رواية خطوة مميتة 7 الفصل السابع بقلم بنوتة الشيخ
وسط المربوعه والعيله كلهم ملتمين عشان فيه الف موضوع بينفتح
كانت هديل مقعمزه بي وجها التاااعب والاصفر ولافه ع نفسها بطانيه خفيفه
وجنبها امها وخوها مصعب يلي ميبيش يشوف في عيونها كنهاذا بيقتلها 
على بعد خطوات منهم مقعمز سيف وامه فجره يلي كانت بتهببببل من الشي يلي داره سيف
وسيف عيونه في ريان طول الوقت
اما ريان كل ماتذكر كلام ادم ينتفض جسمها وتبعد عيونها من على سيف
في مقدمة المربوعه مقعمز يعقوب وهوا يراجي في القرارات يلي بتصير
كأن اللحضه هادي يراجي فيها قدااااش ليه
حط ادم يديه على الطاوله وهوا واقف كان منزل عيونه كأنه متحشم من الكلام يلي بيقوله 
قام عيونه وشاف لي خوه بي تقزز
ادم:قبل كل شي بنعتدر لي عمي على الشي الحقير يلي داره خوي
خوي العيل يلي مباش يكبر ولا رح يكبر اصلا
سيف:حرقاته الكلمه وناض يعيط ....حسستوني انا بس الغالط...باهي هياااااا
هيا يلي طول الوقت تدحنس عليا ومش مخليتني في حالي
هديل:طاحو دموعها وهيا تشوفله مصدومه وفجره تقعمز في سيف تهدي فيه وسكتاته
ادم:كمل كلامه ببرود ....وزي ماصارت الغلطه تتصلح
مفيش شي ميتصلحش
مصعب:ماسك يده ع شكل قبضه ويحاول يتحكم في اعصابه
سيف:قارن حواجبه بعدم فهم ...شنو؟!
ادم:شاف لي ريان بعدين غير عيونه لي سيف ....قلنا تتصلح الغلطه
العيله كلها سمعت بيلي صار ولازم نغمو الموضوع قبل ما يطلع
رغم ان الوالد متوفي ليه اسبوع بس
لكن مع هاذا الزواج لازم يصير قبل ماتصيير فضايح حني في غنا عليها
سيف:وقف وهوا يضحك بصدمه...زواج ؟
اي زواج تحكي عليه انت !!
ادم:تجاهل كلام خوه وشاف لي عمه ....حاليا لازم تنقرا الفاتحه واول ما امي ترمي العده يندار عرس
عرس لازم يسمعو بيه الدنيا كله
سيف:عروقه بارزات ووجها احمرررر....تي ندوي معاااااااك النم ندوي
عرس شنو انا الحقيره هاذي منيش واخدهااااا
مصعب:ناض من مكانه وهجم ع سيف لكن امه مسكاته.....تسحابه لعب فروخ ياخامر تضحك عليها وتمشي على كيفك ياواطي
ادم:وقف بينهم يشوفلهم الزوز ببرود لين كل واحد رجع قعمز في مكانه
سيف نزل راسه وقعد متكي ع يده وهوا داااااهش من كثر الاعصاب
اما مصعب ضرب اخته على يدها وقعمز وهوا مغلول
ريان:كانت تتفرج عليهم وهيا مصدوومه في سيف
كيف يقدر يدير حاجه زي هاذي ؟!
قلبها زاد انحرق بعد ما سمعت خبر زواجه
كمل آدم وهوا يحكي
ادم:الحوش كبير واعتقد ساده جناح بس هوا ومرته
سيف:يحكي بشويه ويخبط في يده...قاعد يقول مرتتنتي
الززززززح
ادم:مش محتاجين اي شي باش نقسمو الورث والقصص هيا مفيش داعي شغلنا مع عمي بيمشو زي ماهوا كأن الوالد عايش
يعقوب:هز راسه وعلامات الاعجاب واضحه على وجها
ادم:هكي تمينا موضوع خوي وبنت عمي
نجو لي موضوع ريان
ريان:انخطف لونها ومعش قدرت توقف لما سمعت اسمها ....شافت لي فجره وهيا تسأل بصوت واطي
موضوع شنو؟
اما يعقوب اول ما سمع اسم ريان قرن حواجبه وشاف لي ادم طول
فجره:ريان خيرها؟!
ادم:شاف لي ريان متجاهل نضرات الكل ليه ....كلنا عارفين ان بوك مختفي ويلي رباك ووصلك للمرحله هاذي الوالد الله يرحمه
يعقوب :اي ؟؟؟
ادم:كمل كلامه وهوا يشوف لي ريان بس .....وانا مش رح نخلي تعب بوي فيك يمشي ع الفاضي
ريان:بلعت ريقها وشفايفها لونهم ابيض من الخوف ...ك كيف ؟!
ادم:شاف لي عيونها بضبط....يعني لو في يوم بوك رجع
مش ح نخليه ياخدك بساهل
يعقوب :كيفففف؟؟!
ادم:محركش عيونه على ريان كأنه سارح فيها ....زي ما سمعت يا عمي
لو يبي بنته لازم يدفع الدين يلي عليه
ويدفع كل قرش صرفه بوي على بنته
يعقوب:ناض من مكانه وهوا بيتفجرررر...لكن هاذا مستحييييل
ريان:تشوف لي ادم بصدمه
ادم:شاف لي عمه ....زي ما سمعت
من غير هاذا كله مزال فيه قرار تاني لازم الكل يحترمه
سيف:ضحك بهزوه وقهر....شن هوا ؟نموتو كلنا ونخلولك الحوش ؟!
ادم:يحكي كأنه مسمعاش ......وجودها في حوش فيه زوز شباب غرب ليها غلط
سيف:وقف ....شن تقول انت
يخبط على راسه.....هبلللللت بعد قريب 7سنين جاي تقولي غلط وين بترفعها بتلوحها. ؟؟؟؟؟
يعقوب:اسكتتتتت يا سيف خلي نسمع خوك على شنو ناوي
ادم؛نلوحها ...عيب الكلمه هاذي تنقال حتى في حق الوالد الله يرحمه
سيف:الوالد الوالد الوالد خلاص شوفلك حجه تانيه
ادم؛كمل كلامه ببرود ....لازم يكون حد فينا مش غريب عليها في الحوش
يعقوب :زاد قرن حواجبه اكتر وهوا مصدوم....نعم!
ادم:بنقرى عليها الفاتحه بدون زواج لين نشوفو اخرتها ياترجع لي بوها بي شروط
يا تقعد زي ما هيا قاعده
ريان:قلبها طاح ومن الصدمه توسعو عيونها تشوف لي ادم مش مستوعبه الكلام يلي سمعاته
يعقوب:لاااااا مش م....
ادم:معليشي عمي القرارات يلي تخص عيلتي انا مليكش اي علاقه بيها
مشكلة بنتك وبنحلوها حاجه تانيه لا 
خذي تالفونه ودخانه وطلع ببرود من المربوعه مخلي عيلتين في صدمتهم مش مستوعبين ولا حرف من يلي صار
قامت ريان عيونها في سيف ودموعها ينزلو ومن الصدمه مش قادره تتكلم
اما سيف طلع من المربوعه وعيووونه حمر وكان فيه كمية غضب مش طبيعيه قادره تقلب الدنيا فوقي لوطي
مصعب:وقف وهوا متكنطي...اهو ادم حلها بدون ما ندخل لا انا ولا ولد التاني يلي في تونس قريب يسكر شهر مش معروف وين اراضيه
يعقوب:شن قصدك انت التاااني ها؟؟؟؟
مصعب:مسك اخته من يدها ....بتقنعني ان الحقيره هاذي خليتها تنفد بي عملتها هكي ؟؟؟
بدون اي مصلحه مخليتنيش حتى نمس منها شعره
يعقوب:كلنا نغلطو
نصعب:تي كيففففففف كيف نغلطو هاذا شررررف
ديوث انا باش نرضى يلي صار ونصفقلها؟؟؟
يابوي نعرفك انا مسكتش على الحجات هاذي شن فيه في راسك
يعقوب:مفي شي والمشكله نحلت ...يالله تحرك اطلع برا شوف مرتك يلي ملوحه في المشفى بين الحياه والموت
بدل ما تستقوي على اختك برا دور مرتك مع منو كانت راكبه هديك الليله
كان الكلام قاسي هلبااا على مصعب ومستحملاش
طلع وسيبهم وقلبه زي الناررر
طلع وراه هديل للحوش وهيا معش قادره تشوف في وجه ولا واحد منهم
اما ريان مش قادره توقف على رجليها اصلا
فجره رجعتلها حالة البكي وبدت تخبط وتبكي وتردد في كلامها ...وين مشيت وخليتنا ياغالي
انت مشيت والدنيا بعدك نقلبت معش مزال بنشوف خير بعدك
اااااااااه ياربي صبرني واستر عليا وعلى ولادي وعلى ها البنت يلي معش عرفت اهلها وين
___________________________________
ادم:درس سيارته قدام البحر 
وكان البحر هايج بطريقه تخوف والسحاب باين عليه يحضر لي مطر رهيبه
قعد ادم مقعمز داخل سيارته يتفرج ع البحر وهوا مبتسم
قلبه مرتاح لاول مره ...لما بيقرا عليها الفاتحه يعني خلاص مش رح تكون لي غيرها
فتح الروشن وشم ريحة الهواء النضيف بعمق
سكر عيونه وجت صورت ريان وهيا خايفه ومصدومه لما قال بيقرا الفاتحه عليها
شبحتله بخوف وصدمه وتقزز كأنها في حياتها ابدا مش متخيله نفسها معاه
فتح عيونه وبدي يخبط في السياره وقلبه موجوع
طيح الكرسي ورقد بتعب وهوا يفكر في كل القرارات يلي خداها
وكيف بتكون حياة ريان معاه بعد ماتنقرا الفاتحه؟!
سكر عيونه وقال داخله....حتى لو ماتت ميهمش
المهم مفيش ذكر غيري يقربها
___________________________________
مصعب:خش للحوش وهوا قاعد في الممر شرين تالفونه
سكر التالفون وخش الصاله
رجع التالفون شريين من جديد رد وهوا مضايق
مصعب:نعم؟
فوزي:ها يانسيب وينك
مصعب:في الحوش جاي نشوف في ولدي
فوزي:مرتك ان ولدك في المشفى ملوحه ره مسألتش عليها ولا جيت جيهتها
مصعب:اخر مره جيتكم قتلكم محدش يفتحلي موضوعها
فوزي:مش على كيفك
مرتك في المشفى وانت ملزووووم وغصب عليك تدفع تكاليف علاجها
قاعده في العنايه عندها مشكله في الكبد من اثر الحادث
جيت معاك بي الطيب مفهمتش
اقسم بالله متجيش وتتصرف عادي قدام بوي وامي وادير بالك ع مرتك مش رح نخليك تتربح في حياتك سامع ؟؟؟
مصعب:تهدد انت ؟اقسم بالله ساعه ونقيم انت وعيلتك كلها من تباتو في المقر رد بالك تلعب معاي
فوزي:ياحضرة الضابط معش اضحك عليك الناس اختي متقدرش تشد عليها شي لان مفيش حد شافها راكبه مع شخص غريب ولا هيا مذكره وين كانت نص ساعه وتكون هنايا....وسكر الخط
مصعب رمي نفسه ع الكنبه بتعب وحاس الدنيا ضاقيه بيه مفيش حد يفضفضله
كل عيلته لاهيين في مشاكلهم وفي المصيبه يلي دارتها اخته
مفيش حد سأل على ولده لا اهله ولا حتى اهل مرته
لاول مره مصعب حس نفسه وحيد
بين كل التفكيرات هاذي قاطعه صوت
فاطمه:بنبرة قلق....فندي انت كويس ؟!
مريض؟
مريض؟مصعب:فتح عيونه وهوا شايف لي نضرة الخوف في عيونها وابتسم قال في خاطره...لالااا الواضح اني مش بروحي
مصعب:قعمز ....معش تناديني يافندي هنايا
لما نكون في الحوش منحبش حد يناديني زي الشغل
فاطمه:حاضر يافندي ....وحطت يدها ع فمها وضحكت من قلبها
مصعب:ابتسم واشرلها على الممر...تلقي كيسه في الباب ليك
فاطمه:ليا انا ؟!من منو
مصعب:وقف...مني انا
ان شاء الله يعجبوك بري شوفيهم
فاطمه :مشت بسرعه قبل حتى ما مصعب يكمل كلامه
ضحك مصعب على عفويتها الزايده وخش لي غرفة نومه
_____________________________________
ريان :قعمزت على الارض ويديها الاثنين ع فمها ودموعها ينزلووو
تبكي من وسط قلبها عمرها وحياتها مكانت تتوقع في يوم ان يكون ادم راجلها حتى لو فاتحه وعلى ورق بس
بكت من وسط خاطرها وهيا متخيله كيف حياتها بتكون جحيم اكتر وكيف بيبدا عنده سلطه عليها بعد وفاة حاتم
في عز بكاها اذكرت شي ....لو ادم عرف سرها وهيا مرته شنو ممكن يدير فيها ؟!
خبطت على وجها اكتر من مرا لما اذكرت الشي هاذا وقعدت مقعمزه في الحمام والتفكير والبكي ينهش في جسمها
_________________________________
هديل :كانت شبه ميته معش فرق معاها شي
كأنها شمعه ونطفت
ماتت كل الاحاسيس داخلها حتى الحزن والخوف معش تحس بيهم
بدت ميته وهيا عايشه
معش يأثر فيها شي خلاص ....ياخدها سيف يخليها يقتلوها يسامحوها
لان يلي تعرضتله هديل كبير هلبا
فضيحه بين العيله والبني ادم يلي ماتت فيه نكرها بعد خدي منها شنو يبي
ووصفها بي الحقيره قدام امها وخوها وحتى بوها
خوها ولا عمره مزال يكلمها ولا يشوفلها بنفس نضرته الاولى !
كللللل هاذي الحجات قتلتها وهيا عايشه
رويـــــــات بنـــــوتـــة الــشـــيخأروى الطـــــــاهـــــر المسلاتي
القروب الاصلي400الف عضوفاتت على كل هاذي القصص 5شهور بضبط!
فاتت على مصعب اصعب شهور
من الخدمه للمشفى ويروح الحوش الساعه 1او2في الليل
اكتر شي كان مهون عليه اهتمام فاطمه بيه
كان كل شهر يزيد فيها في الراتب وكانت متروحش لين يروح هوا
رغم انه طول النهار ميشوفهاش الا دقايق معدوده لكن مجرد ماينذكر حتى اسمها يرتاح
بدت مرته تستعيد في صحتها لكن ذاكرتها لا
________________________________
سيف طول ها المده سافر لي بنغازي
قعد عند خاله لين امه رمت العده عشان يتفادى اي شي يخص مصعب او هديل او حتى عمه
وكان ادم مداير نفس الشي
الحوش معش يروحله الا في الليل وريان مش عاطياته الفرصه انه يشوفها اصلا
بي اختصار كانت كل العيله عايشه قصة الهروب من بعض لكن لعند امتى؟!
اهو اليوم الحوش زحمه وعامر
في اول الجنان قريب 7عزايز مقعمزين يبرمو في الكسكسي ويغنو
وسط الخيمه مقعمزه الحنايه لافين عليها البنات والصغار ويندو في يديهم بدور
صواني الغدي يلي تخش من جيهة الرجاله لي النساوين وريحتها بروحها كافيه
نعيمه يلي تلود بي البخوربين البنات ونساوين العيله يلي يضمو في حوسة الغدي والزغاريط في كل مكان
فجره رغم حزنها الكبير في عينها لكن مره مره تضحك من قلبها مع خواتها وسلفتها نعيمه
كملت حوسة الغدي وقعمزو البنات في دوره وسط الخيمه
بدي صوت الدربوكه يعلى والبنات يغنو ويصفقو بي حنتهم
يما ديريلي شنبير ولبه *هيي شنبير ولبه *يما واعطيني الراجل لنحبه 
يما ديريلي خاتم وحدايد هيي خاتم وحدايد
خاتم وحدايد وعطيني لي حراس القايد هيييي حراس القايد
يما ديريلي حولي زيتوني* هيي حولي زيتوني * يما واعطيني لي نور عيوني
يما ديريلي حنّـةة سعوديةة * هيي حنه سعوديه * يما وزفيني عروسـةة لغاليا
يما دريلي خاتم وحديده * هييي خاتم وحديده * وعطيني الراجل اللي نريده 
يما ديريلي ديريلي حولي ياجوري هييي حولي ياجوري حولي ياجوري وعطيني اي واحد تاجوري هييي واحد تاجوري
وبدت صوت الزغروطه والتصفيق يعلاا
جت ركبتي ف باخره مجتمعه
وجت عشقتي ف ولد سوق الجُمعة
جت عشقتي ف حواجبه وعيونه
درت المدينه ومالقيتش لونه
جت عشقتي ف هيبته وكتافه
درت المدينه ومالقيت اوصافه
جت عشقتي ف لحيته وطوله
درت المدينه ومالقيتش زوله
جت ركبتي ف باخره منحوته
وجت عشقتي ف غزيل خوته
جت ركبتي ف باخره مليانه
وجت عشقتي ف طيبته وحنانه
شـقيـت ٱلبحر وٱنـي قـليبي زٱهي
وجـت عـشقتي فـ راجل صـيته باهي
جت ركبتي ف باخره تركيه
وجت عشقتي ف ولد الككليه
جت ركبتي ف باخره لامان وجت عشقتي ف صقر من زنتان
جت ركبتي في باخرة غرناطه...وجت عشقتي في ولد من صبراته
جت ركبتي ف باخرة غاليا وجت عشقتي ف ولد الغريانية
.جت ركبتي في باخره رحاله
و جت عشقتي في سيد هالرجاله
جت ركبتي في باخره ملتمه
و جت عشقتي في اغزيل امه 
واستمرت احلا سهريه
رويـــــــات بنـــــوتـــة الــشـــيخأروى الطـــــــاهـــــر المسلاتيالقروب الاصلي400الف عضونختصر عليكم كل التفاصيل الصغيره
وناخدكم لي يوم الحفله بي التحديد اول ما تعبت الصاله معازيم
طلعت ريان وكانت لابسه قفطان قصير ابيض وفيه ورد صغير ملون ومخليه شعرها مفتوح مع مكياج اقل من بسيط
واقفه تشوف للبنات بي ذهول تام
كيف كل وحده تالفونها احسن من التانيه و24ساعه ع النت ويصورو الا هيا معمرهاش ملكت تالفون
كانت واقفه تستقبل في مباركات لان فاتحتها انقرت على ادم وتسمع في همس البنات
ادم ياخد وحده مش متعلمه ؟!
تجاوبها التانيه ...واخدها هكي وخلاص قالو ميبيش يخلوها غريبه في الحوش هوا مش رح يدخل عليها اصلا
كانت ريان تسمع في الكلام هاذا وادير في روحها مسمعت شي لكن من داخل تتقطع بي العرق
_______________________________
هديل :قعمزت وملامحها جامده
المزينه ترتبلها في طرحتها وتعاود في نفس الكلام من الصبح ....حرام عليك اقسم بالله يوم عرسك ابتسمي ع الاقل عيب يلي اديري فيه في نفسك
لكن هديل لاحياة لمن تنادي
كانت حرفيا ميته
__________________________________
فاطمه:طلعت تجرررري من العرفه وهيا ماسكه العطر
عثرت في العاب ولد مصعب وطاحت والعطر تكسر
بدت تخبط ع وجها وتبكي وترعش مع بعضها
قرب عليها مصعب
مصعب:انتي كويسه مصار فيك شي ؟؟
فاطمه:تبكي بعبرتها....اسس اسفه والله مقصدي والله
مصعب:ابتسم ....تبكي ع خاطر شيشة عطر ؟؟؟
فاطمه:وحق الله اغلا مني يلي كسرتها سامحني حقك عليا اخصمهم من راتبي
مصعب:ضحك....عبيطه
مفيش شي اغلا منك
بعدين شوفي ها يمشي الحال....حط صبعه على العطر يلي في الارض ومسح بيه سوريته
فاطمه:خطف قلبها بي حنيته ولبسه وشعره وهوا مرتب روحه ع خاطر العرس
ولبسه وشعره وهوا مرتب روحه ع خاطر العرس رجع مصعب وقف ومدلها يده 
مسكت في يده ووقفها
مصعب:انا مستعجل هداك هوا ....ردي بالك تنجرحي
فاطمه:هزت راسها بي تمام وقلبها بيطلع منها
قعدت تتأمل فيه لين طلع
__________________________________
فجره:بلعت ريقها....افرد وجهك قدام الناس عيب ميصيرش
سيف:بكيفي حتى تعابير وجهي بتخشو فيها ؟!
فجره:تساوي في القرواطه ....بلا عار قدام الناااس
الحق عليك انت كانك مش حيوان ومتع بنات راهو خديت يلي انت تبيها
لكن تستاهل هاذا جزاء يلي يضحك ع البنات
سيف:افففففف خلاص عاد سادني ولدك يلي برا
فجره:خش تحرك
هدت الاضاءه وفتحو اغنية (هلا بيلي تمنيتك نصيبي
خش سيف بخطوات شوي سريعه
وقفت هديل وهيا تشوفله بنضره مطفيه
اما ريان متحملتش تشوف شي ومشت للحمام
وقف جنبها سيف بدون اي ابتسامه والكل لاحظ ويحكي في موضوعهم
خدتلهم المصوره لقطات بسيطه وطلع بدون حتى ما يمسك يدها )
)طلعت عديل بعد مالبسوها الكاب ومبتش حتى تسلم ع امها
ركبت السياره بمساعدة بنات العيله
ركب سيف جنبها واول ناسكر باب السياره حط راسه على الدومان
_______________________________
فجره:تعالي الحقيني لي غرفة العروسه
ريان:مسحت دموعها يلي كانو ع طرف دموعها وتبعتها
رجعت شعرها للخلف واول ما تخش تنصدم بي ادم مستنيها في الغرفه
فجره:شافت لي ادم....متعطلش
ادم:هز راسه لي امه بمعنى تمام وطلعت فجره وقلبها محروق على ريان لانها موافقه غصب
ريان:كانت مصدومه وادور اي شي تستر بيه نفسها وهيا ناسيه ان ادم قري عليها فاتحه !....يتبع
