رواية هوس العشق الفصل الثاني 2 بقلم سوليية نصار

رواية هوس العشق الفصل الثاني 2 بقلم سوليية نصار

-جني انتي بتقولي ايه ؟!

قالها لي باسل وهو مصدوم وبيبعدني عنه

بصتله وقولت بزعل :

-انت قولت انك بتحبني ...قولت اني عنينا اجمل عيون شوفتها قولت هتتجوزني

-بس أنا كنت بهزر. ...أنا

مخلتهوش يكمل كلامه وقعدت اصرخ فيه وأبكي:

-بتهزر ...تعلقني بيك وبتقول بتهزر....تخليني احبك وتقول بتهزر ....ترسملي احلام وتقول هزار ...انت ايه ....

انها*رت وقعدت ابكي واصرخ ...بصلي بخوف وبعدين مسكني وقال:

-وانا بحبك....بحبك يا جني ...اسف يا حبيبتي

-متتجوزهاش ابوس ايديك ...لو عايزني اهرب معاك أنا موافقة ....

فضل يمسح دموعي ويقول :

-اهدي بس

-مش ههدي لا ...لازم نهرب ...مش هيسمحولي اتجوزك هنا عشان فرح ...أنا مستعدة اتخلي عن العيلة عشان خاطرك ...

سكت للحظات وهو بيبصلي بتوتر

حضنته تاني وقولت:

-باسل هحبك اكتر منها ...صدقني هتبقي مبسوط معايا اكتر ...هحترمك واقدرك ...لكن ابوس ايديك متتخلاش عني انا ممكن اموت ....خلينا نهرب من هنا ونروح بعيد ....انت كده كده دكتور وانا هشتغل وهنأسس حياتنا بعيد عنهم ...وهنجيب ولاد كتير هديلهم الحب اللي ملقتهوش في حياتي ها قولت ايه

بعدني عنه وطبطب عليا وقال:

-حاضر هنهرب

-نهرب دلوقتي ...

مسك أيدي وقال بهدوء :

-روحي دلوقتي نامي ونهرب بكرة بس عشان اجهز حاجاتي يا جني اكيد مش هروح كده من غير حاجة

بصتله وقولت بتوتر :

-بس هنهرب بالليل صح

-اكيد ...

ضحكت وانا بمسح دموعي وقولت:

-انا بحبك اوووي بجد يا باسل والله هتبقي مبسوط معايا ...أنا كنت عارفة انك مش بتحبها وأنك كنت عايز بس تخليني اغير. ..

-صح كنت عايزك تغيري

قالها وهو سرحان ابتسمت ليه وقولت:

-انا مش هاخد حاجات كتير ...هلم هدومي بس ...

-لا لا .

قاطعني بسرعة بعدين كمل :

-متاخديش من هنا حاجة أنا هشتريلك اللي انتي عايزاه

-يكون احسن برضه ...أنا مش عايزاهم يشوفوا أنهم متفضلين عليا بحاجة ...

ابتسمت بحزن وقولت:

-انا فعلا بحبهم وبحب فرح ...بس هي بتحاول تسر*قك مني يا باسل وانا مش هسمح بكده ابدا

-ولا أنا كمان هسمح بكدة ابدا ...يالا حبيبتي روحي نامي ....اليوم بكرة حافل ...

حضنته جامد وبعدين روحت أوضتي ....نومت علي سريري وانا فرحانة ...ياااه طلع بيحبني ...مطلعش بيكدب...نومت وانا مبسوطة ...

طلع النهار وصحيت وانا كلي نشاط ولقيت باسل في اوضتي

-باسل

-اهدي يا جني...ويالا البسي بسرعة رايحين مشوار

-رايحين فين

-انتي مش عايزة تهر*بي معايا ؟!

هزيت راسي وقولت:

-ايوة كده طبعا

-يبقي البسي وتعالي ...

.......

خرجنا أنا وباسل ...اخدني لمكان غريب لما قريب اليافطة لقيتها عيادة لدكتور نفسي ...

-باسل

قولتها بصدمة ...مسك أيدي وقال:

-ثقي فيا ممكن ...أنا بحبك

روحت معاه وانا خايفة ....

دخلت اوضة الدكتور وقعدت وانا خايفة ....ابتسم الدكتور في وشي وقال:

-ازيك يا جني اخبارك ايه ؟!

-الحمدلله

قال الدكتور وهو بيلبس نضارته :

-تقدري تقولي عمرك قد ايه ..

بصتله بحيرة بس قولت:

-عندي اتنين وعشرين سنة ...

بصلي باسل بصدمة والدكتور كمان بس ابتسم بهدوء وقال:

-بس الحقيقة يا جني انك عندك اتناشر سنة بس !!!

يتبع

الثالث من هنا

تعديل المقال