رواية خدمة العملاء الفصل الثاني 2
خدمة العملاء
الجزء التانى( تليفونه اتقفل وانا راسي ابتدت تودي وتجيب ومش عارفه اعمل ايه وايه اللي بيحصل ده )
لغايه تاني يوم فضلت محتاره ورنيت ع اماني صاحبتي عشان نتقابل وروحنا الكافيه وهناك حصلت حاجه غريبه اوي … الشاب اللى شغال ف الكافيه ده كان مرتبك جدااا وكان كل ما يقرب ويعدى من جنبنا بحس انه مش عاوزنى اشوفه .. كلمت صاحبتى عشان تاخد بالها معايا .
ساره : امانى بقولك ايه . شوفتى الواد اللى شغال ده .. مش مريحنى والله ونظراته مُريبه
امانى : ايه بيقل ادبه بنظراته عليكى ولا ايه ؟
ساره : بالعكس ده مرتبك ومش عاوزنى ابصله وبيقلق كل ما عينى تيجى ف عينه بالصدفه
امانى : طب استنى انا هركز معاه وانتى حاولي ماتبصليش وركزى ف تليفونك كانك بتلعبى فيه وانا هبص من غير ما ياخد باله
…
( بعد 5 دقايق )
امانى : انا مش فاهمه حاجه يا سوسو
ساره : ليه ؟
امانى : الواد ده مُريب فعلا … كل ما يروح يقف ع الكاونتر بتاع الارودرات ويستنى حاجه تطلعله يبصلك ويسرح … اقسم بالله نظراته ليكى حاجه كده توهان
ساره : يعنى انا كنت صح ؟ بيبصلى صح
امانى : جداااا والغريب انه بيبصلك وبيبتسم ومش عاوز حاجه غير انه يفضل باصصلك .. انا مش فاهمه حاجه
ساره : انا بدات اتوتر بصراحه . الواد ده بيشدنى كل يوم ليه من رإكشناته والحاجات اللى بيعملها دى … عارفه يا مونى اقولك حاجه يمكن تستغربيها ؟
امانى : خير يا حبي
ساره : بقيت بحس بالامان وانا قاعده هنا .. وشايفاه رايح جاى حواليا
بقيت اهرب من دنيتى للمكان ده .. انا مابجيش هنا عشان اشرب او اريح اعصابي وخلاص . انا باجى عشان ابقي جنبه
محسسنى بامان رهيب ومش عارفه ليه ؟ والغريب ان عمره ما حاول يفتح معايا حوار بره حوار الشغل بتاعه وتطلبى ايه وتشربي ايه
انا مش عارفه مالى … وبردو مش عارفه انا ليه اتشديت بالشكل ده للواد اللى بيكلمنى على التليفون واللى مخى ساح بسببه لما قالى امبارح ان الفستان اللى كنت لابساه كان حلو وزى القمر عليا …. انا مش فاهمه بيجرالى ايه ؟ وليه احس بنفس الاحساس ناحية شخصين مختلفين … ليه بجد ؟ انا لما اتشديت للواد اللى هنا ده زعلت اوى من نفسي لما لقتنى مشدوده لغيره وحابه اعرف التانى … حسيت انى بخونه
امانى : فوقى يا ساره انتى قربتى تتجننى
ساره : والله ما متجننه بس بجد حسيت انى بخونه
امانى : تخونيه ازاى دانتى اساسا ماكلمتيهوش كلمه واحده .. ومافيش اى كلام بينه وبينك غير تشربي ايه وتحت امرك .. ايه يا بنتى ماتصحصحى شويه
ساره : مش عارفه … مش عااارفه … انا مش هكلم الواد اللى بيتصل عليا ده تانى وهمسح رقمه ولو اتصل عليا بالليل همسح بكرامته الارض .. انا راضيه بالامان اللى حاساه هنا .. يمكن ييجى ف يوم ويكلمنى او يفتح معايا حوار . انا راضيه والله بس ييجى
امانى : طب بقولك ايه .. هاتيلى انا الرقم وانا هلاغيه انا .. اهو اطلع منك بأى منفعه وخليكى انتى ف الحليوه بتاعك اللى هنا اللى لحس مخك
ساره : هههههه ماشي هديهولك
امانى : احكيلى بقي قولتيله ايه بالظبط عشان لما ارن عليه واكلمه اكون عارفه كل حاجه
ساره : يعنى ايه
امانى : هههه منا هكلمه على انى انتى .
ساره : وتلبسينى مصيبه هه
امانى : انتى مالك بقا مانتى لا تعرفيه ولا هو يعرفك
ساره : يابنتى بقولك قالى انى زى القمر وكنت حلوه ف الفستان اللى كنت لابساه . تفسرى ده بإيه
امانى : ههههه لا دى حركات بيعملوها الشباب كده اهو حظ … لو شبكت يبقي خير وبركه ماشبكتش عادى هيدور على غيرك . يابنتى اسمعى منى وهاتى ام الرقم
ساره : خدى ياحتى … سجليه عندك بقي عشان همسحه من عندى انا …
امانى : ايوه امسحيه من عندك عشان بغير عليه من دلوقتى
ساره : يلا يا مجنونه ….
امانى : الواد لسا عيونه عليكى على فكره وف الرايحه والجايه يبص ناحيتنا .. نظرته بتلبشنى اقسم بالله . بيبصلك كأنك اخته ولا بنته وخايف عليك … ليكى حق تحسي بالامان يا ساره .. مافيش واحده فينا مابتحبش كده ومابتحبش تحس الاحساس ده
ساره : شوفتى بقي . يعنى عندى حق .. استنى هطلب منه طلب
امانى : ورينى
ساره : احححم لو سمحت
الجرسون : افندم تحت امرك
ساره : ممكن العصير بتاعى اللى بتعملهولى بنفسك
الجرسون : تحت امرك حاضر .. عجب حضرتك يعنى ؟
ساره : جداااا . انا باجى هنا مخصوص عشان اشربه من ايدك
الجرسون : اححم . تمام … عن اذنكو .. تشربي حاجه يا فندم
امانى : لا متشكره .. انا لسا بشرب النسكافيه
الجرسون : تمام . عن اذنكو
…
امانى : يا لهووووى يانا على بصاته ليكى . ابن الجزمه ده
ساره : هههههههههههه ماتشتميهوش يا بت اهو انتى
امانى : يلا يا واطيه .. المهم يلا خلصى العصير بتاعك اللى هيعملهولك يا ست محن انتى عشان نمشي . ماليش انا ف جو المحن ده انا عاوزه اتدلع بس هههههههههه
ساره : والله ما هتسكتى غير لما تقعى ف واحد يخزوقك احلى خازوق من كتر الشباب اللى انتى عرفتيهم دول
امانى : الولاد بقت مزز يا اوختى بقت موزز هنلاحق على مين ولا على مين . انا ماليش دعوه انا عاوزه اتباس هههههههه
ساره : ههههههههههههههههه الله يحرقك … طب وطى صوتك عشان جاى بقا
…………..
( الساعه 1 بالليل )
احمد : الو
ساره : الو ! مع حضرتك ساره من خدمه العملا اقدر اساعد حضرتك ؟
احمد : ازيك يا ساره
ساره : هو انت !
احمد : ايه نسيتى صوتى ؟
ساره : الشغل بقا وانت عارف … المهم اللى بنعمله ده غلط وماينفعش تكلمنى تانى بعد اذنك
احمد : ليه بس انا عملتلك ايه ؟ انا مش عاوز غير انى اسمع صوتك بس . لا عاوز نمرتك ولا حتى ارغى معاك .. دقيقه واحده اسمع صوتك فيهم وامشي واروح لحالى
ساره : ماينفعش لو سمحت وغلط
احمد : خلاص متاسف . حقك عليا … وعلى فكره بقا الروج الاحمر الهادى اللى كنتى حاطاه النهارده كان ملفت اوى .. ياريت ماتحطيهوش تانى .. سلام
ساره : انت يا اخينا انت .. الو .يا عم رد عليا ماتطلعش عين امى معاك انت مين ؟. الووو
يتبع....
