه : وانتوا كمان وحشتونى قوى
اسر بص لهمس بمعنى ان فى واحد غريب بيهتم اهو همس فهمته وبصت للارض
ادهم قام وبص لهمس حس ان فى حاجه مضيقها : ازيك ياهمس عامله ايه
همس : الحمد لله كويسه انتوا هترجعوا على امتى
أدهم : ليه فى حاجه
همس : لا ابدا علشان نزلين نجيب شبكه اسر (وقالتله بوجع) عقبالك
أدهم اتجاهل عقبالك لانه عايز يقولها ياريت توافقى : طيب لو مش محتجاهم معاكى خلصى وكلمينى اجبهم
همس : انا كده كده كنت هسيبهم مع ماما
أدهم : خلاص يبقى تخلصى وتكلمينى اجبهم يلا سلام احنا
واخدهم ونزل همس اعدت وبصه للارض وكلمته بتتردد فى عقلها (قريب انشاء الله) يعنى ايه هيجوز فعلا رجعت قالت لنفسها طيب وانا مالى هو حر بس انا ليه قلبى وجعنى كده
اسر شافها كده وعرف انها فى سراع مع نفسها حب يخفف عنها : همس مالك ياحبيبتى
همس انتبهت : ها قولت حاجه
اسر : بقولك مالك ياهمس
همس : مافيش انا كويسه اهو احنا هننزل امتى
اسر عرف انها عايزه تغير الموضوع : هننزل على ٧ الا ربع علشان نوصل لنور ٧
همس قامت : طيب انا هقوم اريح شويه على مانيجى ننزل
ودخلت وعيون اسر عليها : ربنا يهديكى ياهمس
همس دخلت نامت على سريرها وفضلت باصه للسقف وبدات رحله تفكرها مع نفسها زى كل يوم
___________________________
عند ادهم وصلوا الملاهى وفضلوا يلعبوا ويتنتطوا وكانوا مبسوطين جدا أدهم اخدهم على الكافيه
أدهم : ها اطلبلكم ايس كريم ولا عصير
حور : انا عايزه ايس كريم شوكلت
أدم : واتم تمان عايس ايس تييم
أدهم ضحك: عنيا حاضر ( طلب الايس كريم وبص لحور لقاها سرحانه) مالك ياحور انتى مش مبسوطه
حور : لا انا مبسوطه خالص
أدهم : اومال مالك ياقمر
حور بزعل اطفال : كان نفسى انت تبقى بابايا وتفضل معايا على طول
أدهم قلبه وجعه عليها : وانا كمان ياحور نفسى اكون انا باباكى
حور بفرحه : بجد يعنى ينفع اقولك بابا ويبقى عندى بابا زى اصحابى
أدهم : اكيد ينفع طبعا
حور قامت حضنته : انا بحبك قوى يابابا
ادم قام هو كمان حضنه وقاله زى ما حور قالت أدهم اخدهم فى حضنه وصمم اكتر من الاول انه هيفضل ورى همس لحد لما توافق حتى لو وصلت انوا يخطفها
______________________
اسر اخد همس وراح لنور اخدها هى ومامتها وراحوا اشتروا الشبكه همس كانت فرحانه لاخوها وهى شايفه فرحته بنور الى باينه فى عيونه خلصوا ووصل نور وماماتها وروحوا
اسر لهمس : هتكلمى أدهم علشان يجيب حور وادم
همس : اه هتصل بيه اهو
واتصلت بيه : الو ايوا ياأدهم احنا خلاصنا وفى البيت دلوقت انتوا خلصتوا
أدهم : اه نص ساعه ونكون عندك
همس : تمام تيجوا بالسلامه
أدهم بحب: الله يسلمك مش محتاجه حاجه اجبهالك
همس بتوتر من عيون اسر الى عليها : ها لا شكرا عايزه سلامتك مع السلامه
قفلت وبصت لاسر لقيته مبتسم على منظرها سابته بغيظ منه ودخلت الاوضه
نص ساعه وكان أدهم وصل وكالعاده شايل حور وادم الى تعبوا من اللعب وناموا فى الطريق فتحت همس الباب لقته شايلهم ابتسمت و دخلته نايمهم مكانهم وخرج كانت هناء طلعت هى واسر
هناء : المرادى مش هتنزل الا لما تشرب حاجه
أدهم باستسلام : حاضر ياست الكل لو ينفع يبقى فنجان قهوه
هناء :عنيا ياحبيبى هعملك قهوه
همس : خليكى انتى ياماما انا هعملها تشرب حاجه يااسر
اسر : انا كمان قهوه ياحبيبتى
ادهم بص لاسر بغيره هى حبيبته هو وبس حاول يدارى انه مضايق بس كان خلاص شافه اسر وعرف انه غيران وكان عايز يضحك بس مسك نفسه
هناء كمان شافت غيرته فى عنيه وفرحت قوى : احنا تعبينك معانا والله ياأدهم
أدهم : تعب ايه بس دانا ببقى مبسوط جدا وانا معاهم ربنا عالم
هناء : يالا عقبال ما ربنا يرزقك بالذريه الصالحه يارب
أدهم سكت وشويه وهمس طلعت بالقهوه اعدوا مع بعض شويه يتكلموا على خطوبه اسر وهيعملوا ايه ونزل أدهم
هناء بصت لهمس : ابن حلال ربنا يكرمه وبيحب العيال قوى
همس : اه فعلا انا هدخل انام تصبحوا على خير
اسر وهناء : وانتى من اهله
دخلت همس وهناء بصت لاسر : وبعدين يااسر هنفضل سيبنها كده
اسر : مالها بس ياماما
هناء : يابنى دى لسه في عز شبابها هتفضل عايشه لوحدها
اسر قام باس ايد امه : سيبها على الله ياماما وان شاء الله خير يالا تصبحى على خير
هناء بقلة حيله: وانت من اهله يابنى
___________________________
تانى يوم عند اياد منه حبت تعمله مفجاه راحتله المكتب ولسه يادوب هتدخل لقته واقف مع واحده بيضحكوا دخلت عليه ووشها بيطلع نار اياد اول لما شافها فرح جدا
اياد : منه ايه المفجاه الحلو دى تعالى
منه بصت للى معاه من فوق لتحت : مش هتعرفنا
اياد ابتسم على منظرها لانه عارف انها غيرانه : اه دى ريم مهندسه معانا فى المكتب
ريم مدت ايدها بابتسامه : اهلا وسهلا يانسه منه نورتى
منه : انتى عرفانى
ريم : اه طبعا البشمهندس مالوش سيره غيرك وشفت صورتك الى على المكتب
منه بغيظ : ااه طيب تشرفنا
ريم حست انها عايزه تولع فيها استاذنت وخرجت وقفلت الباب
اياد قرب منها وهو بيقول ربنا يستر : منون القمر ايه المفاجاه الحلوه دى وحشتينى
منه مردتش عليه ووقفه تهز رجلها عرف ان يومه مش هيعدى
اياد : مالك ياقلبى انتى زعلانه من حاجه
منه بصتله بغيظ اكتر : والله ممكن اعرف كنت بتعملوا ايه وانا دخله
اياد : بنشتغل هنكون بنعمل ايه
منه قربت عليه : وهو الشغل بالضحك والمياعه الى انا شفتها ! ده بتسميه شغل ماشى يااياد انا الى غلطانه انى واثقه فيك وفكراك بتحبنى
اخدت شنطتها وكانت هتمشى اياد مسك إديها بسرعه
اياد : استنى بس اهدى الله يهديكى والله ماحصل حاجه
منه بدموع : والله والضحك والهزار الى بتعمله ده ايه
اياد قرب عليها ومسح دموعها : ليه كده يامنه ليه الدموع دى والله ماحصل اكتر من انى كنت بوريها تصميم على اللاب ولقته هنج والصوره اتقلبت قمت قلبت اللاب علشان تشوف التصميم فضحكت لا اكتر ولا اقل
منه ولسه عماله تعيط : ياسلام
اياد بحب : وحياتك ياقلبى ماحصل اكتر من كده (قرب عليها حضنها ) وبعدين ياستى حقك عليا مش هعمل كده تانى ( بعدها شويه بس لسه فى حضنه وبص لعنيها ) لسه زعلانه منى
منه بصتله بحب : لا بس لو شفتك بتهزر مع حد تانى هقتلك
اياد بهمس : واهون عليكى اياد حبيبك يموت
منه بضياع من قربه : لا
اياد قرب منها وباس شفايفها برقه وبعد بص لعنيها وقالها بهمس : انا بحبك قوى مابشوفش غيرك ومش عايز غيرك
وعمرى ماهحب غيرك لحد لما اموت
منه بسرعه حتت ايدها على شفافيه : بعدالشر عليك ياحبيبى متقولش كده انا مقدرش اعيش من غيرك لحظه
اياد باس اديها : ربنا يخليكى ليا ياقلبى تعالى بقى افرجك على المكتب والشغل
منه ابتسمت وهزت راسها انها موافقه وراحت معاه
____________________
فى الشركه عند همس كانت فى مكتبها الباب خبط
ودخل جاسر
جاسر : ممكن ادخل
همس قامت مستغربه هو بيعمل ايه عندها : اه اتفضل طبعا ياستاذ جاسر
جاسر : انا اسف انا كنت جاى لنور ومعرفتش مكتبها فخبط على اول باب قدامى
همس استغربت اكتر لان مكتب نور قبلها : لا ابدا مافيش مشكله نور مكتبها قبل مكتبى على طول
جاسر باحراج من كدبته الى باين : احم المهم انتى عامله ايه والاولاد كويسين
همس : اه الحمد لله كويسين
جاسر سكت مش عارف يقول ايه ولا عارف ايه الى جابه اصلا : طيب استاذن انا هروح لنور مش محتاجه حاجه
همس : لا شكرا وسلملى على طنط هدى
جاسر : يوصل انشاء الله سلام
جاسر مشى وهمس فضلت مستغربه هو ايه الى جابه اصلا مهتمتش وراحت تكمل شغلها
جاسر راح لمكتب نور خبط ودخل قامت نور فرحانه
نور : مش ممكن سياده الرائد جاسر باشا عندى فى المكتب ايه النور ده
جاسر : بس يالمضه عامله ايه
نور : الحمد لله فى حاجه ولا ايه
جاسر مش عارف يقولها هو اجى ليه: ها لا انا كنت معدى من جانبك قولت اطلع اشوفك
نور بنص عين : لا والله معدى من جنبى قولت تشوفنى انا وماله وشوفتنى ولا لسه قصدى تشرب ايه
جاسر خبطها براحه على دماغها : مش عايز اشرب حاجه انا ماشى عايزه حاجه يالا سلام
وسبها ومشى وهى واقفه متنحه وبتقول لنفسها : ماله ده هو كان جاى ليه (افتكرت همس وكلامه عنها.) ربنا يستر وميكنش وقع على بوزه
______________________
همس بعد ماروحت من الشركه كانت اعده مع حور وادم بتلعب معاهم وفجاه لقت حور بتقولها
حور : ماما عايزه اكلم بابا
همس بصتلها بصدمه : بابا !!!!ليه ياحبيبتى
حور : انا قولتله امبارح واحنا خارجين بكره هكلمك
همس استغربت : بابا مين ياحور
أدم رد عليها : بابا أتهم
همس تنحت وبصت لحور : انتى قصدك أدهم ياحور
حور : اه ياماما اصل انا امبارح قولتله انى عايزه اقوله بابا وهو قالى موافق
همس اضيقت وقالت لنفسها طيب وبعدين لو اتعلقوا بيه اكتر من كده وبعد عنهم هو كمان ممكن يتعبوا نفسيا اعمل ايه ياربى ماهو واضح انه هتجوز قريب مش ده كان كلامه لاسر
حور : ماما ممكن تتصلى اكلمه
همس بصتلها قوى بتفكير : حاضر ياحور
همس اتصلت وادتلها التليفون وفتحت الاسبيكر حور ردت : الو ايوا يابابا عامل ايه وحشتنى
أدهم كان فرحان قوى بكلمه بابا من حور : حبيبت قلب بابا عامله ايه ياقمر وانتى كمان وحشتينى قوى أدم عامل ايه
أدم : اتم تويس انت واحستنى تمان يابابا
أدهم : حبيبى يادومه وانت كمان وحشتينى يابطل
همس سامعه كلامهم ورد ادهم عليهم الى باين فيه قد ايه بيحبهم بس برده هيجى يوم ويبعد عنهم لازم تعمل حاجه علشان عيالها ميتعبوش نفسيا
أدهم : حور ماما عامله ايه هى جنبك
حور : ماما كويسه الحمد لله اه جنبى اهى
وادت التليفون لهمس قفلت الاسبيكر وردت
همس : الو ازيك ياأدهم عامل ايه
أدهم : انا الحمد لله انتى عامله ايه
همس : الحمد لله أدهم انا كنت عايزه اكلم معاك شويه ممكن
أدهم : خير ياهمس فى حاجه
همس : مش هينفع فى التليفون
أدهم : طيب تحبى فين
همس : بكره انشاء الله بعد الشغل فى اى كافيه
أدهم :تمام بكره هكلمك وهعدى عليكى
همس : طيب انشاء الله يالا سلام
أدهم : سلام
أدهم قفل معاها وهو مستغرب صوتها كان مضايق ياترى فى ايه
يتبع
