رواية احمد ورحمة الفصل السابع 7 بقلم رحمة عبدالمنعم
لقيت نور بتتكلم فى التليفون فى الصاله على راحتها جدآ كنت لسه راجع من الشغل وكان فات اسبوع على الحوار بتاعنا، دخلت وقعدت وولعت سيجاره سمعتها بتقول، لا مش هتأخر، مسافة الطريق
سيبك منه ميقدرش يعمل حاجه
يسألها رايحه فين؟
قالت هقابل هند صاحبتى
مسكت نفسى بالعافيه،هند دى اكتر واحده بكرهها من صاحبتها وكنت حذرتها انها تقطع علاقتها بيها فترة الخطوبه، بنت مش كويسه،بتاعت خروجات ورقص، تحسها كده العوبانه ومش سالكه
نور كانت قطعت علاقتها بيها فعلآ، ليه دلوقتى قررت ترجع كل حاجه تانى؟
بتحاول تضايقنى ولا مجرد عند؟
نور بعد ما قالت هقابل هند وقفت لحظه مستنيه ردة فعلى، انا مفتحتش بقى
سألتنى بسخريه، عايز حاجه؟
لا، ترجعى بالسلامه، الفون رن تانى، نور دخلت اوضتها والفون على ودنها
لا يابنتى قلتلك خلاص معدش فيه منه ده، براحتى، ميقدرش يعمل حاجه
انا فى الطريق اهو
خرجت وقفلت الباب وراها، كنت مجهز كل حاجه، كاميرا صغيره مش باينه حطتها فى مكان يكشف السرير، كان املى انها تلقط اى محادثه او حركه من نور، تأكدت ان الكاميرا متوصله كويس، وقبل نور ما ترجع خرجت عشان أبين انى مش مهتم ولا بفتش وراها
كلمتنى نور اول ما رجعت بتسألنى انت فين؟
قلتلها انا فى مشوار ومش هرجع غير بعد نص الليل
نور سكتت شويه، الوقت كان عصر، قالت بنبره فيها شك هتفضل بره كل ده؟
قلتلها اه خدى راحتك ومتقلقيش عليا
صمتت نور شويه تانى، اخد راحتى؟
قلت قصدى يعنى متقلقيش
نور بنبره غير معروفه ماشي يا أدهم
فضلت بره ملطوع على القهوه لحد نص الليل ورجعت على الشقه
فتحت الباب لقيت الشقه مقلوبه، حيطان مكسره، دبش وطوب على الأرض، تراب فى كل مكان، تحس ان فيه انفجار حصل فى الشقه
جريت على أوضة نور كانت مفتوحه، بسألها نور حصل حاجه فى غيابى؟! الشقه مدمره؟
وهى نايمه على السرير قالت لا مفيش غيرت الكهربه بتاعت الشقه كانت قديمه ومش عجبانى
دخلت جوه الاوضه، ببص بطرف عيني على الكاميرا ملقتهاش
نور بتسألنى مالك كده متسمر عنيك على السقف؟
قلتلها مفيش حاجه، اديتها ضهرى وهخرج من الاوضه قالت، أدهم
لقينا البتاعه دى متعلقه هنا، متعرفش بتاعت ايه؟ وحطت الكاميرا فى ايدي
القصه للكاتب اسماعيل موسى
قلتلها معرفش الصراحه، انا مشترى الشقه جديد يمكن المالك إلى كان قبلنا
بصت ناحيتى وضحكت، ماشي يا أدهم عادى
طلعت الصاله وانا حاطط ايدى على صدرى، ازاي اكتشفت الكاميرا؟
الصاله واوضة النوم الى تغيرت الكهربه بتاعتها، باقى الشقه لا
ازاي عرفت مكانها
وهل عرفت انى انا الى حطييت الكاميرا؟
مالك؟ كانت نور خرجت من الاوضه وقعدت جنبى
انت مش على بعضك
اسلوب التلاعب النفسي بتمارسه عليه، عندى خبره كويسه فى المجال ده
نور متأكده انى انا الى حطيت الكاميرا
قلتلها شوية مشاكل فى الشغل
يا اخى الشغل ده كله مشاكل، مفيش ح. مرتاح، حاجه زفت، ربنا يساعدك على مشاكل الشغل يا حبيبى
انا هخد شاور
دخلت الحمام وسابت الفون بتاعها جنبى لأول مره من بداية جوازنا
مرضتش المسه، حرمه مكشوفه
تليفونها رن، سألتنى من الحمام مين
قلتلها هند صاحبتك
قالت رد عليها يا أدهم يمكن فيه حاجه، نور بتمارس ضغطها النفسي عليه، عايزانى انفجر
هديت نفسي ورديت، هند ازيك يا أدهم عامل ايه؟
كويس الحمد لله
طبعا الجواز طلع حلو يا بختك بنور
اه طبعا، انا محظوظ والله، نور دى حتة سكرة
مش زعلان انها كلمتني تاني؟
اصل نور قالت انك طلبت منها تقاطعنى؟
لا ابدا كل صحاب نور صحابى
يعنى انا صاحبتك؟
خدت التليفون وطلعت على الشرفه، اه طبعا يا هند ولازم تزورينا فى شقتنا انا عازمك على الغدا
انت بقيت لطيف جدا يا أدهم حصل ايه فى الدنيا؟
ان كنت اعرف شيء واحد عن هند فأنها لا ترفض علاقه جأتها بالمجان
هكذا النساء لا تتغير طبيعتهن ابدآ
على فكره يا هند صوتك حلو
الله انت بتعكاسنى يا أدهم ومن تليفون مراتك!؟
انا قصدي صوتك احلى عن آخر مره سمعته فيها
اه لو كان كده ماشي، بعدين متخفش انا مش نمامه
نور خرجت من الحمام بتنده عليه لما سمعت صوتى فى البلكونه
قلتلها انا هنا
انت لسه بتكلم هند؟
اه قلت ادردش معاها شويه لغاية ما تخرجي من الحمام
هند سألتنى فيه حاجه؟
قلت لا مفيش، انتى لسه بتروحي الجيم؟
القصه للكاتب اسماعيل موسى
ضحكت هند، ايوه طبعا، الواحده لازم تهتم بجسمها
بعد كده كملت بخباثه كل يوم الساعه عشره الصبح مش بغير ميعادى
عشره
نور وصلت عندي، هات التليفون يا أدهم كلمتنى بنبره عصبيه
اديتها التليفون، مجرد دقيقه وقفلت مع هند ورجعت عندي
بصت ناحيتى كنت بدخن سيجاره وبتفرج على التليفزيون
أدهم كل ده كلام مع هند، انت مكنتش بتطيق تسمع اسمها؟
قلت لا منا اتغيرت بقا صحابك لازم احترمهم واهتم بيهم
سحبت البطانيه فوق جسمى، على فكره يا نور انا عزمت هند على الغدا
نور انصدمت، من غير ما تقولى؟
منا بقلك اهو
