رواية عذاب الحب كاملة بقلم ايمان شلبي
- انتي مستوعبه انك هتروحي كتب كتاب جوزك علي واحده تانيه !
بلعت ريقي واخدت نفس عميق وانا ببصلها بهدوء :
-لازم اروح
صرخت فيا بعصبيه :
-لا مش لازم ،مش لازم ابدا تروحي ،مكانش لازم توافقي من الأساس علي حاجه زي كده
قعدت علي طرف السرير وانا بنفس الثبات :
-طب عايزاني اعمل ايه
-ترفضي
-مش من حقي
-يعني ايه مش من حقك هو ده واحد من الشارع !
ده جوزك يابنتي جوزززك
-انا اتفرضت علي جوزي واضطر يوافق عشان ميزعلش أهله ،من حقه يتجوز البنت اللي بيحبها
-بس انتي بتحبيه ياريم
ابتسمت ابتسامه حزينه وباهته :
-بس هو بيحب حد تاني وانا مش من حقي ارفض يكون معاها ،ابقي انانيه لو رفضت واعترضت
-بس هو كمان اناني يعني ايه اضطر يوافق عشان أهله ،هو حتي مفكرش في مشاعرك
انتي ازاي هتقدري تستحملي يكون مع واحده تانيه
-ومين قال أني هفضل معاه
-هتطلقي؟!
-هتطلق طبعا
-امتي
-اتفقنا لما أولد نتطلق
-اشمعنا
-عشان يبقي معايا يوم الولاده ،انتي عارفه مليش حد يقف معايا
ردت بعتاب:
-اخس عليكي وانا روحت فين ؟
ابتسمت بهدوء :
-ربنا يخليكي ليا طبعا ،انا بس حابه أن البيبي اللي في بطني يكون اول حد يشيله هو باباه ،اتفقنا انا وادم أنه هيجبلنا شقه نعيش فيها وهيتكفل بمصاريفه وكل حاجه تخصه واتفقنا أنه يشوفه في أي وقت هو عايزه
-انا حقيقي مستغربه
-مستغربه ايه؟
-ريم انتي ازاي بالثبات ده ،بلاش دي ،انتي ازاي بالسماحه دي ،ادم شخص اناني فوق ما تتخيلي ،ليه ترضي بحاجه زي كده مع أن من حقك ترفضي وتقلبي الدنيا فوق دماغه وتشهدي أهله عليه و....
قاطعتها بهدوء :
-واعيش حياتي مع واحد محبنيش ولا عمره هيحبني ،واحد طول عمره هيفضل يتخيلني واحده تانيه ،ليه اعمل كده في نفسي ،انا اه بحب آدم بس بحب نفسي وبحب عزه نفسي اكتر من اي حاجه في الدنيا
-طب وليه هتحضري كتب الكتاب ؟!
اتنهدت تنهيده طويله وانا ببصلها بابتسامه حاولت متكونش مهزوزه :
-انا وآدم اتفقنا نكون اصحاب و...
ردت عليا بعصبيه وجنون:
-انا وادم اتفقنا انا وادم اتفقنا هو في ايه ؟
انتي ازاي كده بجد مفيش شخص طيب اوي كده
رديت بلا مبالاه:
-لا عادي في أشخاص ناضجه وعاقله زي انا وادم
قررنا نكون اصحاب وأخوات عشان ابني اللي في بطني ميطلعش يلاقي امه وأبوه طول الوقت في خناق ومحاكم ويبقي عنده عقده نفسيه
قامت وقفت وقربت مني وهي بتمسك ايدي بشفقه :
-ريم حبيبتي عيطي اصرخي اتعصبي كسري اللي قدامك بس ارجوكي متفضليش بالهدوء ده ،الانسان مهما كان قوي بيجي عليه لحظه ضعف ،متكتميش في نفسك أكتر من كده انا عارفه انك تعبانه و.....
قاطعتها بثبات اكبر وانا بهز راسي بكبرياء :
-انا تمام جدا ،عن اذنك
-رايحه فين؟
-ادم مستنيني تحت
-هي اللي هتبقي مراته عارفه
-ايوه
-وموافقه
ابتسمت بسخرية :
-آدم قالها أننا هنتطلق عادي
مسكت ايدي وهي بتبصلي بقلق:
-ريم متروحيش
-ليه
-ع عشان ع عشان
-عشان هي هتغيظني يعني وكده لا عادي متقلقيش اصل آدم عرفني عليها وطلعت لطيفه عن اذنك
قولت كلامي بكل سخريه ووجع من جوايا وخرجت ..
نزلت لقيته واقف وساند علي عربيته مستنيني ،علامات القلق والتوتر باينه علي ملامحه
قربت منه بابتسامه مصطنعه :
-ازيك يا آدم
بصلي وسألني بتوتر :
-شكلي حلو
سكت لحظه وانا بتفحص شكله بدايه من شعره الناعم الطويل ،ملامحه اللي من كتر ما بدقق فيها حفظتها ،البدله الكحلي اللي زادته جمال فوق جماله
شكله كان يخطف قلب اي شخص يشوفه مابال قلبي اللي عشقه من وقت ما كُنا جيران وزمايل في المدرسه !
قولت من شرودي علي صوته وهو بيهزني من كتفي :
-ريييم
-هه ن نعم
-بقولك شكلي حلو
ابتسمت وانا بهز راسي بدون وعي:
-اوي
ابتسم وعدل الجاكيت بتاعه برزانه وهو بيفتحلي باب العربيه عشان اركب
قربت خطوه عشان اركب ،ريحه البرفيوم بتاعته حطمت آخر ذره من عقلي بالمعني الحرفي
رفعت راسي أبص في عيونه بحزن وكسره
كان جوايا كلام كتير اوي نفسي اقوله لكن للاسف مقدرتش
اتنهدت تنهيده طويله وركبت وانا بحاول معيطش عشان ميحسش اني ضعيفه
ركب جنبي وساق وبعد فتره من الصمت لف وشه وهو بيسألني بهدوء
-انتي كويسه
هزيت راسي بابتسامه مصطنعه :
-الحمد لله
-متأكده؟
-اه طبعا
اتنهدت وبص قدامه وسكت لحظه وبعدها بصلي تاني
-ريم لو مش هتقدري تحضري مش هزعل
بصيتله بابتسامه باهته:
-لا عادي
-انا اسف
-بتتأسف علي ايه
-اني مقدرتش احبك
بلعت ريقي ورديت بصوت مبحوح :
-قلوبنا مش بأيدينا
-انتي جميله اوي يا ريم ،قلبك جميل زيك و...
قاطعته بعصبيه بعد ما فاض بيا الكيل :
-كفااايه يا آدم كفاايه ارجوك
-حاضر انا اسف خلاص
ــــــــــــــــــــــــــــــــــــــــــــــــــــــــــــــــــــــــــــــــــــــــ
"بارك الله لكما وبارك عليكما وجمع بينكما في خير"
-عقبالك
لفيت لمصدر الصوت لقيت شاب وسيم واقف ورايا وبيبصلي بنظرات مش مريحاني نهائياً
بلعت ريقي بتوتر :
-ا أنا متجوزه
رد بحزن مصطنع :
-ياخساره
-ا احم لو سمحت بعد اذنك ميصحش كده
بصلي بهيام :
-يابخته بيكي
-لو سمحت انا.....
قاطعني بسخريه:
-انا عارف انك مرات آدم
عيوني لمعت بالدموع وانا بهز راسي بنفي:
-لا ا انا بنت خالته و...
-ليه بتعملي كده في نفسك
-بعمل ايه حضرتك بقولك انا بنت خالته
-ليه توافقي علي حاجه زي كده مع أن من حقك ترفضي
اخدت نفس طويل وانا بحاول اسيطر علي اعصابي :
-حضرتك شكلك فاهم غلط عن اذنك
كنت همشي بس هو مسك ايدي وهمس في ودني :
-جوزك شخص اناني ،مكانش لازم توافقي يتجوز غيرك
بصيت حوليا بخوف أن حد يشوفنا وخاصه آدم
سحبت ايدي بعصبيه :
-لو سمحت ده شئ يخصني حضرتك ملكش دعوه
-بس انتي بتحبيه
سكت لحظه وعيوني بتلمع بالدموع
-انا معرفش حضرتك ولا اعرف انت تعرف كل ده ازاي بس اللي عايزه أوضحه لحضرتك أن حتي لو كنت بحبه فهو مش بيحبني وانا اتفرضت عليه واضطر يوافق عشان ميزعلش أهله ،مكانش مفروض ابدا احرمه من البنت اللي بيحبها ابقي انانيه لو عملت كده
في النهايه هو عمره ما حبني ولا هيحبني وكده كده هنتطلق لكن بعد ما أولد عن اذنك
-ريم
اتنهدت ولفيت بهدوء :
-نعم
ابتسم بهدوء :
-انتي فعلا جميله زي ما آدم قال عنك
بصيتله باستغراب :
-انت صاحب آدم
-ايوه
ابتسمت بسخرية :
-فعلا مش كل شخص نقول عليه صاحب يبقي بيحبنا
-قصدك ايه
-اقصد انك شخص مش سالك
-ليه بتقولي كده ؟!
عشان المفروض انت اكتر شخص عارف ان آدم بيحب غيري يبقي متجيش تحاول تقنعني اني اقف في طريق سعادته !
ابتسم ابتسامه باهته :
-انتي متعرفيش حاجه
-يعني ايه معرفش حاجه
قرب مني وعيونه بتلمع بالدموع :
-ادم ده أحقر بني آدم علي وجه الارض
عيوني احمرت من الغضب وانا بصرخ في وشه :
-احترم نفسك ده جوزي ياحقير
-صدقيني جوزك حقير فعلا ،شيطان علي هيئه بني ادم
-انت اللي شيطان بجد وحقيقي مش فاهمه ازاي آدم مصاحب واحد حقير زيك و.....
-ادم اللي بتدافعي عنه ده اتجوز النهارده اكتر انسانه انا حبيتها وهو عارف
بلعت ريقي ورديت بصدمه :
-ا انت بتقول ايه ا اكيد مكانش يعرف انك بتحب زينب
-لا كان عارف ،هو انتي فاكره أنه اتجوز زينب عشان بيحبها!
-اومال اتجوزها ليه
-اتجوزها عشان يقهر قلبي ،عشان هو بيكرهني ،عمره ما حبني ولا حب وجودي بالرغم اني حبيته واعتبرته اخ لكن هو كان طول الوقت بيغير مني ومن نجاحي ودائما يحاول يحبطني ،اول ما عرفته اني بحب زينب فورا اتقرب منها لحد ما حبته وجه عزمني علي كتب الكتاب
صدقيني آدم ده أحقر بني آدم وعمره ما حب غير نفسه
كنت مصدومه من اللي بسمعه ،مكنتش اتوقع ابدا ان آدم يعمل كده
مش مستوعبه ومش قادره اصدق اي كلمه من اللي قالها البني آدم ده
لا لا اكيد آدم مش حقير
لا البني آدم ده بيكذب عليا
بس مش يمكن يكون بيقول الحقيقه ؟
عارفين اي اصعب حاجه ،انك تكون شايف الحقيقه قدام عينك بس مش قادر تصدقها من كتر حبك للشخص اللي قدامك
