رواية تربية حواري الفصل الحادي عشر11 بقلم ولاء حامد
تربية حواري
الفصل الحادي عشر
وصل جبل الشغل وهو رايق ولسه الضحه مرسومه على وشه
رامي بإستغراب: اش اش ايه الضحه اللي مبينه أسنانك على الصبح دي
جبل بفرحه وعدل ياقه القميص: احم احم هاروح ب بكره انا وبابا وماما نتقدم لحور
جبل بهزه راس: لا بابا قالي اوعي تتراجع وانا في ضهرك ولما سخنت اوي بابا وقفلها فاضطرت توافق
رامي بتفكير في كلام جبل
طيب خد بالك لان والدتك مش من النوع اللي بيتجبر على حاجه وشكلها ناويه على نيه
جبل بلا مبالاه: تؤتؤ خالص ماما بتخاف من بابا وهو الوحيد اللي بيعرف يخليها ترجع في كلامها
رامي بعدك ارتياح: اتمنى والله يا صاحبي على العموم الف مبرووك وربنا يتمملك بخير بس متنساش تعزمنا علشان نشوف الحوريه اللي شغلتك أيام وليالي
جبل بقلبه وش: رامي حور خط أحمر ولا حتى بهزار
رامي بضحك: تمام يا صحبي ربنا يسعدك يلا علشان مناخدش كلمتين في عضمنا
أتوجه كل واحد فيهم لمكتبه وبداء اليوم
*********************************
في بيت حور قفلت هدى مع بنتها واتصلت بأخواتها
قطب بضحك: هدى يااااااه عاش من سمع صوتك يا غاليه
هدى بمعاتبه: صوتي موجود يا ابن امي وابويا بس انتوا اللي نسيتوا ان ليكم اخت باين
قطب: والله ابدا انتي عارفه الدنيا تلاهي والواحد عمال يلف زي التور المربوط في ساقيه يلا الحمد لله على كل حال طمنيني عليكي وعلى حور عاملين إيه عارف والله ان السؤال جاي متأخر بس عصب عني ويعلم ربنا
هدي بتفهم: الله يعينك على شيلتك يا اخويا احنا الحمد لله زي الفل وحور تربيه عامر مش انا اللي هاعرفك عامر يا قطب
قطب بضحك: لسه بتغيري عليه وتحاميله حتى وهو في قبره يا هدي
هدي بحب ووجع : وانا ليا مين غيره بعد ربنا دانا فتحت عيني في الدنيا على حبه دانا شوفت الدنيا بعنيه ميأسش ومتعبش مني في يوم جري سنسن وسنين على الخلفه لحد ما ربنا كرمني اااه يلا الله يرحمه ويجمعني بيه في الاخره يارب
قطب: والله يا هدى يستحق كان ونعم الرجال الله يرحمه المهم اؤمري اصل الاتصال داه مش لله وللوطن ولا انا غلطان
هدى: لا يا اخويا مش لله وللوطن عايزاك انتا وراشد يوم الجمعه بعد صلاه العشاء
قطب بإستغراب: ليه خير يا هدى
هدى بتنهيده طويله: حور جايلها عريس ومينفعش ييجي البيت ومفيهوش راجل الناس تاكل وشي وعمها انتا عارف اللي فيها من يوم موت عامر الله يرحمه واللي عملته حور فيه هو وابنه ومراته وكمان بيني وبينك عشان ميستقصروش حيطه البت داه المثل بيقولك بنت الحي عزوها وبنت الميت هانوها يعرفوا ان ليها رجاله والله يا قطب وماليك عليا حلفان حور مافيهاش الا لسان والله
قطب بتفهم: تؤمري يا أم حور بنتنا ست البنات واللي ييجي يبقى عارف انها تاج غالي وعالي فوق الراس متعتليش هم انا وراشد جايين والله عايزه ربنا خير
هدي بتنهيده ارتياح: الحمد لله ماشي يا غالي مستنياكم
******************
عند حور بعتت سوزي الفلوس مع حد من طرفها
حور: سبارس حاجه العربيه جهزت
سبارس بهزه راس: ايوه يا أسطى ها هانبداء على بركه الله
حور بلويه وش : ايوه يا اخويا يلا استعنا على الشقاء بالله يلا شد حيلك علشان هانبداء نفك فيها واعمل حسابك ايدك بإيدي لحد ما تاجز آمين يا آبا
سبارس: آمين يا أسطا
وفعلا بدئت حور فعلا تفك في العربيه اللي محتاجه معجزه علشان ترجع تاني
وفعلا مر اليوم بطوله وحور لسه شغاله
ساعات طويله مرت وهي لسه شغاله وناسيه كل الدنيا من حواليها مفصلهاش غير التليفون
سبارس: ايه يا اسطى تليفونك اتحرق رن
حور وهي بتمسح ايديها: طيب ناولهوني
اخدته منه وبصا فيه ومره واحده
يالهوووووي الساعه 9 وعوجت بوقها يمين وشمال في حركه شعبيه مشهوره
حور: يلا يا ياعم قفل الورشه وسيبها على حالها وبكره يحلها الحلال دانا هاتنفخ في البيت يلا يلا يا حاج الله يسترك
لم يسعف الوقت حور لتغيير ملابسها المتسخه وركبت عربيتها واتحركت بسرعه
روحت حور وهي بتركن على باب البيت شافت أمها قاعده على المصطبه قدام الباب مستنيهاها
حور نزلت جري: مالك يا هدي إيه اللي مقعدك على المصطبه عز الليل
هدي بتنهيده: مستنياكي يا ست الساعه كام دلوقتي
حور بصبر: طيب يلا ندخل وانا احكيلك
هدي بعدم رضا: يلا يا ست لما نشوف اخرتها يا هانم
دخلت حور وهدي وهي عارفه ان القيامه هاتقوم مع أمها
هدي قعدت على أول كنبه قابلتها: ها يا ست هانم الساعه في إيدك كام يا برنسيسه
نفخت حور بتعب: الساعه 11 يا أما بس كان عندي شغل كتير وفي ايدي عربيه زبونه وعايزه شغل من نار بدئت أحل فيها والوقت سرقني لو بصيتيلي كويس هاتلاقيني مغيرته وبعفريته الشغل
هدي بتعب: وآخرها يا بنت بطني هاتفضلي واجعه قلبي عليكي كده كتير متنسيش انك بقيتي عروسه على وش جواز
حور: فاهمه يا أما بس والله غصب عني داه مال ناس وأكل عيشنا وبيوت ناس مفتوحه من ورا الشغل داه دي أمانه ابويا اللهزيرحمه سلميها لله والله أخر مره اتأخر مش هاتتكرر يلا بقى سخني الأكل قلبي سقط عليا من الجوع هاستحمى واجيلك ريحتي كلها شحم
هدي: طيب يا ضنايا متنسيش إننا في حاره والناس ما بتصدق تلاقي حاجه تمسكها في بوقها لبانه تتشدق بيها وتنقل من بوق لبوق
هزت حور رأسها بتفهم : حاضر يا أما يلا بقى يا هدهد الجناين
اتحركت هدي وهي مقتنعه ان بنتها على حق بس قلب الأم أم
مر اليوم مرور الكرام
تاني يوم يوم جديد بنهار جديد على الكل
صحيت حور بروتينات المعتاد
هدي : رايحه فين انهارده
حور برفعه حاجب: رايحه الورشه ليه
هدي بتعوجه بوق: لا يا شملوله انهارده مش هاتروحي خلى حد يحل مكانك
حور بإستغراب: ليييه يعني
هدي بنفخه طويله: انهارده يا عروسه هانضف البيت من فوق لتحت ونفرشه عشان الناس اللي جايه بكره وانا مش هاقدر لوحدي
حور: يأما نمسح الدور داه هما يعني هايقعدوا في البيت من فوق لتحت هي اوضه الجلوس ودمتم
هدي بعصبيه: بت انتي كلامي يتسمع داه المثل بيقولك أكنس بيتك ورشه ما تعرف مين يخشه يا عين أمك يلا يلا خلي حد من اللي في الورشه يحل محلك انهارده
حور : يأما
هدي بحسم: هي كلمه ومش هاتنيها بلا أما بلا أبويا يلا يا بت
حور بنفاذ صبر: حاضر يا أما ماانا عارفه لما بتصممي على حاجه دماغك جزمه قديمه
هدي: مااااشي يلا يا بت كلمي حد يكمل شغلك انهارده
وسابتها ومشيت
حور طلعت تليفونها
حور: ايوه يا سبارس بقولك إيه كمل شغل في العربيه اللي عندك انا انهارده مش جايه
سبارس: لييه يا اسطى خير اول مره تعمليها
حور: ظروف انهارده انا اجازه كمل شغلك يا أسطي يلا سلام يا باشا
سبارس: اطمني يا أسطى كأنك موجوده وزياده يلا سلام
مر اليوم بطوله في بيت حور ماخليش من تنضيف وكنس ومسح
قعدت حور بتعب: بالله عليكي يا هدي كفايه انا وسطي اتحش من الشيل والحط نريح شويه ونقوم نكمل
هدي بشخطه: قومي يا بت اومال لما تشيلي بيت لوحده يا معدوله هاتقوليله إيه يا اختي همي همي يا بت بلاش لكاعه بنات
حور بتعب وهي بتدلك في رجليها: يالهووي عليا وعلى سنيني وعلى الجواز وسنينه هو الجواز كنيس ومسيح يا هدي دي تنضيفه العيد على اللي بتعمليه داه كله
هدي بلا مبالاه: يلا يا عروسه لسه عندنا تلميع الخشب اللي اتبهدل من غبره التنضيف ولسه فرش البيت وبكره ورانا تجهيز واجب للناس اللي جايه
حور وهي ناقصه العياط: لا خلي عنك واجب الناس هاجيب جاهز من بره
هدي بقلبه وش: من بره ليه يا اختي كتعه ولا كتعه داه لازم غدا معتبر ووصايه كمان غير الحلو والعصير لازم يعرفوا إننا بيت كرم وانك عروسه لقطه وست بيت بريمو ميلاقوش زيها لو لفوا الدنيا على كعوب رجليهم حافيين يلا يلا همي اومال
قامت حور بتعب : يلا يا أما منا مش هاخلص من الموال داه يلا الله يباركلك في صحتك اللي هدت حيلي طول اليوم
****************
عند جبل قاعد سرحان وهو بيعد الساعات اللي بتفصله عن اليوم اللي بيحلم بيه من يوم ما عينه جات على حور وهي خطفت قلبه قبل عينه
همام بخبث: ايه اللي واخد عقلك يتهنى بيه
جبل بضحك: انتا يا ابو جبل
همام بضحك: طيب يا عم هامشيها اللي واخد قلبك أصله اكيد مش انا
جبل بضحكه جامده: ايييه يا حاج مالك بتنكش معايا ليه هي أم جبل لسه قافله منك
همام بنفخه غضب: عادي امك مجدتش عليا مراتي وانا عارف طبعها تقدر تقول كده قاريها وحافظها دي عشره عمر سيبك منها وافرح انتا يا عريس والباقي أمره سهل
جبل بتفهم: ربنا يحنن قلبها
همام : آمين
*******************
حل الليل وحور اترمت على الكنبه من التعب
هدي برفعه حاجب: مالك يا بت يلا عشان نفرش بقى
حور وهي ناقصه العياط: وكتاب الله يا أما مافيها عضمايه راكبه على اختها ابوس ايدك خلي الفرش لبكره جسمي بيدعي عليا بشالشيل عنيه
هدي بهزه راس: مفيش فايده فيكي طول اليوم مناهده معاكي خليكي يا اختي وانا هافرش
حور بوجع: أما هو انتي كنتي بتاخدي مقويات اصل اللي انتي فيه داه مش طبيعي وربنا
هدى بشهقه وهي بتخمس في وشها وبترقي نفسها: في ايه يا بت كان معايا ورده وفتحت وقفلت ايه سمي وكبري يابت داه مايحسد المال اللي أصحابه
حور بتعب: والله ما قصدي اصلك طول اليوم وخدانا فحت وردم لما اتهديت وانتي ولا الهوا
هدي بضحك: يا بت احنا متأسسين على السمنه البلدي والمرود انما انتوا اخيييه عليكم واخدين على أكل الشوارع والزيت والسمنه النباتين اللي لا ترم عضم ولا تقوت جته يلا يلا العافيه للدود وسابتها وقامت تفرش ولا كأن حاجه حصلت
حور سابتها تكمل فرش ودخلت استحمت واترمت على السرير نامت زي القتيل محستش بحاجه من التعب
*****************
في صباح يوم الجمعه وعلى غير العاده حور لسه نايمه مش حاسه بالدنيا
هدي : حوووور يا حووووور قومي يابت ايه نايمه نومه أهل الكهف من عشيه فزي بقى فرهدتيني يا بت
حور وهي بتحاول تفتح عنيها ومش قادره: ابوس ايدك سيبيني انام انا جسمي كله بينأح عليا من إمبارح
هدي وهي بتنغزها في دراعها: يلا يابت الجمعه قربت تأذن يلا بقى انا نزلت السوق جبت الحاجات اللي ناقصه يلا يابت قومي طسي وشك بشويه ميه وصلي وتعالي كلي لقمه عشان نجهز الأكل
حور وهي بتمثل العياط: والنبي يا هدي الهي يسترك جهزي انتي الأكل ومسكت حرف الطرحة انففففف وعملت نفسها بتنف فيها
هدي شدت الطرحه منها: الله يقرفك قومي يلا ولمي كدشك اللي عامل زي طبق المش داه والا وديني لو ما لقيتك ورايا لاجي اصحيكي باللي في رجلي
حور بصت على رجل أمها: البانص لابسه بانص بلاستك يا هدي في الحر داه
هدي: ماله البانص يا اختي طول عمري بلبسه طيب والنبي داه مريح تحسي انك ماشيه حافيه ومصمصت بوقها ايش فهمكم انتوا يلا يا بت بلاش عطله ورانا يوم طويل
حور هزت رأسها بتعب وقامت تشوف اللي وراها مع أمها
طول اليوم حور مع هدي في المطبخ وكل ما تزوغ هدي تجيبها من قفاها ومسكاها قفشه الأعمى في الضلمه لحد ما المغرب أذن
هدي: يلا يا حور ادخلي استحمي وغيري وظبطي نفسك يلا شهلي اومال قبل الوقت ما يسرقنا
حور بنفخه وخنقه: اوووووف اخيرا خلصنا الأشغال الشاقه دي كلها وسابتها ودخلت اوضتها
دقايق والجرس رن
هدي وهي بتلف طرحتها: ايوه ياللي على الباب ثواني مش ساكنه وراه انا اصطبر
على الباب بص قطب لراشد وضحك
قطب: اختك طول عمرها روحها على طرطوفه مناخيرها مش هاتتغير
راشد: بس والله غلبانه تطلع تطلع وتنزل على مفيش
قطب: عندك حق
فتحت هدي وبشهقه مره واحده: قطب وحشتني ادخل ادخل يا راشد داه احنا زارنا النبي يا خطوه عزيزه داه البيت نور والله
قطب : بنورك يا هدي
راشد: تسلمي يا غاليه والله عارفين إننا مقصرين معاكي بس والله ما ماليكي عليا يمين غصب عني الشيله تقيله وكل يوم الحمل بيزيد
هدي بتفهم: ولا يهمك يا غالي ربنا يعينك على شيلتك والله عارفه ومقدره وهو انا يعني يوم ما احتاجتكم منا دقيت وانتا جيت يبقى خلاص بقى
قطب وعينه بتدور في البيت: أومال فين عروستنا
هدي: بتجهز وراها بقى عروسه ويحقلها تتدلع
راشد: طبعا بنتنا يحقلها الدلع كله
هدي بإبتسامه رضا: الله يجبرك بخاطرك زي ما جبرت بخاطري
قطب: عيب يا هدي حور دي في مقام بنتي ربنا يسعدها
راشد: عيب يا هدي داحنا أهل والخال والد بس سيبنا نتكلم واحنا هانسأل ونجيب قرار الواد وأهله مهو بيقولك حاسب قبل ما تناسب
هزت هدي رأسها: عندك حق عشان كده كلمتكم
مر الوقت بسرعه والعشاء اذن والكل قاعد ومستني
وفجاءه
.................. ؟؟؟؟؟
يا ترى إيه اللي حصل
