رواية هل انت قرة عيني كامله بقلم منة سعد
فتاة جميلة في الواحد و العشرين من عمرها مرحه ولكنها
انسانة قوية الشخصية أن تخطي احد حدودها تجعلة يندم علي اليوم الذي قابلها فيه
في منزل عائلتها المليئ بالحب المكون من خمسة اشخاص والدها يحيي و والدتها رغد واخوها الوسطاني مروان واختها الصغيرة فريال والدتها تذهب لتيقظها لصلاة الفجر
استيقظت جاسمين بأعين مغلقة قائلة "طيب يارورو خمس ثواني وهقوم "
صلت صلاة الفجر و عادت للنوم
استيقظت مره اخري لتناول الافطار مع عائلتها
"اول يوم في ثالثة جامعة انهارده صح يا جيسي "
"ايوا يا بابا "
"ربنا يوفقك يابنتي ونشوفك انا ورورو احلي دكتورة انتي واخواتك"
"يارب يا اكتر حاجه حلوة في حياتي انت ورورو"
رغد بحب "ربنا يوفقك يروح رورو "
"ايوا بقي دلعوها وسيبونا انا واخويا بائسين كدا لتكمل بتمثيل قوم ياواد يامروان ملناش مكان هنا "
ليضحكوا جميعا علي ما تقوله في جو عائلي جميل
ثم ذهبت جاسمين لتحضير ملابسها التي سترتديها اول يوم في العام الثالث من كلية الطب وهي تقول "فريال يا زفته انتي لبستي الطقم اللي كنت محضراه امبارح ؟؟؟"
استيقظت فريال التي كانت تمثل النوم "اييه يابنتي بتصوتي جنب ودني ليه "
قالت بعصبية"خلصي يافريال و اطلعي بالطقم"
"احم بصي هو بصراحة في الغسيل وانا كسلت اغسلة مكنتش عارفه انك هتلبسيه "
وقفت جاسمين تراقب اختها بنظرات مرعبة ثم قالت "فريال "
اردفت بخوف"نعم "
"اجري ، اجري يافريال والا..."
لم تكمل جملتها فكانت فريال تهرول بخوف الي اخاهما مروان الذي كان يستمع لاغاني بدون موسيقي وهو يغسل الاطباق بعد الإفطار لانه يومه في غسيل الاطباق
"الحقني يامروان اختك المجنونة بتجري ورايا "
لتختبئ خلفه ثم اكملت "ده كله عشان طقم معرفش بصراحة اي ده معندهاش غيره يعني "
جاءت جاسمين بغضب قائلة لأخيها"سيبهالي يامروان سيبهااا!!!!!!"
"اهدوا ياجماعة محصلش حاجه انتو واحد يعني "
جاسمين وهي تركض نحو فريال" واحد ايه بلا واحد بلا اتنين لقد طفح الكيل ده كل يوم علي كدا "
"استني بس استهدي بالله اجري يا فريال روحي فأي حته هتتشعلقي " ليكمل
"فرفشي يجيسي بقا مش هتتكرر تاني خلاص "
فريال بتأكيد"ايوا مش هتكرر تاني خلاص اني اسف "
جاسمين وهي تعود لغرفتها"لما نشوف ياختي المره الجاية اصلا انا هعلقك برا علي منشر الغسيل وانا مجنونة واعملها انتي عارفاني "
" ربنا يسامحك يا فريال هتجلطيها بجد كل يوم واخده حاجه من حاجتها يإما تضيعيها يا إما تبوظيها "
"يعم انت معايا ولا عليا انا غلطانة اني جيتلك اصلا يابوتجاز خمسة شعلههه"
"والله غلطانة انك جيتي فعلا كان هيبقي شكلك حلو علي منشر الغسيل "
"ماشي يامروان شوف مين بقي اللي هيصورك كل خروجة "
"استني بس هفهمك "
ارتدت ملابسها واخذت معها معطفها الطبي ذهبت بإتجاه الباب و ودعتهم جميعا ثم توكلت علي الله الي جامعتها
كلية الطب البشري
كانت جاسمين جالسة بجانب صديقتها المقربة منار في المقهي بعد انتهاء المحاضرات أخيها يكون معيد في الكليه وهي تعرف كل ما سوف يدرسونه فكانت تحكي لها ان هذا العام سوف تُدرس المواضيع الطبية التي أُخذت سابقا ولكن في حالة المرض أي تدرس أجهزة الجسم والأمراض إكلينيكيا وبجانب ما سبق يتم أخذ مادتي علم الأمراض وعلم الأدوية و علم الأحياء الدقيقة ومادة الصحة العامة والصحة البيئية وتاريخ الطب وأخلاقياته
كانت تحاول جاسمين الاستماع لها ولكن غلبها النوم
لتصرخ منار "هو انا بكلم نفسيي!!!" اصحي!!!!
استيقظت مذعورة من صوتها "يامنار ارحميني يامنار كل مرة تصوتي وانا نايمة بفكر الكلية وقعت ولا حصل حاجه "
"ما انا عمالة بحكي في معلومات وانتي ولا هنا قومي يلا رايحين مشوار قريب من هنا"
" رايحين فين يا اختاه انا عايزة انام "
" هنروح نودي الاكل ده لابن عمتي هيقابلنا قدام الكلية جاي من السكن لانه مجاش انهارده " كنت عند عمتي امبارح و ادتني الاكل ده اودهوله "
"عمتك مدتهوش الاكل علي طول ليه؟ "
"يابنتي هو في سكن جامعي عمتي مش من هنا اصلا كنت مسافرة امبارح انا والعيلة الكريمة روحنالهم ما انا قولتلك علي فكرة الاهتمام مبيطلبش "
"طيب هكلم بابا اقول.. اهو بصي بيتصل "
"ايه يحجوج عامل ايه"
"الحمدلله عملتي ايه يومك كان حلو؟"
"اه الحمد لله المحاضرات كانت حلوة وبعدها قعدنا في الكافيه ومنار جنبي اهي بتسلم عليك "
"سلميلي عليها "
"يوصل "
"كنت بستأذن حضرتك نروح نودي اكل لإبن عمتها هيقابلنا قدام الكلية ياخده "
"طيب روحي وخدي بالك من نفسك متتأخريش"
"حاضر من عيوني "
"مع السلامة "
"يلا يامنار "
"يلا ياختي والله ما طايقاكي بعد المعلومات اللي راحت علي الفاضي اعمل ايه مضطرة استحملك "
جاسمين بضحك علي ما تقول"يعم المرة الجاية مش هنام اتفقنا "
"اتفقنا يلا بقا الواد واقف بقالة نص ساعة "
اتي انس ومعه صديقة المقرب عمر
"ازيك يا انس ازيك يا عمر عاملين ايه اخبار السنة الرابعة معاكم ايه "
عمر "الحمدلله مفيهاش اجازة يومين علي بعض "
انس"مبهدلانا بس الحمدلله علي كل شئ , صحبتك دي"
"اه اعرفكم انس دي البيست فريند جاسمين ، جاسمين ده ابن عمتي انس وده صاحبه عمر "
ارتبك انس فمد يده للسلام بدون قصد"اتشرفت بمعرفتك"
" وانا كمان اتشرفت بمعرفتك معلش مش بسلم "
" اه اسف نسيت قصدي مكنتش اعرف "
منار وعمر كانا يراقبهما و يضحكون علي ما قاله انس
منار وهي تحاول كتم الضحك " خد اكلك اهو يا انس متأكلش عمر معاك عشان مش طايقاه من غير سبب ليبتسم لها عمر بغيظ وتكمل
" تلاقي عمته حطالك سبعتلاف فرخه و ورق عنب ومكرونة بالباشاميل مكنتش قادرة اشيل الشنطة اصلا "
"نقي عليا بقا اقولك خدي الشنطة وروحي"
"هات صدقني مش هقولك لا يلا يابت يا جاسمين "
"يلا يامنار احنا غلطانين اننا جبنا حاجه كنا اخدناها علي طول ووفرنا المسافات "
"لا لا خلاص انا عايزها "
ضحكوا جميعا واخذ حقيبته ثم ودعهم وذهب مع صديقه الي السكن الجامعي
" عمر عايز اقولك حاجه "
" قول يعم ولا اقولك لا لا ثواني خليني اخمن ،امممم عرفت "
"ايه ؟"
يتبع ..
الثاني من هنا
