رواية خطوة مميتة 4 الفصل الرابع بقلم بنوتة الشيخ
وصلت السياره لعند 4شوارع ومن كل شارع طلعت سياره !
سياره كملت طريقها في امان
لكن خلت وراها حادث شنيع!
من كل سياره فيه قصه
وكل قصه ترتبط بي قصه تانيه !
صدفه؟!
ولا كان الموضوع مؤامره!؟
______________________________
تحركت عقارب الساعه يلي كانت معلقه ع الحيط عشان تسكر 7:30صباحاً
ريان:فتحت عيونها بتعب على اصوات عياط جنبها 
قامت حواجبها عشان تزيد مساحة العين وتقدر تشوف بوضوح
كان واقف بنفس لباسه الرسمي في كل مره !
نفس نبرة الصوت نفس النضره لما تكون في مصيبه ويكتشفها هوا !!
كان واقف يتكلم في التالفون ولما سكر الخط ضرب يده في الحيط بقووه كأنه داخله بركان
بركان قوي وصعب اي حد يطفيه
شافت كل الاآت يلي كانت موجوده جنبها وفهمت انها في المشفى
اذكرت هيا علاش موجوده هنايا !
وادكرت انها طلعت مع ادم بدون علم حد رغم ان ممنوع عليها تطلع لي اي مكان 
سكرت عيونها من الخوف عشان تمثل انها قاعده تحت تأثير المخدر
حست بي خطوات قربت على السرير
ويد مسكت طرف السرير بقبضه قويه
بلعت ريقها بصعوبه وهيا خايفه
حاولت تحافظ على هدوئها وتمثل انها راقده
دقايق وحست نفسه قريب ع خدها ....
....كان قلبها بيوقف في اللحضات هاذي بدات!!
ادم:بصوت واطي ومغلول...اصحي بس وحسابي عسير معاك
الكلمتين هاذم وقفو الدم في عروقها وتمنت انها تقعد راقده لنهاية العمر!
_____________________________________
بعيون مصدومه وقلب مكسور الف مره كان مصعب واقف في اول الممر !
واقف وع شعره بس كان بيطيح من كثر ماحيله مهدود
ضابط بطوله وعرضه مش قادر يسند نفسه بعد مكالمه هاتفيه يخبروه انه مرته موجوده في قسم الحوادث!
ان من قوة الحادث مرته طلعت من روشن السياره عشان تضربها سياره من الطريق الثانيه
والافضع من هكي بي مليون مره مفيش ولا اي أثر لي السياره يلي كانت مقعمزه فيها
حادث الساعه 11في الليل !!
مع منو كانت مرته ؟...وليش يلي كانت راكبه معاه مختفي !!
وخر خطوات ورمي نفسه ع الحيط يسنده !
مش قادر يحكي لي حد من كثر ما انه حاس بي العار
مش لاقي ولا اي حد يسنده !!
رجع وقف على حيله بصدمه اكتر لما شاف ادم طالع من الغرفه يلي جنبه ؟!
بلع ريقه وقال بصدمه...اءء انت شنو ادير هنايا!
ادم:عقد حواجبه وتكلم بهدوء....علاش مكلمت حد وقتله يلي صار !؟
مصعب:نزل عيونه وحط يده بين عيونه بتعب...قق قاعد مش مستوعب
شنو تبيني نقول ؟؟
معندي شي نقوله
معندي شي نقوله غير الحجات يلي بتحشمني!
ادم:خدي نفس عميق وهوا يشوف لي الروشن ....صدفه ممكن
مصعب:مسح وجها بيديه وعيونه حمرر....شنو يلي صدفه ؟
ادم:الحادث 3سيارت
السياره يلي كانت فيها مرتك وسياره فيها ولد توفى
مصعب:سأل بفضول واضح....والثالثه؟؟؟
ادم:بلع ريقه وهوا سارح في الروشن ...فيها سيف خوي وريان
مصعب:عقدت حواجبه بعدم فهم....سيف؟؟
مش البنت هاذي يلي في حوشكم ممنوع تطلع !!
سيف !؟..والساعه11في الليل ؟
كيف م.......
قاطعه ادم وهوا مش متحمل يسمع كلمه زياده
ادم:متقوليش في شنو فكرت لان مزال شعره بس ونمشي نقتلهم الاثنين
مصعب:قعمز ع اقرب كرسي كان جنبه وحط راسه بين يديه الاثنين وهوا حاس بي حجم المصيبه يلي صايره
دقايق وحس بي يد نحطت على كتفه 
قام راسه عشان يشوف ادم واقف جنبه وزاد ضغط على يده
ادم:علط انك متكلمنيش اول واحد بعد ماتسمع بي مرتك
انت ولد عمي وعيب تتحشم مني في اي شي يصير معاك
مصعب:حط يديه على وجها وهوا كامت دموعه
زاد ادم طبطب على يده .....اهداا وكله سيروه نعرفوه
اختك هديل وامك عندنا في الحوش مبدئياً مفيش داعي حد يعرف
شوف حد يدير باله ع ولدك
الكلمه هاذي رنت في وذن مصعب ووقف وهوا مخلوع لان ولده بروحه في الحوش ومشافاش من امس
فتح تالفونه وهوا يراجع في مسج وصله امس
احيانا ربي يبعتلنا ناس في اسوء فترات نمرو بيها باش ينورو حياتنا
_________________________________
حاتم:درس السياره وهوا سارح في الطريق !
سكر المكيف وحط راسه على دومان السياره بتعب
كان يحاول ياخد نفس وغارق في تفكيره
سمع صوت هاتفه يرن ...سند نفسه على الكرسي ومد يده لي تالفونه
شاف اسم المتصل ..ادم ابني
حاول يرد عليه لكن صحته خاناته
رجفت يده وطاح التالفون ....وبدي النفس ينقطع عليه اكتر واكتر !
....وبدي النفس ينقطع عليه اكتر واكتر !لين ربي خدي امانته
توفى في سيارته وهوا مقعمز ع الكرسي
مات وماتت كل الاسرار معاه!
أدم:رجع تالفونه داخل جيبه وعاود ثبت عيونه على ريان من جديد لكن تلفت لما سمع صوت الباب انفتح
خش سيف وهوا يعكز على رجله وكله جروح وخباش
عيونه في الارض مش قادر يقيمهم بعد يلي صار
حاول ادم يتمالك نفسه وميهجمش عليه بي الضرب من اول ما يشوفه
ربع يديه وسأل بكل هدوء...وين كنتم؟!
سيف:قام عيونه وشاف للحيط...ممشيناش لي مكان معين دورتين بي السياره
ادم:ماسك نفسه بغضبب...شن صار بينكم!!
سيف:توسعو عيونه بصدمه....شن تقول انت هبلت ؟؟
ادم:معش قدر يتحمل وضربه كف !
كف صوته انتشر في جميع ارجاء الغرفه يلي كان فيها
وريان فتحت عيونها ومعش قدرت تمثل انها راقده !
سيف:قام راسه ....تبيني نخليها مضايقه بعد الكلام يلي سمعتهولها ؟؟
تبيني نحسسها زيك انها حثاله ومكانها مش بينا !!
ادم:رد بغضب وصوت عالي ....اييييي اييييي هاذا المطلوب منكككك
سيف:رد عليه بتعصب اكتر وعروقه بارزات.....علاش جاااااابهااااا
علاش جابها بوك من البدايه لو مكانها مش بينا!!!!!!
كمل كلامه وهوا يعيط ووجها احمررر من العياط
فكر فيها شووويه مفيش حد غبييييييي
برا اسأل بوك كيف الانسان يجيب بنت اكبر عدو ليه ويعيشها بين صغاره ويحبها اكتر منهم حتى!!
ولا بدير روحك احووول وتفهمني انك متشوفش في نضرات بوك ليها وكيف انه ميشوفش لي غيرها لما تبدا بينااااا
مفيش حد غبي مش رح نخليهم يضحكو عليا بنفس القصه تتعاود من سنين ....وطلع وسكر الباب بقوه
قعد ادم واقف مصدوم من الكلام يلي اول مره يسمعه من خوه!!
الكلام يلي دخل الشك لي قلبه وخلاه يحط في راسه اسئله اول مره تخطر على باله!
طلع تالفونه واتصل بي بوه يبي يسأله ع كل حرف سمعه من سيف لكن مردش
ادم:لوح تالفونه بغلللل وراسه مشوش ومتعصب من بوه
متعصب منه لان في هلبا حجات مش واضحه ولان مردش
لكن بي اختصار ميعلمش ان بوه اللحضات هاذي بدات كان متوفي
حط يدين الاثنين ورا راسه وعيونه يشوفو لي السقف
وتلفت
تلفت وشاف ريان فاتحه عيونه وتشوفله بخوف
قلبه ذاب من نضراتها في ثواني
لكن وجها وملامحه كانت العكس بي الف مرررره
رويـــــــات بنـــــوتـــة الــشـــيخأروى الطـــــــاهـــــر المسلاتي
القروب الاصلي400الف عضوفاطمه:نحت وشاحها يلي كان متهااالك وقديم
قامت شعرها كله على شكل كعكه بعدين رجعت لفت وشاحها عليه
قامت قفطانها يلي كان حاله اسوء من الوشاح بي الالف المرات
رغم كلل الحجات الباليه يلي كانت لابستهم لاكن جمال عيونها وشعرها الكيرلي كان طاغي على كل شي
ربعت يديها في بعض وهيا تشوف للحوش وللفوضى يلي كانت واقفه فيها
ابتسمت وقالت....والله وشكله الحض بيبتسملك يافاطمه
حوشهم صغير وباين عليه الضابظ هاذا فلوس
يعني خدمه مش متعب ضمان على السريع وولده قاعد صغير
خدمه شويه وفلوسها هلبا مش نفس معمل الحار يلي كنت نخدم فيه كبره زي المدرسه والاجر شويه
زادت ابتسامتها اكتر وانطلقت تخدم بقلب ورب وهيا فرحانه
__________________________________
ادم:نزل يديه ودخلهم في جيوبه قرن حواجبه وهوا يشوفلها
ريان:بلعت ريقها وبدت تتلعثم في الكلام...اءء اس اسفه
انا
انا مش
انا السبب مش سيف ...اصريت عليه كنت مضايقه و
ادم:قاطعها.....حرف منبيش نسمعه منك!
ريان:عدلت تقعميزتها وبدت تساوي في اللصقه يلي كانت على راسها
نزلت يديها شبكتهم في بعض ....ادم شنو كان يقصد بي كلامه؟
ادم:كان يشوفلها وخاطره يسألها انتي بخير؟!
شن حاسه ؟
شنو يلي في جسمك واجعك!!
كان خاطره يمسكها من رقبتها خنننق ويخليها تعترف غصب عنها ليش طالعه مع خوه في الليل وبعدين يحضنها ويمسحه عليها بحنيه ويشرحلها قداش في كمية حب في قلبه
قداش خايف عليها وكابوسه ان ياخدوها من بين يديه!!
لو فهمت هاذا كله رح تعذره في كل تصرف يديره معاها
لكن سيب كل شي من يلي حكاهوله قلبه وعطاها بضهره سيبها وطلع !
علاش في ناس مش قادره تعترف بي مشاعرها الصادقه؟!
مش قادرين !؟
ولا خايفين!!
________________________________
فجره:تشوف لي هديل وتحكي لي سلفتها بصوت واطي ...خديت موعد من الشيخ يلي حكيتلك عليه
نعيمه:بنضرات توتر سألت....الساعه كم قالك؟!
فجره:مزال نصف ساعه بس
نعيمه:بلعت ريقها وهيا تشوف لي بنتها....انا خايفه منه الشيخ هاذا مش مستريحه للموضوع
فجره:عاجبك حال بنتك هكي ؟
كل شويه خاشه تستفرغ ووجها اصفررر مسكينه
اعراض السحر يلي قاعده تصير حرام عليك تخلي بنتك اضيع منك
نعيمه:حطت يد على يد ....اي والله كلامك صح 100%
فجره:هي نوضي امالا خلي نمشو بكري باش منعطلوش لان بدور عليه الشيخ هاذا
نعيمه:شنو بنقوللها زعمى البنت باش تمشي معاي
فجره:معليكش فيها خليها عليا
نعيمه:تمام...وناضت وهيا مقتنعه كاااامل الاقتناع ان بنتها مسحوره والحل عند الشيخ هاذا بدات!
_________________________________
رجع مصعب بطاقته بعد ما خلى الدكتور يتأكد انه ضابط
خش للغرفه وكان قادر انه يمسك مرته ويقتلهاااا
لكن فوق من هاذا كله كان قلبه يقوله اسألها قبل !!
اسألها مع منو كانت هذيك الليل يمكن تكون ضالمها !
وقف قدامها يشوف لي حالتها المزريه
جسمها كله كسور ومجبس
وجها متشوه من كثر النفاخ والخبط قلبه تقطع عليها !!
مش بيده مهما دارت في النهايه يحبها !!
سألها بصوت عالي وقلبه متلهف للاجابه !
مع من درتي الحادث امس ؟؟
سكتت مرته وهيا تشوفله وتتألم
رجع سألها بهدوء مره واثنين وثلاثه لكن مكانش في رد
فقد مصعب اعصابه
وبدي يعيط عليهااااا كانت حالته تقطع القلب
كل يلي دراته كوم وانه يحبها كوم تاني
ادخل ادم وقعد ماسكه باش ميقربش عليها ولا يرتكب فيها جريمه
بعد عناء وصراخ طويله جاوبت مرته بي كلمتين!
كلمتين بزبط خلت كل يلي في الغرفه مصدومين بشكل كبير!...
________________________________
قعمزت هديل قدام الشيخ وجسمها يرجف من الخوف
طلب الشيخ من فجره وسلفتها يطلعو من الغرفه عشان يعالج هديل وفعلا طلعو !
الشيخ:من وين الوجع تحسي فيه ؟!
هديل:جاوبت وصوتها هااارب من الخوف ...بب بطني
نرجع وفي وجع بسيط
الشيخ:عطاها بي الضهر وبدي يحضر لي حجات غريبه !
برا الغرفه:-
نعيمه:نحس فيه مشعود يافجره لا شيخ ولا غيره مش شايفه منضره ولا الغرفه يلي يخدم فيها
فجره:تعدل في شاربتها...مشعود ولا غيره المهم يلاقي حل لي بنتك متفرقش
رقدت هديل وقلبها بيطيح لكنها في نفس الوقت فرحانه ان امها مشكت في شي وحطت في بالها ان سحر مش حمل!
بدي الشيخ يقرا في كلام غريب وهديل تبلع في ريقها !
كان كل شي تمام لين بدي يخبط على بطنها...يتبع
...يتبعهل سيف كان عنده حق في كلامه!؟
وهل الحادث كان صدفه ولا لا!!
شنو الاسرار يلي ماتت مع حاتم ؟!
