رواية خدعتني بحبها الفصل الحادي عشر 11 بقلم سلمي تامر
وقف بصدمه وهو شايف مراته على حافة الانتحا..ر
جرى بسرعة البرق على السطح علشان يلحق ينقذها من اللي هتعمله في نفسها
اول ما وصل لقاها واقفه مدياله ضهرها مشى بخطوات بطيئه واتكلم بهدوء علشان ميخضهاش وتقع
دورت وشها ليه وهي واقفه على السور وبصتله بدموع ووجه شاحب
_صدقني الموت ارحملي من اللي انا فيه ده ياكرم
انا مش متخيله حياتي من بعده ده ابويا فاهم يعني ايه ابويا
اكتر حد حبيته في حياتي واكتر حد حبني برضو
هو كان معوضني عن امي اللي ماتت من وانا صغيره وبقا ليا الاب والام والصاحب وكل حاجه
عمره ما رفضلي طلب وكان دايما واقف في ضهري وبيعمل اي حاجه انا عايزاها وخلاني معتمده عليه في كل كبيرة وصغيره
خلاني حرفيا مقدرش اعيش من غيره
انا مش متخيله حياتي من غيره
فكرة اني هصحى بعد كده من النوم واوجه العالم وهو مش فيه بترعبني
انا خايفه ياكرم...خايفه اعيش حياتي من غير ما يكون موجود وواقف جنبي
انا ضهري اتكس.ر من بعده
الحل اني اروحله وابقى معاه واخلص من كل الخوف اللي انا فيه ده
حبيبة قابت كل ده وكرم كان مستغل الفرصه وبيقرب واحده واحده علشان يوصل للمكان اللي هي فيه
_طب وفكرك ان هو هيبقى مبسوط لما تنتح.ري ياحبيبة
طب مفكرتيش في اختك اللي بقا ملهاش غيرك دلوقت ولو انتِ كمان مشيتي ايه اللي هيحصل فيها
ابتسمت بسخريه وحزن
_مفيش حاجه هتحصل ياكرم من بعدي
كل حاجه هتفضل زي ما هي وكل اللي حواليا هيعيشوا حياتهم طبيعي ومفيش حد هيتأثر من بعدي
انا محدش بيحبني غير بابا وبابا خلاص راح
حس انه عايز يصرخ بحبه ليها ويقولها انتِ ليه مش شايفاني ولا حاسه بيا وبحبي ليكي وانه مستعد يضحي بعمره كله علشان سعادتها لكن كبريائه منعه طبعا واستخدم اقوى طريقه علشان يمنعها وهي الدين واتكلم بهدوء وجدية مصطنعه
_طب ياحبيبة ارمي نفسك..يلا مالك بتبصيلي بإستغراب ليه مش ده اللي انتِ عايزاه
بس هتخسري آخرتك ليه
هتغضبي ربنا بحاجه زي دي ليه
بدل ما تقربي منه وتدعي لأبوكي بالرحمه وانه يرزقه الجنه تعملي كده!
عارفه
انتِ مش لاقية حل للي انتِ فيه ده صح
انا بقا عندي الحل
ترجعي لربك
تصلي وتقري قرآن وقسما بالله هتحسي براحه محستيش زيها قبل كده وهتقوي وهتصبري
نظراتها شردت بتفكير وكرم استغل الفرصه وقرب منها شدها عليه وقعت في حضنه
بس اللي استغربه انها مبعدتش عنه واتمسكت فيه وهي بتدفن وشها في صدره وبتعيط بصوت واطي
بادلها الحضن واتكلم بهمس وحنان
_ششش اهدي...ادعيله بالرحمه ياحبيبة هو بقا في مكان احسن
صدقيني مش هيبقى مرتاح باللي بتعمليه ده
_مش قادرة ياكرم اتقبل الفكره..انا هم.وت من الحزن
بعدها عنه ومسح دموعها
_انا مجرب احساسك ده وعارف يعني ايه يتم الاب وصدقيني عمري ما نسيته
عنيه دمعت واتكلم بإبتسامه فخورة
_بابا الله يرحمه كان احسن راجل في الدنيا كلها
وكان الناس كلها بتحسد امي لأنها اتجوزت راجل زيه
وفي كان راجع من شغله بدري علشان يوفي بوعده انه يخرجني لأني كنت ساعتها عندي ١٠ سنين وبحب الخروجات والتنطيط و
كنت لابس وواقف في البلكونه ومستنيه ييجي علشان نخرج وفضلت واقف ساعه والتانيه لحد ما لقيت صاحبه داخل شارعنا وباين على وشه الزعل والحزن
طلع بيتنا وامي فتحتله وبعدها سمعت صريخ وعياط
جريت بخضه اشوف فيه ايه لقيتها بتقولي ابوك مات ياكرم ابوك عمل حادثه بالعربيه وراح فيها وسابنا
مستوعبتش الفكره وفضلت واقف في البلكونه مستنيه ييجي ورافض اتحرك مهما يعملوا
كنت بفضل قاعد قدام الباب مستني صوت تكة المفتاح في الباب ودخلته عليا وهو جايبلي كل اللي نفسي فيه
كنت مستني يوم اجازته لما ننزل نصلي الجمعه وبعدها نروح نجيب اكل ونتغدا وبعدها يفضل يلعب معايا كورة ويخرجني
ذكريات كتير مستعد اقعد احكيهالك لحد السنه الجايه وعمري ما نسيتها ولا هنساها ولا قادر لحد دلوقت اتعافى منها وهفضل مكسو.ر طول عمري بسبب بعده عني
لكن موقفتش حياتي ومستسلمتش لما استوعبت انه خلاص مشى ومش هيرجع نهائي
اهتميت بتعليمي وبدأت اشتغل واصرف على نفسي وعلى امي ومرضيتش ابدا اخليها تتشحطط في اي شغلانه خصوصاً انها كانت جميله جدا ومطمع للي حواليها
موت الاب او الام بيفضل سايب اثر سلبي في نفسيتنا العمر كله
بس الشاطر انه يتغلب على ده ويحاول يكمل حياته ويخليهم يرتاحوا في تربتهم وميتعذبوش لأنهم بيكونوا حاسين بينا وشايفينا
ابوكي هيفضل في قلبك وعقلك وازعلي عليه وعيطي براحتك
بس حطي في دماغك انك لازم تفوقي من اللي انتِ فيه ده يا حبيبة وتقوي
حبيبة اتأثرت جداً بقصته ودموعها زادت
لاحظ وشها الاصفر سألها بإهتمام
_انتِ مكلتيش طبعا صح
نزلت عنيها في الارض بإحراج
سحبها من ايديها ونزل اوضتها وخلاها تقعد على السرير وبعدها نزل المطبخ وطلع تاني بعدها بخمس دقايق بصنيه ودوا ومايه وحطها قدامها
_لو بتحبي ابوكي بجد متعمليش في نفسك كده وكلي ياحبيبة
_مش قادرة ياكرم
_علشان خاطري..ده اول طلب اطلبه منك في حياتي
هتكسفيني
بصتله بتردد وبعدها بدأت تاكل حاجات بسيطه واخدت المهدئ اللي جابهولها
نامت عالسرير وكرم بصلها بحنان
_نامي دلوقت وحاولي تريحي اعصابك وانا هجيلك بكره
خلي بالك من نفسك ياحبيبه
كان هيمشي بس مسكت ايده واتكلمت بإمتنان
_شكرا ياكرم
ابتسم بهدوء ومشى من قدامها وحبيبة راحت في النوم
_______________________
_منار..تعالي ياحبيبتي عايزاكي
راحت منار لمرات عمها اللي بتناديها وسألتها بإستفسار
_نعم ياطنط
سميحه(ام سيف) بخبث:
_هو انتِ ياحبيبتي حاسه من ناحية سيف بحاجه
منار نظراتها اتوترت واتكلمت بقوة مصطنعه
_حاجه زي ايه بالظبط ياطنط معلش مش فاهمة
_يعني..معجبه مثلا..بتحبيه
قاطعتها منار بجدية مصطنعه
_لأ طبعا ياطنط سميحه وعمري ما هحس بحاجه ناحيته سيف زيه زي اخويا بالظبط
وبعدين متنسيش انه كان بيحب حبيبة وهيتجوزها وتقريباً بيحبها لغاية دلوقت يعني عمره ما هيفكر فيا ولا هفكر فيه
وبعدين مش وقت كلام حضرتك ده دلوقت ده انا دموعي لسه منشفتش على ابويا يعني
فهمت سميحه انها بتخفي مشاعرها ناحية ابنها بسبب وجود حبيبه علشان كده اتكلمت بود مصطنع
_طيب ياحبيبتي معلش فهمتك غلط ومش قصدي اضايقك
شوفي كنتي بتعملي ايه
مشيت منار من قدامها وسميحه قعدت على الكرسي بغضب واتكلمت بغضب في سرها
_انا عارفه انتِ قولتي كده بسبب مين
وعارفه كمان ان ابني لسه بيحبها وممكن في أي لحظة يرجعلها وينسى انها شكيت فيه واتجوزت غيره علشان تغيظه وتقهره
بس لأ..ده على جث.تي
فكرت شويه وابتسمت بشر وهي بتطلع تليفونها وجابت رقم خال حبيبة ومنار اللي عايش في الصعيد
_الو..مهران بيه الحقني
حبيبة بنت اختك عيارها فبت وبقيت فاج.رة ولازم تيجي تتصرف معاها
___________________
رجع كرم البيت ودخل بهدوء وهو حزين جداً على حبيبة
جريت سهيلة على حضنه اول ما شافته
_حمدالله على السلامه ياحبيبي
جبر نفسه انه يبتسم في وشها لأنه عارف ان ملهاش ذنب في اي حاجه واتكلم بهدوء
_الله يسلمك ياسهيلة
_احطلك تاكل.. شكلك تعبان اوي مالك
_والد حبيبة مات
متأثرتش نهائي واتكلمت بشفقه مصطنعه
_ياحول الله يارب..ربنا يرحمه
_امين
_طب بص روح غير هدومك وانا هحطلك الاكل ونتغدى مع بعض
_مش جعان والله يا سهيلة كلي انتِ
قربت منه وحاوطت رقبته وهي بتبصله بإغراء وصوت انوثي ناعم
_اخص عليك يا كرميلا يعني ابقى واقفة طول اليوم بجهزلك في الاكل علشان يعجبك وفي الاخر تقولي مش عايز
بعدها عنه بهدوء واتكلم بنبرة عاديه
_طيب ياسهيله حطي عقبال ما اغير هدومي مفيش مشكله
باسته من خده واتكلمت بدلع
_في ثواني يا عيوني وهتلاقي الاكل قدامك
بعدت عنه ودخلت قدامه المطبخ وهو بصلها بمشاعر متلغبطه وحاول يحس ناحيتها بأي حاجه لكن للأسف حبيبة واخده جزء كبير جداً من عقله وقلبه وبلمسه صغيرة منها بتقدر تأثر فيه لدرجه كبيره
حاول يطرد الافكار دي من دماغه ويركز مع سهيله اللي بتحبه من قلبها وهمها راحته
سمع صوت رسايل كتير جايلها من تليفونها
بص للتليفون بعدم اهتمام لقى مكتوب فيها
"يخربيتك ياسهيلة..يعني حطيتي لجوزك مخدر علشان يتصرف بعدم وعي ويطلق مراته التانيه..ده انتِ ست قادرة والنبي تعالي علميني "
برق عنيه بصدمه و...
