رواية حب محرم كاملة بقلم ايمان شلبي
اسكريبت كامل 
بقلمي إيمان شلبي
بقلمي إيمان شلبي -نعم اتجوز مرات اخويا ازاي انا خاطب وبحب خطيبتي وفرحنا الشهر اللي جاي !
-يعني هنسيب مرات اخوك تتجوز واحد غريب وابن اخوك يتربي مع راجل غريب
بابا بعصبيه:
-وابن اخوك يتربي مع واحد غريب الله اعلم ممكن يعمل فيه ايه
-والله مامتهم معاه واكيد هتحافظ عليه وهتختارله شخص مناسب
بابا بحزم :
-خلص الكلام كتب كتابك علي مرات اخوك يوم الخميس
-بس...
-لو اعترضت لا انت ابني ولا اعرفك
قومت وقفت وانا ببص لابويا وبقوله بجديه وحزم
-انا مش صغير يابابا عشان حضرتك تفرض عليا حاجه انا مش عايزها ،انا بني آدم ومن حقي اختار البني ادمه اللي تناسبني واللي بحبها ،حضرتك كده بتظلمني وبتفرض عليا شئ هيتعبني طول عمري وهيخليني تعيس
بابا حضرتك زمان فرضت علي اخويا شريف الله يرحمه بنت مش بيحبها واضطر يتجوزها ويتخلي عن البنت اللي بيحبها عشان يرضي حضرتك وطول الوقت كان حزين وحضرتك بنفسك قولت ياريتني كنت طاوعته وخليته يتجوز اللي بيحبها مكانش ده بقي حاله ،شريف اخويا مات بقهرته يابابا ،وانا مش عايز ابقي نسخه من شريف ،عن إذن حضرتك
قولت كلامي دفعه واحده وخرجت من البيت وانا غضب الدنيا كله علي وشي
ــــــــــــــــــــــــــــــــــــــــــــــــــــــــــــــــــــــــــــــــــــــــــ
وصلت الكافيه اللي بنقعد فيه انا و ياسمين
لقيتها قاعده علي الطربيزه اللي بنقعد عليها دايماً شارده لابعد حد لدرجه انها مأخدتش بالها اني قعدت !
-ياسمين....ياسمييين
فاقت من شرودها وبصتلي بعيون بهتانه وبتلمع بالدموع
مسكت ايديها بقلق :
-مالك انتي كويسه
بلعت ريقها وردت بصعوبه :
-ا الحمد لله
-لا مش واضح مالك في ايه ؟
هزت راسها بابتسامه حزينه :
-مفيش ياحبيبي تعبانه بس شويه
-حاسه بأيه نروح لدكتور طيب
اتنهدت وضغطت علي شفايفها وهي بتحاول متعيطش بس دموعها خانتها
بصيت لها بقلق :
-في ايه يا ياسمين قلقتيني
اخدت نفس عميق وبصت في عيوني :
-انت عارف اني بحبك صح ؟
-عارف ياحبيبتي وانا كمان بحبك
-ر حيم لو طلبت منك طلب تنفذه
-طبعا
-اي طلب؟؟
-اي طلب
سكتت لحظه وبعدها غمضت عينيها بقوه وهي بتضغط علي ايدي
-رحيم احنا لازم نسيب بعض
سكت لحظه احاول استوعب كلامها وملامحي كانت جامده وفجأه سيبت ايديها وانا بهز راسي بصدمه
-انا سمعت صح ولا انا غلطان
ردت بصوت مبحوح :
-ايوه انت سمعت صح انا مش عايزه اكمل يارحيم احنا لازم نسيب بعض و....
زعقت فيها بجنون لدرجه صوتي غطي علي المكان:
-يعني ايه ؟
يعني ايه مش عايزه تكملي وليه
اتنهدت وردت بثبات:
-عشان انا بحب واحد تاني
رديت بصدمه :
-ب بتحبي واحد تاني ؟
-ايوه انت لما اتقدمتلي بابا وافق عليك من غير ما ياخد رأي وانا و وانا كنت بحب ابن عمي وهو كان مسافر يكون نفسه عشان يجي يتجوزني بس بابا لما عرف رفض وصمم اني اتخطبلك و...
قاطعتها بجمود :
-انتي كذابه
ردت بتوتر وهي بتحط عينيها في كل مكان إلا عيوني:
-لا انا مش بكذب انا بقول الحقيقه و...
مسكت وشها بغيظ وانا بحط عينيها في عيني :
-طب قولي كلامك وانتي بتبصي في عنيا ...قولي انك مش بتحبيني ..قوليها يا ياسمين ..اوعدك لو قدرتي تقوليها هسيبك وهمشي وحالاً
كانت بتترعش وعيونها بتلمع بالدموع
عايزه تتكلم بس مش قادره تنطق حرف واحد !
-قولي يا ياسمين قوليلي انا مش بحبك
اخدت نفس عميق وردت بحزن :
-لو قولتها هتسيبني وتمشي؟
-قوليها وشوفي
سكتت لحظه وبعدها مسحت دموعها وبصتلي بثبات وقالت بجمود:
-انا مش عايزاك
-توء قولي مش بحبك
-مقدرش اقولها عشان انا مش بكرهك لانك معملتش حاجه تخليني اكرهك ،انت كنت احن وأطيب شخص انا شوفته في حياتي بس للاسف قلبي مش بأيدي
حاولت اتأقلم علي وجودك وانسي اللي بحبه بس مقدرتش انا اسفه يا رحيم ارجوك اوعي تزعل مني اوعي تكرهني انا عارفه انك شخص قلبك في حنان يسيع العالم كله فأرجوك متقساش عليا لاني بني ادمه وليا مشاعر
اخدت نفس طويل وانا بمسح دمعه شارده نزلت من عيوني وببتسم بسخريه:
-لا ولا يهمك مش زعلان خالص عادي عادي
-ر رحيم ...
قومت وقفت وانا بطلع فلوس من جيبي وبحطها علي التربيزه
-عن اذنك يا ياسمين ربنا يوفقك في حياتك
-رحيم رحيم استني ارجوك اسمعني انا....
وفي الحقيقه موقفتش ولا كنت قادر اسمع منها حرف زياده ،ركبت العربيه وسوقتها بأقصي سرعه عندي لحد البيت وانا مقرر قرار في وقت عصبيه متأكد أنه هيخليني اعيش حياه مش سعيده لكن كان لازم اعمله حفاظاً علي نفسي وكرامتي اللي اتهانت !
ــــــــــــــــــــــــــــــــــــــــــــــــــــــــــــــــــــــــــــــــــــــــــ
-بابا انا موافق اتجوز نور مرات شريف الله يرحمه
بابا وهو بيقوم يقف وبيقرب مني بابتسامه متحفظه وبيطبطب علي كتفي
-كنت متأكد انك هتفكر كويس وهتوافق
هزيت راسي بهدوء :
-يوم الخميس إن شاء الله نكتب الكتاب
-علي خيره الله يابني ربنا يكمل علي خير
-يارب عن اذنك تصبحوا علي خير
كنت لسه هدخل اوضتي بس هو مسكني من دراعي :
-انت كنت مع ياسمين
بصيت في الأرض وانا بضغط علي ايدي بقوه :
-ايوه
-وعرفتها قرارك ؟
رديت بكذب وتوتر :
-اه
-وهي كان ردها ايه ؟
-رفضت اكيد
- وبعدين
-ولا قبلين سيبنا بعض
رد بشك :
-بالسهوله دي
بصيتلها ورديت بجمود :
-رضاك عني انت وامي اهم من اي حاجه
ابتسم وهو بيحط أيده علي كتفي:
-ربنا يكملك بعقلك يابني
ابتسمت ابتسامه حزينه ودخلت اوضتي وانا في جوايا براكين لو خرجت هتحرق الاخضر واليابس
دخلت اوضتي وقفلت عليا الباب وقعدت علي طرف السرير وفي اللحظه دي نزلت دموعي علي خدي
فضلت اعيط بحرقه وافتكر كل لحظه مرت ما بينا ،مكانش سهل تفارقني واتقبل فراقها بالسهوله دي
مكانش سهل لاني حبيتها اكتر ما حبيت نفسي ،هي كانت محور يومي ،هي كانت مصدر الامان في حياتي ،مصدر النور اللي نورلي طريقي اللي كان كله ضلمه قبل ما اعرفها
حبها ليا ،اهتمامها بيا كأني طفل ، خوفها عليا وكأني ابنها الصغير ،كلامها الدافي ،ابتسامتها البريئه في وقت انا مُحبط فيه وكاره كل العالم ،كلها كانت أشياء كفيله تخليني احبها واحب وجودها
مكانش سهل اتقبل أن كل ده ينتهي في لمح البصر
مش قادر استوعب انها محبتنيش واني كنت بديل لشخص تاني
مش قادر استوعب انها كانت بتتخيلني شخص تاني ومش شيفاني انا كرحيم
وفي الخلفيه صوت عمرو حسن بيقول
مراية الحب مش عميا
مراية الحب كدابة
وكان لازم تغيب عني ياسايبه يا اما متسابه !
ــــــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور أسبوع والموافق يوم الخميس الساعه ٧
كان في تجمع عائلي بسيط حاضرين عشان كتب كتابي انا ونور
قرب مني ابن اخويا بعد ما خلصنا كتب الكتاب وسابونا نقعد مع بعض
سألني وعيونه مليانه بالدموع :
-انت هتتجوز ماما ؟
حاوطت وشه بحنان :
-اه ياحبيبي احنا اتجوزنا خلاص
ردببراءه :
-بس هي كانت متجوزه بابا مينفعش
-بابا الله يرحمه ياحبيبي
-يعني عادي تتجوزها؟
-اه
-طب وانا ؟
-انت ايه
رد بدموع :
-انا ممكن اقولك يابابا
اخدته في حضني وعيوني بتلمع بالدموع :
-ممكن طبعا ياحبيبي
-انت هتحبني
-انا بحبك من زمان
-هتفسحني
-المكان اللي تحبه هوديك فيه
رد بحماس:
-بجد ،يعني هتوديني الملاهي
-حاضر
-تعرف بابا مكانش بيحبني
سكت لحظه مصدوم من كلامه وبعدها رديت بذهول:
-ليه بتقول كده ياحبيبي بابا كان بيحبك اوي
هز رأسه بنفي :
-لا مكانش بيحبني ولا كان بيحضني زيك وكنت كل ما أقوله عايز اروح الملاهي يضربني ،كنت ببقي عايز احضنه بيقولي لا متقربش انا مش طايقك، حتي ماما ياعمو رحيم كان بيضربها جامد اوي ويقولها انا بكرهك وبكره ابنك
كنت مصدوم من الكلام اللي بسمعه ،بصيت لنور كانت حاطه وشها في الأرض بأحراج وعيونها بتلمع بالدموع
بلعت ريقي بصعوبه وانا بسألها بتوتر :
-ص صحيح الكلام ده يانور ؟
سكتت لحظه وبعدها رفعت عيونها وهي بتبصلي بابتسامه باهته :
-الله يرحمه يارحيم ادعيله بالرحمه
رديت بحزم:
-ردي علي سؤالي يانور شريف كان بيعمل كده
دموعها نزلت علي خدها وهي بتهز رأسها وبصوت مبحوح :
-ايوه احم مازن حبيبي روح العب برا
-حاضر ياماما
رديت بذهول :
-طب وليه مجتيش تحكيلنا ،ليه لما كنتي تقابلينا كُنا نحس انك اسعد واحده في الدنيا وان انتي وشريف عايشين قصه حب ملهاش مثيل ؟؟
ابتسمت ابتسامه باهته وحزينه :
-عشان مكانش قدامي حل غير السُكات
-يعني ايه ؟
-انا مليش حد يا رحيم ،امي وابويا ماتوا وسابوني لوحدي ،عمتي هي اللي ربتني وعيشت معاهم اسوء ايام حياتي ،ضرب واهانه وذل محدش يستحمله وفي الآخر بعد كل ده كمان جوزها بني آدم قذر ،ما صدقت اول عريس واللي هو شريف اخوك وافقت عليه عشان ارتاح من العذاب اللي كنت فيه
سكتت لحظه تحاول توقف الدموع اللي كانت متجمعه في عينيها وبعدها كملت بصوت مبحوح
-كنت بتمني شريف يكون العوض عن كل اللي شوفته في حياتي لكن للاسف اخوك اول يوم جواز قالي بكل صراحه
انا متجوزك عشان ارضي اهلي مش عشان عايزك انا مش بحبك ولا عمري هحبك بالعكس انتي اكتر واحده بكرهها في الدنيا ،يومها قالي كلامه بكل قسوه ومشي ،قلبي اتقسم نصين بس مكانش قدامي حل غير اني افضل
ابتسمت بسخرية :
-قررت اختاره وقولت يمكن حاله يتصلح لكن للاسف
كنت في حياته عامله زي الكرسي ،كان بيقضي واجباته كزوج بكل قرف ويحذرني لو اتكلمت هعيش ايام سودا
كنت بسكت خوفاً منه وخوفاً من اني ارجع تاني لعمتي ،بعد سنه جبنا مازن
تعرف أنه لما عرف اني حامل كان عايز ينزله؟
-بتتكلمي بجد؟
-والله بجد ،بس انا قررت احافظ عليه ،اترجيته ،بوست رجله ،عملت كل حاجه عشان يوافق وفي الآخر قلبه رق
حياتي مع اخوك كانت جحيم يا رحيم بس كنت مضطره اعيش واتأقلم لاني ولا معايا فلوس ولا عندي بيت ولا حتي معايا شهاده انزل اشتغل بيها واصرف علي نفسي وعلي عيالي
بصيت قدامي بشرود وانا بهمس لنفسي :
-ياااااه معقوله ممكن الحب يعمل كده
-اخوك كان بيحب واحده تانيه قبل ما يتجوزني مش كده
بصيتلها وسكتت بأحراج مكنتش عارف اقول ايه ؟
ابتسمت بحزن :
-متخافش مشاعري مش هتتجرح كده كده اخوك كان بيقول اسمها وهو نايم
اتنهدت وبعدها سألتني بحزن:
-انت اتجوزتني ليه يا رحيم ،انت مش كنت خاطب وبتحب خطيبتك
ابتسمت وانا بمسك ايديها وببص في عيونها وبقول بكذب :
-انا مش بحب حد انا بحبك انتي يا نور
ايديها اترعشت والعرق اتكون فوق جبينها وهي بترفع عينيها وبتبصلي بذهول
-ب بتحبني؟
ابتسمت وانا بهز راسي :
-بحبك بس مكنتش اقدر اعترف بمشاعري ليكي و...
قاطعتني بسخريه :
-حب ايه يا رحيم انت بتكذب عليا ولا علي نفسك
اتنهدت تنهيده طويله وبعدها بصيتلها وانا ببتسم ابتسامه مصطنعه :
-انا مش بكذب عليكي انا فعلا بحبك يا نور
بصت قدامها وهي بتردد كلامي بهمس :
-بتحبني ..
لفت وشها مره واحده وهي بتسأل بحيره وجنون :
-ازاي وامتي و واشمعني انا ده انا كنت مرات اخوك
ازاي كنت قادر تعيش وانت بتحب مرات اخوك ؟
ازاي مسامح نفسك اصلا ازاي ؟
رديت بجمود :
-انا معملتش حاجه غلط
-انت شايف انك معملتش حاجه غلط ؟
-ايوه انا حبيتك بيني وبين نفسي لا عمرك شوفتي مني تصرف غلط او حتي نظره وحشه ،لما حبيتك وانتي مع اخويا كنت طول الوقت بحاول ابعد نفسي عنك عشان مبصلكيش بنظره غصب عني تخوفك مني ،عشان قلبي ميجريش نحيتك ،كنت بدعي ليل مع نهار انساكي لكن للاسف مقدرتش ،حبيتك ومقدرتش انسي ولا احب غيرك
لما شريف اتوفي وبابا قالي هتتجوز مرات اخوك فوراً وافقت من غير اي اعتراض
ردت بحزن ودموع:
-وياسمين خطيبتك سيبتها عشاني ؟
-ياسمين كانت بديل ليكي يا نور
-حرام عليك ليه عملت فيها كده ،ياسمين كانت بتحبك و...
قاطعتها بعصبيه :
-وانا مكنتش بحبها انا بحبك انتي افهمي بقي
هزت راسها بنفي :
-مش قادره اصدق ،مش قادره استوعب انك مكنتش بتحبها ،نظراتك ليها ،لمعه عينيك وانت بتحكي عنها ، تفاصيل يومها ،كل حاجه محتفظ بيها عشان منها ،كلها اشياء بتقول قد ايه كنت بتحبها
معقوله فى حد ممكن يزيف مشاعره بالشكل المريب ده يارحيم ؟!
غمضت عيني بقوه وانا بضغط علي ايدي وبحاول اتكلم بثبات
-حاولت اتأقلم علي وجودها ،حاولت احبها، كل كلامي وكل نظراتي ليها عشان مكنتش شايفها ياسمين
-يعني ايه ؟
-يعني عشان كنت بشوفها انتي طول الوقت
ردت بصوت مبحوح :
-مش قادره اصدق
مسكت ايديها وانا ببصلها وبقولها بتوسل :
-ممكن تديني فرصه يا نور ،انا فعلا بحبك اوي
هزت راسها بنفي وهي بتسحب ايديها من ايدي :
-مش هقدر يا رحيم صدقني مش هقدر
-اومال اتجوزتيني ليه أما انتي مش هتقدري ؟
اخدت نفس عميق وبعدها بصتلي وهي بترد بحزن :
-عشان مازن ،مش عايزه مازن ابني يبقي يتيم زي !
عايزاه يعيش مع حد يحبه ويخاف عليه ويكون في مقام باباه ،لما قالولي انك هتتجوزني فوراً وافقت عشان انا عارفه ومتأكده أني مش هلاقي احن منك علي مازن
كنت بشوف حُبك ليه وحضنك الدافئ لما تشوفه عشان كده وافقت عشان هو بيحبك
اتنهدت وانا ببصلها بابتسامه هاديه كلها ثقه :
-وانتي كمان هتحبيني أن شاء الله
ــــــــــــــــــــــــــــــــــــــــــــــــــــــــــــــــــــــــــــــــــــــــــ
وصلنا البيت ،كان مازن نايم علي كتفي ،دخلته اوضته وبوست رأسه بحب وخرجت
كانت نور واقفه في نص البيت بتفرك ايديها بتوتر واول ما خرجت قربت مني وهي بترفع ايديها في وشي
-بصي بقي يا رحيم انا زي ما قولتلك انا متجوزاك عشان مازن يعني لا تطلب مني احبك ولا تاخد فرصه ولا كل الكلام الفاكس ده ولا ...
قاطعتها ببرود :
-انا جعان عندك ايه يتاكل ؟
جزت علي أسنانها وردت بغيظ :
-علي فكره انا بتكلم معاك في موضوع مهم
ابتسمت ابتسامه مستفزه:
-مش بعرف اتكلم وانا جعان
-رحيم من فضلك متتعاملش معايا بالبرود ده
-وانا عملت ايه دلوقتي
-رحيم احنا لازم قبل ما نبدء حياتنا نحط شويه قواعد لأن وضعنا مختلف
اتنهدت تنهيده طويله وقعدت علي الكنبه وانا بشاورلها تقعد
-اتفضلي يانور قولي كل اللي انتي عايزاه
اخدت نفس عميق ومسحت علي وشها كرد فعل تلقائي لطيف منها خطف قلبي !!
قعدت علي الكرسي اللي قدامي وبدأت تتكلم في محاوله منها أن الكلام يكون متناسق ومُرتب وكأنها طفله لسه بتتعلم ازاي تقول جمله علي بعض
-بص يارحيم ب بص يعني عشان ع عشان احنا وضعنا مختلف وكده يعني فأنا ا انا ..
-رتبي كلامك واتكلمي براحه يانور متخافيش مني
عيونها لمعت بالدموع وحطت وشها في الأرض بأحراج وهي بتهمس بقهر
-هتصدقني لو قولتلك اني عمري ما اتكلمت مع حد ولا بعرف اقول كلام مترتب زي الناس
صعبت عليا وحسيت اني عايز أخدها في حضني بس مقدرتش لاني عارف ومتأكد انها هتخاف مني وهتتوتر اكتر
-طيب خدي نفس واتكلمي ،قولي كل اللي في بالك وانا هفهمك
ابتسمت ابتسامه حزينه :
-كان نفسي يكون شريف زيك يا رحيم ،كان نفسي يعاملني بهدوء وحنيه ،كان نفسي يفهمني
نبره صوتها اتخنقت بالدموع :
-كان نفسي يحبني
قومت قعدت علي رُكبتي قدامها وانا بمسك ايديها بحنان :
-انا بحبك وهفهمك
وشها بقي احمر من كتر الاحراج والتوتر وسحبت ايديها وهي بتمسح دموعها
-ب بص يارحيم ا انا انا بص بصراحه يعني انا مش مصدقاك في حوار ياسمين ده و وعندي احساس انك بتقول كلام من ورا قلبك ،لو سمحت يا رحيم ارجوك قولي الحقيقه ،متعشمنيش وتفضل توهمني بمشاعر كذابه لاني مش حمل كده ،انا ا انا عمري ما حبيت يا رحيم ولا عمر حد قالي كلمه حلوه ولا حسسني اني بنت زي اي بنت بتحب وتتحب وتعيش حياه رومانسيه وقصه حب مع شخص بتحبه ،طبيعي اي كلمه منك هتأثر فيا
من فضلك يا رحيم متعشمنيش بحُب مش حقيقي ..
قومت وقفت وسحبتها من ايديها لحضني وانا ببوس رأسها برقه :
-انتي جميله اوي يانور فعلا شريف كان معاه جوهره مقدرش يقدرها ولا يحافظ عليها بس انا هقدرك وهحافظ عليكي ،هخليكي تحبي نفسك وتثقي فيها اكتر من كده ،هخليكي تعيشي قصه الحب اللي كنتي بتتمنيها
صدقيني يانور ياسمين مبقتش في بالي خلاص ،مقدرش افكر فى واحده متجوزه دلوقتي
رفعت راسها اللي مليانه دموع وهي بتسألني بصدمه :
-اتجوزت؟!
هزيت راسي بحزن :
-امبارح كان فرحها
-معقوله ازاي دي كانت بتحبك و....
قاطعتها وانا ببص قدامي بقهر:
-قصدك كانت بتحب فلوسي واول ما جالها الاغني مني قررت تعمل عليا تمثيليه بايخه زيها عشان نسيب بعض
بعدت عنها وانا بلف ظهري وعيوني بتلمع بالدموع :
-ياسمين دي أحقر بني ادمه انا شوفتها في حياتي
حطت ايديها علي كتفي وهي بتلفني عشان ابصلها:
-يعني كنت بتحبها اهو
حطيت وشي في الأرض وانا بفرك ايدي بتوتر من غير ما انطق حرف
اتنهدت وهي بتهز رأسها بيأس :
-مش هتقدر تهرب من قلبك يارحيم مفيش بني آدم معندوش مشاعر
-نور
-نعم
-انا محتاجلك ارجوكي متسبنيش
عيطت واترمت في حضني وهي بتقولي بهمس :
-مش هسيبك لاني محتاجه وجودك اكتر مانت محتاجلي!
بعدتها عني وحاوطت وشها وانا بمسح دموعها برقه :
-يلا ادخلي ارتاحي في اوضتك انتي تعبتي النهارده
سألت بهدوء :
-وانت مش هتنام؟؟
ابتسمت بهدوء :
-هنام مع مازن في أوضته
هزت راسها بابتسامه رقيقه :
-تصبح علي خير
بوست ايديها برقه :
-وانتي من أهل الخير ياقمري
ــــــــــــــــــــــــــــــــــــــــــــــــــــــــــــــــــــــــــــــــــــــــ
آدي نوڤمبر
إحساس بالدفا بيعاشر أيامه الباردة
وعنيكي اللحن اللي بليغ حمدي خباه م الناس واداه لـ وردة
صحيت تاني يوم الصبح علي صوت الهواء اللي بيخبط في الشباك بتاع اوضتي في ليله من ليالي الشتا البارده
فركت عيني وبصيت جنبي ملقتش مازن سحبت الفون بتاعي من علي الكمود عشان اعرف الساعه كانت الساعه تلاته العصر
-يااااه اول مره انام كل ده
قومت وخرجت من الأوضه لقيت مازن قاعد علي الكنبه بيتفرج علي كرتون بكل اندماج لدرجه انه مأخدش باله اني موجوده من الأساس
ابتسمت ابتسامه لطيفه وانا بقرب منه :
-صباح الخير ياحبيبي
انتبه علي صوتي وفجأه لقيته بيجري نحيتي وبيحضني :
-صباح النور يابابا
شيلته وبوسته من خده بحب :
-صاحي من بدري ؟
-اه بس ماما قالتلي متعملش دوشه عشان بابا نايم
ابتسمت بهدوء وانا بسأله بهمس :
-هي فين ماما
رد بهمس زي:
-في المطبخ بتحضر الغداء
بوست خده وانا بقعده علي الكنبه:
-طيب كمل فُرجه علي الكرتون وانا راجعلك تاني
-حاضر يابابا
بوست أيده :
-شاطر ياقلب بابا
اتسحبت بهدوء وروحت نحيه المطبخ لقيتها واقفه بظهرها بتحضر الأكل بكل خفه
-احم صباح الخير
اول ما سمعت صوتي لفت بتوتر :
-ص صباح النور
ابتسمت بخفه :
-مصحتنيش ليه
فركت ايديها بتوتر وهي بتحط وشها في الأرض :
-ي يعني قولت اسيبك ترتاح ..احم احضرلك الفطار ؟
-مش انتي بتعملي الغدا
-اه
-خلاص هستناكي
-طب تحب اعملك حاجه دافيه تشربها
-امممم ماشي اعمليلي قهوه
ردت بحزم:
-قهوه علي الريق لا
رديت بابتسامه :
-خلاص اعمليلي نسكافيه
ردت بتذمر:
-نسكافيه علي الريق برضو لا
ضحكت علي رد فعلها وانا برفع اكتافي بحيره :
-خلاص اعمليلي اي حاجه علي ذوقك
ابتسمت وردت بتلقائية:
-خلاص هعملك ينسون
-ينسون!!!
-ايه مش بتحبه
-لا بس....
قاطعتني بضيق :
-يبقي اعملك لمون سخن
حكيت راسي وانا ببصلها :
-هو حد قالك اني عندي برد ولا ايه ؟
بصتلي بقرف :
-انت بتتريق عليا ؟
-محصلش
ردت بضيق :
-خلاص اطلع
قربت منها وانا يسألها بقلق :
-انتي زعلتي ولا ايه انا بهزر و....
قاطعتني وهي بتحط الينسون علي البوتجاز:
-لا انا بعملك ينسون عشان انت كنت عمال تكح امبارح كتير
ابتسمت وانا ببصلها بمشاعر مختلفه تماماً عن زمان وبدون مقدمات مسكت ايديها وبوستها برقه
-ربنا يخليكي ليا يانوري
ابتسمت بخجل ولفت وشها النحيه التانيه من غير ما تنطق حرف
خرجت من المطبخ قعدت مع مازن وشويه وخرجت وحطت الينسون قدامي وطلعت تجري علي المطبخ بتوتر
ـــــــــــــــــــــــــــــــــــــــــــــــــــــــــــــــــــــــــــــــــــــــ
بعد مرور أسبوع
-رحيم هو انا ممكن أسألك سؤال ؟
حطيت الفنجان على الطربيزه وانا بهز راسي بهدوء:
-اتفضلي
-هو انت بتعمل معايا كده ليه
رديت باستغراب :
-مش فاهم قصدك ايه ؟
-يعني انت ليه بتعاملني بالرقه والهدوء والحنان ده ؟
شفقه يعني عشان قولتلك اني عمري ما عيشت يوم حلو في حياتي ولا عشان تحسس نفسك انك قادر تنسي ياسمين !
سكتت لحظه وبعدها بصيتلها ورديت بصدق:
-هتصدقيني لو قولتلك ان معاملتي ليكي كانت شفقه في البدايه اتحولت لمشاعر حقيقه خارجه من قلبي وافعال بعملها عشان اشوف ولو ضحكه بسيطه منك
عيونها لمعت بالدموع وسكتت لحظه وبعدها ردت بصوت مهزوز :
-انت بتتكلم بجد يارحيم
قومت قعدت جنبها وانا بحاوط وشها برقه وبمسح دموعها :
-تعرفي يانور لو كنت قابلتك زمان كنت حبيتك من اول نظره ،انتي فعلا جميله ،رقيقه ،مفيش احن من قلبك ،انا ربنا بيحبني عشان بقيتي معايا فعلا
-رحيم ا انا انا...
-انتي ايه ؟
-هو انا لو قولتلك اني بحبك هتكرهني؟
سكت لحظه وملامح الصدمه اترسمت علي وشي
قلبي دق بشكل مُريب
عيوني لمعت بفرحه
اترعشت من جمال الكلمه وخاصه منها من نور اللي عمري في يوم ما كنت اتخيل يجمعنا ولو حتي حديث داير !
حطت وشها في الأرض وبلعت ريقها وبعدها اتنهدت وبدأت تتكلم بجراءه لاول مره
-لما كنت بتيجي عندنا زياره انت وياسمين وأشوف تصرفاتك معاها وقد ايه كنت حنين وراقي ورقيق في كل تصرف كنت بتخطف غصب عني ،ك كنت بحب حنيتك اوي وبتمني لو ابقي مكان ياسمين ولو لحظه واحده ، اتمني حد يحبني ،يخاف عليا ،يعاملني كأني حاجه غاليه
عيونها لمعت بالدموع وهي بتبصلي ببراءه :
-والله العظيم عمري ما كرهتلك الخير كنت دائما اقول ربنا يسعدهم ويعوضني خير ،هو هو بس اللي حصل والله كان غصب عني حبيتك من غير ما اقصد والله
قومت قعدت علي رُكبتي قدامها وانا بمسك ايديها وبضغط عليها وببتسم بهدوء :
-هشششش انا مصدقك من غير ما تحلفي
وبعدها غمزتلها بمرح :
-وبعدين هو انا اطول أن القمر ده يحبني ياعم
ابتسمت برقه وهي بتمسح دموعها وبتبص في الأرض :
-ش شكراً
-هو انا ممكن اطلب منك طلب؟
رفعت راسها تبص في عيوني :
-اتفضل
-ممكن تعمليلي ينسون ؟
ملامحها اتغيرت للأمتعاض وبصتلي من فوق لتحت
-بقي بذمتك في حد يفصل حد كده في لحظه رومانسيه زي دي
-الاه!
-تصدق هتصدق أن شاء الله انا داخله انام
قالت جملتها وقامت من مكانها قومت جريت وراها
-حج كامل حج كامل استني ياحج كامل
وقفت وربعت ايديها بضيق :
-نعم !
-تيجي نتجوز بالسر
رفعت حاجبها وردت ببرود:
-ليه
-اهلي واهلك ما يدرون
-ما يدرون اي العيله كلها عرفت اننا متجوزين
-طب تيجي ناخد بيت بعيد
قفلت عينيها نص قفله وردت بشك:
-عايز تخطفني يعني
-عايزه الحق ولا الحق
ضحكت بصوت عالي لدرجه الغمازات اللي علي خدها ظهرت وخطفت قلبي زي صاحبتها!
-حد ينادي حد يلحقني
ردت بقلق :
-مالك في ايه
رديت بهيام:
-في واحده اسمها نور خاطفه قلبي هنا
-والله؟!
-والله
-طب بقولك ايه خد بعضك وادخل نام
-حد يقفل حد كده يانوري
-انا يارحيم عندك مانع
-نور انتي نكديه ليه؟
-بصراحه بصراحه
-بصراحه بصراحه
-عايزه اتخانق معاك زي الناس اللي هناك دي
رديت ببلاهه:
-ناس مين لا مؤاخذه؟
-يعني عايز اتخانق معاك زي البنات وانكد عليك وكده
-اااه عايزه تجربي اوبشن النكد يعني
هزت راسها بتأكيد:
-ايون
-تمام اتفضلي معاكي الميكرفون
ابتسمت وبعدها عدلت هدومها وفضلت تلف حوليا زي المُخبر
-امبارح
بلعت ريقي بتوتر :
-ماله ياحبيبتي كان يوم لطيف حار جاف معتدل ممطر
-دي دراسات ام محمد دي ولا ايه ؟
-يعني عديها
-تمام امبارح الأستاذ رجع البيت جايب معاه كيسه حلويات قددد كده لمازن مظبوط؟
-احم مظبوط يافندم فين السؤال ؟
-السؤال بقي فين حلويات ممس؟
حكيت راسي بأحراج وانا ببصلها وبقولها بأسف:
-سوري مجاش في بالي
-تمام
-لا تمام ايه خدي هنا بس هقولك
-لو سمحت مش قادره اتكلم دلوقتي
-طب معلش يانوري هجبلك بكره والله
-لا لو سمحت خلاص الحاجه اما بتيجي بعد ما تتطلب بتبقي بايخه
-لا ياحبيبتي عادي الاهتمام بيتطلب والله
-اصلا!
-بيتشحت كمان بس عمرنا ما نروح نقول
-اوكي بما أنه بيتشحت ف يلا ياحبيبي كده زي الشاطر انزل هاتلي حاجه حلوه
مسكت ايديها وبوستها برقه :
-حاضر عيوني ليكي يانوري
-رحيم
-نعم
-هو أنا ممكن احضنك
فتحتلها دراعاتي وانا برد بابتسامه :
-حضني مفتوحلك في أي وقت
اترمت في حضني وسندت رأسها علي صدري وهي بتتنهد براحه وبتقول كلام في سرها مقدرتش اسمعه لكنه من الواضح كان رساله شكر وامتنان لربنا أنه بعد كل التعب اللي شافته في حياتها عوضها بحُبي
انا اصلا قمر ها اي تاني
الله يحفظني بجد
ــــــــــــــــــــــــــــــــــــــــــــــــــــــــــــــــــــــــــــــــــــــ
اليوم التاني وانا راجع من الشغل كان في محل بتاع ورد دخلت عملت لنور احلي بوكيه وحطيتلها فيه شوكلت كتير جدا ورشيت برفيوم من بتاعي عليه وكتبت جواب بخط ايدي
شويه تلميحات بقصايد عمرو حسن لاني عارف انها بتحبه
وعليكى قبول ربى يديمه
بتخشى قلوب الناس فى سكوت
شايله كاريزما نص العالم
وعارفه تخلى الواحد مبسوط
كانت مجرد جُمل لكنها كانت كفيله توصفها بالملي
كنت مستغرب حالي !
ازاي حبيتها بالسرعه دي بعد ما كنت بحب ياسمين
معقوله في ظرف اسبوعين مشاعري تتبدل ميه وتمنين درجه وقلبي يجري نحيه نور بكل استسلام وكأن مفيش بنات غيرها في الكون
كل ذره فيا تحبها ،عيوني تبقي ملهوفه تشوف طيفها ،ودني ملهوفه تسمع اسمي علي لسانها ،ايدي ملهوفه تمسك ايديها وتطمنها
ولا قلبي !
قلبي ملهوف كل لحظه يعبرلها عن مشاعره وقد ايه بيكون مبسوط في قربها
انا مش شخص سطحي أو بياع زي ما الكل فاكر
انا بس شخص بيفكر بعقله قبل قلبه
ولما فكرت شويه بعقلي وركنت قلبي علي جنب عرفت أن ياسمين ما هي إلا شخصيه مؤذيه طماعه بتعشق الفلوس عشان كده مع اول فرصه باعتني
وصلت البيت وخبطت فتحلي مازن كالعاده زي كل يوم وجري نحيتي
شيلته وبوسته :
-حبيبي عامل ايه
-الحمد لله يابابا وحشتني
-وانت كمان ياقلب بابا
-ايه ده يابابا
قالهالي وهو بيشاور علي بوكيه الورد اللي كان فى ايدي
ميلت عليه وانا بهمس بصوت واطي :
-ده ورد جبته لماما حلو ؟
هز رأسه بفرحه:
-حلو أوي ماما هتفرح بيه
بصيت حوليا وانا بسأله باستغراب :
-هي فين ماما طيب ؟
-في الأوضه
غمزلته :
-انا هدخلها
-هاجي معاك
-يلا بينا
روحنا خبطنا الباب ثواني وفتحت وطلت علينا بشكل مختلف تماماً لكنه خطف قلبي وعقلي أن مكانش خطفني أنا شخصياً !!!
كانت لابسه فستان احمر طويل وفارده شعرها علي كتفها وحاطه ميك اب رقيق وهادي زي رقتها
قربت منها وانا بهمس :
-بسم الله ماشاء الله زي القمر
فركت ايديها بتوتر وهي بتبلع ريقها :
-ح حمد لله علي السلامه احضرلك الغداء
طلعت البوكيه من ورا ظهري وانا بقدمهولها :
-اتفضلي ياقمري
عيونها لمعت بفرحه ولهفه :
-الله حلو اوي اوي يارحيم ده عشاني
-هو في قمر غيرك هنا
من فرحتها هجمت علي رقبتي واتعلقت فيها وهي بتقولي بفرحه ودموع :
-ربنا يخليك ليا ياحبيبي
حضنتها ودفنت راسي في شعرها :
-ويخليكي ليا انتي ومازن
بعدت عني بأحراج وبصينا لمازن اللي كان واقف مبتسم ببلاهه
-مالك ياحبيبي
-انا مبسوط اوي عشان انت خليت ماما تضحك يابابا انا بحبك اوي
نزلت علي رُكبتي قدامه وشديته لحضني وعيوني بتلمع بالدموع
-وانا كمان بحبك ياحبيبي
نور بفرحه:
-بالمناسبه السعيده دي انا عندي ليكم خبر حلو اوي
-ايه هو
-انا عملت كيكه بالكريم كراميل انما اورجانيييك
انا ومازن في صوت واحد وانا بقوم من علي الارض :
-اوعي تكون محروقه زي كل مره
ردت بثقه :
-توء عيب عليكم دي اتحرقت اكتر من كل مره
همست لمازن:
-لا ست بيت ممتازه
-بتقول حاجه يارحيم
-بقول انا عازمكم علي العشا برا ياقلب رحيم روحي البسي وانا هلبس مازن
حضنتني بحماس :
- انا بحبك اوي اوي
-وانا بحبك اوي اوي اوي يانور عيني
مرحباً أيها العالم،لقد وجدت الرجل الذي كنت اتمناه طيلة سنوات حياتي،رجل الأحلام والأمان والحب
وجودَك هو إستجابه عُمر كامل من الدُعاء
تمت
