رواية احببته في معسكر الرجال الفصل الخامس 5 بقلم مريم سمير
البارت الخامس
*عبدالله قالنا انك راجعة النهارده ، ف ابوكي وعمك اتفقوا تبقي خطوبتكم بالمرة
_ ايييي! خطوبة مين؟
منة صحبتي باستني ° مبروك يحبيبتي
_ مبروك اييي بطلي عبط ، انا مش عاوزة اتخطبله يماما!
ماما دخلت المطبخ ودخلت انا ومنة الاوضه
_ فيه كارثة بتحصل برا ، انا مستحيل اتجوز عبدالله
° لييي؟ دا حتي غني وعنده عربيه وفلوس يعني اي بنت تتمناه
_ اي بنت غيري ، انا مبحبوش
° مش احتمال الحب يجي في الخطوبة؟
_ مستحيل ، عبدالله عمره ما كان شبهي
° طب كنتي فين بقي الفضول هيموتني ؟
_ كنت ، احممم بصي هو انا كنت..
° مريم انتي عاملة مصيبه مش كده؟
_ مش اوييي ، كنت في معسكر الرجالة الي عاملينه هنا
° اييييي!!
حطيت ايدي علي بوقها _ تعرفي تهدي؟ هتفضحينا اهدييي
° انتي عملتي كده ازاي؟
_ مش عارفه ، لقتني عاوزة اعمل كده ، لما عبدالله جه هنا لبابا عشان يقنع عمي يلغي تطوعه من المعسكر ، قعدت معاه وعرفت مكانه وهيبقي كام يوم ، كان معاه اسمه انه اتقبل ، خدت منه الاوراق وقولتله اني هلغي التطوع انا ، عشان ليا واحدة صحبتي ابوها بيشتغل في الحكومة ، عمي صرف نظر عن الموضوع بس عبدالله كان عاوز يتأكد اني لغيت التطوع ، قولتلهم هنا اني راحة سفرية تبع الشغل ، وروحت علي اساس اني هو
° انتي اكيد فيه حاجه في دماغك! وعملتي اي هناك ؟
_ عشر ايام فرهدة وطلعان عين ، بس والله احلي عشر ايام في حياتي كلها ، وبجد كانت تجربة جامدة
° محدش شك فيكي؟
مسكت مخدتي وحضنتها _ لاء ، كان معايا راجل في الاوضه
° ينهار اهلك مش فايت ، وبعدين؟
_ متخافيش ، انا المفروض راجل زيي زيه ، بس تعرفي؟ مختلف اوييي عن اي راجل ممكن اشوفه
° حلو؟
_ اوييي ، كاريزما ماشيه علي الارض يبنتي والله ، طيب وحنين ودمه خفيف ، هو الي كان مهون عليا الفترة الي قعدتها هناك ، بنعمل تدريبات وساعدني كتير اويي وبقينا صحاب
° مريم! انتي بتحبيه؟
سكت شويه وانا شيفاها بصالي ب استغراب ، انا ذات نفسي مستغرباني اني بتكلم عن حد كده! مش عارفه مش يمكن فعلا بحبه! عشان طول مهو موجود عمر قلبي مخاف!
_ مش عارفه مالي والله، بس صدفة شقلبت حالي كله!
° انتي كده معتيش هتشوفيه؟
_ لسه فيه اسبوع تدريب بعد بكرة
° انتي كده بتهزري! مستحيل اهلك يرضوا يخليكي تسافري تاني
_ هلاقي تصريفة ، المهم دلوقتي حوار خطوبتي دا!
° هتعملي أييي؟
_ لما بابا يجي هقوله مش موافقة
° تفتكري هيقولك ماشي ؟
_ مش عارفة ، ربنا يستر
بابا جه روحت سلمت عليه وحضنته
*البيت كان هادي من غيرك يعفريتة
_ بس اكيد مكنش ليه ايي طعم! انكر كده؟
ضحك *لاء مش هنكر عشان انتي دايما الي عامله حس للمكان
_حبيبي يحجيجة والله ، بابا انا مش عاوزة اتخطب لعبدالله
ملامح وشه اتغيرت *دا الي هو ازاي يعني؟ بعد الاتفاق؟ بعد ما جهزنا كل حاجه ؟
_ مكنش فيه اتفاق معايا ، مجتوش قولتولي رأيك ايي؟ ، التجهيزات دي انا معرفش عنها حاجه
*بس انتي وابن عمك محجوزين لبعض من وانتوا صغيرين
_ اسمعني يبابا ، مش انت دايما بتقولي انك ملكش غيري؟ ان سعادتي اهم حاجه عنك؟ ، وانك مستني يوم فرحي وتشوفي فرحانة مع جوزي ، انا اه عروسه بس مش فرحانة يبابا! انا مبحبوش
*الحب بيجي بالعشرة والتعود ، انتي بتقولي كده عشان لسه متعرفهوش كويس
_ عرفاه يبابا ، عمري مهحس ب الامان معاه
*بلاش كلام افلام! ، قومي اجهزي زمانهم جايين ، بكرة تعرفي اني عاوز مصلحتك
قومت دخلت اوضتي وانا بعيط ، مسبقش بابا كلمني بجمود كده!
° بطلي عياط ارحمي عينك شوية
_ تبقي اكبر غلطه في حياتي لو اتجوزته!
° طب اهدي وكل حاجه ليها حل ، بصي طفشيه
_ يعني اييي؟
° يعني خليه هو الي يقول مش عاوزك ، ف تيجي منه هو ، وانتي ما شاء الله سهل اوي تعرفي تعملي كده
مسحت عياطي _ يبنت اللعيبة! ، هعمل ايي حاجه بجد عشان انقذ نفسي من الورطة دييي
غمزت ° وتتجوزي سي روميو بتاعك
_علي فكرة لازم البس!
طلعت برا وهي بتضحك ، لبست فستان سيمبل وحطيت ميكب خفيف ، بعد شويه جم ، بابا جه خدني من الاوضه وطلعت قعدت جمبه ، لبسني خاتم سوليتير ، دا المال لا يصنع السعادة بجد يا اخي! بس هاخد الخاتم دا ابيعه واهرب .
خلصت الخطوبة ومشيوا ، كان قلبي مقبوض ان معرفش اطفشه وابقي لبست! ، نمت بعدها من كتر التفكير ، صحيت علي صوت ماما وهي بتصحيني
*صباح الخير
قومت وانا بفرك عيني علي امل إن كل دا يطلع حلم وانا لسه في المعسكر ، واحمد بيرجني عشان اصحي! ضحكت لما افتكرت وقومت غسلت وشي وصليت
*يلا ساعديني في المطبخ ، عبدالله معزوم علي الغدا
_ انا مش بعرف اطبخ يماما
*دا من امتي دا؟ دا انتي احسن طباخة في المنطقة ، دا انتي اكلك احلي من أكلي يبت!
_ مبعرفش من دلوقتي
دخلت اوضتي فضلت قاعدة فيها ، حد يرجعني المعسكر تاني ومش هشتكي ان روحي بتطلع من التدريبات دا اهون عليا من الي بيحصل دا بجد
لبست وطلعت كان هو جه ، اتغدينا وطلعت قعدت في البلكونة
° سرحانه في ايي؟
_ ولا حاجه
° السفرية كانت حلوة؟
_ اه حلوة اوييي
° طب كويس ، شكلك بتحبي شغلك اوييي
_ اه الشغل؟ حاجه متعرفش حاجة عنها طبعا ، لو اشتغلت هتعرف قد اييي الشغل حلو
° اشتغل؟ شيت
_ ايدا في اي ، مالك يحبيبي؟
° اشتغل اييي واتعب نفسي لييي!
_ صحيح ، مهو عمي شقيان في الشغل وانت لاقي فلوس علي الجاهز ف تتعب نفسك ليي فعلا
° طب يلا عشان هنخرج
_ مش عاوزة ، جسمي كله واجعني هدخل انام
° يطنط ، طنط
_ ششش خلاص! ماشي هنخرج وطي صوتك بقي!
نزلنا وركبنا عربيته ، عربية اخر موديل لابس لبس شيك ، نضارة غاليه ، ساعة ب الشئ الفلاني ، كل حاجه كانت مترتبة ، الا قلبي .
وصلنا مطعم كان شكله غالي اوييي! ، دخلنا طلبنا عصير
° ابقى فكري في حاجه قوليلي وانا اجبهالك كادو بمناسبة الخطوبة
_ كادو؟ ماشي ربنا يسهل
خلصنا وطلعنا برا المطعم
° تحبي نلف بالعربيه ؟
_ نتمشي شويه ، ولا مش واخد علي المشي؟
مشيت ف مشي جمبي ° مريم انا لي حاسك مش مبسوطة؟
_ سجدة شكر لله يحبيب اخوك انك خدت بالك
° طب ولييي؟
_ عشان مش انت الي كنت مستنياه يعبدالله
° والهانم كانت مستنيه واحد تاني ولا اي مش فاهم؟
_ ايي حد بس يكون بيشتغل ، احس انه بيتعب عشاني ، لما نجيب حاجه في بيتنا احس انه مشوارنا قرب ، وإن تعب كل الايام يهون طالما هو موجود ، وإن بيتنا دا شاهد علي كل حاجه صعبة مرينا بيها ، لكن شقه تجنن متشطبة ومفروشه بفلوس ابوك؟ عمري مستنيت كده
° واييي الي فيها مدام معانا فلوس
_ الي فيها انها مش فلوسك ، الي فيها إن عمي الي هيصرف علينا ، إن لو عمي ممعهوش فلوس بعد كده لأي سبب البيت هيتخرب ، عرفت فيها اييي؟
جم اتنين ووقفوا قدامنا
*علي فين يجميل؟
_ وانت مالك انت؟
عبدالله مسك ايدي ° يلا بينا بلاش مشاكل
_ مشاكل؟ انا بتعاكس قدامك يحبيبي ، النظر تمام؟
° مش كنتي عوزانا نمشي؟ ادينا مشينا يلا بينا
ربعت ايدي _ دا اخرك يعني؟
*سيبها وخد نصيبها
_ اتفضل! رد
واحد منهم مسك ايدييي ، بصتله لقيته متوتر ، غمضت عيني وانا متعصبة ، ضربتهم الاتنين ومشيت
° واو! انتي جامدة ، عملتيها ازاي دييي
_ اهو يبقي فينا حد بيعرف يعمل كده
° انا كنت هضربهم علي فكرة بس محبتش اعمل كده قدامك عشان متخافيش
_ انت لو حد ضايقني مش هتعرف تعمل حاجة ، انا لو اتجوزتك هفضل طول عمري خايفة!
ركبنا العربيه ووصلنا وطلعت فوق بسرعة ، عدي اليوم ونمت ، صحيت الصبح وانا بفكر اقولهم اييي عشان اغيب اسبوع من هنا! ، اتصلت ب منة
_ الف سلامه عليكي يحبيبتي
° ايدا هو انا تعبانة؟
_ هتبقي تعبانة وهقعد عندك اسبوع
° اه يعني هتلبسيني معاكي؟
_ الصاحب ليه اييي عند صاحبه؟
° ملوش حاجة
_ حبيبتي هو دا العشم ، لو حد اتصل بيكي من هنا ف انا قاعدة عنك بقي ها؟
° ديي اخر مرة يمريم فاهمه؟
_ حاضر والله ، هو اسبوع صد رد ومعتش تدريب اصلا
اتفقت معاها ، وبعد اقناع كبير في ماما وبابا وافقوا اني اروح اقعد معاها ، جهزت شنطتي وافتكرته!
(صنيه مكرونة بشاميل ، البشاميل فيها يكون كتير ، وعلي الوش حبه جبن)
ابتسمت وقومت اعملها ، ايوة دلوقتي بقيت بعرف اطبخ ، اييي حكمة ربنا!
عملتها وانا في كل خطوة كنت بفتكره مش مصدقة خلاص اني هشوفه كمان كام ساعة ، عملتها وخلصتها وحطيتها في حافظة ، سلمت علي بابا وماما ومشيت ، روحت ظبطت نفسي عند منه ، ركبت عربيه ووصلتني للمعسكر ، دخلت الاوضه لقيته ف ابتسمت ، كان حاطط راسه في الارض وايديه الاتنين علي راسه
_ في اييي يعم مالك؟
= انا خطبت بنت عمي
_ نعمممم؟
