recent
روايات مكتبة حواء

رواية اطياف الغرام الفصل الثاني 2

رواية اطياف الغرام الفصل الثاني 2

 الجزء الثاني (( ليش))



طــــــــــــــــــلال

من البارحه وانا افكر في خالد الله يهديه عمي ما لقى الا خالد يزوجه من ........... استغفر الله حتى اسمها ما عرفته الا امس .............. المشكله وش اقول له اللحين اذا انا السالفه كلها مو داخله مخي كيف خالد يعني بكل بساطه يفرضون عليه انه يتزوجها............. اساسا هم يعرفون ان خالد مو من النوعيه اللي تمشيه على كيفك خالد رجال حر وكلمته وحده رجال ينشد فيه الظهر يفرض عليك احترامه رغم تواضعه بس عيبه انه عنيد وفي مشاعره اما ان يعطي بلا حدود او انه يجفو الى ابعد حد ........... انا اللي محيرني ليش عمي وابوي اختاروا خالد بالذات هو صحيح مايرفض لابوه طلب لكن بعد عمي عمره ما اجبر احد من اولاده على شي وبالذات خالد يعامله على انه ند له ياخذ ويعطي معه ويهتم لرايه

وهو في غمرة افكاره انتبه على صوت مفاتيح السيارة اللي رماها خالد على الطاوله

رفع طلال راسه لولد عمه :-هلا كيف حالك

خالد جلس سند ظهره للكرسي ومد يده يلعب في المفاتيح :- احوالي انت تعرفها .....(( سكت شوي وفجأة قال)) ........ طلال ليش يبون يزوجونها ؟

طلال ابتسم ابتسامه باهته على جنب :- ابو ي يقول علشان ترجع بنته لحضنه و...............

رفع خالد راسه وطالع طلال بنضره حاده وقال :- أي حضن هذا اللي يبيها ترجع له ؟ وينه عنها كل هالسنين اللي طافت ؟وبعدين انا شدخلني تراها بنته يعني يقدر يروح ياخذها يعني سالفه الزواج مالها داعي

طلال وهو ياشر لخالد بيده بمعنى بشويش :- هدي وانا اخوك ترانا في مكان عام وشوي شوي علي انا بعد ما كملت كلامي .......... هو صدق الوالد عمره من قبل ما قال انه بيرجعها بس هذا مو معناته انه ما فكر في هالشي ..........((اخذ نفس عميق وحط مرفقه على الطاوله ))
جدها اتصل على الوالد من يومين وقال له ان في واحد خطب علياء وانه يبي راي ابوي في الخطبه قبل ما يرد على الرجال
خالد بابتسامه تهكميه :- هه وش رد عليه ؟ اكيد قاله لا البنت لولد عمها

طلال:- هو رفض بس مو بهالطريقه انت تعرف ابوك وعمك لو يفكرون كذا كان انت من زمان متزوج ندى بدل عزيز

خالد وهو يضرب صدره يقبضه يده:- انا هذا الي حارني لييييييييييييييييييييييييش لييييييييييييييييييييييييييش
وش معنى انا؟

طلال يفرك جبينه :- ابوي اتصل على ابوك وخبره بالمكالمه وقرروا ان البنت ما عاد تقعد في البحرين خلاص
لانهم مو كل يوم والثاني بيردون الخطاب ابوي يقول ما يبغى يزوجها أي واحد ويبغاها جنبه وابوك يقول انها ما ينفع تتزوج واحد من برى العايله لانه بكذا الحلال يروح برى العايله .............. واتفقوا يخطبونها لك بكذا تعيش قريب من ابوي ويضمنون الحلال


خالد بعصبيه :- هذا كلام ما يدخل دماغي كلام غير منطقي.......... ليش عزيز من العيله يوم يزوجونه اختك ندى لو لان ابوه شريكهم في مشاريع الشرقيه ((سكت شوي وغمض عيونه كانه بهالطريقه بيهدأ من انفعاله ))
على فرض اني وافقتهم على منطقهم الغريب هذا طيب ليش انا وش معنى انا بالذات ليش مو تركي او سلطان او حتى ماجد ولد عمتى ........... أي احد بس مو انا ........

طلال وهو يطالع ولد عمه بنضرة اعتذار :- ما ادري بس انت تعرف سلطان اصغر منها بسنه لانها في سن اختى وداد واختك العنود غير انه لا زال يدرس وماجد خاطب وداد وتركي ...................

خالد :- وتركي اكبر منها ومو خاطب احد لكن انا متكلم على ساره ............... ليش يا طلال انا بالذات تدري اني ما عرفت الا عقب ما راحو البحرين وكلمو جدها كاني كرسي يشيلونه ويحطونه بكيفهم ومتى ما بيغون
ما كاني انسان له قلب ومشاعر وعقل ............طلال انا رجال واتحمل لكن ساره ما فكرو فيها في ردة فعلها
اذا مو علشان مشاعرها علشان امها هذي اختهم مو غريبه ............. انا ابي افهم من هي علياء((واشر اشاره تدل على انها شي صغير وحقير من غير قيمه)) اللي علشانها يجرحون ساره ويذبحون كرامتى ..............انا يا طلال انا انجبر على شي ما ابغاه


لو واحد ثاني غير طلال كان زعل من خالد انه يتكلم عن اخته بهالطريقه لكن خالد مو أي واحد هذا ولد عمه واعز واقرب صديق على قلبه باختصار اخوه اللي ما جابته امه ولانه يعرفه مثل ما يعرف نفسه فهو عاذره لانه يعرف وش قد خالد يعز ساره ويحبها ...........بس مع ذلك حميته وغريزه الاخوه وتربيته وغيرته على محارمه خلته يقول

طلال:- ليش انت بالذات هذا شي اسأل عنه ابوك وعمك وثانيا انا عارفك زين وادري انك مو من النوع اللي ينجبر وانا اللي اسألك وش الي جابرك واذا على علياء تراها بنت عمك ويمكن تكون اخير لك من ساره

خالد قاطعه والكلام مو عاجبه :-اللي جابرني؟!! قول اللي كاسر ظهري ان هالعلياء تصير بنت عمي اللي كاسر ظهري كلمه ابوي لعمي اللي كاسر ظهري اني ما اقدر اقول لعمي ما ابي بنتك ما اقدر لاني لو سويتها بذبح عمي واوطي راسه ومو انا اللي اسوي كذا لو على كسر رقبتي ولو مو كذا ما كنت تنازلت عن ساره وانت تدري من هي ساره ومستحيل في احد احسن منها


طلال :- كلامك هذا مردود عليه انا ما اعرف شلون هي علياء لكني اعرف ابوي ولو جدها مو رجال ويعرف يربي ما كان امنه على بنته وساره من دخلت الجامعه وهي تغيرت حتى على وداد والعنود يقولون انها ما عادت مثل اول واسأل العنود وهي تقول لك................. واذا انت منت راضي بعلياء تكلم مع عمي وقوله عن تركي تراه يناسبها واللي ادري عنه ان قلبه خالي وبكذا ابوي ما بيزعل ولا صاير عليه شي

خالد :- كانك ما تعرف ابوي هو قاصد اني ما اعرف بالموضوع الا بعد ما يسوي كل اللي يبغاه علشان يقطع على الطريق وما اقدر اعتذر او اتراجع ابوي لعبها صح .............((شرب من كاسه الماي اللي قدامه وكمل))

ابوي خطب علياء من عمي في مجلسكم قدام الرجاجيل واهمهم زوج عمتي ابو ماجد فلو اعترضت اكيد الناس بتتكلم وش فيها بنت عمه علشان يردها والناس بتحكي فيها وهذا شي ما ارضاه على بنت عمي وعمي
غير ان ابوي قال قدام ابو ماجد بعد ما وافق عمي على هالخطبه اني مستعجل وابيهم يروحون البحرين يتممون الخطبه قبل ما ارجع من جده .............. واكيد هالكلام وصل لساره وصدقت ...............اخ بس لو عندي طريقه اوصل لساره الحقيقه


طلال :- يا ابن الحلال ما يصيبك الا نصيبك وهذا اللي الله كاتبه لك وعسى ان تكرهوا شيئا وهو خيرا لكم

خالد :- ونعم بالله بس اللي يده في الما مو مثل اللي يده في النار انت وش عليك العنود وضامنها في جيبك

طلال :- يا اخي خليها على الله اللي يسمعك يقول هي عندي في البيت او حتى مالك عليها
يكفي انها شارطه انها ما تتزوج الا بعد ما تكمل جامعه

خالد بابتسامه:- اللحين اللي يسمعك يقول بيستناها عشر سنين ترى كلها دبلوم يعني سنه وحده لسى باقي لك تستنى

وتغيرت وجهة الحديث ويمكن اللي يشوف البسمه والضحكات اللي تخللت كلامهم يقول انهم نسوا او رضوا بالامر لكن لا كل واحد منهم داخله شايل على قلبه هم

خالد يفكر في ابوه وليش اختاره هو بالذات ويفكر في............... ساره وشعورها ناحيه خطبته وشلون يوصل لها انه مجبور على هالخطبه خاصة ان ما بينهم أي اتصال حتى العنود اللي كانت تنقل له اخبارها وتكلمه عن احاسيس ساره واحلامها تجاهه ما عادت مثل اول صارت تتهرب هي صحيح تجاوبه على اسألته بس ما عادت تسولف له عنها مثل اول يحس ان العنود تغيرت على ساره علاقتها معها مو مثل اول كانو على طول مع بعض وين ما تكون العنود تلاقي معاها ساره و وداد اللحين ما عاد ينشافون ثلاثتهم مع بعض الا في جمعات العيله وبعض طلعات السوق يا ترى بترضى توصل لساره حقيقه موقفي .................. ويفكر وش ردة فعل امه هو يذكر انها ما تحب نجاة ايه كان اسم امها نجاة ..............ردة فعل العنود يمكن تكون ما عادت بهالقرب من سارة بس لا زالت صديقتها وبنت عمتها غير انها تعرف اني احب ساره...................ردة فعل نجود اللي كانها توم لسعاد بنت عمي اللي تكرهه وحده منهم تكرهه الثانيه واللي تحبه وحده منهم تحبه الثانيه
.....................اما تركي عاد من رد من بريطانيا العام اللي فات عقب ما تخرج وهو غير ما عاد تركي المرح اللي يحب الجمعات حتى علاقته بماجد احسها يسودها نوع من البرود وما اظن يهتم بالذات في امور تخص بيت عمي ابو طلال.....................اما سلطان كل شي عنده ايزي


طلال يفكر في خالد شايل همه يتخيل لو هو مكانه وجبروه يتخلى عن العنود وش بيكون احساسه
اكيد مو ارحم من الموت ................. وشايل هم امه كيف بتستقبل بنت ضرتها كيف بتتحمل وجودها معاها في نفس البيت
وخواته...................... ندى اللي يعرف انها ما تتقبل زيارات ابوي القليله لبنته شلون بتقبل ان هالبنت تقعد في البيت ويجيبونها هنا .....................وداد اللي عارفه ان مشروع خطبة خالد لساره مو مجرد كلام لانها تعرف مشاعر ساره تجاه خالد بحكم صداقتها لساره وعارفه بمشاعر خالد لساره بحكم صداقتها للعنود
................سعاد بنت ال16 سنه الدلوعه اللي اكيد بيزعجها وجود بنت الحرمه اللي العايله كلها تكرهها لانها تزوجت ابوها على امها وفي الاخير تخيره بينها وبين امها ...................... وما مرتاح الا فيصل
ابو العشر سنوات اخر العنقود الوحيد اللي موهامه شي وبالعكس يمكن يترقب يشوف هالعلياء بس من باب الفضول


يفكرون في الكل ومهتمين في الكل لكن محد فكر في علياء شعورها احساسها ردة فعلها يمكن في احد مهتم لكن للاسف ما في يدها غير انها تخفف عنها وتحسسها ان في احد جنبها صديقتها وجارتها هاجر

في البحرين على العشا في بيت جد علياء

الجد وهو قايم من السفره :- الحمد لله اللهم ادمها نعمه واحفظها من الزوال................... علياء

علياء وهي تشيل الصحون من على السفره :- سم يبه

الجد ابو محمد:- سم الله عدوش يبا اليوم بشرب الشاي في الصاله ابي اكلمش في موضوع ولد عمش

علياء وقلبها يدق بسرعة جنونيه ((قرب وقت المواجهه يا علياء)):- ان شاء الله يبه

عقب ما خلصت علياء من غسل الصحون جهزت صينيه الشاي وراحت بها الصاله قعدت على الارض قبال جدها القاعد على الجلسه العربيه وصبت له استكانه ((بياله)) الشاي ومدتها عليه

علياء :- تفضل يبه

ابو محمد :- زاد فضلش يا بنتي ((شرب رشفه من الشاي ونزلها في الارض قدامه)) علياء ابوش البارحه تعنى هو وعمش من السعوديه للبحرين علشان يخطبونش لولد عمش الكبير اللي اسمه خالد ويبون ياخذونش وياهم السعوديه بكره

بدون وعي وبتسرع علياء قاطعة جدها ولاول مره :- بس انت قلت اني ما اطلع من اهني الا مالكين علي شلون اروح السعوديه بكره غير اني ما ابيه ما ابي اتزوج ما ابي اتزوجه
علياء ابتدت كلامها بصوت عالي ومع سيرت الزواج غلبها الحياء وانخفض صوتها وبالنسبه لها قمة الشجاعه انها قالت هالكلام في وجه جدها


يمكن تستغربون بنت عمرها 20 سنه في هالزمن وتستحي انها تقول لا ما ابي اتزوج لا وتعتبر شجاعه بعد بس لا علياء شخصيتها مو ضعيفه بس شخصية جدها وطبيعة تربيتها هي اللي تخلي تصرفها هذا عادي
علياء رباها جدها على ان البنت السنعه لازم تلتزم بشغل البيت كله ويمكن هالشي فرضه تفكيره كرجل كبير في السن ووضعهم المادي اللي ما يسمح ان يستقدمون خدامه يكفي ان في ايام الدراسه ان زوجه خالها محمد تطبخ الغدا لهم ومثل ما ربى في نفسها ان شغل البيت واجب المره بعد ربى في نفسها الخلق الكريم من احترام الغير الالتزام بالصلاة والصوم والاهم اكتسبت من جدها انها ما تتكلم قبل ما تفكر وان كسب احترام الشخص لك واقناع غيرك برايك ما يجي بالصراخ او الدلال او الصياح بالعكس الرصانه والهدوء والصبر هو اللي يوصلك لهدفك ويخلي الناس تحترمك وتعلمت بعد شلون تخفي وتسيطر على مشاعرها

جدها له هيبه مو معقوله وبنضره وحده وكلمه وحده يخلي اللي قدامه يطيعه ويخافه بعد لو كان قاصد... عمره ما صرخ عليها او ضربها علشان تنفذ شي طول عمره يوصل لمبتغاه بكلمات قليله ودائما قول وفعل عمره ما قال شي وما سواه علشان جذي كلمته اقوى من افعال ناس واجد........... ومتى ما عاملته بطيب واحترام وكلمته بمنطق كلما زادت فرصتك انه يطيعك وينفذ لك طلبك


ابتسم ابو محمد :- ما ابي اتزوج هذا مو كلام كل بنت مسيرها تتزوج .................اما ما ابي اتزوجه هذي عاد تحتاج تقولين لي ليش؟ والسعوديه بنروح عقب يومين وياي وما راح اخليش الا اذا ملكو عليش


علياء وهي تبلع ريقها تفكر وش الشي اللي ممكن يقنع جدها :- يبه انا ما ابي اروح السعوديه يعني 20 سنه ما سألو عني ولا اهتمو اللحين اروح واتزوج من هناك انا ابي اقعد وياك قريب منك ما ابي اخليك بروحك وثانيا خالد هذا ما اعرفه .......... اقصد ما نعرف عنه شي اتزوج واحد كل اللي اعرفه عنه ان اسمه خالد
.... غير ان امي يمكن ما توافق يعني اقول يبه انت تدري ان امي ما تحب اهل ابوي شلون اتزوج واحد تكرهه امي

ابو محمد بكل هدوء:- شوفي اول شي ابو ش ما كان راميش وما سأل عنش بالعكس وانتي تدرين ان لبسش واغراض المدرسه ومصروفش كل من عنده ما في غير هالسياره الي تسوقينها واكلش اللي من عندي غير انه يجي لش في الاعياد وغيرها كم مره

علياء :- بس هذا واجبه ومو دليل اهتمام

ابو محمد وشوي خلقه ضاق:- علياء انا ما كملت كلامي واللحين اللي يسمعش مهتمه في راي امش يقول انها مو مقصره ويوميا عندش وتسأل عنش وترى اذا لانها ما تحب اهل ابوش ما بتتزوجينه عجل تبري من ابوش لانها ما تحبه...غير انها ما لها كلمه في زواجش ولا شور...............
((ابو محمد اللي مربي علياء ويعرفها زين حس بالدموع اللي بدت تتجمع في عيون علياء وخلتها تلمع كمل وهو يخفف من حدته لهجته))
واذا علي انا ما بتم بروحي انا بس تروحين بيقعد عندي ولد خالش وزوجه خالش تقوم بخدمتنا الى ان يتزوج ولد خالش ومرته تقوم بالبيت ومو من بعدها السعوديه متى ما بغيتين تجين تعالي

وثاني شي اذا انتين ما تعرفين ولد عمش يعني غيره بتعرفينه يا بتي ؟!!

هزت علياء راسها اشارة لاوواصل ابو محمد كلامه:- انتي ما تعرفينه لكن انا اعرف ابوش واعرف عمش بعد رجال ما يربون الا رجال ولو ما هو يستاهل ما زوجه بنته ترى مهما يكون الابو ما يرمي بنته لاي واحد ولو كان ولد اخوه............. وابوش انا اعرفه وما دام قال ان خالد رجال ما يتعيب عليه خلا ص .................
والمره يكفيها انها تعرف ان رجلها على دين وخلق ولد اصل وفصل وعنده شغله حلال يعيل فيها بيته ومرته واولاده............ وانا ما اقدر اقلول لا على الرجال وهو ما يعيبه شي خاصه ان ابوش ولي امرش موافق عليه ............. غير انه لو جاني يخطبش ما رديته

وقام ابو محمد منهي بهالحركة الكلام في الموضوع وطبعا بالنسبه له علياء ما قدمت أي عذر مقبول ولو انها كلمته عن مخاوفها كان ما بيكلف نفسه حتى عناء الرد عليها يعني خلاص جدها حكم عليها بالزواج من خالد وقام حتى من غير ما يهتم اذا كانت اقتنعت او لا

حست علياء ان الدنيا ضاقت عليها وان خلاص ما في امل حتى امها اللي كانت بتكلمها اليوم عن موضوع الخطبه وتعتمد على كراهيتها لاهل ابو طلال علشان تساندها وتدعمها في قرارها ما عاد ينفع لا جدها قال وكلمته وحده(( امش ما لها راي ولا شور))وهي في غمرة افكارها سمعت صوت موبايلها وكانت المتصله هاجر
ردت علياء وقبل ما تسلم قالت هاجر :- هاه وش صار ؟ وش قلتين لجدش ؟ وش قال ليش؟ اتصلتين بامش؟

علياء بهدوء عكس حماس هاجر :- بسم الله علي شوي شو ي حبه حبه واول يسلمون

هاجر وحماسها ما خف :- سلاااااااااااااااااااااااااااام والحين وش الاخبار بسرعه ما عندي لا وقت ولا رصيد

علياء ضحكت على هاجر :- وعليكم السلام ما في اخبار تسرش جدي ما قتنع بكلامي وقالي باختصار ولد عمش رجال دين وخلق واصل وفصل ويشتغل وهذا يساوي رجال ما ينرفض وامي حتى لو باتصل فباتصل علشان اخبرها لان جدي قال امش ما لها شور يعني قفلها وطلع وهو اكيد في نفسه يقول انه ضيع وقته على لا شيء

هاجر بهدوء يدل على حماسها اللي انطفى :- زين كان قلتين له عن مخاوفش من هالزواج يعني قدرتين تقنعينه بدخول الجامعه والسياقه ما تقدرين عليه في هذي

علياء باحباط :- هذي غير والجامعه والسياقه غير تدرين الجامعه شي يخص العلم وجدي محب للعلم يحترم سعي الواحد لانه يتعلم ومع هذا ما وافق الا بعد ما قبلوني في تخصص تدريس يعني مستقبل الوظيفه ما في خلط........... والسياقه تدرين زحمت مواعيد باصات الجامعه تطلعين من صباح ربي وما ترجعين الا العصر وفي عز الشتا قريب اذان المغرب غير ان الباص فيه خلط وهذا ما يعجب جدي حتى لو الاولاد في ناحيه والبنات في ناحيه وعدم وجود من يلتزم بروحتي وجيتي لكن هذي وش اقوله خابفه من ابوي وعيلته خايفه من نظرتهم لي خايفه من هالعالم الجديد (( تتنهد بقوه)) خليها على الله

هاجر وحست بعلياء وما حبت تتركها جذي قالت لها بنبره هيام وعشق علشان تغير مزاجها:- زين ما قلتين اهم شي جدش ما قال لش شلونه خلودي طوله عرضه عيونه خشمه خدوده صوته

علياء وفعلا تغير مزاجها :- خلودي في عينش وما دورتين الا جدي اسأله عن هالسخافات

هاجر وعجبها تعصيب علياء :- في عيني هاااااااااااه لكن ما اقول الا حسبي الله على الغيره وعلى العموم بكره بجي وبعرف التفاصيل وريوقي عليش
علياء وبحمق:- غيره ... غارت عليش .............. وش اقول حسبي الله على عدوينش واي ريوق ليكون ناويه تجين من صباح الله خير

هاجر وبكل برود :- اكيد بكره الجمعه وغير الصبح ما بشوفش بروحش لان خوالش وعائلاتهم عندكم ..................واحم احم حمودي بعد بيتغدى عندنا بكره

علياء باستسلام :- زين امري لله تعالي يلا مع السلامه


هاجر :- مع السلامه ايه ولا تنسين تقولين لجدش يعطيش صورة لخلودي
وسكرت التلفون قبل ما ترد عليها علياء


اتمنى ان يحوز هذا البارت على اعجابكم
مع اعذب وارق التحايا

الثالث من هنا
google-playkhamsatmostaqltradent