رواية ملائكة بالف وجه الفصل السادس عشر16 بقلم اروي طاهر المسلاتي
الخيمه كانت زحمه وصوت الزمزامات واصل لي اخر الشارع وريحة البخور والناس يلي مهجة معاهم تغني وتصفق
نحن كيف نهار الطوفه.. حتي جرتنا معروفة 
مبهانا ومبهي عشرتنا.. السر الباهي من مامتنا
مكبرني عقلي بالزينه
لانحسد لا ندير الشينه
نحن كيف نهار الطوفه.. حتي جرتنا معروفة
مبهانا ومبهي عشرتنا.. السر الباهي من مامتنا
مكبرني عقلي بالزينة
لانحسد لا ندير الشينة
حتي لو طالت خطبتهم...كيف الشيك مشت كلمتهم
سندها بوها يا نشاد
يحل ويربط فالميعاد
مكبرني عقلي بالزينه
لانحسد لا ندير الشينه
خشو العاملات ماسكين سفرة الشاهي بي الرغوة وباكوات الحلاوات وبدو تفريق على الناس
وتم شوط الزمزامات وكل حد رجع لي مكانه
كفاح:غريبه تضحكي وجوك مليح شن صاير في الدنيا؟ولا تصالحتي مع راجلك ؟
شيخه:لا طبعا
انتي عابيه بعد يلي داره في عيد زواجنا مزال بنسامحه ؟
ولا بنرجع معاه زي قبل خليه هكي نعامل فيه زي البراني
كفاح:مش عارف كيف تقدرو ياناس تعيشو هكي
انا انور كان زعل مني شويه تلقيني حاضناته
شيخه:ابتسمت بدون نفس .......تو ينفعك !
كفاح:افففف انا بجديات اعصابي توترو من المصيبه يلي قاعده في الحوش هيا
معش قااادره نسايرها
شيخه:ترتب في روجها ......المشكله ان حتى طه مش باين عليه وين
كفاح:هوا يدير المصايب وحني نتلقو
شيخه:انا لما قالت مرت ولدك قلبي طاح من مكانه
كفاح:ضحكت .....علاش خفتي تجيك ضره ولا شنو ؟
شيخه:يجوني حتى زوز كانك عليا مش مدوره
كفاح:اي اي وربي اول ما تشمي شمان بس ان في موضوع لما تهبلي
شيخه:وربي لا هي مبردك
كفاح:
_________________________________
المكان ضلام وريحة الغبرة كانت قوية هلبا والضي خاش من شقوق بسيطه في الباب
نجمه:طاح يلي في يدها وعيطت بصوووت عاااالي ......غبي انتتتتتت؟
تو متعرفش باب حوشكم ولا شنو خيررررك
نصر:تي منو انتي 
نجمه:اقلب وجهك غادي اشبح غااادي تحرررك مش لابسه
نصر:عطاها بي الضهر .....تي ع اساس نشبح في حاجه انا
نجمه:افتح الباب دير اي شي
نصر :تو انتي معزومه على عرس شن جابك لي دار الدروج ولا محتفله مع الفيران ؟!
نجمه: وهيا معصبه........مدخلكش فيا دير حل للباب وقت على العشييييي
نصر:اياه اياه شكلك من العواله بنت منو انتي؟
نجمه:بنت خالتك
نصر:استغرب ........من خالتي ؟
نجمه:انا نجمه!
نصر:نسي وتلفت ......هادي انتي ؟
نجمه:شوووووف غادي نصر يادراه
نصر:رجع عطاها بي الضهر وهوا يضحك .....ومشاء الله تعرفيني زياده
نجمه:شايفاتك كدا مره اي
نصر:حط يده على خده وهوا مبتسم .......كبرتي الله يبارك اخر مره شفتك هكي كان طولك
واشر على طول صغير بكل
نجمه:قالت بي استغراب .......شفتني وانا صغيره ؟
نصر:اي كانت امك تجينا كدا مره قبل ياما لعبتي معاي وضربتيني
نجمه:كداب مكنتش نضرب في الولاد
نصر ضحك وربي كان يحز فيا نذير منك .....مدلها يده بي المقلوب
شرفنا بنت خالتي الغالية
نجمه:سلمت عليه .......افتح الباب
نصر:دقيقه تو نتصل بي حد يجي يفتح من برا ......
نجمه:بسرررعه
نصر:اتصل كدا مره لكن الخط مباش يعلق
نزل ع الارض جبد الخيط يلي كان موصل بي قفل الباب وجبده بقوة
انفتح الباب وتوجه ضي قوي عليهم
نصر :شافلها وهوا يضحك .......والله كبرتي وصار منك يانجمه وين قريناتك زمان
نجمه:لوحت عليه الفوطه الصغيرونه يلي كانت في يدها شوف غادي يلي متتحشمش
نصر:طلع من الدار وهوا ميت ضحكككك
نجمه:خدت الكوشه وطلعت وهيا منحرجججه ان نصر شايف شكلها زمان
__________________________________
يزن:قلبه تحرك من الخلعه بعد شوفت ريحانه لابسه هكي خصوصا انها عارفها كويس قبل ويعرف طريقة لبسها !
حط في بالها انها جايه بسبب شي معين غلط !
يزن:بعد عليها ....زانتي شن اديري هنايا ؟
ريحانه:غطت وجها ومعش تكلمت
يزن:نزل نادا بوها وهوا قاعد مش فاهم يلي صاير ناسي او مكانش يعرف ان رباب صاحبة ريحانه !
نزل سمير وسند بنته وركبها السياره ويزن واقف معاه
سمير:صحيت يا ولدي
يزن:الف سلامه ارفعها المشفى طول الباين رجلها صاير فيها شي
سمير:اي اهو ماشي هيا كانت عند صاحبتها فوق تهدرز هادا وين طلعت
وربي يصلحها معرفتش تمشي في الدروج بي العبايه ربي يهديها
يزن:اهاا ......اي اي فهمت عليك
ان شاء الله ميكونش فيها شي ربي يسهلكم الطريق
سمير:يبارك فيك صحيت
يزن:الله يسلمك ......رجع يزن لي سيارته وهوا مستغرب من يلي صار
كيف ريحانه غيرت لبسها هكي ؟!
هل السبب كان العدة بس ؟! او شنو صار بزبط !
طلع بسيارته بدون ما يفكر اكتر من هكي
سمير:شن يلي صار العفو خيرك !
ريحانه:اااااه يابابا رجلي خلاص الوجع يزيد
نازله مستعجله عفست على العبايه بي الغلط وزاد خلعني يزن
سمير:مشاء الله عليه يزن الله يبارك مستغرب لتوا علاش متزوجش !
ريحانه:كانت تتألم.....منعرفش وبعدين وين بيسكنها بالله هما شقتهم هكي كبرها !
سمير:عنده استراحه فخمه الله يبارك تسوى قريب مليون
ومتنسيش الشقه يلي هازيه عليها وين شوفي حيهم الله يبارك هنايا العقار ناااار
ريحانه:ضحكت ....حشيشتك العقارات يابابا
سمير:احسن شي الانسان يشتغل على نفسه ويطلع بي عقار كويس
ريحانه:اااااخخخخ يارجلي
سمير:تحملي شويتين يادلوعه شوي ونوصلو
ريحانه:فردت ضهرها على الكرسي وحاولت تهدي نفسها
سمير:بلع ريقه وهوا يحاول يتماسك عشان يقوللها كلمتين .......ريحانه
ريحانه:وهيا تتألم .....ها بابا نعم ؟!
سمير:انا ءء انا بصراحه كنت نبي نقولك
ريحانه:شافتله ....في مشكله !
سمير:لا بس
ريحانه:بابا شن في ؟
سمير:انا .....انا فخور بيك هلبا الفتره الاخير بتغيرك يابنتي
رجف صوته ودمعو عيونه وهوا يقول ....كنت نتمنى نربيك على الصلاه والعباده هكي
لكن ربي يهدي من يشاء
ريحانه :تغيرت ملامحها من فزع وخوف لي حب ودموع.......مسحت دموع بوها وحضناته وهوا يسوق وقالت .......انت احلى اب في الدنيا ودرت كل جهدك معاي
انا يلي اسفه على كل غلط درته وكل موقف سببتلك فيه ازعاج وضايقك مني 
سمير:ابتسم والراحه كانت واضحه في وجها
_________________________________
نجم الدين:كان ماسك موبايله ومبتسم لما شاف رسالة الدكتوره
مودة:ولو نجم الدين انت تدلل في اي وقت صدقني انا موجوده ديمه ليك ولي مساعدتك ولو ؟
نجم الدين :جاوبها بي رساله ...بجديات وقفتك هادي مش ناسيها درتي اكتر من خدمتك بي هلبا
مودة:مش بينا حني بدينا صحاب خلاص!
نجم الدين:اي صح
مودة:شن رايك نعزمك بكرا على فنجان قهوة؟
نجم الدين:قام راسه من التالفون وفكر شنو يرد !
مودة:وينككك؟؟نجم؟
نجم الدين:رد عليها بي مسج قصير....وين؟
مودة:عندي في الحوش نبي نوريك مجموعة كتب رح تعجبك هلبا
تعرف انت الخدمه وهكي منبيش نتخطا حدودي فيها
نجم الدين :انحرج منها خصوصا ان يشوف فيها في مركز كبير واثقه من نفسها ومحترمه وراكزه ......ابدا مكانش يبي الشي هادا بس تحشم منها
واضطر يبعتلها .....تمام
مودة:فرحتني والله رح نكون في انتضارك على الساعه 1 الضهر وغداك معاي متاكلش
نجم الدين :ارتبك وعرق مع بعضه .....سكر شاشة التالفون وهوا مضايق من يلي يدير فيه
انور:خيره وجهك انقلب هكي ؟
نجم الدين:شي كنت نهدرز على صاحبي
انور:مسك ابتسامته.......خيره صاحبك
نجم الدين :ولا شي مشكله عاديه
نذير:تفضلو شباب ......ومدلهم السفرة
انور:يبارك فيك صحيت
نجم الدين :منور
نذير:صحتين ....وطلع من جنبهم يوزع على باقي المعزومين
نجم الدين:بلع ريقه وهوا يشوف لي خوه ....زقتلك يا انور
انور:يضحك وهوا يشوف لي الشباب يلي هايمين يرقصو ......ها شنو
نجم الدين :صاحبي يلي كان يحكيلي على مشكلته
انور:شافله بي شك ..... ان شاء الله خير
نجم الدين :متزوج واموره تمام باهي
لكن متعرف على وحده تحسها واقفه معاه لنم ومدايره جهدها ترضيه لكن مرته متجاهلاته عرفت كيف !
وفي نفس الوقت مرته تحسها مش فاهماته كويس وهوا يضلم فيها
زعمى يحاول مع مرته؟
وهل المرا يلي تساعد فيه غلط انه يتواصل معاها !
انور:ماسك ضحتك بسيف.....اممممممم
قول لي صاحبك ياخد باله من مرته وولده
قصدي صغاره يكون احسن لان اي علاقه خارجيه رح ادمر زواجه مهما كانت طبيعة علاقته
ميقولش لا فاهمتني ولا تساعد فيا لو يبي حاجه يمشي يطلبها من مرته يكون احسن بي الحلال وتساعد زواجه ينجح
نجم الدين:تغيرت ملامحه .....اي اي تمام تو نقوله
انور:قوله صاحبك يدير باله ع روحه باهي
نجم الدين:به به خلاص
انور:لف وجها وضحك بدون ما يوري لي خوه
_____________________________________
رباب:كانت يديها ترجف والتوتر ماليها 
سمعت الصوت يلي ليها سنين خاطرها تسمعه وبدت دموعها تنزل وتبكي بي شهقه
خوله:الووو الوو منو ؟
راهو الرقم هادا بنعطيه لي زوجي ليك شهور تتصل على ها الحال الوووو
رباب:جاوبت بصوت فيه رجفه......ماما
ماما انا رباب
وبكت من وسط قلبها
هدووووووء وصمت ومفيش غير صوت البكي والشهقاتبينهم الاثنين
بينهم الاثنينخوله:وينك وينك يابنتي كسرتيلي ضهري وخليتي النوم طاير من عيوني
وينك الله يسامحك حرام عليك شن درنالك
رباب:بكت اكتر وردت.....سامحيني يا امي
والله غصبا عني وربي اسفه مكنتش يبي يصير هادا كله
استاحشت حوشنا واستاحشتك ياماما قلبي بيتقطع
انا نموت كل يوم الف موته يا امي
خوله:مردتش عليها غير بصوت بكي
نشف الدم من عروقها لما سمعت صوت بوها ينادي في امها من بعيد
سكرت الخط بسرعه وهيا مرعوبه
مسحت دموعها وكانت مرتاحه بسمعة صوت امها
غسلت وجها وقامت راسها ع المرايا وهيا تمسح في وجها بس نصدمت لما شافت للمرايا
تلفتت بسرعه .......شنو ادير هنايا ؟
طه:يشوفلها بنضرة حب......هادا استقبال بالله ؟
......هادا استقبال بالله ؟رباب:رجعت الدموع لي عيونها .....علاش درت فيا هكي يا حقير
دفاته بقوة.....علاااااااش ياتافه
طه:حضنها على الرغم من انها كانت منهاااااارة وتضرب فيه بقوة
رباب:انهارت بكي
طه:اشششش عندي ليك خبر رح يفرحك هلبا تعالي تعالي قعمزي هنايا
وقعمزها على الكرسي يلي كان في الممر
رباب:مسحت دموعها وهيا تحاول تقوي نفسها
طه:قام راسها بيده .......حبيبتي انا خلاص
بنبدا ليك بس تمام؟
يعني يعني انءء....
انا وياك رح نتزوجو
حتى شوفي .....طلع باسبورت رباب
طه:قدرت نجيبه بألف طريقه انا وياك رح نتزوجو ونسافرو بعيييييد
نديرو عيله ونجيبو صغار انا مش رح نخليك ياقلبي انتي
رباب:كانت الشهقه مستمره معاها بس وقفت بكي ......انا منبيش طه
انا رح نهرب لي مكان مش رح تقدر توصله منبيش نعيش معاك بعد يلي درته فيا
فوق من انك حرمتني من اهلي خديت شرفي ياحقير
اطمن مش رح نطلب منك تطلع من شقتك انا يلي بنطلع بعد من عليا
وناضت
طه:قعد في مكانه شويه سارح وهوا يفكر كأن امله خاب فيها
كأن مفيش شي يبيه من ها الدنيا غيرها بس مخداهاش بي طريقه الصح !
مجاش من البداية من الباب وطلبها زي اي راجل
هرب بيها وخلاها زي اللعبه عنده
خلاها معندهاش ولا اي حد في الدنيا غيره
ولا اي مكان غير شقته !
ولا اي حد يصرف عليها غيره .......يعني هكي ضمن خلاص انه رح تقعد ملكه بطريقة غلط
ناض من مكانه وهوا معصصصصصصب
لحقها وكانت موجوده في غرفة نومها فاتحه الدولاب واطلع في حوايجها
طه:شنو اديري ؟!
رباب:عيونك يخدمو اعتقد ......بنلم كل شي يخصني وماشيه شقة نجمه
انا الحاله يلي فيها معش نقدرها فوتني طه فوتني
والله لاتسامحك على حياتي يلي خربتها
طه:تمام ديري يلي تعرفيه يصلح
رباب:عطاته بي الضهر وكملت تلم في باقي حوايجها
لين فجأه تسمع في مفتاح الباب طق مرتين ولما تلفتت عرفت ان طه حبسها
__________________________________
تمت السهريه وروحو الزمزامات مقعدش غير صحاب العرس بس في الخيمه
البعض منهم غير ملابسه ولبس بجامات النوم
والباقي قاعدين بي مكياجهم وملابسهم بس مقعمزين يهدرزو في الخيمه
ندى:خليييكم شوي 
شيخه:وقت حبيبتي خلاص الساعه 1 ره
كفاح:اي والله البنات خليتهم بكرا عندهم امتحان
شيخه:نزلت الطرف يلي يغطي وجها من العباية ......هي تصبحي ع خير
ندى:تلاقو الخير
طلعو كفاح وشيخه مع بعض وندى ركبت لي حوشها
سكرت الباب غيرت ملابسها ورتبت شعرها بدون ما تمسح ولا اي شي من مكياجها
قعدت تمشي وتجي في غرفتها بتوتر اخر شي قررت اضم حوست لبسها واكسسواراتها يلي كانت معبيه الغرفه
على خشة نذير يلي كانت تراجي فيه يركب بي الساعه والدقيقه وقفت على طرف السرير وعيونها على باب الغرفة
نذير:السلام عليكم
ندى:وعليكم السلام اهلين
نذير:طلع فوطة الدوش بدون مايهتم لي شكلها ولا اي شي
ندى:تعصبت شويه .....انا بنبات لوطه
نذير:اي عادي حتى انا بايت مع الشباب في الخيمة
ندى:اهااا
بلعت ريقها .......اممم يعني انت رح ترتاح في الخيمه ؟
متحسش انه نو هلبا !
نذير:تلفتلها وشافها .....لا عادي اصلا معتقدش فيه نوم اليوم رح يفوتوه كله في الهدرزة والسهور
ندى:شافتله بخيبت امل .....اهااا
نذير:اتجه للحمام
ندى:قالت بدون ما تحس ......مقلتليش كيف طالعه !
نذير:لف وجها ليها وهوا يشوفلها ......حلوه الله يبارك
وخش للحمام بدون ما يضيف ولا كلمه
ندى:نفسيتها نهارت
ومعش فاهمه شنو يلي تغير !
شنو يلي صار وليش يتعامل معاها هكي فجآه
لو جينا بي العقل وحكينا في موضوع ندى
ندى كانت تتمنى يبتعد عليها ويخليها في حالها ومعش لسانه يخاطب لسانها اصلا
لكن يلي صاير توا شنو ؟
انا نشرحلكم شنو يلي صاير ....
من عوايد البنت لما تضمن ان الراجل يحبها تدلل عليه واحيانا تكرها وتنخنق بي اهتمامه لما تكون معندهاش اي مشاعر اتجاها !!
لكن يوم تفقد الاهتمام يلي تعودت عليه هنايا رح تنجن حرفيا
والشي هادا ينطبق على المراءه والراجل
رح تحاول بي اي طريقه ترجع الاهتمام يلي كان يقدملها فيه
لان عدم الاهتمام فجآه بيها طيح ثقتها بنفسها هلبا وخلاها في سؤال داااائم .....شنو يلي تغير ؟
_______________________________________
نجم الدين :ليش تمسحي في المكياج ؟
شيخه:لاني بنرقد ......وانت اصلا تكره المكياج ولا نسيت ؟
نجم الدين:ابتسم بهدوء.....شن رايك تخليه
بدلي ملابسك وتعالي جنبي
شيخه :تلفتت وهيا مقعمزة على كرسي الزيانه .........والله ؟
نجم انت راضي ع روحك هكي ؟
كل الامور تحسابها تنحل بي ليله بس نرقد فيها جنبك !؟
ياريت تثبت ع شخصيه لان رح يجي يوم ومعش ح تلقاني جنبك لو قعدت هكي
يا اما تختار وتكمل في اسلوبك الكويس معاي وتستمر معاي زي الشهر يلي عيشتني فيه في عالم تاني
يا اما تقعد قاسي زي ما عرفتك وقتها مستحيل نلوم عليك صدقني
لكن ولا عمري نسمحلك تلعب بي مشاعري بي الطريقه السخيفه هادي
نجم الدين :سكت بعد الكلام يلي طلع من شيخه لان ببساطه كل كلمه قالتها كانت عندها الحق فيها
والسكوت هادا قاطعه اتصال من الدكتوره يلي خلاته يطلع من غرفة نومه بدون ميرد على شيخه ولا كلمه
_________________________________
انور:شنو ادوري ؟
كفاح:اففف ياربي قالبه الدنيا على خاتمي الدهب يلي خديته في عرس خوك
انور:سيورك تلقيه دوري كويس
كفاح :انا متأكده اخر مره كان في الشنطه هنايا .........اففففففففف وين بيطير
انور :مسكها من يديها الاثنين
غير تعالي ياقلبي انتي الخاتم تو تلقيه خليني نعبي عيوني منك
شن ها الجمال والزين كله فالحه اديري في الجو هادا غير للعراس
علاش مديريشي لي راجلك حبيبك ولا ميستاهلش هااااا؟؟
كفاح:ههههههههه انور مش وقتك خليني نلاقي الخاتم م........
انور :قاطعها غير تعالي توا بعدين ندور معاك
وتسكر الضي
الباين ان الثنائي الوحيد يلي كان سعيد الليله هادي هما كفاح وراجلها
___________________________________
الساعه 3 في الليل:-
كل بناويت وكناين العيله كانو ساهرين في الخيمه
هدرزه وضحك وشاهي وقهوة في عز الليل وطبعا ميحلاش السهور الا في الاعراس زي العاده
نادا صوت من بعيد وندى فز قلبها واستغربت شنو جاب راجلها في ساعه متأخره هكي
بس قبل ما تنوض تنصدم بي بنت من العيله طلعت طلللقه تجري لي نذير بدون ما تحط ع راسها ولا شي
كأنها مستشوره شعرها خصيصا لي موقف وشي زي هادا
الضحك والدلع وتلبية طلبات نذير كانت واااااضحه هلبا واي حد ياخد باله من يلي قاعد يصير
الموجودين كلهم شافو لي ندى وخدوها بي ضحكه ولعبة ان البنت صغيره وولد عمها عادي ومن ها الكلام
بس البنت ابدا مكانتش صغيره وتصرفاتها واااضحه
ناضت ندى طلعت لي راجلها ووقفت بدون ما تتكلم
نذير:خيرك؟في شي
ندى:والله بنسألك انت .شن يلي جايبك في ها الليل لي خيمة نساوين ؟
نذير:عقد حواجبه بي استغراب من تصرفها .....جيت بناخد اكواب اميه للاولاد
ندى:لما تب.........
قاطعتهم البنت بضحكها
لينا:تفضل نذير
ندى:كانت مركزه في البنت
شعرها المطلوق وبيجامتها المفصله الزمالطو والبارفان كل شي فيها مستفز
نذير:مشكوره لينا تعبناك
لينا:ايااااااه عاد نذير تعرفني منحباش الاسم هادا مبردك
نذير:ضحك ........منوره لونا خلاص متزعليش
لينا :ايوااااه
ندى:كانت تشوفلهم الاثنين بقرف
وتعصبببببت لما نذير خدي الميه ومعبرهاش بي ولا تصرف او كلمه ومشي
نجمه:كانت قايمه شعرها بطريقه اضحك لانه معبي مثبت وقاعده مغسلتاش
ولعت مكيف الغرفه ع اقصى حد ورتبت كل الحلويات قدامه
سكرت الغرفه وطلعت
نصر:شن اديري في حوشي يا ابله ؟
نجمه:انخلعت وقالت بي فزع ..........ووووه شن جابك
نصر:مات بي الضحك على منضر شعرها وقال ........شنو القنفود يلي فوق راسك هوا طالع منضرك زي الهنود الحمر
نجمه:لبست البرنوص ودرقت كل شعرها .......وانت حشيشتك الشبح للبنات وشعرهم
نصر:ع اساس انك بنت يعني ؟
كان تشوفي منضرك وانتي تلعبي في الكوره زمان صدقيني رح تغيري رايك
نجمه:الحلويات داخل عادتهم بي الطرف نلقى طرف ناقص نعدمك سامعني ؟؟
نصر:كمل ضحكه ونجمه طلعت من شقته والابتسامه على وجها من جوه وكلامه
____________________________________
ثاني يوم 
ها اليوم كانت البروده فيه تضرب ليه ليه
والجو يرد الروح والشمس خفيفه
كأن كل الاجواء متسخره لي حفلة هديل
زي اي عرس في ها الوقت كان الكل يجهز في نفسه ويستعد عشان لقب احلى وحده في الحفله
نجم الدين :طق الباب وهوا ابدا مش راضي على المكان يلي فيه
وكان يسأل في نفسه
انا شنو ندير هنايا ؟!
انفتح الباب وقابلاته الدكتوره على لبس غير المعتاد
كانت لابسه فستان حرايري على اللون البينك الفاقع قايمه شعرها بي تسريحه خفيفه ومكياجها صارخ زي العاده !
مودة:يا مرحبتين
تفضل
نجم الدين:ارتبك ولاخر لحضه كان متردد ......خش وهوا يبلع في ريقه من التوتر
موده شنو هادا ؟
نجم الدين :مدلها باكو حلويات والتوتر باين عليه ......شي بسيط للقهوة
موده :ااااه بجديات شكراااا هلبا كلك ذوق
تفضل خود راحتك
خش نجم الدين وهوا مركز في تفاصيل حوشها وداخله سؤال ....زليش عايشه بروحها ؟
مودة:هادا حوشي المتواضع
نجم الدين:لفت انتباها حيط معبي صور لي فريق الاهلي وكل اللاعبين يلي يحبهم
ابتسم ع جنب وهوا يقول ........طلعتي زيني تشجعي في الاهلي ؟
مودة:عقدت حواجبها وضحكت شن ها الصدفه ؟
نجم الدين :ضحك .........اي والله
مودة:تفضل معاي نوريك
دخلاته موده لي غرفة مكتب
وكان في رفوف كبيره معبية كتب متنوعه وقالت
مودة:الغرفه هادي كانت لي زوجي الله يرحمه
طبعا نسيت نقولك .....انا ارمله وعايشه بروحي لان اهلي برا البلد مقيمين مرا مرا نمشيلهم ويزورو فيا
نجم الدين :كويس حلو
مودة:ها الكتب كلها تخيل تحكي ع شي واحد بس
نجم الدين :بعدم فهم ......على شنو تحكي؟
مودة :لمعت عيونها ........ع الحب
احيانا نحبو اشخاص يكونو مش حاسين بينا ابدا
نجم الدين :ببرائه ........متزوجين قصدك ؟
مودة:مش شرط
نجم نبي نعترفلك بي شي وهادا يلي خلاني نجيبك هنايا
نجم الدين :عقد حواجبه بي استغراب ......ان شاء الله خير
مودة:انا
بصراحه انا ...........
وقاطعهم صوت التالفون ..........
نجم الدين :لحضه بس بوي منقدرش نفوته
مودة:اوكي ولا يهمك
نجم الدين :رد على تليفونه وتغيرت ملامحه وهوا يقول ......تم هي جاي جاي
وطلع بسرعه وهوا يعتدر من موده ومخلالهاش حتى فرصه ترد
____________________________________
جميله:حطت زوز مخاد تحت رجل ريحانه يلي كانت ملفوفه بي شاش ابيض
ريحانه:اااااه ياماما شوي شوي
جميله:ضحكت .....ززهادي مره بس طلعتي فيها هكي دارت فيك ؟
ريحانه:اي اي اضحكي من حقك
جميله:وين بنتي القويه وين ؟
ريحانه:غير نكمل العده متعي تو نوريكم
كاثرين:ماما في راجل برا يبي استاذ سمير
جميله :بدون اهتمام......وبري قوليله شنو جايتيني انا
كاثرين حاضر
ريحانه:شنو ضيوف بابا بدو يجو في الوقت هادا ؟
جميله:قعمز وخدت فنجان القهوه .......والله بوك ومعارفه الغريبه فكيني منه ترا مستحيل يدير صحاب طبيعيين
ريحانه :
سمير:تفاجأ اول ما شاف نصر مقعمز يراجي فيه في المربوعه
سلم عليه وقعمز وهوا مذهول بدي سؤاله
سمير:خير ؟
ان شاء الله خير ياولدي ؟محتاج شي ؟
نصر :ابتسم ...لا ياعمي يبارك فيك خيرك سابق
كيف حال ريحانه وباقي العيله
سمير:علامات الاستغراب على وجها
الحمد الله تمام
نصر:زي ما تعرف عمي انا ها الايام مشغول بي عرس اختي ومعنديش وقت بس مقدرتش نطول اكتر من هكي
سمير:نحا نضراته .....زفي شنو ؟
نصر:حط شنطة مسكره ع الارض ........هادي كل فلوسك يلي عطيتهولي قبل مقابل ناخد ريحانه
معنديش اي حق اني ناخدها منك ولا عندها علاش تقعد عندي ونعتذر منك هلبا على تصرفي يلي كان وقح معاك
سمير:قال وهوا مذهول ........... الله يبارك
الله اكبر ياربي
شن ها التغير يلي حل عليك وعلي بنتي شنو ها الهدايه يلي نزلت عليكم الله يبارك
نصر:ابتسم .......اكيد لعند امتى بنقعدو طايشين
وتوا اسمحلي عمي لان والله مشغول بس محبيتش نعطل اكتر من هكي
وسامحنيلاني جيت بدون موعد
سمير:تشرف ياولدي وتأنس وتبي اي حاجه ادلل
نصر:يبارك فيك هي السلام عليكم
طلع نصر ومخلي سمير في صدمه من يلي قاعد يصير
قبل بنته وتوا نصر؟!
____________________________
نجمه:ركبت السياره .........السلام عليكم
كريمة:وعليكم السلام بنتي نجمه قوليله يزن مكان المزين وين
يزن:شافلها في المرايا وهوا مش طايقها
نجمه:كمل القدام وامشي زي ما نقولك ......وابتسمت بي مكر
يزن:ادوي باهي
نجمه:قامت حاجبها وعلاش شن قلت
كريمه :هي ياسر انت وياها عاد مش صغار باش تقعدو تتعاركو
يزن:طلع بي السياره وهوا يسطرب من كثر الاعصاب
نجمه:حجزت من بكري ياخالتي ره تو نلقو دورنا فاضي ولا يهمك
كريمه:باهي مليح بكل اهم شي نكملو قبل المغرب بس
يزن:خطي شعرك الطالع ونزلي كمامات العبايه يلي راكبين للمرفق بلا عار
نجمه:قلبت عيونها عليه ومردتش
كريمه تلفتتلها وبهدوء.....سلم بنتي اسمعي كلامه يزن هكي ميحبش الحاجات هيا معليشي سايريه
نجمه:حاضر ياخالتي ع خاطرك بس
يزن :شافلها في المرايا بنضره حاره
ونجمه ك العاده تستفز فيه
ندى:نزلت استقبلت المزينه سلمت عليها ورحبت بيها ودخلتها لي حوش العرس
ولما جت بتركب لي شقتها عشان تبدا فيها وقفها وليد صغير من صغار العرس وهوا حامل زرف في يده ويقول
عمتي عمتي هادا جابهولي عمي راجل قالي عطيه لناس داخل
ندى:خدت الزرف وهيا مستغربه واول ما فتحاته هنايا كانت الصدمه
نجم الدين :خش للمشفى زي المجنون يدور
لين اخيرا لمحهم من بعيد وقف سأل بوه شن يلي صاير وانصدم اكتر بي الخبر يلي عرفه .......يتبع
