رواية فقيرة في بيتي الفصل الخامس 5 والاخير بقلم اسماء عبدالهادي
الاخير
نوفيلا فقيره في بيتي 5
يزن راح بسرعة عند امه ومسك ايديها ....امي ميصحش كدا الناس تقول ايه لو فيه اي مشاكل تتحل بهدوء وبلااش شوشرة وقلة قيمة لحد
هدى ردت عليها بحدة.... لا انا ولا أمي بنشتغل خدامين هنا وانتي عارفة دا كويس وحتى لو،،، دا ابدا مش شىء يعيبنا تعرفي العيب فين العيب ف اننا وافقنا اننا نيجي هنا من اصله كانت غلطة ودلوقتي بندفع تمنها غالي اوي، اهي عندك فيلتك يا سوزي هانم اشبعي بيها وانت يا سيف شكرا ع الفستان الجميل دا،،، اول ما اروح بيتي اللي هو فوق السطوح ها فوق السطوح يا سوزي هانم وانتي عارفة ليه هرجع الفستان ليك تاني يا سيف وابقوا سلمولي ع فريد بيه سلمولي عليه كتير اوي
قالتها وهي بتحاول تكون قوية وتمسك نفسها والدموع متنزلش ف موقف زي دا
وأخدت أمها في حضنها ومشيت بكل شموخ وسط زهول من الكل
اما سيف وعلشان هو الوحيد اللي يعرف كل حاجة فجري وراها ولحقها
.....هدى هدى
هدى بكل غضب.... سيبني دلوقتي يا سيف
هدى كانت بتلم هدومها هي ومامتها اللي بتلم حاجتهم بهدوء
فسيف قال ...اسمعيني بس يا هدى احتا اتفقنا ع ايه
هدى ....متفقناش ع حاجة انسى كل حاجة قلتها ليك يا سيف خلاص كل حاجة انتهت لحد كدا
ولما خلصوا لمو هدومهم البسيطة مشيوا من بوابة الفيلا فسيف جاب عربيته
وقال ...طب اركبوا هوصلكم
هدى... لا مش هنركب مش عايزة اي حاجة منكم خلاص انا عايزة انسى العيلة دي بكل شخص فيها بكل تفاصيلها سيبونا ف حالنا بقا ياريتني ما جيت يا ريتني ما جيت هنا
سيف
.... معلش يا هدى اركبوا بقا علشان خاطري
طنط وداد من فضلك اركبوا احنا بالليل ومش هتلاقوا مواصلات كويسة دلوقتي
هدى.... لا هنقدر نعتمد ع نفسنا كويس اوي يا سيف شكرا
سيف زعق لاول مرة.... قلت اركبي يا هدى لاحسن وربنا هروح اقول للكل الحقيقة ولا يهمني
هدى هنا عيطت ...لا اوعى يا سيف خلاص كل حاجة انتهت وانا خلاص مبقتش منتظرة اي حاجة من حد انا عايزة اعيش انا وماما بهدوء بس ابعدوا عننا بقا
هنا كانت نغم اتصلت بيوسف اللي جه وسمع الحوار اللي دار بين سيف وهدى فقال
....هو في ايه يا جماعة في ايه يا سيف في ايه يا مدام وداد
محدش رد عليه لكن سيف قال.... يوسف ارجوك خليهم يسمحوا ليا اوصلهم مش هينفع يمشوا لوحدهم ف حالتهم دي
يوسف.... انا اسف اوي يا مدام وداد ع اللي حصل من طنط سوزي اكيد هي مش قصدها دا او كان سوء تصرف منها امسحيها فيا انا ارجوكي
هدى بعصبية ....لا انت مش هتعتذر بالنيابة عنها انا عرفت احنا ليه جينا هنا من الاول جينا هنا علشان تذلنا علشان تدوس علينا وتحطنا تحت رجليها زي ما قالت دا السبب الوحيد مفيش غيره قد ايه انا كنت ساذجة اوي وغبية اوي ما هو ايه اللي هيغير فريد بيه من يوم وليلة كدا شكرا اوي يا يوسف بيه انت وسيف بيه احنا مش محتاجين مساعدة من حد يلا يا ماما
ومشيت هدى مع امها بالشنط بتاعتهم
فسيف قال... لا حول ولا قوة إلا بالله ربنا يكون ف عونها بجد
يوسف... سيف هو فيه ايه انا حاسس ان فيه حاجة غريبة ف الموضوع ايه الحكاية بالظبط
سيف ....هقولك انا كدا كدا كنت هقولك علشان تساعدها وتشوف حل ف الموضوع دا
ولما حكاله كل اللي عرفه من هدى
يوسف مكانش قادر يعقل ابدا اللي بيسمعه
...انت بتقول ايه يا سيف انت مجنون هدى تبقى بنت عمك فريد ازاي يعني وايه اللي يخليه يخفيها عن الكل
سيف.... الله اعلم ودا اللي هدى هتموت وتعرفه واللي احنا لازم نساعدها فيه مش هينفع نسيبها تعاني كدا دي عايشة ف حي فقير جدا فوق السطوح السطوح تصور وفريد بيه يعتبر من أكبر رجال الأعمال في مصر بنته تعاني كدا؟؟
يوسف ...معاك حق احنا لازم نعرف ايه اللي بيحصل بالظبط وليه عمك مخبي امرها كدا
سيف ....طب هتعمل ايه
يوسف ...سيب الموضوع دا عليا بس بكرة الصبح لما هدى نفسيتها تهدا شوية
سيف ...طب انت مش شايف اننا لازم نقول ليزن اخوها اكيد لو عرف هيكون اكتر واحد هيقف جنبها وعايز يساعدها
يوسف... يا ابني افهم يزن مش اخوها
سيف تنح ....نعم مش اخوها ازاي دا
يوسف... دي الحقيقة اللي مش كتير يعرفها يزن ميبقاش ابن عمنا فريد زي ما الكل بيظن
سيف ...اومال ابن مين هو ايه الحوارات الجديدة اللي الواحد بيكتشفها يعني هدى تبقى بنت عمي ويزن لأ هو ايه اللي بيحصل بالظبط
يوسف ....يزن يبقى ابن مدام سوزي مرات عمك يا سيف ، مدام سوزي كانت متجوزة واحد تاني قبل ما تتجوز عمك فريد وخلفت منه يزن ولما مات اتجوزت عمك فريد وهو اللي ربى يزن كأنه ابنه بالظبط وبعدها خلف كارما فهمت
سيف.... اه فهمت كدا وناقص بقا لغز هدى ليه محدش يعرف بيها
يوسف ....اممم اظن الموضوع ليه علاقة بمدام سوزي مرات عمك وع حسب اللي حصل منها النهاردة وانها كانت قاصدة تسىء لهدى ولأمها انها هي اللي طلبت من عمك انه يبعدهم عنه دا انا برجحه لكن الحقيقة فين الله اعلم
سيف.... تصدق صح عندك حق ما هي بعد اللي عملته دا النهاردة تتوقع منها اي حاجة
___
تاني يوم يوسف راح ليزن الشركة يجس نبضه ويتأكد هل يزن يعرف بموضوع هدى ولا لا
يزن بترحاب
.....يوسف باشا عندنا هنا ف الشركة وف مكتبي كمان يا مرحبا يا مرحبا
يوسف.... اتمنى مكونش هعطلك
يزن..... يا ابني دا انا لو مش فاضي افضي نفسي علشانك منورنا اكيد تشرب ايه
يوسف ...قهوة مظبوظ ياريت
يزن ...تمام
ونادى ع الساعي.... اتنين قهوة مظبوط يا عم حسن
حسن.... تمام يا بيه حالا وتكون عندكم
يزن ....ها ايه سر الزيارة السعيدة دي انا حاسس ان وراها حاجة
يوسف ....بصراحة اه يا يزن فيه سبب لزيارتي النهاردة
يزن.... خير يا ابني ما تتكلم
يوسف ....انت تعرف ايه عن هدى يا يزن
يزن اول ما سمع اسم هدى اتعصب
...انت كمان بتسأل عنها انا مش عارف البنت دي عايزة ايه بالظبط بس عامة اهي مشيت وهنرتاح منها
يوسف.... يعني عاجبك اللي مامتك عملته فيهم
يزن بلا مبالاة
....ويعني هي سكتت ما لسانها كان طوله شبرين واخدت حقها، لكن فعلا منكرش ان ماما غلطت ومكانش ينفع تعمل اللي عملته
يوسف قام وقف.... ممم معنى كدا فعلا انك متعرفش عنها حاجة غير انها بنت مدام وداد الطباخة مش كدا
يزن ....يوسف هو ف ايه بالظبط ليه مهتم وبتسال اوي ع البنت دي
يوسف... لا ولا حاجة بس اللي مش قادر افهمه انت ليه متحيز للعداء بينك وبينها كدا .. رغم انها بنت طيبة كدا وزوق واخلاق
يزن ....هه اخلاق لا مفتكرش وبلاش اتكلم عن حد انا عندي اخوات بنات بس نصيحة لو كنت بتفكر فيها ابعد عنها يا يوسف
يوسف.... اممم بلاش تحكم عن حاجة من ظاهر انت شايفه قدامك لان الحقيقة ساعات بتكون عكس اللي شايفينه. لما بنعرفها بنقدر نفهم ليه الناس اتصرفت بالشكل دا فبلاش تظلم هدى البنت انسانة كويسة جدا وبكرة تعرف يلا سلام هبقى اشوفك بعدين
جه حسن ....القهوة يا بهوات
يزن ...قهوتك يا يوسف
يوسف ...معلش ابقى اشربها بعدين عندي مشوار لازم اعمله
وقف يزن وقال ....يوسف انت مخبي عني ايه
يوسف ...هكون مخبي ايه عنك
يزن ...يوسف انا مش تايه عنك احنا مش عشرة يوم ولا اتنين وكمان اصحاب قبل كل شىء في ايه مالها البنت دي
اتنهد يوسف وقعد تاني ومسك فنجان القهوة واخد رشفة وقال بعد صمت دام لكم ثانية ويزن منتظره يتكلم
_هدى تبقى بنت عمي فريد يا يزن
يزن برق بعينه.... ايه هدى تبقى بنت فريد بيه ازاي يعني
يوسف ...للاسف دي الحقيقة يا يزن ومحدش عارف ليه مخبي عن الكل حقيقتها
يزن قعد بأسى ....ودا يفسر تصرفاتها اللي انا كنت مفكرها جريئة ومش مقبولة
يوسف.... دا صحيح حتى سيف قالي انها كانت مفكراك اخوها ما هو محدش يعرف غيري انك مش ابن عمي فريد
يزن ....سيف، يعني سيف كان عارف حقيقة هدى؟؟
يوسف ....عرف دا قريب بس اه هو اول واحد هدى تحكيله الحقيقة
يزن بلع ريقه بضيق
...لا حول ولا قوة الا بالله ولما هي بنت فريد بيه ليه بيعاملها كدا انا كنت بشوف فعلا القهر ف عنيها بس مكنتش فاهم حاجة
يوسف ....ودلوقتي فهمت وعرفت كل حاجة ناوي تعمل ايه هنساعدها ازاي
يزن بجدية.... هنواجه بابا طبعا بالحقيقة اللي عرفناها
يوسف ...سيف قالي انها مش عايزة حد يعرف مش عايزة تخسر باباها حتى لو مش بيحبها مش عايزاه يناساها وفضلت تبعد عن الكل وترجع لحياتها القديمة
يزن قام وقف ....يوسف تعالى وديني عندها
يوسف ....طب اصبر اكلم سيف لانه الوحيد اللي يعرف مكانها
يزن بغضب وغيره .... الواد ده ايه علاقته بيها بالظبط
___
سليم وقف قدام نغم ف النادي وزعق
....الواد دا عايز منك ايه
ابتسمت بمكر وقالت... دكتور سليم اهلا منور النادي يااه من زمان انت مجتش هنا
سليم ....انطقي ردي ع سؤالي الواد دا عايز منك ايه
نغم ....اه چو دا كان بيقولي انه معجب بيا وعايز يطلبني من بابي فديته رقمه يكلمه
سليم بغضب ....نعم ياختي يطلبك من بابي لا ياشيخة
نغم.... ايه يا سليم انت ايه مشكلتك
سليم ....ويوسف يا نغم
نغم.... ماله يوسف
سليم ....اخويا يوسف بيحبك وعايز يتجوزك هتبيعيه كدا بسهولة
نغم فهمت ليه اتغير سليم من ناحيتها وقالت ....مين عبيط قالك كدا يوسف بيحب كوكي من زمان اوي
سليم ...نعم بيحب كوكي؟؟ دا انا سمعته بوداني بيقول انه بيحبك ومنتظر الوقت المناسب غلشان يطلبك من عمه
هنا جه يوسف وقال
...اه لو تقصد وقت ما كنا ف رحلة شرم ،، انا كان قصدي ع كارما مش نغم
سليم ...اه بس انت شاورت ناحية البنزينة ونغم اللي كانت واقفة
يوسف ...يا ابني كارما كانت واقفة معاها بس دخلت وقتها التويليت
سليم بفرحة.... يعني انت مكانش قصدك ع نغم، يعني انت مش بتحب نغم ياااه دا احلى خبر سمعته ف حياتي انا فرحان اوي
يوسف ...وانت فكرتني بحب نغم فبعت حبك علشان سعادة اخوك مش كدا، مش بقولك يا نغم اكيد فيه سبب لتغيره دا
نغم ابتسمت وقالت.... ياااه قد ايه انت جميل اوي يا سليم انا يا بختي بيك
سليم كان هيطير من الفرحة
...وربنا ما فيه اجمل من عيونك اللي مدوبة قلبي معاها دي
اتكسفت نغم وحطت وشها ف الارض
يوسف حط ايده ع كتف اخوه
...مش وقت نحنحة دلوقتي تعالى عايزينك ف مشوار مهم
يزن ف العربية
.... ولا انت ايه علاقتك بهدى يالا
سيف بعند.... ايه يا عم وانت مالك بتسأل ليه
يزن بشر ....سيف اتعدل بدل ما انت عارفني
سيف ...خلاص يا عم مفيش اي علاقة عادي يعني بنت عمي وبساعدها
يزن ...عرفت عنوان بيتها منين وكانت معاك ف العربية ليه طالما انت لسه عارف انها بنت عمك قريب
سبف ....يااه انت لسه فاكر مش عايز تعدي الموقف دا ابدا
يزن... انطق يالا وخلصني
سيف... يا سيدي كنا عند الشركة تحت كانت خارجة معيطة ومش شايفة قدامها فجت قدام عربيتي والحمد لله لحقتها قبل ما تخبطها لكن اغمي عليها من الخضة اخدتها وروحت المستشفى عند سليم واطمنت عليها وسليم قالي اوصلها بعربيتي علشان دايخة دي كل الحكاية
هنا فهم يزن ليه سليم يعرفها فارتاحت نفسه للي سمعه
__
بعد عشر دقايق وصلوا لبيت هدى اللي اول ما شافتهم بصت لسيف بعتاب
...بردو يا سيف قلتلهم انا قلتلك ايه
يوسف... اهلا بيكي يا بنت عمي
سليم ...ياااه يا بنتي طلعنا قرايب مش تقولي
سيف ...شوفتي كلهم ما صدقوا انك طلعتي بنت عمهم مش بقولك انتي اي حد يشوفك يحبك
يزن اللي كان مركز معاها وبيبص عليها بحب وأسى اول ما سمع كلام سيف قال ....سبف اتلم بدل مااجيلك
هدى بصت ليزن منتظرة ياخدها ف حضنها ويعوضها بحنان الاخ عن حنان الاب
فقال يوسف ...على فكرة يا هدى يزن مش ابن عمي فريد يعني مش اخوكي لكنه اخو كارما من الأم
هدى رمشت بعنيها اكتر من مرة وبعدين حطت أيدها ع بوءها
....يا خبر ايه انت مش اخويا،، ااا انا اسفة اوي انت بتقوله يا بابا وانا فكرتك ابنه اا انا اسفة اوي والله
ابتسم يزن وقال... دلوقتي فهمت تصرفاتك انا اسف حقيقي اسف ع سوء ظني بيكي اتمنى تقبلي اعتذاري
هدى ...خير محصلش حاجة ما هو مكانش حد فينا عارف الحقيقة
__
انتشر الخبر للجميع
وكان وقت المواجهة قدام فريد
يزن ....ليه يا بابا خبيت ان هدى بنتك ؟؟
كارما بفرحة وصدمة ....ايه هدى تبقى اختي لا مش معقول بس ازاي دا
نغم ....بجد يا هدى انتي بنت عمو فريد الله انا مبسوطة اوي
يزن ...من فضلك يا بابا ارجوك تفسر لينا ليه كنت بعيد عن بنتك بالشكل دا ومخبي حقيقتها؟؟
سوزي قالت بغضب ....انا اللي طلبت منه دا واستحالة البنت دي تتساوى ببنتي أبدا ولا يمكن اسمح بيه
يزن ...في ايه يا ماما طب فهمينا
سوزي ...انا كنت متجوزة والدك يا يزن واللي كان صاحب فريد
فريد ف فترة من الفترات خسر فيها كل فلوسه ف صفقة خسرانة وكان خلاص ايام ويعلن افلاسه
ف الفترة دي كان والدك تعب ومات وسابنا كنت لسه صغير وانا خفت ع مصلحتك وع فلوسك وشركتك فمكانش عندي حل غير اعرض ع فريد انه يدير هو مجموعة الشركات وينميهالك ويحافظ ع مالك يا يزن ف مقابل انه هو يرجع تاني يستعيد مجده وثروته اللي كانت خلاص راحت
فريد طلق وداد وقتها لاني مقبلش اني اتجوز ع ضره وخلاص بعد عنها ونسينا امرها و مكانش يعرف انها حامل في بنته
ولما خلاص قربت تولد لقيناها جتله تقوله ع بنته ف بطنها
انا كنت وقتها حامل ف كارما وطبعا استحالة انا اسيب جوزي يرجع تاني للطباخة دي فطلبت منه انه يمشيها ويديها فلوس تعيش منها هي وبنتها لاني مش هسمح بيهم أبدا ف حياتنا وهددته بإن كل حاجة مكتوبة باسم يزن وهخليه يرجع تاني مفلس
هدى ابتسمت بمرارة..... هه وطبعا بابا فضل الفلوس ع بنته ووافق يبعدنا عن حياته تماما ف مقابل انه يعيش حياة العز والترف ويبعتلنا اخر الشهر كام مليم كارضاء لضميره مش اكتر مش كدا يا فريد بيه
قالتها وهي منهارة في البكا وبعدين سابتهم وطلعت تجري على برا
كارما جت تلحق بيها
....هدى استنى
سوزي مسكت ايديها ....اوعي تلحقيها مفهوم
الكل كان متضايق علشان هدى واللي حصلها واللي عاشته طول حياتها
ويزن لام امه ع اللي عملته
راحوا كلهم لحقوا بهدى اللي كانت قعدت ع كرسي ع الطريق
حتى كارما مسمعتش كلام امها وجريت معاهم تلحق هدى
هدى عيطت ....انتوا جااين ورايا ليه عايزين مني ايه انتوا ايه مسمعتوش ماهو خلاص باعني علشان الفلوس انا مش مهمة أبدا بالنسبة ليه
كارما مسكت ايدين اختها وحضنتها ....بس مهمة جدا بالنسبة لينا احنا يا هدى
رفعت هدى عنيها ليهم والدموع مغرقة وشها
فقربت منها نغم ....بالله عليكي مش تعيطي لاني انا كدا هفضل اعيط جنبك
هدى ...انتوا لسه عايزين مني ايه ما خلاص كل حاجة انتهت بابا مش عايزني في حياته
هنا جالها عمها والد يوسف وقال بابتسامة
....اذا كان فريد اتخلى عنك فاحنا لا يا بنتي وبيتي مفتوحلك انتي ومامتك طول الوقت.. صدقيني انا مكنتش اعرف الكلام دا الا من يوسف وانصعقت لما عرفت وفريد اخويا انا ليا كلام معاه
هدى عيطت.... شايف اخوك عمل فيا ايه عمي
عمها.... حقك عليا يا بنتي هعوضك عن كل اللي فات تعالي في حضن عمك يا حبيبتي
جريت هدى ف حضن عمها لانها ف الوقت دا فعلا محتاجة تحس ان ليها سند وونس وضهر ف الحياة مش منبوذة
سيف ....الله يا ناس ع اللحظة الرومانيكية لا قلبي الصغير لا يتحمل انا خلاص هعيط دعوني ابكي
الكل انفجر ف الضحك
وقرروا انهم يروحوا كلهم يتغدوا سوا
وهناك يزن قال
......هدى انا اسف ع اللي عملته ماما صدقيني والله مكنتش اعرف اي حاجة من دي
هدى بتفهم.... حضرتك ملكش اي ذنب ف اللي حصل يا دكتور يزن انا متفهمة دا
يزن ....حيث كدا بقا اسمحيلي اقولك اني مبسوط انك مش اختي
بصتله باستغراب فبصلها بحب
....هتصدقيتي لو قلتلك انك لفتي انتباهي من اول مرة اقابلك فيها
فاكرة لما كنتي خارجة من الشركة بتعيطي وخبطي فيا من وقتها وانا قلبي وقع ف حبك من اول وهلة وبقيت بفكر فيكي ومش عارف اطلعك من دماغي ومستغرب تفسير الاهتمام بيكي دا ايه كنت بكدب احساسي دا ومش عارف ولا راضي اصدقه وخاصة بعد ما شوفت تصرفاتك اللي وقتها مكانتش مفهومة بالنسبة ليا لكن بعدها بدأت اتأكد بمشاعري ناحيتك وقد ايه انتي شغلتي كياني كله ودخلتي قلبي من غير استئذان
هدى كانت فرحانة وهي بتسمع كلامه دا لانها كمان كانت اعجبت بيه من قبل كده من اول ما شافته ف الجامعة وفرحت لما ظنت انه اخوها وكانت مبسوطة لقربها ولما عرفت بعدها انه مش اخوها زاد فرحتها اكتر واكتر
فوشها كله بقا احمر من الكسوف ونزلت وشها ف الارض بحياء
فقال يزن.... عمي تسمحلي اطلب ايد هدى من حضرتك وكمان هكلم بابا فريد بس دا بعد موافقة حضرتك طبعا
ابتسم عمه وقال.؟ يزن انت شاب عاقل واخلاقك لا يعلى عليها واي ولي أمر يتمناك لبنته وانا عن نفسي موافق بس طبعا الرأي رأي عروستنا الجميلة ايه رايك يا بنتي
هنا هدى كانت وصلت لاقصى مرحلة من الكسوف ووطت وشها ف الارض اكتر
فقال سيف وهو بيزغرط... لولولولي خلاص يا عمي الرد اهو باين قدامك يلا بسرعة نبل الشربات
يزن فرح وقال.... صدق يالا دي احسن حاجة قلتها في حياتك روح يا شيخ ربنا يوقعك في بنت الحلال اللي تاخد عقلك زيي كدا
سيف رفع ايده لفوق... يسمع من بوءك ربنا يااارب واخدة بالك انتي يا هدى ها
ضحكت هدي
فقال يزن بغضب.... ولا انت مالك ومال هدى ها عايز منها ايه
سيف... يا عم خف بقا مش عايز منها حاجة ، قصدي على صاحبتها وهي عارفة كويس
كارما ....ايوا بقا سيفو كمان وقع ع جدور رقابته عقبالك انت كمان يا أبيه يوسف
هنا يوسف انفجر فيها وقال
...ابيه بردو ابيه انتي ايه يا بنتي مش راجعة الا لما اكسرلك دماغك التخينة دي علشان تفهمي بقا لا اقولك انا هقولهالك صراحة خلاص كارما انا بحبك بحباااااك ها كدا مرتاحة لما فرجتي علينا المطعم كله يارب تكوني مرتاحة
كارما كانت واقفة مصدومة ....ايه بتحبني؟؟
يوسف... حرام عليكي الكل فاهم وعارف وانتي لا
ضحك سيف... هههه كارما هتجنني يوسف بجد هو فيه كدا ما تشوف اختك يا يزن
يزن ابتسم ....يوسف قايلي من زمان يا كارما ع الموضوع دا فانتي ايه رايك
كارما باندفاع.... موافقة طبعا اتجوز ابيه
يوسف.... ايه
كارما ....قصدي يوسف
سيف ...يخربيتك كسفتينا طب اعملي زي البنات وبيني انك مكسوفة مش تندلقي كدا
يوسف بحب.... احلى دلقة دي ولا ايه
__
بعد حوالي ٣ اسابيع
في مكان كبير وفخم يليق بالعيلة
اتجمع الأهل والأحباب والأصدقاء
علشان يحضروا فرح كل من
يزن وهدى
يوسف وكارما
سليم ونغم
كانت الحفلة جميلة والاجواء كلها بهجة وسرور
يزن ....مبسوطة يا حبيبتي 
هدى ...اه مبسوطة يا يزن بجد انت مفيش حاجة كان نفسي فيها الا وعملتها ليه
يزن وهو بيبص ف عنيها بتوهان..... لو اقدر اجيبلك نجمة من السما مش هتأخر يا حب عمري
__
يوسف بهيام
....ها يا كوكي ايه رايك ف الحفلة
كارما بفرحة ....تحفة طبعا علشان انت فيها يا روحي
يوسف... لا كدا كتير عليا واحدة واحدة عليا دا انتي كنتي هارياني ابيه أبيه لما استويت
حطت ايدها ع بوءها بخجل... اسفة
يوسف بحب.... بس كانت احلى كلمة ابيه سمعتها ف حياتي
___
سليم ....نغمتي
نغم... ها يا سليم
سليم.... ها ايه انتي مركزة ف ايه ومش معايا
نغم ....امم اصلي بفكر
سليم ....بتفكري ف ايه وسايباني كدا
نغم بصت لعيونه ...بحب بفكر احبك اكتر من كدا ايه
سليم زادت ابتسامته
.....قلب سليم وعيون سليم وروح سليم انتي يا نغم
نغم بدلع... عارفة
سليم... يا شيخة
نغم... اها يلا قولي كمان كلام حلو
سليم.... لا دا انا ههريكي كلام حلو بس اصبري عليا
ضحكت وقالت.. بحبك يا دكتور قلبي المجنون
سليم ....مجنون بحبك يا مجنونتى
__
سيف كان قاعد ع ترابيزة مع ابوه وعمه وحاطط ايده ع خده وبييص عليهم
...اه يانا ياما حسرة عليها وحسرة عليها مش كان انا كمان تيجي رجلي واتجوز وتبقى شوطة مرة واحدة ... اه ياني ع حظك الهباب يا سيف
فجأة نط من مكانه اول ما لقاها
....لا حظك زي القمر يا سيف
وراح عندها وقال... امل ازيك
امل ....اهلا استاذ سيف مبرووك لهدى وللبنات
سيف بحب.... الله يبارك فيكي عقبالك
امل ....مرسي
سيف.... ايه مش نفسك تبقي عروسة زيهم
اتكسفت فقال
....ابوكي مجاش معاكي ليه
امل ....لا بابا وماما جم طبعا
سيف ....حلو اوي وبابا وماما كمان هنا يبقى مضيعش وقت واستغل الفرصة الله عليك يا سيفو يا جامد
__
يزن كان بيبص ف الساعة
هدى.... ايه مالك يا يزن مش قاعد ع بعضك ليه وكأنك قلقان من حاجة
يزن... هو الفرح دا لسه فاضل عليه قد ايه ويخلص
هدى.... ليه مستعجل ليه خير
يزن.... بصراحة بقا عايز اخطفك واطير لعالم مفيهوش غيرنا مش قادر اتحمل عيون الناس دي كلها عليكي هو انتي حلوة اوي كدا ليه
ابتسمت.... عيونك اللي جميلة ع فكرة
هنا سمعوا حد بيتنحنح
....احم احم
لما بصوا للصوت الاتنين قالوا ف نفس واحد ....فريد بيه
فريد بص لهدى بأسف
....ألف مبروك يا بنتي ربنا يتمم ليكم ع خير
هدى فضلت تبصله شوية وكانت هتعيط
يزن.... لا بالله عليكي احنا كنا حلوين بلاش تفتحي حتى الميكاب هيبوظ وانتي حلوة اصلا من غير ميكاب مش عارفة حاطاه ليه
فريد بندم.... سامحيني يا بنتي اتمنى تقبلي نفتح صفحة جديدة وننسى اللي فات بكل المر اللي فيه
هدى قامت بسرعة وحضنت ابوها
....ياااه قد ايه كان نفسي ف الحضن دا من زمان
يزن قام وقف وشالها من حضن ابوها
...اا احم اسف يا بابا من هنا ورايح هدى هتكون ف حضني انا الفرصة راحت عليك
ابتسم فريد.... بقا كدا يا يزن
يزن ....اعملك ايه بغير عليها حتى من ابوها مش بأيدي
فريد ....ربنا يسعدكم يا ولاد ويفرح قلبكم
وتمت
