رواية انتقامي مختلف الفصل الثاني 2 بقلم عادل عبدالله
لكن اول لما هند اختي دخلت وضح الارتباك اوي علي مدحت وساعتها انا فهمت انه فهم وبدأت استعد لأصعب موقف ممكن يحصل لبنت في الدنيا .
لكن بعد لحظات وانا ببص لمدحت ومستنيه رد فعله اتفاجئت به ابتسم ابتسامة طمننتي .
فهمت من ابتسامته انه فهم الملعوب اللي عملناه بس فهمت برضو انه اعجب بيا ووافق عليا .
لما اتخطبنا فكرت كتير اني اواجهه وأسأله هو ليه وافق بعد ما عرف ؟ لكن في اخر لحظة كنت بتراجع واقنع نفسي انه معرفش يميز بينا ، خصوصا لما قربت منه و حبيته فعلا كأني كنت اعرفه وبحبه من زمان .
قولت لنفسي متخربيش علي نفسك بايديكي ومادام مش اتكلم في حاجة خلي كل حاجة تمشي طبيعي .
وبالفعل عدت فترة الخطوبة بسرعة وقبل فرحي بشهرين هند اختي اتقدملها حبيبها علاء بعد ما خلصوا جامعة وهو كان بيشتغل من ايام الدراسة وببيستعد للخطوبة .
وبعد خطوبتهم بشهرين كان فرحي انا ومدحت .
مدحت عملنا فرح كبير اوي وكان فرحان اوي اوي وانا كنت حاسة اني اسعد انسانه في الدنيا .
و قضينا اجمل ايام حياتنا في شهر العسل و حبيت مدحت اكتر واكتر .
و مدحت كمان ظهر اوي انه حبني اوي .
وعلي عكس المتوقع ظهرت مشاكل كتير بين اختي هند وجوزها رغم الحب الكبير اللي كان بينهم قبل الجواز ، خصوصا لما عرفت انه بدأ يشرب خمرة ويتغير كتير عن قبل الجواز .
ممكن كتر الفلوس في ايده هو اللي خلاه يشرب ويتغير !! خاصة انه كان بيشتغل بمرتب كبير وعايش هو واختي حياة مرفهة الي حد كبير .
ورغم كل ده لكن اختي كانت بتحبه بجنون ومش ممكن تبعد عنه !!
اخويا احمد اتجوز وعروسته في البداية ايام الخطوبة كانت كويسة معنا جدا لكن بعد الجواز بدأت معاملتها معانا تتغير كتير وبدأت تبعد عنا وبدأت تأثر علي اخويا وقدرت تبعده عننا خصوصا بعد وفاة بابا .
اما انا ومدحت خلفنا بنتين تؤام كانوا اجمل حاجة في حياتنا .
ومدحت كان زوج طيب واب حنون ، وفضلنا علي كده اكتر من ٣ سنين لغاية لما بدأ يتغير معايا انا بالذات وحبه ليا بدأت احس انه قل كتير ولهفته عليا راحت !! وكل يوم يتأخر وهو راجع من الشغل بالساعتين واحيانا اكتر .
وبقيت بفكر ليل ونهار عن سبب تغييره معايا بالشكل ده ؟!!!
وعملت كل حاجة علشان يرجع زي الاول اهتميت بنفسي وبقيت اقرب منه اكتر وادلع عليه اكتر وبردو مفيش فايدة .
وفضل متغير بالشكل ده شهور وانا مش عارفه ماله لغاية ما في يوم قولت مفيش فايدة لازم اواجهه وافهم في ايه !!
واستنيته لما رجع متأخر زي عوايده وبعد ما اكل وشرب قهوته قعدت جنبه وسألته
: مالك يا مدحت ؟
: مالي ازاي يعني مش فاهم ؟
: بتتأخر كل يوم وانت راجع من الشغل ومتغير معايا مش عارفه ليه ؟
: ما انا قولتلك قبل كده اني احيانا بقعد وقت اضافي في الشغل علشان عندنا شغل كتير .
: وانا صدقتك لكن ده ممكن يكون يوم او اتنين اسبوع او اتنين انما انت علي الحال ده من شهور !!!
: يعني قصدك ان انا بكدب ؟
: مش قصدي يا حبيبي بس حاسة ان في حاجة مخبيها عني .
: لا انا مش بخبي عنك حاجة واللي انا قولتهولك قبل كده هو الحقيقة .
: طيب ممكن اعرف متغير معايا انا بالذات ليه ؟
؛ مش متغير معاكي ولا حاجة ؟
: لأ ، متغير معايا اوي كمان ومش بقيت تحبني زي الاول .
: ده بيتهيألك بس .
: لأ مش بيتهيألي .
: صدقيني يا حبيبتي بيتهيألك ، يمكن علشان برجع من الشغل تعبان الايام دي علشان الشغل كتير .
سكت لكن مش صدقت كلامه خصوصا انه كان واضح عليه الارتباك وهو بيكدب .
وفضلت فترة علي كده وانا مش قادرة اعرف سبب تغييره لحد ما في يوم قدرت اراقبه واعرف باسوورد تليفونه واستنيت لحد لما نام وبدأت ابحث في تليفونه عن اي حاجة تفهمني ماله !!
شوفت حاجات مكنتش مصدقة نفسي !!! رسايل حب وغرام بينه وبين رقم مش متسجل علي تليفونه !!
لكن كان في رسايل كتير اوي ومكالمات كتير اوي بينهم !!
وعرفت وقتها ان مدحت بيخوني !!!
قررت اني لازم اراقبه واعرف بيخوني مع مين واظبطه متلبس بالخيانه واواجهه .
و قررت استناه عند الشغل وقت خروجه واراقبه بيروح فين ومع مين ؟!
وروحت عند شغله وقت خروجه وراقبته لحد ما خرج من الشغل ومشي لوحده !!! لكن الغريب انه مش ركب اي مواصلات ومشي لوحده فترة وانا ماشية وراه من بعيد لكن لاحظت انه ماشي ووراه واحدة ست كانت خارجة معاه من الشغل حسيت انها زميلته في الشغل !!
وبعد مسافة من الشغل قربت زميلته له ومشيوا مع بعض وركبوا ميكروباص سوا !!
وانا راقبتهم لحد لما نزلوا من الميكروباص وهي مشيت لوحدها وهو مشي وراها لحد لما هي دخلت عمارة وهو دخل نفس العمارة بعدها بدقايق !!!
ووقفت وانا قلبي كان هيقف من الخوف وضربات قلبي سريعة جدا .
لازم اطلع اظبطهم متلبسين وبعدين افضحه واخليه يطلقني .
لكن المشكلة اني مش عارفة اطلع اي شقة في العمارة ؟؟
واضح ان العمارة فيها شقق كتير !!
لاحظت ان مفيش حد دخل او خرج من العمارة وانا واقفة .
دخلت علي المصعد وشوفت اخر دور متسجل عليه كان الدور السابع .
طلعت الدور السابع لقيت قدامي ٣ شقق .
اكيد هما دلوقتي بيخنوني مع بعض في شقة من التلاته ، لكن هعرف اي شقة فيهم ازاي ؟؟
خرجت من الشنطة تليفوني ورنيت علي رقم مدحت وسمعت صوته خارج من شقة من التلاتة .
وقفت قدام الشقة وانا بجمع اعصابي واخدت نفس طويل ورنيت الجرس .متابعه للصفحة الشخصية عشان نستمر
