رواية عشق الصخر(صخر وعشق ) الفصل السابع 7 بقلم شيماء عصمت
الفصل السابع ......
صخر فضل حاضنها ويلمس علي شعرها لحد ماعياطها قل وبقى مجرد تنهيدات ناعمة بعدها شوية عنه بس مطلعهاش من حضنه بص لوشها اللي بقى زي الفراولة من العياط وبص لـ قميصه وقال بـ هزار: ينفع اللي عملتيه في القميص ده؟! هنزل أنا إزاي دلوقتي!! وبعدين إيه الدموع دي كلها!! إنتي موصله حنفيه في عينيكي ولا إيه ؟!!
حاولت متضحكش علي طريقة كلامه اللي مش لايقه أبداً مع ملامحه الرجولية القاسية!! اللي يشوفه أول مره يقول ده شخص مستحيل يهزر أو حتى يبتسم دلوقت بيهزر معاها بعد ما ضربته!! هي فعلاً ضربته؟!!جابت الشجاعة دي منين وإزاي!!
قطع شوردها صخر :اللي واخد عقلك
بصتله فـ عنيه وقالت: أنت عايز مني إيه ياصخر؟! ليه اتجوزتني بالطريقة دي؟! ليه تعمل فيا كده؟ كان ممكن تصبر علي بابا عشان تاخد فلوسك بس ليه يحصل معايا كده اشمعني أنا؟! أنا مش هقدر أستمر في الوضع ده كتير ، أنا تعبت من كل حاجة ، أرجوك أنا هعمل أي حاجة بس سيبني!! خليني أمشي من هنا!! أنا عايزة أكمل تعليمي عايزة أشتغل وأنجح وأحقق كياني ساعدني ياصخر أرجوك أنا مليش حق أطلب منك كده بس أنا معنديش حد في الدنيا دي!! أبويا وتخلى عني وطردني من بيته ، أمي وماتت بعد ماولدتني أنا حتى مشفتهاش معرفش شكلها إيه ؟!!
أنا معنديش أي قرايب مش هلاقي حد يساعدني وأنت مهما تظلمني أو تيجي عليا مش هتلاقي حد يقفلك عشان يدافع عني!! اعتبرني زي مريم أختك ترضى يحصلها اللي بيحصلي ده؟! وأنت في يوم أكيد هتلاقي واحدة في سنك ومركزك وترتبط بيها!! ساكت ليه ياصخر رد عليا!!
صخر مسك أيديها وقعد وقعدها معاه على طرف السرير مسح دموعها وقال بهدوء وكأنه بيكلم طفلة: أول حاجة ممكن تبطلي عياط وتبقي بنوته شطورة
بصتله بغصب وحاولت تتكلم بس هو قاطعها: مش أنتي اللي قولتي واحدة في سني معني كده إني عجوز وأنتي طفله صح
عشق: لا مقصدش أنت اا
صخر :متقاطعنيش ياعشق اسمعيني للآخر زي ما أنا سمعتك أولاً حقك عليا إني مديت أيدي عليكي أنا عمري مامديت أيدي على أي واحدة أي نعم أنتي عصبتيني لدرجة مقدرتش أسيطر فيها على نفسي بس ده مش مبرر أنا آسف ياعشقي ثانياً أنتي مينفعش تسيبي البيت هنا لأنه ببساطة بيتك عشان أنتي مراتي ومكانك معايا عارف أن جوازنا متمش بطريقة طبيعية وعارف إنك مش متقبلاه ولا متقبلاني بس أهو حصل وأنا بقيت جوزك وأنتي مراتي لو سبتي البيت هنا هتروحي فين؟! هتعيشي منين وإزاي ولوحدك؟! أنتي عايزة تنجحي وتكملي تعليمك وأنا مش معترض!! فيها إيه تحققي اللي أنتي عايزة وأنتي معايا وفـي بيتي؟! أنا عمري ماهظلمك ياعشق حتي لو عايز مقدرش، أنا عندي حل أعتقد هيعجبك
عشق بفضول: إيه هو
صخر ببتسامة : نتخطب
بصتله بذهول وكان ليه راسيين ورددت كلامه : نتخطب
صخر: أيوه ننسي خالص أن إحنا اتجوزنا وهنعيش مع بعض وفـي أوضة واحدة هنكون أصحاب! اتنين مخطوبين خلينا نتعرف علي بعض نقول مثلاً الخطوبة 6 شهـور ولما يخلصوا هعمل اللي تقولي عليه ياعشق سواء وافقتي إننا نتمم جوازنا ونعيش زي أي اتنين طبعيين أو رفضتي ومقتنعتيش بيا وقتها هننفصل بهدوء
وكمل بمرح: مع إني أشك أصلاً إنك هترفضي!! هتلاقي فين حد زي كده جينتل مان ورجل أعمال الكل بيعمله حساب وطول بعرض زيي كده ده كفاية لون عنيا ياستي
انفجرت عشق فـي الضحك لدرجة أن عيونها دمعت: مش ممكن أنت مغرووور أوي ياصخر
صخر بغمزه: دي أقل حاجة عندي
عشق بارتباك: ططب وودراستي ياصخر هكملها مش كده
صخر: طبعاً ياعشقي هتكملي دراستك أنا لسه قايلك وهتشتغلي معايا في الشركة كمان
عشق بتلقائية رمت نفسها فحضنه وحضنته وقالت بأمتنان: متشكره أوووي أووووي ياصخر ربنا يخليك ليا يارب
صخر دفن وشه فـي رقبتها وقال: شكلك هتخليني ألغي فترة الخطوبة دي ونخليها دخلة على طول
بعدت عنه بـ خجل: بطل قلة أدب ياصخر
صخر: حاضر ياعيون صخر
عشق بتوتر من كلامه ونظراته: طب إيه مش هننزل نفطر
صخر: يلا بينا
مسك أيديها حاولت تسحبها بس بصلها بإصرار: أنتي مراتي ياعشق وطبيعي أمسك إيدك صحيح إحنا قولنا هنعيش وكأننا مخطوبين بس ده ميمنعش إني أمسك إيدك أو حتي أحضنك اووو...
وبص لشفايفها وغمزلها عشق بصتله بكسوف ومردتش صخر نزل بيها لأوضة السفرة
كريمة ومريم و علي كانوا موجودين
قعد صخر وجنبه عشق
صخر: صباح الخير
الكل: صباح النور
كريمة بابتسامة: صباح الخير ياعشق عاملة إيه يا حبيبتي
عشق بـ ابستامة: الحمدلله بخير
كريمة: يستاهل الحمد ياحبيبتي،اتأخرتوا كل ده ليه ياصخر
مريم بمرح: عريس وكده بقى ياماما
صخر بجدية: مريم
مريم: بقولك إيه يا أبيه دور رجل الأعمال ده مش عليا أنت هنا أخويا حبيبي أهزر براحتي
صخر بـ ابستامة: لا والله
مريم: اه والله زي ما بقولك كده
صخر: ماشي يا أم لسانين
عشق كانت متابعاهم بابتسامة حبت علاقته بأخته واضح أنه حنين عليها ياريت كان عندها أخ زي صخر كان هيوقف معاها ويحميها ويدافع عنها
كريمة: عشق!! عششق!! سرحتي فإيه يابنتي أنتي كويسة
عشق: اه كويسة الحمدلله
كريمة: طب أحب أعرفك بـ «علي» صاحب صخر من أيام الإبتدائية متربي مع صخر زي الإخوات بالظبط بعتبره ابني التاني وشريك صخر فالشغل وساكن فـي الڤيلا اللي جانبنا وطبعاً مش محتاجة أعرفك بيها ياعلي ولا إيه
علي بهدوء وابتسامة: طبعاً ياماما كريمة ، عشق هانم غنية عن التعريف اتشرفنا عشق هانم
عشق بابتسامة : الشرف ليا يا أستاذ علي بس بلاش هانم دي قولي عشق بس
صخر بحدة: مش هنفطر بقى ولا إيه؟! كفاية تعارف عندنا شغل وكمل بتريقة: يا أستاذ علي
علي ابتسم ومردش وعرف أن صخر غيران على عشق حتى من الكلام معاه!!
خلصوا فطارهم وصخر وعلي راحوا على الشركة (السيوفي)
فضلت كريمة وعشق ومريم قاعدين مع بعض
_____________________
في قصر ناصر عمران كان ناصر قاعد فـي أوضته دراعه متجبس ومعاه نريمان ومايا
مايا: سلامتك يا انكل
نريمان بتريقة: تعيش وتاخد وغيرها ياحبيبي قال إيه أكيد هيشكرني
ناصر بعصبية: نااااريمان مش وقتك خالص أنا علي اخري كفاية دراعي اللي اتخلع ده
نريمان بتريقة : أنت هتتشاطر عليا أنا كنت شوف نفسك لما صخر جوز بنتك كسر دراعك فوسط بيتك الله أعلم السنيورة عشق قالتله إيه عشان يجيلك بنفسه ويعمل فيك كده
ناصر بغضب وحقد: ورحمة أمي ما أنا سايبه ولا سايبها هخليهم يدفعوا تمن كسرة أيدي دي غالي أوووي مبقاش أنا ناصر عمران إن ما ندمتوا علي اللحظة اللي فكر يعمل فيا كدا يا أنا يا هو
نريمان بخبث : إتكلم علي قدك ياناصر ما تنساش هو مين ومركزه إيه وممكن يعمل فيك إيه!! وبعدين ماهو كان سايبك ومعملكش حاجة وأنت عليك ليه 100مليون جنيه اشمعني دلوقتي جالك؟! أكيد عشق بنت الـ*** هي اللي سخنته عليك ووقفته ضدك الله أعلم هيعمل فيك إيه تاني!! البداية كانت كسر إيدك مين عارف بعد كده هيعمل إيه
ناصر خاف من كلامها وفي نفس الوقت الحقد والغل ناحية عشق وصخر كبر أكتر وأكتر
لازم ينتقم من عشق مش كفاية اللي أمها عملته فيه زمان !! جاية هي دلوقتي وتخلي جوزها يكمل عليه!!
ناصر بصوت جهوري: سبيني دلوقتي يا نريمان عايزه أتخمد خدي بنتك وطلعوا بره
نريمان بصتله بسخرية وخدت مايا وطلعوا قعدوا في الصالون
مايا بغل: شفتي يا مامي اللي حصل مين يتخيل أن صخر يطلع كده وأن عشق الجربوعة تقع واقفة بالشكل ده اه ياناري بنت الـ**** على طول واقعة واقفة
نريمان بحقد : عندك حق مين يصدق اللي حصل ده ، وأنا اللي قلت هرتاح منها وهنتقم من اللي أمها عملته فيا زمان
مايا بفضول: أنتي كنتي تعرفي أمها
نريمان بغل: عز المعرفة
مايا بأستغراب: منين يامامي؟! أنا مش فاهمة حاجة مش أنتي اتجوزتي انكل ناصر بعد موت مراته؟! إزاي عرفاها ده أنا حتى عمري ماشفت ليها صورة هنا
نريمان : كنا صحاب
مايا بذهول: صحاااب؟!!!!! لا أنتي تحكيلي الحكاية من طقطق لـ سلام عليكوا
_____☆_________☆_______
في قصر صخر .. كانت عشق قاعدة في الصالون ومعاها كريمة ومريم
مريم بفضول : قوليلي بقى ياعشق أنتي عندك كام سنة وبتدرسي إيه وبتشتغلي ولا لا؟!مين صحابك؟! عندك إخوات؟ كام واحد؟ ، بنات ولا صبيان؟ أكتر أكل بتحبيه؟! بتكرهي إيه وهو أنتي ساكته ليه ومبترديش عليا؟!!
عشق كانت متنحة من كتر الأسئلة اللي مريم سألتها لها في وقت واحد ومن غير ما تسيبلها فرصة حتى ترد
كريمة بضحك: مش لما تسيبلها فرصة ترد الأول بالراحة عليها يامريم لسه مأخدتش علي رغيك متصدعهاش من أولها
ردت عشق بابتسامة ودودة: خليها براحتها ياطنط وأنتي ياست مريم هجاوبك على أسئلتك الكتشيرة أوي دي أولا أنا بدرس إدارة أعمال عندي 20 سنة معنديش أخوات لا صبيان ولا بنات ومش بشتغل معنديش صحاب لأني تقريباً مبخرجش من البيت إلا للجامعة ومبخطلتش بحد ، وسألتي إيه تاني ااه افتكرت أكتر أكل بحبه اممم كل الأكل تقريباً وخصوصاً المكرونة بالبشاميل والشوكولاته دول قلبي ، وأخيراً وليس آخراً أكتر حاجة بكرها هي الكذب . . بكره الكذب جداً ومش بسامح أي حد يكذب عليا هاه ياستي عندك أسئلة تانية
مريم: تؤتؤ معنديش بس عندي إقتراح حلو إيه رأيك أنا أبقى صاحبتك لأني معنديش صحاب وأهو نعمل فريق ضد أبيه صخر
عشق حضنتها وضحكت: هو أنا أطول واحدة قمر كده تبقي صاحبتي وخصوصاً لو هنبقي فريق ضد صخر بيه
مريم حضنتها بحب: حبيبتي ياعشق تعرفي من أول ماشفتك حبيتك حسيت وكأني أعرفك من زمااان
عشق كان جواها نفس الإحساس من أول ما شافت مريم حبتها سواء هي أو مامتها كريمة عكس صخر تماماً
كريمة بحب: قوليلي ياعشق مامتك فين
عشق والدموع ملت عنيها: ماتت
الكلمة وجعت قلب كريمة قربت من عشق وحضنتها: اعتبريني زي أمك ياعشق أي حاجة محتجاها أو مزعلاكي أنا موجودة يابنتي وهفضل معاكي وفي ضهرك مش هسيبك أبداً
كريمة كانت عارفة أن عشق حاسه أنها لوحدها وأنها خايفة ومحتاجة حد يطمنها هي بتعبرها زي مريم بنتها بالظبط ، عارفة أن ملهاش حد وأن أبوها مش سأل عنها وأنها مش فارقة معاه قررت أنها هتحميها حتي لو من أبنها ، أي نعم صخر لايمكن يأذيها بس عارفة أنه معاها بيبقي واحد تاني غير صخر اللي هي مربياه وعرفاه
قطع شرودها صوت مريم : إيه ياست الحبايب الدراما دي!! وأنتي ياعشق تعالي أما أفرجك علي أوضتي هتعجبك جداً تعالي تعالي بلاش نكد ياماما
مريم أخدت عشق وطلعت أوضتها
كريمة قعدت مهمومة وحزينة . . مقهورة علي عشق لو تقدر تقولها اللي جواها لو بس تقدر أنها تقولها!!
يتبع
