رواية عشق بغير حسبان الفصل التاسع 9 بقلم ندي الشريف
يوم فرحي كان ولا الخيال..
الساعه 1كانت الميكب آرتست جات وبدأت شغلها، بنات خالاتي وصحابي وقرايبنا كلهم جم البيت..
"_ألو..
:_ايه يا جميل...جهزت ولا لسا؟
إتفاجئت ببنات خالاتي كلهم لزقوا في الموبايل عشان يسمعوا...قولتله وانا بزقهم بإيدي:_
لسا بجهز اهو..
للأسف تميم قلب شاعر رومانسي اليوم دا...قالي بِحُب:_
ساعتين وهجيلك يا عمري....وهتروحي معايا!
البنت وقفت ميكب عشان البنات اللي اتملوا...قولتله وانا بشيل الموبايل من جنب ودني:_
طب يا تميم هكلمك بعدين...سلام.
قفلت الخط وكلهم جريوا...بصتلهم بغيظ وهديت بعدها عشان البنت تخلص.
ولأن بنت خالتي فوفوغرافر كانت واخده اليوم كله تصوير...
____________سالم__________
بيتنا كان مليان بنات علىٰ الأخر، قرايبنا وصحاب أختي، أصل النهارده فرح أختي!!
هتتجوز من صاحب الشركه اللي بتشتغل فيها، وسبب إزدحام بيتنا بالبنات هو إن أختي هتجهز في البيت، عريسها جابلها الميكب أرتست للبيت بس انا بقول عليها كوافيره!!
مكنتش عارف أخد راحتي في البيت، وفضلت محبوس في الأوضه، أول ما اذن العصر لبست بدلتي وجهزت وخرجت من الأوضه.
معرفتش أمشي في الطرقه من بنات خالاتي، قولتلهم وانا خارج من وسطهم:_
بطلوا الدهانات اللي في وشكم دي.
ضحكوا عليا ميعرفوش اني بكلم جد!! خبطت ودخلت لأختي لاقيتها جاهزه بس الكوافيره كانت بتشدها من شعرها عشان تتأكد ان التاج من هيقع.
دخلت بوست ايديها وقولتلها:_
بقا الجمال دا هيسيبنا ويمشي؟!
قالتلي بإبتسامه:_
شكلي حلو يا سالم؟!
"_ملكه جمال يا ناس.
سمعت الكوافيره بتقولي:_ بطل معاكسه كدا مش هتسيب للعريس حاجه.
واحنا واقفين فريدة أختي دخلت علينا وقالتلنا بحماس:_
عمو العريس وصل!!
خرجت من الأوضه عشان أقابل تميم بس اتخنقت من ريحه البرفيوم اللي البنات حاطينها، بصيت علىٰ فريدة لاقيتها بتحط روچ!!
زعقت فيهم وانا بجري من الشقه من الريحه:_
الله يخرب بيت المكياج وسنينه.
خرجت برا لاقيت تميم واقف بالبدله السودا وماسك بوكيه ورد، أول ما شافني فتح دراعه وقالي:_
أبو نسب.
حضنته وخبط علىٰ ضهره وانا بقوله:_
مبروك يا عريس.
سبته يدخل ل تماره وخرجت أشوف الزفه بتاعه أختي، كانت زفه ماڤيا..
تميم جاب لعيلتنا ومعارفنا عربيات ملاكي، كانت واقفه في صف ورا بعضها في نص الشارع، كل عربيه متزينه كأنها عربية العروسه، وفي بداية الصف عربيه بيضه ومتزينه بشكل مختلف عنهم ودي عربية تميم وتماره.
علىٰ الجنب اليمين والشمال للعربيات في عربيات حراسه محاوطه العربيات اللي هنركبها من كل حته.
دخلت أشوف لحظه اللقاء...دخلت لاقيت تميم بيبوس إيديها وقالها حاجه في ودنها ضحكتها.
قولتلهم بصوت عالي:_
اييييه يا جدعان راعو ان في ناس سنجل هنا!
تميم قالي وهو بيحط ايد تماره في دراعه:_
عقبالك يا عم.
خرجوا وسط الزغاريط لحد العربيه، تميم خصص ليا انا وامي واختي الصغيره عربيه لوحدنا.
تميم كان سايق العربيه وتماره جنبه، أول ما اتحركوا اتفاجئنا بعربيات الحراسه بتضرب العاب نارية في السما!
ودخان بيخرج من عربيتهم، وطول الطريق نار في الجو!!
_____________________تماره_____________
قالولي ان تميم واقف برا، اتوترت جدًا وفضلت اقول حاجه واحده:_
شكلي وحش يا بنات؟!
وكان ردهم اني جميله وهكون أجمل واحده بس انا بحب أوتر نفسي..
خرجت لتميم لاقيته لابس بدلته السودا وواقف مبتسم...كان حته من القمر.
أول ما شافني لمحته بيدمع بس مسح عينه بسرعه، أول ما قربت منه باس راسي وقالي:_
ايه الحلاوه دي.
قولتله بمشاكسه:_ شوفتك وانت بتعيط علىٰ فكره!!
سالم اخويا دخل وهو بيبوس إيدي وقرب من ودني ومش هينفع أقولكم قالي ايه؟!!
____________________بسنت____________
كنت اول الناس الموجوده في القاعه! أول ما سمعت إنهم وصلوا خرجت برا أشوفهم، كانت جايا بموكب مش زفه عاديه، الصحافيين والمصورين كانوا ماليين المكان!
المعازيم نزلوا ودخلوا القاعه اللي كانت شبه ساحه القصر، مساحتها كانت ضخمه بشكل ميخترش علىٰ بال!
دا غير مدخل القاعه اللي ينفع يبقى قاعه تانيه من وسعه!
وقفنا كلنا مستعدين لدخولهم، الإضاءه قلت بالتدريج، واتركز ضوء علىٰ مدخل القاعه، الفرقه الموسيقيه بدأت تعزف لحن ملكي..
وفجأه الأبواب اتفتحت علىٰ أخرها، وهلت صاحبتي بفستانها الملكي، كانوا شبه الأمير والأميره!
ممسكتش نفسي وعيطت من جمالهم، سمعت حد بيقولي:_
بتعيطي ليه.
لفيت لاقيته سالم أخوها، قولتله وانا بمسح دموعي:_
تماره بتتجوز.
خبط بكف ايده وقالي:_
لاحول ولا قوة الابالله يبنتي انتي في فرح!!
سكت شوية وقالي:_
صاحبتك بتتجوز مش ناوية انتي كمان؟
قولتله بغباء:_
اعمل ايه؟
:_هقولك بعد الفرح...كملي عياط.
تماره وقفت مع مستر تميم وبدأو يرقصوا سوا، الدخان إنفجر في أرض القاعه، وكأنهم بيرقصوا فوق السحاب، النار طلعت من الأرض وهو بيشليها ويلف بيها...ورد اترمىٰ علينا من السقف.
جابو كل المغنيين الكُبار اللي ممكن تتخيلهم، فرحها كان حلم كل بنت..
بس مكملش علىٰ خير، بعد الفرح الأسطوري دا كل المعازيم روحوا، ما عدا انا وأسرة تماره، روحنا معاها لبيتها الجديد.
___________________تماره____________
بعد ما خلصنا فرحنا، ركبت جنب تميم اللي كان عاشق ولهان الليله دي، فتحت موبايلي اللي خدته من ماما وقررت أتصور سيلفي معاه.
قولتله وانا بستعد عشان القط الصوره:_
اضحك يا تميم.
قبل ما القط الصوره، لاقيت مسدچ جات علىٰ الخط مكتوب فيها
"مبروك يا عروسه...اعذريني هاخدك من عريسك"
مفهمتش معناها بس قلقت ومردتش أقول ل تميم عشان الليله تعدي علىٰ خير.
وقفنا قدام الڤله، قولت ل تميم:_
بقولك ايه إستنىٰ شوية واطلع!
قالي بأستغراب:_ ليه؟
:_عشان بسنت هتطلع تساعدني أشيل الميكب والفستان.
غمزلي وقالي بإبتسامه:_
علىٰ فكره انا بعرف أشيل الميكب والفستان حلو أوي.
قولتله وانا بفتح باب العربيه:_
لا يا بابا انت هتفضل هنا لحد ما بسنت تنزل...ماا
قطعت كلامي لما لاقيت حد كتم بقي بإيده وسحبني لورا...شوفت تميم وهو بيتخبط علىٰ دماغه من ورا وأغمىٰ عليه، حاولت أفك نفسي أو أتنفس حتىٰ...
شوفت رجاله الأمن اللي كانوا معانا واقعين علىٰ الأرض...ملحقتش أشوف أهلي وخدت خبطه علىٰ دماغي فقدت الوعي..
