رواية اترك قلبي الفصل الثاني 2 بقلم ندي صابر
اترك قلبي
البارت التاني
رد عليها ببرود: خلال كام يوم ورقه الطلاق هتكون عندك
قامت من جمبه وهيا بتمسح دموعها: انا هدخل ألم هدومى.
دخلت اوضتهم.... وإلا خلاص مبقتش اوضتهم بكرا واحده تانيه تيجي مكانها وهيا مكانها هيتمحى من البيت اللي كان بالنسبه ليها الأمان، اخدت شنطه هدومها وخرجت وهو لسه قاعد برا وباين على ملامحه الحزن: انا ماشيه..... سلام عليكم
خرجت من البيت..... ومن حياته وهو السبب، حط ايديه على وشه ولأول مره يعيط مكنش حابب يخسرها ولا يبعدها عنه في يوم....... بس غصب عنه كل ده.......
بعد دقايق دخلت البيت عند والدتها واترمت على اقرب كرسي، والدتها صحيت على صوت الباب واول ما شافتها خافت عليها وطلعت تجري تشوف مالها: مالك يانور، وايه اللي منزلك في الوقت المتأخر ده يابنتي
بصتلها وهيا بتقاوم دموعها ورفضت تقولها اي حاجه: مفيش ياماما... اتخانقت انا ويونس وحبيت اجي اقعد كام يوم عندك لحد مانتصالح
ضحكت سماح (الأم) بعفويه: دايما تتخانقي معاه كده يابنتي وياتري بقا ايه سبب خناقه المرادي
ضحكت بتصنع: واحده زميلته في الشغل عملاله لايك وكومنت على الفيسبوك ولما سالته قالى وايه المشكله، يرضيكى كده يعني ياسوسو
ضربتها بهزار: يابنتي حرام عليكي خفى على الواد شويه ليطفش منك
قالت في سرها: ماهو خلاص طفش ومعتش راجع
سماح لاحظت انها مش معاها وعيونها بتدمع: نور..... انتى يابت يانوررر
طلعت من افكارها وبصتلها: نعم ياماما.... كنتى بتقولى حاجه
سماح: لا شكلك زعلانه جامد المرادي قومى ادخلى اوضتك ارتاحى شويه وانا هتصل على يونس
اعترضت بسرعه: لا لا ياماما متتصليش عليه بالله عليكي
استغربت سماح من تصرفاتها: منا كل مره بكلمه يابنتي ايه اللي جد المرادي
نور اتوترت جدا: انا عاوزاه يجى يصالحنى لوحده
: هو مين ده اللي يجي يصالحك ياج*زمه
ضحكت على اخوها اللي كان واقف قدامهم: وانت مالك انت ياض
سماح: تعال يانادر شوف اختك مالها هيا وجوزها وانا هدخل احضر العشا.
قرب منها نادر وسماح دخلت المطبخ: هاااا بقا مالك ياابله
بعدت عيونها عنه لانه اكتر حد بيفهم هيا مالها منغير حتى ماتتكلم: مشكله صغيره بينى وبين يونس وهتتحل شبه كل مره عادى
بصلها جامد وهو عارف انها بتكدب: كدابه
ضحكت بيأس: ياابنى انا نفسي مره اعرف اضحك عليك
ضحك بكل صوته: انتى تضحكى على الناس كلها إلا أنا.... أنتى ناسيه انى تؤامك وبحس بيكى وإلا دى مش جايه معاكى سكه
اتكلمت بجديه وعيونها دمعت تاني: أنا ويونس هنتطلق
بصلها بصدمه ولسه جاي يتكلم اترمت تعيط في حضنه: اهدى اهدى وفهمينى ايه اللي حصل بس، انتو طول عمركم بتتخانقو بس عمرها ماوصلت للطلاق اكيد في حاجه كبيرة... احكيلى يانور في ايه
نور وهيا بتعيط: عاوز يطلقنى يانادر علشلن مش بخلف وعاوز يتجوز واحده غيري علشان تخلف وتسعده
استغرب من كلامها: يونس ميعملش كده يانور انتى اكيد غلطانه، اكيد عملتى حاجه ضايقته منك جامد لأنه مستحيل يفكر يتجوز غيرك
طلعت من حضنه واتعصبت جدا: يانادر بقولك معملتش اي حاجه والله، احنا كنا بناكل عادى فجأه لاقيته بيقولي احنا لازم نتطلق ولما سألته قالى احنا الاتنين مينفعش نكمل مع بعض علشان وجودنا مع بعض مؤذي لينا..... ولما قولتله عاوز تتجوز واحده تانيه غيري معترضش يانادر وصمم على الطلاق
قرب منها وفضل يطبطب عليها: طيب اهدى وانا هنتكلم معاه
اعترضت بعصبيه: لا مش عاوزاك تتكلم معاه لانه كده هيفهم انى لسه عاوزاه
نادر: ماانتى فعلاً لسه عاوزاه يانور
نور بدموع: بس هو مش عاوزنى يانادر، هو اتخلى عنى عادى إزاى بس هرمى نفسي عليه تانى بعد ماقالى في وشي اننا لازم نتطلق...... كل ده علشان مش عارفه اخلف واجبله العيل اللي نفسه فيه
نادر: نور اهدى انتى مش ذنبك ودى إراده ربنا انا مش عاوزك تتضعفي كده وحاضر هسيبه براحته ومش هتكلم معاه في حاجه لحد مااشوف اخره ايه.
قامت تدخل اوضتها لانها حاسه بدوخه وصداع جامد ومبقتش قادره تتكلم: انا هدخل انام شويه يانادر
قام يسندها ودخل معاها اوضتها وهو زعلان جدا عليها: ارتاحى يانور وبعدين نتكلم براحتنا.
ابتسمت على حنيته: وحشنى الكلام معاك اوى وقعدتنا في البلكونة لحد الفجر
ضحك: ماانتى اللي اتجوزتى بسرعه وانا ياعينى عليا قاعد مع نفسي وانتى عارفه ماما بتنام من العشا
ضحكت: لما جيت من شويه صحيت مرعوبه عليا، مكنتش حابه انزل في الوقت ده بس مقدرتش افضل في الشقه لحد الصبح ده حتى هو مقاليش خليكى لحد الصبح
نادر: متصلتيش عليا ليه اجيلك
نور: مكنتش حابه اخليك تنزل لانى عرفاك هتخلينى اتكلم قبل مانتحرك وبكدا هتاكد انك هترجع تعمل فيه حاجه
ملامحه بان عليها الحزن اكتر: بعد كل اللي حصل ده خايفه عليه لسه
ابتسمت بوجع: اكيد هخاف عليه يانادر، انا محبتش غيره وبقالنا ٦سنين متجوزين مشوفتش منه اي حاجه وحشه
نادر: طب ارتاحى بقا وكفايه كلام النهارده
مسحت دموعها: حاضر
قامت وطفى النور: تصبحي على خير ياحبيبتي
نور وهيا بتروح في النوم من التعب: وانت من اهل الخير
خرج من الاوضه وداخل اوضته لاقى والدته في وشه واقفه في الضلمه : ايه يماما خضتينى
سماح وهيا بتشده من ودانه: تعاليلى بقا قولى اختك مالها والاستاذ جوزها عامل فيها ايه مخلياها معيطه كده
نادر وهو بيضحك على تصرفات والدته اللي مش بتتغير: يماما سيبي ودانى كده هتكبر حرام عليكي
سماح: انطق الاول اختك مالها
نادر وهو بيحاول يفلت من ايديها: طب سيبي وانا هقولك والله
سابته سماح: ادينى سيبتك اهو، ياواد اتكلم بقا
نادر وهو ماسك ودانه: ودانى كبرت حرام عليكي مش كده....... وبنتك هتتطلق عادي
سماح بصراخ: يلهوووووووووووووووووووووي
الثالث من هنا
