رواية البريئة والمطارد كامله وحصريه بقلم بنت الجنوب
فى بلد صغيره فى اخر الصعيد وقريبه من الجبل وليله من
ليالى الشتا بدأت الحكايه
هنا فى بيت " سالم " ابو محمد اللى يبقى والد لتلات بنات وولد . اكبرهم " يمنى
" اللى فى نهائى تمريض و"ندا" اللى فى تالته ثانوى و"سمر"
فى اعدادى واصغرهم "محمد" اللى فى ابتدائى
يمنى كانت بترسم كعادتها بعد ماتخلص مذاكره بس المره دى
كانت سرحانه فى الاحلام الغريبه اللى بقت تظهر لها بقالها فتره
اتنفضت فجأه لما والدتها زعقت عليها
نجيه : انتى يازفته . مابترديش ليه ؟
يمنى مخضوضه : فى ايه بس ياما ؟
نجيه : انا اللى فيه ايه ولا انتى . . دا انا بجالى فتره بنده عليكى من بره وانتى مرداش .. كنت سرحانه فى ايه يامحروسه
يمنى بارتباك : ياعنى هاكون سرحانه فى ايه بس ياما
نجيه : طب اخلصى جومى سوى كوبايتين شاى ووديهم لابوكى فوج هو وعمك " يونس"
يمنى بطاعه : حاضر ياما
نجيه : اخلصى ماتعوجيش
يمنى : جايمه على طول اها
قالتها وهى بتقوم فعلا .. فسابتها نجيه ومشت .. وقبل ماتتحرك " يمنى " عينها وقعت عالصوره اللى كانو بترسمها
واللى كانت عباره عن جوز عيون بشريه
طب اجول لامى ايه ؟ .. اجولها انى بجالى فتره بحلم براجل غريب ومعرفش من وشه
غير جوز العيون بتاعته واللى انا اساساً معرفوش .. اكيد هاتجول عليا مجنونه اكيد
**************************
بعد ما طلعت السطح " يمنى " لوالدها . صعب عليها الراجل المسكين اللى طول النهار شغل وشقى وبالليل متحرمه عليه النومه وبيحرس البيت
يمنى : الشاى يابوى
رد عليها سالم .. واللى كان بيتدفى جمب النار وبندقيته فى ايده وعمها " يونس " جمبه
سالم : تعالى يابتى .. وهاتى الشاى . دا انا وعمك من بدرى مستنين
يمنى وهى بتقرب تديهم الشاى : معلش يابوى ان كنت اتأخرت عليك
اخد منها شاى وعطى اخوه وبعدين اتكلم . النهارده ليله مايعلم بيها غير ربنا
صوت الديابه مع صوت الريح .. دا غير السما اللى مغطيها الغيم وحاجب ضى الجمر والنجوم
يونس : اهى الليالى دى بتبجى عيد للحرامبه
سالم : انتى هاتجولى ... يعنى مش كفايه التعالب اللى بتنزل يوماتى تاكل الطير من
جلب بيوتنا . يطلعلنا كمان الحراميه ويسرقوا البهايم اللى ساترانا احنا وعيالنا
يونس : امال لوتعرف ان سمعت من يومين من جماعه صحابى انهم شافوا ديب نزل من الجبل
سالم : وااه دا تلاجيه جاع . ربنا يسترها علينا
وقبل مايرد يونس .. سمعوا صوت ضرب نار
سالم : ياساتر يارب .. صوت ضرب النار دا جاى منين ؟
يونس : لازم الحراميه نزلت البلد
صوت الضرب اشتغل تانى
سالم قام من مكانه هو ويونس يبصوا على طريق الجبل والبيوت اللى قدامهم
يمنى : يابوى تعالى انزل معايا او اعملوها ورديه انت وعمى
سالم وعينه رايحه جايا قدامه : انزلى انتى يا" يمنى " دلوك اتأكدى من البيبان والشبابك زين
صوت الضرب كان شغال وماوقفش
يونس : الضرب مش راضى يوجف هو ايه اللى حاصل بالظبط
سالم : ربنا يستر .. انت لسه مكانك اخلصى يابت انزلى واعملى اللى جولتلك عليه
- حاضر يابوى
قالتها " يمنى" ونزلت وهى خايفه على والدها وصعبان عليها
بعد مانزلت " يمنى " ابتدت باوضة خواتها البنات
وكالعاده غلست عليهم بقفل وفتح التليفزيون . انبسطت لما استفزتهم وبعدين شيكت
كويس على الشبابيك واتأكدت من قفلهم . وبعدين دخلت
اؤضة اخوها لاقته نايم ووالدتها كمان
عملت نفس الامر واتأكدت من قفل الشبابيك وبعدين دخلت الحمام ولما جه الدور على
المطبخ واللى اول ماحاولت تنور الكهربا . لاقت ايد بتكمم بقها وصوت بيقول
- ماسمعلكيس نفس والا هاخلص عليكى
فى البدايه كانت بتقاوم بشراسه لكن لما هديت شويه اتكلم هو جمب ودانها وقال
- هاشيل يدى لكن لو طلعلك صوت هاخلص عليكى وجتى . ها ايه رأيك ؟
- هزت بدماغاها توافق رأيه
شال ايده ولف بقا مواجه ليها . شهقت لما شافته قدامها ملثم وشه ومش ظاهر غير عنيه
قدامها واللى تقريباً او تكاد تكون هى نفسها العيون اللى بتشوفها فى احلامها !!!!!!!!
