رواية الزوج القاسي الفصل الخامس 5 بقلم اماني عنان
= فين ولادي ي بابا ؟؟ وديتهم فين
= وديتهم لابوهم هوديهم فين يعني هو أولي بلحمة وانتي بيت ابوكي مفتوحلك لحد مانشوف الأمور هتنتهي علي ايه مع الواد دا ..
= هانوا عليك سبتهم من غير ماتقولي وارتاحت ، كدا انتقمت لكرامتك وكرامة بنتك ،، انت دبحتني بسكينة اتلم من سكينة كريم ي بابا حرام عليكم ارحموني بقي ..
= امشي خشي اوضتك انتي مصدومة ومش ف وعيك ..
= مش هدخل انت لازم اروح لولادي سارة وسالم بيعيطوا مش هيناموا من غيري. .
الباب خبط أنقذ هدي من انفعال ابوها اللي كان هيدخلها جوا غصب عنها ،دخل محمود أخوها وشه مغزوع من تليفون أمه
= خير ي ماما .. السلام عليكم
= وعليكم السلام ورحمة الله
لسه فاكر تيجي ي محمود ..؟
=معلش ي حج انت عارف مراتي في الشهر السابع ومايتقدرش تتحرك ..
بصت له الأم وهي لويه بوقها وقالت في سرها
= يادي الخيبة الواد مايل ومراته ممشياه والبت خايبه وماعرفتش تحاجي علي جوزها وتعلقه بيها ..
= احكيلي ي هدي ازاي دا حصل وليه كريم اتجوز الزفته دي .. وبعدين انا نبهتك خمسين مره بلاش سماح مابرتحلهاش ماسمعتيش كلامي ..
اترمت ف حضنه ونزلت عياط وشحتفه كبيره ..
=عايزا ولادي ي محمود .. ابوس ايدك اتصرف
= هما فين ؟؟
= وديتهم لابوهم
=ازاي بس ي حج
= انت اسكت خالص ي حيلتها ،، هتصرف عليهم انت ؟؟
طاطا رأسه للأرض وسكت ،، اول ماتيجي سيرة الدفع إجدعها راجل يدلدل ودانه ويسكت بعدت عنه هدي وحست أنها مالهاش حد لاول مره تفضي الدنيا عليها وماتسمعش غير صوت وجعها وبس 
=يالا بينا نرتاح كلنا تعبنا النهاردة والساعة قربت علي 1
= الام يالا ي خويا .. ادخلي اوضتك ي بنتي والصباح رباح وانت ي محمود هتبات ولا هتروح عشان المداس ماتقعدش لوحدها ..
= ماما ارجوكي ..
= جت بالغلط اقصد المدام ي شملول
=لا هروح ،، تصبحوا ع خير
=وانت من أهله
________ #أماني_عنان _______
في شقة كريم خلص اللي اي حد بيعمله بعد الجواز لحظات والوش الحقيقي بيبان علي اصله زي الجعان لما ياكل بيعقل واعصابه بتهدي .. دا كان حال كريم خد الشئ اللي كان بيستناه ويحلم فيه من سماح وحش أنه عادي بس البنت ذكية وفي الدلع مغرقاه عايزا تتوهه وتلغي عقله وعواطفه تجاه ولاده المرميه علي أعتاب بيته ..
= مش هتنام بقي ي حبيبي ؟؟
= مش عارف قلقان علي سارة وسالم ليكون جدهم سابهم بجد والجو بيمطر
= سابهم ازاي اكيد خدهم حتي تعالي بص قدام الشقة مش هتلاقي حد ..
فتح كريم الباب وماشافش حد فيهم اتنفس نفس طويل وكأنه بيدي حباية مسكن لضميره الميت بأن الولاد بخير وبعد يومين هيروح يشوفهم
=الحمد لله يالا ي موحه ندخل ننام
= يالا ي قلب موحه هههه
حط أيده علي كتفها وهي عماله تفكر في اللي شافته وتقول
= ي خبرك اسود ي سماح لو حد عرف انك شوفتي العيال يتركب عربية ملاكي غريبة في عز الشتا ،ساعتها كريم هيقطعني للكلاب في الشارع 
بس ايه هيعرفه مانا قولت مع جدهم ولما يسأل أهل هدي هيلبسوها 
________ #أماني_عنان _______
ف اوضة ابو هدي وأمها مش جايله نوم وعمال يتقلب علي السرير من الحيرة فقال لمراته اللي سهرانه زيه
=لسه صاحيه ؟
=ومين هيجيله نوم في الحال دا بس ي ابو محمود
= مش عارف اللي عملته دا صح ولا غلط بس الشيطان ركبني وماعرفتش اتصرف ..
اتعدلت في السرير وقالت بقلق
= بتقول كدا ليه ؟؟ انت عملت ايه في العيال
= أبوهم مارضيش يفتح وانا سامع صوته هيئ ومئ مع البت فالدم غلي غ دماغي سبتهم قدام الشقة ومشيت
= ي لهوي وهان عليك .. والعيال سكتت
كتم بوقها وقال هششش اسكتي لهدي تسمعك
= رد عليا ..انا قلبي بيقولي أنهم ف خطر الجو برد اووي والدنيا بتمطر ..
= ربك يسترها .. نامي والصباح رباح
سمعت هدي كل كلامهم لطمت علي وشها وجريت علي الاوضة جابت فلوس وجاكت علي هدوم البيت ونزلت تتسحب من الباب ولما خرجت جري علي السلم ..
= حسبي الله ونعم الوكيل . يارب عالم بوجع قلبي ووحدتي رجعلي عيالي سالمين .. وصلت بيت كريم خبطت مافيش صوت الساعة بقت 2
صحيت سماح بتفتح عيونها بالعافية وقالت
= ي فتاح ي عليم .. مين ؟؟
فتحت الباب ولما شافتها لمت الروب علي جسمها كدا وشدته من عند الوسط وقالت
=انتي .. خير
= عايزا ولادي ؟؟
= بقولك ايه هي مش سيرة ابوكي جه ورماهم ه السلم وانا دخلتهم وعشيتهم وناموا خلصنا بطلي تمثيل بقي
= مش همشي من هنا من غيرهم
= لا هتمشي وبطلي دوشة عشان كيمو نايم ..
زقتها بكل قوة برا الشقة اللي كانت بيتها وهي بتجيلها ضيفة فيه .. قعدت هدي علي الباب وضمه رجلها وتقول
= انا بحلم صح .. لازم اصحي من الكابوس دا
ونزلت ف وشها ضرب وعلي رجلها ..للاسف حاسه بكل حاجة بس وجعها الداخلي افظع ..حاولت تقوم وبتسند في نفسها لحد ماخرجت للشارع في وقت متأخر وقف لها شاب ثلاثيني بعربية غالية وبدأ يغازلها
=الجميل ماشي لوحده ليه ؟؟
هي مكمله بتمشي بالعافية ويتحرك رجلها بصعوبة
=الجو برد عليك ي قمر .. تعالي اركبي وانا ادفيكي
بصت له لاقته وسيم .. شعره ناعم وعيونه خضرا وجسمه رشيق
=يالا مافيش وقت كلها كام ساعة والنهار يطلع الليل جميل ورومانسي
كملت مشي وفجأة هدت خطواتها وشدت الطرحه من علي راسها وفردت شعرها في الهوا وهي بتحركه شمال ويمين بكل طلاقه ويأس
وقالت
= مانا حلوة ومرغوبة اهو امال ليه رماني كريم بدري
ووقفت قدام باب العربية وبصت وراها وهي بتمد أيدها المرتعشة علي مقبض الباب ..
