رواية قصتنا تشبه بعض كاملة بقلم ايمان شلبي
كنت في البيوتي سنتر يوم فرحي وجاهزه ومستنيه العريس ، رنيت عليه بدل المره الف لكن مفيش رد وفجأه اتبعتلي ماسدج واول ما شوفتها الدنيا لفت بيا
"انا اسف مش هقدر اتجوزك "
قعدت علي اقرب كرسي بوهن وصدمه وانا ببص قدامي والدموع في عيني
اختي بقلق :
-ميار في ايه انتي كويسه ؟
-سابني ،سابني
-هو مين اللي سابك
فضلت اكرر الكلمه بهستريه ودموعي بتنزل علي خدي
-سابني سابني سابني سابني
اختي بقلق :
-ميار في أي ياميار هو مين اللي سابك انطقي
لطمت علي خدي بهستريه :
-سابني يوم فرحي يونس سابني يوم فرحي
اختي بصدمه وهي بتحط ايديها علي بوقها :
-انتي بتقولي ايه يونس مين اللي سابك يونس جاي في الطريق
هزيت راسي وانا بعيط بحرقه :
-يونس مش جاي يالمار يونس سابني يوم فرحي
قعدت علي ركبتها قدامي وهي بتمسك ايدي بشفقه :
-عرفتي منين
-بعتلي ماسدج قالي " انا اسف مش هقدر اتجوزك"
اخدتني في حضنها وفضلنا نعيط احنا الاتنين لحد ما بابا جه أخدنا وروحنا علي البيت
ــــــــــــــــــــــــــــــــــــــــــــــــــــــــــــــــــــــــــــــــــــــــ
بليل كنت قاعده في اوضتي وقافله عليا الباب وانا لسه بفستاني
كان حوليا كل حاجه حرفياً ،الصور ،الهدايا ،الذكريات ، تيشرت اخدته منه عشان كل ما يوحشني اشم ريحته
جوا عقلي كل تفصيله في ملامحه ،كل كلمه قالها في لحظه حب ،كل مره وقف جنبي في وقت كنت محتاجه وجوده ،كل مره استحمل فيها تقلباتي المزاجيه
مكنتش قادره افهم ليه عمل كده
ده كل كلامه وأفعاله تدل علي أنه حبني فوق ما انا حبيته !
ليه ممكن شخص بعد الحب ده كله يتخلي عن اللي بيحبه في لحظه وبدون اي مقدمات
اعتقد لو كان في تمهيد للموضوع مكنتش هبقي موجوعه بالشكل ده
الفون بتاعي رن برقمه وفتحت الفون وقبل اي كلام سألته بكل الوجع اللي في الدنيا
-ليه يايونس
-انا اسف
ضحكت بسخرية :
-لا ولا يهمك اللي اتكسر مش حاجه مهمه يعني ده قلبي
-انا عارف ان الموضوع مش سهل بس للاسف قلوبنا مش بأيدينا
-قلوبنا مش بأيدينا !!
-انا اسف يا ايمان انا انا اكتشفت اني مش بحبك ،ا اكتشفت اني مكنتش مبسوط معاكي ،محبتش لا اظلمك ولا اظلم نفسي ،انا بحب واحده تانيه ،معاها قدرت اكون مبسوط
رديت بصدمه وصوت مهزوز :
-ا اكتشفت انك مش بتحبني ،جاي تكتشف انك مش بتحبني يوم فرحنا ،ازاي مش بتحبني ،ازاي ط طب وكلامك ليا ،ط طب ومشاعرك اللي مخرجتش غير ليا زي ما قولتلي والورد اللي كنت بتجبهولي كل مقابله ،ط طب وضحكتك ض ضحكتك اللي كانت بتخرج من القلب ،والهدايا ،طب طب طب تركيزك في كل تفصيله في حياتي ،طب والصوره بتاعتي اللي مكنتش بتنام اللي وهي في حضنك ، كل ده كان كذب في كذب !!
طب ليه ،ا انا عملت فيك ايه طيب ،ا انا آذيتك في ايه يايونس ،ا انا انا والله انا حبيتك و والله حبيتك ، والله حاولت بكل ما املك اردلك الحب أضعاف مضاعفه ،انا مستاهلش كده ابداً ،انا مكنتش شايله في قلبي ليك غير كل حب وخير
طب طب حبيتها أمتي ،ده انت ده انت لحد امبارح كنت بتكلمني ومبسوط أن فرحنا النهارده ،امتي حبيتها دي يا يونس امتي ظهرت في حياتك ،ليه مقولتليش ،ليه استنيت ليوم الفرح ،ليه عايز تكسرني ،انا آذيتك في أيه ،انا عملت فيك ايه ،انا ا انا انا جوايا الف سؤال مش عارفه اجابه منهم انا دماغي بتغلي،انا قلبي بينزف والله انا تعبانه انا بموت بسببك
-سامحيني مش بأيدي انا....
صرخت بجنون وهستريه وانا برمي بكسر كل حاجه قدامي :
-انت حقيييييير انت جبررررروت انا بكرهك انا بكرهك يا يونس علي قد ما حبيتك هكررررهك حسبي الله ونعم الوكيل فيك ،عمري ما هسامحك،هاخد حقي منك قد ربنا
ــــــــــــــــــــــــــــــــــــــــــــــــــــــــــــــــــــــــــــــــــــــــ
-حمد لله علي السلامه ياقمر
فتحت عيوني بتعب وانا ببص حوليا باستغراب لقيت نفسي في اوضه مستشفي متعلق في أيدي محلول وفي ممرضه واقفه قدامي بابتسامه لطيفه
-ه هو ايه اللي حصل
-باباكي جابك هنا من يومين وانتي فاقده الوعي وتعبانه جدا
بصيت حوليا بخوف :
-هما فين اهلي
حطت ايديها علي ايدي وهي بتطمني :
-متقلقيش هما برا هدخلهم حالا
هزيت راسي بتعب وانا ببص في السقف وبفتكر اللي حصل
كل اللي فكراه اني كنت بتكلم في الفون ودقات قلبي سريعه وفجأه حسيت بصداع رهيب ووقعت علي الارض ومن بعدها محستش باي حاجه غير دلوقتي
الممرضه خرجت واهلي دخلوا وماما اخدتني في حضنها وهي بتعيط
دفنت نفسي بين دراعاتها من غير ما انطق حرف لكن نظره الحزن والكسره اللي في عيني كانت كفيله تحكي وتعبر عن اللي جوايا
رفعت وشي وانا بسألها بدموع :
-ه هو انا عملت حاجه وحشه وربنا بيعاقبني
هزت راسها بلهفه ودموع :
-لا ربنا بيحبك ،ربنا نجدك ياحبيبتي
-ط طب ليه يونس عمل فيا كده ،ليه حب واحده تانيه ،فيها ايه زياده عني ،و والله لو لف الدنيا مكانش هيلاقي حد بيحبه قدي ياماما والله انا محبتش في حياتي قده، هو ليه عمل كده
بصتلي بقله حيله ،مكانتش عارفه ترد تقولي ايه ،اصل في الحقيقه اي كلام في الوقت ده عمره ما هيداوي الجرح اللي في قلبي
فضلنا ساكتين بنبص لبعض كلنا بحزن وكسره ،ماهو مش انا بس اللي اتكسرت ده بابا وماما واختي
كلام الناس بالتأكيد مش راحم ضعفهم ،نظرات الشك اللي في عيون كل شخص محاوطاهم في كل مكان
مفيش شخص ممكن يصدق أن في عروسه اتسابت يوم فرحها عشان عريسها بيحب واحده تانيه
الكل هيقول العيب عندها هي ،الكل هيخترع الف سيناريو كلهم اسوء من بعض
ــــــــــــــــــــــــــــــــــــــــــــــــــــــــــــــــــــــــــــــــــــــــ
-هو انا مش قولتلك الف مره متقعديش مع البنت دي تاني انتي مش بتسمعي الكلام ليه
بصتلي صاحبتي بتوتر وهي بتبلع ريقها ووشها كله بقي اصفر
-م محمد دي ايمان صاحبتي و....
قاطعها بحده:
-كانت صاحبتك انما دلوقتي خلاص
اخدت نفس عميق وانا بمنع نفسي من العياط وقومت وقفت واخدت شنطتي ومشيت من غير ما انطق حرف
كنت بجري من المكان بأقصي سرعه عندي حرفياً لحد ما خرجت من الكليه خالص
وقفت في مكان مفهوش ناس كتير وانا بنهج بتعب وضربات قلبي سريعه
-حبيبتي وحشتيني
لفيت لمصدر الصوت لقيته شاب بيقرب مني وانا ببص يمين وشمال يمكن بيقول الكلام ده لحد تاني
وقف قدامي ومسك ايدي، برقت وكنت لسه هتكلم لقيته همسلي في ودني بتوسل :
-ارجوكي مثلي انك خطيبتي واوعدك هدفعلك المبلغ اللي انتي عايزاه ارجوكي
وبدون وعي مني هزيت راسي وانا ببلع ريقي بتوتر
قربت مننا بنت كانت واقفه بعيد وهي بتبصلي من فوق لتحت بقرف
-امممممم بقي هي دي خطيبتك
رفعت راسي أبص في عيونه اللي لاحظت لونها العسلي مع ضوء الشمس
لوهله قلبي اتنفض وايدي اترعشت
-اه هي دي حبيبتي واغلي ما ليا
بصيتلها بقرف وانا بقول باستفزاز :
-مش تعرفني ياحبيبي مين دي
جزت علي أسنانها بغيظ :
-الاكس ياحبيبتي
-امممم تصدق زوقك وحش اوي
بصتلي والشرار بيخرج من عينيها :
-هو فعلا زوقه وحش عشان اختارك
-توء توء ده زوقه اتحسن ياحبيبتي عشان اختارني مش كده يابيبي
قولتها بدلع مصطنع وهو واقف مصدوم وفاتح بوقه ببلاهه
-بيبي
-هه
-مالك ياحبيبي انت تعبان
-احم ل لا ياروحي نمشي؟!
ابتسمت ابتسامه رقيقه :
-نمشي
مشينا في قدامها واحنا شابكين ايدينا في ايد بعض لحد ما بعدنا عن المكان
اول ما بعدنا سحبت ايدي من أيده بتوتر
-انا انا مش عارف اشكرك ازاي،ا اطلبي اي حاجه وانا هنفذهالك و....
قاطعته بابتسامه رقيقه :
-انا مش عايزه حاجه عن اذنك
كنت لسه همشي بس وقفني سؤاله :
-انتي اسمك ايمان مش كده
