رواية صاحب مفتاح الشقة الفصل الخامس 5 بقلم عمرو راشد
الحقيني يا ماما في حرا*مية دخلو البيت وسر*قوه
= يا نهار اسود حرامية!!،، طب انتي كويسة؟
انا بكلم الزفت اللي اسمه أمجد بس مش بيرد
طب تعالي بسرعة يا ماما،، أنا خايفة اوي؟
= اقفلي الباب عليكي كويس وانا هلبس واجيلك
" حماتي قفلت المكالمة وبصتلي وهي مرعوبة وقالتلي
في حرامية هج*مو على مراتك وسر*قو البيت
= منال حبيبتي،، انا لازم اروحلها حالا
استنى انا جاية معاك
= متتعبيش نفسك يا حماتي،، خليكي هنا وانا هبقا اطمنك
متعبش نفسي ازاي يعني؟،، انا جاية استنى
" قامت بسرعة و دخلت تلبس وانا قعدت استناها،، المجهود دا هيسرع مفعول السم اكتر،، يا بختك يا حماتي والله،، بعد 10 دقايق لقيتها خرجت وانا خدتها ونزلنا ركبنا العربية و روحنا بسرعة على البيت،، وصلنا هناك وطلعنا نجري لحد ما وصلنا الشقة،، رنيت الجرس وبعد ما انتظرت 3 دقايق لقيت الباب اتفتح وشوفت أكتر نظرة كان نفسي اشوفها على منال،، نظرة الخوف حقيقي ممتعة على وشها،، أول ما شافت امها دخلت في حضنها وفضلت تعيط،، ساعتها انا كنت في منتهى السعادة اصل ايه تاني ممكن يفرحني اكتر من كدا
احنا لازم نبلغ البوليس
" الجملة كانت من حماتي وانا رديت عليها وانا باصص ل منال وقولتلها
انتي فاكرة شكلهم؟
" ردت عليا وهي لسة بتحاول تتنفس من العياط
كانو ملثمين
= يبقا البلاغ مش هيفيد بحاجة
" حماتي ردت عليا بزعيق
ازاي يعني؟،، احنا لازم نجيبهم بأي شكل،، لازم نعرف هما مين ومين اللي باعتهم
= اعتقد دول المنافسين بتوعنا في السوق وكانو جايين يخوفونا مش أكتر
محدش في السوق يجرؤ يعمل حاجة زي دي
= كل حاجة بتتغير مع الوقت يبقا اكيد البشر كمان بتتغير
يخافو يا أمجد
= مبقاش في حد بيخاف دلوقتي،، كل اللي يهمهم الفلوس وبس
العمارة هنا اكيد فيها كاميرات
= دا اكيد
خلاص احنا نفرغ الكاميرات ونشوفهم واكيد هنوصل ل حاجة
" ساعتها طبطبت على كتف منال وقولتلها
انا معاكي يا حبيبتي متخافيش
" لكن هي بصتلي في الوقت دا ونظرتها اتحولت من خوف وضعف ل غل وسر
وانت كنت فين حضرتك؟،، سايبني لوحدي في الشقة وبايت برا من امبارح
= دا كان طلبك يا منال
وانت ما صدقت تمشي،، قول انك مش طايقني ولا طايق تعيش معايا
= كنت طلقتك لو دا صحيح
متقدرش عارف ليه؟،، عشان العز دا كله هيروح منك
= بلاش غلط يا منال،، احنا في مشكلة دلوقتي لما نبقا نحلها ساعتها نتكلم غير كدا مش وقته الكلام دا
لا اسمعني بقا،، انا هنا اللي اقول امتى وقته وامتى مش وقته،، البيت دا بتاعي يا أمجد،، بتاعي انا وبس
" حماتي قامت وقفت وقالت بعصبية
كفاية بقا اللي بتعملوه دا،، هو دا وقته؟
" منال ردت عليها
اه وقته يا ماما،، وقته لإني ملقتش راجل ابقا مسنودة عليه في موقف زي دا،، وقته عشان حسيت اني مش متجوزة وكأني عايشة لوحدي
" ساعتها ابتسمت بعد الكلام اللي قالته وقولت بكل هدوء
انا مقدر الحالة اللي أنتي فيها عشان كدا انا هسكت ومش هرد عليكي
= لا رد يا أمجد،، رد اذا كنت تقدر ترد
" في اللحظة دي انا قادر اهد الدنيا عليها ولكن أنا برضو قررت اسكت،، وهي دي اللحظة اللي الغرور بيملك صاحبه وبيخليه يتحدى اللي قدامه وبكل ثقة عشان عارف انه ملوش رد فعل،، بس لان الشخص المغرور دايما بيكون مش ذكي و دا مش معناه انه غبي،، لا خالص بس هو عادي،، بني آدم عادي جدا مش بالعظمة ولا الذكاء اللي غروره بيصوره بس الذكاء اللي بجد هو انك تحاول تكمل الصورة اللي رسمها غروره وتثبتله انك فعلا ملكش رد فعل
امك قاعدة وانا مش عايز اتكلم
= لا اتكلم ووريني هتقول ايه
" ساعتها حماتي بدأت اشوف عليها التعب وقامت بسرعة تجري على الحمام،، منال لما شافتها اتخضت وجريت وراها عشان تطمن عليها،، وبعد خرجت من الحمام كان باين جدا عليها التعب،، وشها بقا لونه أصفر،، بس دا اكيد مش حمل،، يكونش دا اثر السم اللي حطيته في الكوباية بتاعتها بس ميزة السم دا بقا انه مبيقت*لش علطول،، بياخد وقته لحد ما ينتشر في الجسم و يد*مر كل الاعضاء وبعدها يتنقل للمخ عشان يد*مره برضو و بعدها بيقت*ل الشخص،، يعني هخليها تتمنى المو*ت،، مراتي بعد ما شافت حماتي بالشكل قررت انها تبات معانا لحد ما تكون كويسة بس مكنش دا الحال طبعا،، لأن تاني يوم بدأ الوضع يكون اصعب على حماتي ولأن مراتي صممت على أنها تروح ل دكتور،، استأذنت منهم قبلها بحجة أني هحجز عند الدكتور عشان ندخل بسرعة وفعلا روحت وعملت اتفاقي زي كل مرة وبالفعل لما حماتي راحت والدكتور كشف عليها كتبلها على أدوية وقال ان دا نتيجة انفلونزا شديدة شوية،، بعدها رجعنا البيت وحماتي دخلت تنام،، كنت قاعد مستني برا في الصالة لحد لما منال تخرج وبعد شوية خرجت فعلا
نامت؟
= الحمدلله
احنا باين علينا اتحسدنا،، انا لازم اجيب شيخ يقرأ قرآن في البيت
= هو انت كنت عند ماما بتعمل ايه يا امجد؟
كنت في مشوار جنبها وقولت اطلع اطمن عليها عادي يعني
= دا من امتى؟
هو حرام اروح ل امك يعني؟
= لا بس غريبة،، انت مبتروحش هناك غير وانا معاك
لا روحت كتير عادي بس انا مبقولش
= مش عارفة ليه مش مصدقاك
كفاية شك يا منال بعد إذنك،، انا لحد دلوقتي مقدر الظرف اللي احنا فيه ف ياريت كفاية بقا
= كفاية يا أمجد،، انا هسكت
" الشك لما بيدخل جوا اي بني آدم بيقضي عليه بس دي اخر مرحلة منه إنما في الاول بتبدأ تشك في كل اللي حواليك حتى اقرب الناس ليك،، متوقع أي حاجة من اي حد ومش هتكون مستغرب من دا لان الشك بيصورلك ساعتها انه عادي جدا وملهاش لازمة علامات الاستغراب،، الشك شبه الغرور بالظبط والاتنين عاملين زي النار اللي يتأمل نفسها عشان ملقتش حد تاكله،، اما عن الوضع في تالت يوم كان اصعب واصعب خصوصا ان جرعة السم بدأت تزيد في جسمها وانا كتت حريص جدا على انها تاخد الجرعة في معادها عشان الانتظام عندي هو اهم شئ،، اتحججت المرادي ب اني عندي معاد شغل ونزلت من البيت و روحت على شقة ناهد،، فتحت الباب و دخلت سمعت صوت الدش مفتوح ف اكيد هي في الحمام،، دخلت قعدت على الكنبة واستنيت نص ساعة لحد لما لقيتها خارجة وهي ملفوفة بالفوطة حوالين جسمها،، اول ما شافتني ضحكت وجريت عليا وقعدت جنبي
البيت رجع ينور من تاني يا حبيبي
= محبتش اغيب عليكي اكتر من كدا
غيابك بيمو*تني يا أمجد،، في كل دقيقة انت مش معايا فيها انا بمو*ت
= لازم تتعودي لان في اوقات ممكن معرفش اجيلك
مش مشكلة هجيلك انا،، انت ناسي اني بقيت صاحبة منال؟
= أي تصرف طايش او متسرع انا مش هقبل بيه وهيكون عقابك شديد
" بعدها لفت ايدها حواليا وقالت
ما انت بتوحشني
= كل حاجة ليها حدود و اي تصرف خارج الحدود مش مسموح
انا تحت طوعك و امرك يا سيد الرجالة،، قولي بقا وطمني عملت ايه؟
= كل حاجة ماشية زي ما انا عايز بالظبط
عشان انت راجل عظيم مفيش منك اتنين
= دا حقيقي أمجد العطار واحد بس مينفعش يكون عنده نسخة تانية
طب وام منال؟
= غلبانة وهتتعاقب بذنب بنتها
طب ما تعاقب منال احسن
= انا لو عاقبت منال دلوقتي همو*تها بسرعة وانا مش عايز الموضوع يخلص بسرعة
ولما امها تمو*ت هتعمل ايه؟
=اهم ضلع عند منال هيتكسر وبكدا الموضوع هيبقا اسهل بكتير
طب وهالة اختها؟
= مفيش منها قلق
وصلاح؟
= صلاح دا انا مأجل قرار نهايته شوية لحد ما اخلص اللي ورايا
" لقيتها مالت عليا اكتر وقالتلي
ما تيجي نسيب كل دا ونمشي يا أمجد،، نروح بلد تانية ونبعد خالص عن كل القلق دا
= محدش بيهرب من قدره يا ناهد
القدر عمره ما بيظلم حد
= كل واحد فينا اتخلق وهو عنده دور لازم ينفذه و دوري ولازم انفذه و إلا ميبقاش ليا لازمة في الدنيا
وانت كدا هتعيش مرتاح؟
= طالما عملت اللي انا عايزه يبقا اه هعيش مرتاح و جدا كمان
اللي انت عايزه دا اخرته معروفة
= قصدك المو*ت يعني؟،، متقلقيش انا لو همو*ت يبقا احسن ليا امو*ت وانا بعمل اللي أنا عايزه
يا أمجد أنا خايفة عليك،، ارجوك حاول تفهمني
= الخوف مبيعملش حاجة غير انه بيتعب صاحبه،، حاولي تخلصي من خوفك ثم ان مينفعش مرات أمجد العطار تكون خايفة
انا بحبك أوي
" بعدها دخلت في حضني أكتر وانا حضنتها عشان تهدى،، عشان اعرف احتويها واسيطر على الخوف اللي جواها،، لازم كل حاجة تكمل زي ما هي ماشية،، الساعة كانت لسة 7 بس كان لازم اتحرك بسرعة
رايح فين؟
= عند نورا
اشمعنا دا حتى النهاردة مش الجمعة؟
= محتاج ابلغها حاجة مهمة
ايه هي؟
= هتعرفي لما الموضوع يتم
موضوع ايه يا أمجد ما تفهمني؟
= انا معنديش وقت،، همشي دلوقتي وهبقا اكلمك
" اتحركت بسرعة و ركبت العربية و روحت على بيت نورا بس قبل ما اطلع جيبت الجلابية والطاقية من شنطة العربية ولبستهم بسرعة في المدخل بتاع العمارة وحطيت العطر بتاعي و طلعت الشقة،، فتحتها و دخلت
السلام عليكم ورحمه الله وبركاته
" لقيتها قاعدة قدامي وبتقرأ في المصحف و بعدها بثواني قالت
صدق الله العظيم
" قامت بعدها وهي مبتسمة
دا النهاردة كأنه عيد،، ايه الزيارة المفاجئة دي؟
= الحقيقة ال موضوع مهم وميستناش
خير يا أمجد في ايه؟
= الحقيقة هو خير،، في وسط رحلتي في الدنيا قابلت ست كان عندها تجارة و جوزها متوفي وهي اللي ماسكة الشغل كله بس للاسف اهل جوزها مبيرحموش وعايزين يرموها برا ومتاخدش أي حاجة من ورثها
اعوذ بالله هو لسة في ناس كدا؟
= واكتر يا نورا،، الست دي انا لما قابلتها بكيت من اللي هي بتحكيه،، حياتها صعبة جدا
الله يكون في عونها والله،، الموضوع فعلا صعب
= عشان كدا انا اعتبرت ان دي إشارة من ربنا ليا اني احمي الست دي و احافظ على حقها
هتعمل ايه؟
= انا نويت والنية لله اني اتزوجها
" لقيتها ابتسمت وسكتت
صدقيني الموضوع كله خير،، انا مش محتاج زواج لإني معايا احسن زوجة في الدنيا،، انا بس بحاول اساعدها
= خير ما عملت يا حبيبي
انا مش عايز اشوفك زعلانة،، انا كل اللي يهمني راحتك يا ست البنات
= انا مش زعلانة يا حبيبي،، طالما بتعمل كدا عشان ربنا يبقا خلاص انا مش هقدر امنعك
الله يجازيكي خير يا نورا
" بعدها بشوية اتحركت من عند نورا و روحت على بيت حماتي ولاني عارف انها دايما بتسيب نسخة من مفتاح الشقة تحت الدواسة فقررت استعمله و دخلت الشقة وقعدت فيها مستني الشخص اللي انا عايزه،، ساعتين بالظبط لحد لما لقيت جرس الباب بيرن،، قومت وفتحت الباب بكل هدوء ولقيتها هي
مساء الخير،، هي طنط مش موجودة؟
= هي تعبانة شوية ف خدتها تقعد معانا في البيت لحد ما تقوم بالسلامة
لا الف سلامة عليها
= الله يسلمك يا.. شهد مش كدا؟
" ابتسمت ابتسامة خفيفة و هي بترد
شهد اه
= انا ممكن اتكلم معاكي في موضوع؟
اتفضل
= اكيد مش على السلم،، اتفضلي
انت لوحدك اكيد عارف انه مينفعش
= متقلقيش مش هاخد من وقتك كتير ولو عايزة تسيبي الباب مفتوح مفيش مشكلة
" كانت مترددة في الاول ولكن بعد كدا دخلت وانا دخلت وراها وقعدنا
خير يا استاذ أمجد؟
= خير طبعا،، تفتكري لو حد قالك اختاري بين الجنة او الحياه العادية تختاري ايه؟
الجنة اكيد
= نفسك تكوني غنية؟
الغنى في النفس مش في الفلوس
= تفيد ب ايه النفس وانتي مش عارفة تشتري حاجة نفسك فيها
انت عايز ايه يا استاذ أمجد؟
= بتناقش معاكي
طب ياريت لو عندك كلام تقوله بسرعة عشان امشي
= السرعة والاستعجال مش لايقين عليكي،، انا شايفك من جوا،، شايف هدوء وجمال،، انثى بحق وحقيقي،، احساسك وصوت نفّسك واصل ليا،، أنتي واضحة جدا و دا مش بشوفه في ناس كتير
انا قايمة ماشية
" كانت قامت بالفعل ولكني كملت
مترددة ولسة عايزة تسمعي اكتر عن نفسك،، لسة عايزة تسمعي مدح و دا لان مفيش حد قبل كدا كان بيشكرك على اي حاجة عملتيها،، أنتي لسة عايزة تقعدي متقاوميش
= انت عايز مني ايه؟
عايز اقولك ان بعد التعب اللي شوفتيه جالك واحد عارف قيمتك كويس يا شهد،، انتي كنز كبير،، جوهرة في ايد اللي يملكها،، وأنا نفسي اكون انا اللي مالكها
= قصدك ايه؟
انتي أذكى من كدا يا شهد وانا عارف انك فاهمة كويس
= بس الحقيقة انا مش فاهمة
الكدب مش من صفات الجواهر اللي زيك،، الكدب دا بتاع العالم اللي برا اللي أنتي مش واحدة منهم يا شهد
= أمجد انا عايزة امشي
