رواية ملائكة بالف وجه الفصل الثامن عشر18 بقلم اروي طاهر المسلاتي
حيانا نكملو حياتنا ضنا منا ان تخلصنا من كل مشاعر الحب يلي كانت في قلوبنا وان كل يلي صار مجرد فترة وعدت خلاص !
نبدو نخططو لي حياتنا الجديده بعد ما طلعنا منها هلبا ناس وتمر ايام وشهور وحني مرتاحين في سلام لكن فجأه يجي موقف يقلب كللللل شي في حياتنا ويصحي هلبا مشاعر واحاسيس بنضره وحده بس !
نصر:سرح للحضه ومعرفش حتى يطلق السلام عليهم !!!!!!
بعد كل ها الشهور وكل الضروف يلي عاشتها معاه متوقعتش انها تشوفه فجأه !
نجمه :الووووووو تي وين سرحتي ؟!
ريحانه:فاقت على نفسها ......اهلاااا نجمه
وسلمت عليها سلام حار هلبا 
نجمه:جايه لي رباب؟
ريحانه:اي ليا ايام عليها رغم ان اخر مره جيتها رجلي نكسرت 
نجمه:شهقت بصدمه ...الف سلاااامه عليك
ريحانه :شافت لي بوها .......بابا خلاص تو تساعدني نجمه
سمير:به تمام يبارك فيك بنتي صحيتي
نجمه: الله يسلمك عمي ولو !!
نصر:طلع بي السياره كأن هارب من شي ميبيش يرجعله بدون حتى ما يسلم على سمير
مش كل الناس تكون نيتها اتجاهنا حلوه حتى لو شفنا منهم مجهود جبال
والطرف الثالث في العلاقات ديمة يكون خبثهم كبير وعميق لدرجة متقدرش تكشفهم الا بي صدفه يبعتهالك ربي
طق الباب بهدوء بس ورا الهدوء هادا كانت فيه عاصفه 
مودة :شنو نست الغبيه هادي ......وفتحت الباب 
نجم الدين :خش بهدوء بدون حتى مايكلمها
مودة:ضحكت .........حيي مكنتش متوقعه توصل بسرعه هكي
سكرت الباب وزبطت نفسها شوي على مراية المدخل وخشت وراه
مودة:بي ابتسامه عريضه ........شنو تحب تشرب ؟؟
تفضل خيرك واقف !
نجم الدين :شافلها من فوق لعند لوطه .........ع اساس مريضه !؟
مودة:توترت ......اءء اه اي انا كنت تعبانه شويه صح بس خديت فوار وهكي ومشت اموري
نجم الدين:بصوت هادي ......علاش درتي هكي !
مودة:تحاول انها تخلي الابتسامه على وجها !....كيف مفهمتش !
تقصد ان خوفتك عليا ؟
ههههههههه والله ما كنت نقصد انا م............
نجم الدين :طلع التالفون ووراها المكالمه يلي قاعده مفتوح ومدتها 45 دقيقه
هرب منها كل الكلام وتلاشت الضحكة يلي كانت على وجها 
مودة:اءءء انا مكنتش انا نقصد ان
نجم الدين :ماسك يديه على شكل قبضه ويحاول يحافظ على اعصابه .....علاش درتي هكي !
مودة:طلع الوجه التاني وبدت مواجهة الصارحه
قالت وهيا منفعله ........لان انا يلي نستاهلك مش هيا !!!!!
نجم الدين:عيط عليها بصوت عالي.........تي منو انتي اصلااااا
منو انتي انا جاي نبيك تحسنيلي حياتي مع مرتي مررررررررتي يلي نحبها ومش قادر على بعدها تجي تخربيلي كل شي !!!!!!!!!
تضحكي عليا انا؟؟؟؟؟؟؟؟
تضحكي عاليا انا بي اسم علم النفس والعفن يلي خليتيني نمشي وراه !
خليتيني نهدم كل شي بيني وبين مرتي
مودة:قاطعاته وهيا تبكي ولصق فيه .....نجم الدين انا نحبك صدقني انا يلي نستاهلك ومقدره كل شي
صدقني مقدره غيرتك ورجولتك يلي هيا مش حاسه بيهم وادير منهم في مشاكل
نجم اسمعني الله يخليك
نجم الدين:دفها من عليه بقوه.......اقسم بالله مزال نشوف رقمك في تالوفوني ولا تحاولي توصليلي ما تشوفي الا كل شر مني
واحمدي ربك ان مدرتلك شي لان مقدر انك بنت وربي كنهادا فرمتك
مودة:مشت وراه وهيا تبكي وماسكه فيه لعند الباب تتوسل انه يعطيها فرصه وتتاسف
بس هوا كان يبعد فيها بي طريقه واضحه انه متقزز منها
نزل لي سيارته سكر الباب ومقدرش يحرك السياره ولا يدير شي بعد الشي يلي عرفه
استرجع كل ذرياته في لحضه وحده وكل موقف يفوت عليه يكتشف ويعرف قداش ضلم شيخه وهانها وضيع حبه في قلبها
بدي يخبط بي هستيريه وهوا يقول .......غببببببببببببببببببي غبببببببببببي
غبي شن درتتتتتت
اما مودة مستسلمتش وكملت يومها بكي وانهيار لا !
لان مش كل البنات تتخلى علي الشي يلي تبيه بي الساهل حتى لو كان الشي يلي تبيه مش ليها !
__________________________________
كل البديات حلوه
وبدات بدايات قصة الحب المختلفه يلي الحب منها يجي بعد مواقف وايام وعشرة وقت
حتى الكلام والغزل فيها يكون غير
ندى:هادي القهوة .......تفضل
نذير:يبارك فيك
ندى :نزلت خدت سفرت الفطور يلي كانت عند نذير وجت خاشه
لكن نذير مسكها من يدها
ندى:شنو؟
نذير:هاتي السفره جاي ....خداها منها ورجعها على الطاوله
تعالي جاي قعمزي نبيك شوي
ندى:قعمزت بي استغراب ..........شن فيه!
نذير:جبتلك حاجه 
ندى:ضحكت ......والله ؟حلوه ولا شكلاته
نذير:انتي كبرتي خلاص على الحاجات هيا جبتلك حاجه متع كبار
ندى:تشوقت 
نذير:شن بتعطيني مقابلها
ندى:ربعت يديها ......نذييرررر بلا جو هيااا معش قادره نصبر
وقف وطلع شي من جيبه ودرقه ورا ضهره
ندى:وقفت قدامه .....هياااا هات نشوف
نذير:اغريني بي مقابل نعطيك هي
ندى:نذيييير بلا دراه هيااا
نذير:قعد يضحك وهوا يقيم في الهديه يلي جايبها وهيا تحاول توصلها بدون فايده
لين حط الهيديه ورا راسه فجأه وقربت ندى بعفويه وخطف منها بوسه سريعه
ندى:فزعت من يلي صار ووخرت وهيا حاطه يديها الزوز على فمها ......خززززي عليك
نذير تحشم الدنيا زحمة كان حد شافك
نذير:مرتي شن يلي درته انا !
الباين انك متبيش هديتك هي خلي نمشي
ندى:لا عاااااد وريني
نذير:غمزلها بخبث شن رايك نركبو لي حوشنا نعطيهولك فوق 
ندى:بلا هباااال عاد هيا شردتني
نذير:ضحك عليها .......خلاص هاك
ندى:شهقت بصدمه وهيا ماسكه الهديه وقامت عيونها في نذير
تبصر؟
هادا ليا !
نذير:تستاهلي
ندى:معنديش معنديش ويوم تجيبلي
تجيبلي 14 مره وحده 
نذير:مش خسارة فيك
حطيتلك فيه شفرتك ونضمتلك الامور فيه
ندى:نذير بجديات صحيت وربي
نذير:بنضرات خبث .....تعالي اشكريني فوق
ندى:ضحكت .........تحششممممممم مبردك
نبيله:نذيييير نذير
نذير:في لحضه تحول من شخص هايم في الحب ونضراته ذابله وهايمه فيها
لي واحد واقف بعيد على مرته ونضراته كلها جديه لين ندى نصدمت
ندير:ها يا امي ؟!
نبيله :سلم ولدي نقصت علينا المكرونه للغدي جيبلنا بالله وقت
نذير:ان شاء الله حاضر
شاف لي ندى:تحركي البسي عبايتك بري معاي
ندى:عقدت حواجبها بي استغراب .....علاش !
نذير:غير امشي البسي تو
نبيله:هيا يا ندى سرعي روحك سلم بنتي امشي معاه وقت
ندى :تمام عمتي هي
نذير:ابتسملها من تحت لي تحت بي نصر
نجمه:تي شنو مسكر عليك الحقير كيف هكي ؟
رباب:من ورا الباب ......نجمه امشو من هنايا قبل ما يجي خليه تو نعرف كيف نتعامل معاه
ريحانه:تي كيف بنروحو ونخلوك هكي امتى مروح هوا !
رباب:مش عارف عليه جابلي بضاعه وقالي انه بيختفي ايام
نجمه:تو ندير حل
رباب:مديري شي يا نجمه مديري شي خلاص امشو من هنايا يصير خير تو ندبر اموري معاه روحو توا
نجمه:اشرت بي عيونها لي ريحانه بمعنى .....خليك تو نجيك
وركبت نجمه لي حوش خالتها
طقت الباب اكتر من مره ولما قريب تفقد الامل فتح الباب
يزن:يحك في عيونه ....شنو اديري هنايا؟
نجمه:جيت نبي نشوف رباب
يزن:اها به خشي
نقصد عني ان اسمعي كنت راقد انا مش فاهم شي و
نجمه:قاطعاته.....نبي منك خدمه ضرووووريه يزن
يزن:عقد حواجبه بي استغراب .....شنو تبي !
شن صاير انتي اصلا من جابك هنايا !
نجمه:جابني نصر
يزن:نصررررررر؟؟؟؟؟؟من قالك بري معاه شنو تتصرفي من راسك
نجمه:اسمع مش وقتها الدوا هيا كلها توا تعالا معاي......ومسكاته من يده نزلاته
ريحانه:غطت وجها بسرعه اول مشافت يزن
نجمه:رباب تسكر عليها الباب باهي ومعش يفتح من داخل
دير حل فك القفل ولا اي حاجه
رباب:استغربت من ورا الباب بسبب الكذبه !
يزن:تنهد .....يا اخت حاولي تفتحيه من داخل ترا
رباب:اخت
الباب سكرته بي المفتاح والمفتاح راح
يزن:شاف لي نجمة ......راكب شوي ونجي خلي نجيب العدة
نجمة :به
ريحانه :نزلت وقفت على طرف الدروج تراقب في المدخل خايفه طه يخش في اي لحضه
وبدي يزن يحاول يفك القفل بدون مايكسر الباب وبعدين يرجع يركبه
___________________________________
نجم الدين :نزل من شقته يجري
خش لي حوش بوه يدور زي المجنون على اكتر انسانه يحبها وغلط في حقها ودمرلها نفسيتها وكسرلها قلبها
جت عينه عليها وكانت مقعمزه جنب كفاح ترضع في ولدها
كفاح:لبست بسرعه حجابها
شيخه:مستغربه من دخلته عليهم ......خيرك شن في؟
نجم الدين :نبيك
نبيك شوي تعالي للحوش
شيخه:حتى انا نبيك في موضوع غير توا منقدرش نطلع الضيوف عند بوك خلي لين نضيفوهم قبل
نجم الدين:تمام متعطليش نبيك ضروري
شيخه:به
نجم الدين:رجع لي شقته مسيب بوه وضيوفه وكل المواضيع وكان تركيزه على شيخه بس
اما في مربوعة فتحي كانت الاجواء ناااار
من جيها طه كان يحلف بي ايمينات الله ان الولد مش ولده
ومن جيها كان داوود وخاله قالبين الدنيا ومتأكدين ان طه كان متزوج تقوى بي السر
وطه من جيها يحلف ان تقوى كانت تخدم في طريق الحرام وان رقد معاها ليله وحده في تونس وعطاها حقها ومصارش بينهم اي ورق زواج مهما كان رسمي ولا عرفي
والعياط والسبان كان واصل لاخر الدنيا بين الطرفين
في النهايه اتفقو الاثنين ان فحص الابوة(DNA)قادر انه ينهي كل ها الخلافات وبعد يدير الله الف طريق ورح يلاقو حل يرضي الطرفين
__________________________________
كريمه:سألت بي ابتسامة مغطية وجها ….شن رايك في نجمه؟
نبيله:جاوبت بعدم فهم محتوى السؤال بزبط … الله يبارك عليها والله طول العرس يد بيد مع العواله تعرفي مبطلتش بكل
كريمة :مش هكي قصدي
نبيله:عقدت حواجبها بي استغراب ….شنو مفهمتش؟
كريمه:نقصد ان زي ما تعرفي ادهم فسخ خطبته الاسبوعين يلي فاتو
وهوا واتي من كل شي
نبيله:اي !
كريمه:فكرت نخطبها ليه ياريت تعرفي نتهنا عليها وعليه
نبيله:غريبه والله توقعت تقولي يزن
كريمة:تنهدت بملل….يزن مطول معنداش الا ها الاستراحه مداير باله عليها يزرع فيها صبح وليل
ياريته مداير راي لي روحه
كل ما نقوله هيا سلم ولدي خود شقه ابني دير اي شي مدام الفلوس موجوده …..شي شي مسكر راسه
فقلت نسقد ادهم قبل
انا قاعده ما عرضتش عليه الموضوع لكن الايام يلي فاتو يشكر فيها
نبيله:توكلي علي الله وربي يكتب يلي فيه الخير
كريمه؛ياااارب ربي يسمع منك والله ياريت نجيب كنه تساعدني شوي وتكون معاي
نبيله:عيني خير وان شااء الله ربي يسخر الحال
كريمه:يارب !
نجمه:ماهو مش حل هكي تقعدي تحت رحمته
نوضي تحركي لي شقتي والله معاد قاعده هنايا!
ريحانه:اي والله كلامها صح وكان تبي تباعدي روحي معاي خير اقعدي عندي حتي شهر وربي ماما تفرح بيك لين خلاص صدقيني
رباب:بنات انتم مش فاهمين انا نبي نكسبه قبل بعدددين نهرب منبيش نهرب منه طول
ريحانه:هاك هاذا مفتاح الشقه متعي
امتى ما تحسي روحك فديتي اطلعي وخليله الدنيا
ريحانه:ضحكت ….ههههههههههههههه
رباب:ااخخخخ راسي بيتفجر انا
خلي انوض ندير قهوة ع السريع
ريحانه:اسمعي خلي نروحو بالك يجي توا!
رباب:تتكلم من المطبخ…صدقيني لا يبي قريب 4ولا 5ايام ومرات حتي اسبوع
نجمه:كرهتتتتته ياربي قداش مستفز وحقير
رباب:ضحكت من بعيد …..وربي ليا ايام مضحكتش هي
نجمه:خلي نطلع نشكر يزن ونجيكم مسكين فتح الباب خشينا طول
ريحانه:
خلي انحي الملايا حاسه روحي مطبوخه تحتها
___________________________________
الساعه 8 في الليل:-
ندى:طلعت من الدوش ورمت نفسها علي السرير بي استرخاء
سكرت عيونها وهيا مبتسمه مذكرة كل تفاصيل طلعة اليوم مع نذير
حركاته الرومانسيه يلي تجنن في السياره
ومشية البحر يلي جت فجأه وكانت احلى طلعه بنسبه ليها
فتحت عيونها ومسكت تالفونها الجديده خشت على الرسايل واتصل بي الرقم يلي بعتهولها نذير
ردت صاحبة الرقم وكان صوتها يرجف
هديل:ندى باهي يلي اتصلتي
ندى:شن في خيرك!
هديل:خليك دقيقه نطلع لي الصالة ….
ندى:تمام
ناضت ندى وقفت وهيا متوتره
هديل:ندى ندى تسمعي فيا!؟
ندى:نسمع فيييك ادوي طيحتيلي قلبي
راجلك فيه شي ولا شن صاير خيرك!؟
هديل:بلعت ريقها فيه شخص يهدد فيا يا ندي بنموووت
اليوم بيكلم راجلي
ندى:سكتت وهيا تشوف لي الزرف يلي في يدها
هديل:ندى الله يخليك ديريلي شي بالله عليك بنهبل وربي راجلي لما يطلقني
ندى:اسمعيني اصلا متصله بيك ع الشي هاذا
يوم حفلتك في حد بعت صور ليك انتي وولد و …..
هديل:انهارت بكي وتخبييييط ع وجها
وربي ياندى قديم الموضوع اقسم بالله قديم حسبي الله فيه
ياربي كيف ندير لي منو عطاهم الصور !!!ندى:طاحو في يدي انا الحمد الله
فهميني هوا شن يبي منك؟
هديل:ميبيش شي يبي يخربلي حياتي بس
لان رجعلي وقتها مخطوبه وطلب مني نفسخ ع خاطره
المشكله سنه كامله محكيناش مع بعض
ندى:بي اذن الله يصير خير
والله معارفه شنو نقولك انا راعشه من امس وربي مفهمتش كيف نتصرف
هديل:مسكت اعصابها ودموعها….هي حبيبي دقيقه ندوش انا
وتسكر الخط!
قعمزت ندى وهيا تفكر !
مسكت تالفونها وتشوف لي الرقم المكتوب خلف صورة من الصور
فكرت وفكرت وفكرت الف مره وكانت جدا حايره!
_____________________________
درست السياره قدام حوش عصمان
نجمه:حسيتك زي يلي تفركست مبكري لما شفت ريحانه صح؟
نصر:شن تدوي انتي غبيه لا طبعا
نجمه:قول الحق عادي ره
موليه تهبل ريحانه عموما بجد متغيره هلبااااا
نصر:انزلي سلم بنتي بلا هبال انزلي
نجمه:علاش به مترجعوش
شفتها كيف قعدت سارحه فيك مسكينه !
نصر:مفيش حب بينا لا شي يابنتي افهمي خلاص غلطه غلطنا وصلتنا للجواز وكل حد مشي علي روحه طبيعي لما نشوفها بنضايق
نجمه:بس نضرتك ليها مكانتش ضيق!
نصر:اياه علينا عاد بديتي تقري في النضرات توا خلاص
نجمه:به لو……
كريمه:نجمممة جيتي واخيرا
نجمه:خدت شنطتها ونزلت من السياره
كريمة:شنو حال رباب؟
نجمة:كويسه الحمد الله لقيتها واخده بردة خفيفه لكن مشت امورها
كريمه:به كويس تعشيتي ؟
نجمه؛لا والله بدير عشي قلنالها ارتاحي ميته جوع تو نخش ندير ساندوتش
كريمه:ضحكت….لالا سلم بنتي خليتلك حصتك من العشي خشي غيري حوايجك وتعالي
نجمه:ابتسمت….ياودي سلمها ليا الحنونه انا
وباستها
شرين التالفون واستأذنت شويه من خالتها
كريمه:خشت للحوش
ونصر ناشبها شويه وركب لي شقته …
نجمه:ايوا ؟
المنذوب:اختي انا وصلت للحوش يلي وصفتيهولي
نجمه:من انت؟
المنذوب:انا متع الطلبيه يلي كلمتك الضهر
نجمه:معليشب ممكن نفهم الطلبيه شنو بزبط لان انا مش طالبه شي ومعنديش حد يبعتلي
المنذوب:صاحب الطلبيه اسمه ادهم تقريبا
نجمه:ادهم!؟
لا اسفه منقدرش نقبل الطرد هاذا
المتذوب:اختي بالله عليكً انا نخدم علي راسب متسببيليش مشكله انتي الصبح وافقتي اطلعي خودي طلبيتك وبعدين لو تبي تريحيها انتي حره
نجمه:تنهدت بي توتر….اوكي طالعه
طلعت نجمة من الحوش وكانت فيه شاحنه بيضا صغيرونه تراجي فيها
قربت بدون اي شك من شي لان فعلا واضحه السياره متع خدمه!
بس اول ما مدت يدها بتاخد الطرد سحبوها لي الشاحنه بدون ما يخلو اي اثر ليها
___________________________________
حمزه:خيرك؟
هديل:شي حبيبي خيرني !
ولفت وجها تحاول تخفي ملامحها
حمزه:اشبحيلي هنايا ليش وجهك هكي ؟
كنتي تبكي ولا شنو فهميني
هديل:مقدرتش تمسك دموعها وبكت قدامه
وحمزه كان مصدوم وخايف عليها بشكل كبير
حمزه:نكلممم فيك من ضايقك ولا زعلك
هديل ردي عليا ادوي
هديل:مفيش حد ضايقني بس استاحشت ماما
منعرفش كيف بنعيش بدونها هنايا بتقعد بروحها
حمزة:وعلامات الراحه علي وجها …..يا عمري انتي
امك معاها بنتك خالتك ومرت خوك يعني مش بروحها
وانتي خلاص بتفتحي عيله بروحك توا شوي شوي تتعودي علي الوضع
هديل:مسحت دموعها واشرت راسها بنعنى اوكي
حمزه:باسها عليي راسها بحب وهديل كان في بركان داخلها
نذير:نددددى وينك؟
ندى:حبيبي انا في الحمام نلبس
شوي وطالعة
نذير:قعمز علي السرير بتعب….اطلعي ديريلي شي ناكله تربحي بنموت جوع
بعد دقايق من رقاده ع السرير سمع مسج وصل
شاف يمينه كان المسج لي ندى
ضحك وهوا يقول
نذير:مسرع بدو يوصلولك حتي رسايل انتي!
لكن محتوى الرساله كان صدمه ليه
(اسمعي بعد ما فكرت في الموضوع رح نعطيك فرصه عشان صوتك العسل هاذا امتى ماتفضي كلميني )
_______________________________
صوت الباب انفتح وكان بنسبة لي نجم الدين هادا احلى صوت يسمعه بعد طول انتضار
شيخه:السلام عليكم
نجم الدين:بي لهفه….تعالي نبيك
شيخه:ابتسمت….عارفاتك على شنو بتحكي
دقيقه نحط متين في غرفته منبيشي ينوض
نجم الدين:مهتمش لي كلامها وقال…..تمام
شيخه:حطت ولدها في سريره وسكرت عليه الباب
ورجعت لي نجم الدين ….
نجم الدين:شوفي الايام يلي فاتو كلها انا…….
شيخه:قاطعاته….كنت تحب وتتمعشق مع وحده اسمها موده
هاذا باش مفيش شي عاجبك فيا
لا اهتمامي بيك ولا اكلي ولا لبسي ولا شي
نجم الدين:كأن حد كب عليه اميه سخونه ….ككيف !!
شيخه:كانو عيونها دموع بس الابتسامه مرسومه علي وجها
مش مهم كيف عرفت المهم فهمت وخلاص
ياريتك جيت قلتلي بس بدون ما تجرحني وتكسرني عشان نباعد عنك وتعيش حالة الحب يلي انت فيها براحتك
نجم الدين:تي لاااااا انتي فاهمه غلط انا مش……
شيخه:قاطعاته بهدوء….اسمعني نجم
طول فترة بكاي الفترة يلي فاتت مش ع خاطرك كانت ع سبب تاني بكل
والحمد الله اليوم عرفت انك عايش قصة حب وعندك انسانه في حياتك
ع الاقل تعبي الفراغ يلي رح نخليه وتكون ام كويسه لي ولدي
اكيد رح تكون كويسه مدامها دكتوره
نجم الدين:بصدمه….ام كويسه!!
شن تحكي انتي؟!
شيخه:فتحت الورقه يلي كانت بين يديها ومدتهاله….نجم انا مريضه
والباين ان مش رح نكمل حياتي معاك
احمد ربي انك رح تعيش معاها في سعاده ….يتبع
