رواية قصه من العالم الاخر الفصل الخامس 5 بقلم اسلام احمد
دخلت أوضتي وانا فرحانة و مبسوطة ، لكن اللي شوفته كان قادر يوقفني مكاني في صدمة واندهاش ! ، شوفت قطة سودة قاعدة علي السرير بتاعي وبتبص ناحيتي بعنيها اللي زي ما يكون جواها نار ، رجعت لورا بضهري ناحية الباب وانا باصة ناحيتها بخوف وفزع ، الباب اتقفل من ورايا جامد ، بصيت عليه بفزع ، اتفزعت من اللي شوفته بعد ما الباب اتقفل ، الباب كان مكتوب عليه بالدم ( باسيليا ) ! ، عقلي في صدمة واندهاش من اللي شايفاه و من اللي بيحصل معايا ، النور حصل فيه ذبذبة تاني ، بس المرة دي كان مع الذبذبة صوت صراخ قط مفزع كان جاي من ورايا ، بصيت ورايا وانا ببلع ريقي ، اتفزعت اكتر لما لقيت القطة السودة اللي علي السرير بينط من علي السرير ناحيتي بشكل مرعب ومخيف ، في اللحظة دي صرخت ومع صرختي حصلت الذبذبة في النور تاني ، هنا القطة السودة اختفت بس انا بقي فقدت الوعي تماما ، فوقت و فتحت عنيا ، كنت نايمة علي السرير ، في حاجة كانت في ايدي ، رفعت ايدي وانا ببص عليها عشان اعرف ايه اللي فيها ، اكتشف اني معلقة محلول ! ، انا مكنتش في اوضتي ! ولا في بيتنا اصلا ! ، لما بصيت حواليا عرفت بردوا اني في المستشفي ! ، حولت اقوم من مكاني لقيت امي دخلت عليا وهي بتبكي وتقول " ندي انتي فوقتي يا حبيبتي " وفجأة دخل وراها اخواتي وابويا جري عشان يطمئنوا عليا ، بصيت لامي بحزن وانا بقولها " هو في ايه يا امي !؟ وانا جيت المستشفي هنا ليه !؟ " ، في اللحظة دي دخل الدكتور سلم علي ابويا وقالي " الف سلامة عليكي يا دكتورة " ، قولتله " الله يسلمك " ،امى اتكلمت بحزن وحنية وقالت " انتي ايه يا حبيبتي اللي خلاكي تنزفي كل الدم ده ! " ، انصدمت من جملة امي وقولتلها " دم ايه !؟ " ، امي ملحقتش تقولي حاجة ، لان كان العريس وابوه جه يطمئنوا عليا ، ابو العريس ابتسم وقالي " الف سلامة علي عروستنا ، عايزينك تشد حيلك يا عروسة كده وتجمدي " ابتسمت وقولتله " ان شاء الله " ، وفجاة كلهم خرجوا من الاوضة الا " عماد " اللي هو العريس ، قرب وقعد علي الكرسي اللي جنب السرير بتاعي وقال مع الابتسامة الجميلة وملامحه الوسيمة " الف سلامة عليكي ، هتصدقي لو قولتلك يا ريتني كنت انا ؟ " ، مش عارفة ليه اتكسفت اوي وقلبي زي ما يكون اتخطف لما قال الجملة دي ، اتكلمت وقولتله " بعد الشر عليك " ابتسم ابتسامته الساحرة وانا كمان ابتسمت ، بعد ثواني من الصمت قولتله " عماد .. انا عايزة اقولك علي حاجة " ، قرب عليا وقال " عارف اللي هتقوليه.. انتي شوفتني في الحلم قبل ما تشوفيني في الحقيقة " ، انصدمت !! ..يتبع
