أخر الاخبار

رواية اهدتني معاقا (لكنه القدر) الفصل السادس عشر 16 بقلم اسماء عبدالهادي

رواية اهدتني معاقا (لكنه القدر) الفصل السادس عشر 16 بقلم اسماء عبدالهادي

 يامن _ماما فرح فين ،مشفتهاش طول اليوم


احسان_فى البيت ،تعبانه شويه

يامن بخضه عى اخته_تعبانه مالها ياماما

محمود_اختك كويسه مرهقه بس ،اكيد معرفتش تنام فى المستشفى امبارح
اتصل يامن بفرح للاطمئنان عليها

يامن _مش بترد ليه

محمود _يمكن نايمه ،متقلقش نغم معاها فى البيت وانا شويه ورايحلهم
يامن_روحلهم دلوقتى يابابا ،انا قلقان على فرح ،دى استحالة تفضل كده من غير ما تيجى تطمن عليا

فرح_فعلا ،حاولت ومقدرتش يا يامن
يامن بسعاده_فرح خضيتينى عليكى ،،فرح انتى كنتى بتعيطى؟!
فرح وهى تهز رأسها نفيا_لا يا يامن انا كويسه ،انت بس وحشتنى ،زعلت انى فضلت طول اليوم م غير مااشوفك ،فخليت نغم توصلنى على هنا
محمود_وهيه فين دلوقتى
فرح _روحت يابابا
****
بعد اسبوع لم يظهر فيها امجد لفرح ،وتحسنت احوال يامن وسمح له الطبيب بالعودة الى المنزل

الطبيب_دكتور لؤى بيعتذر انه مقدرش يجى النهارده وبيسلم على حضراتكم
محمود_مفيش مشكلة يا دكتور ،ربنا معاه

الطبيب_دكتور لؤى كان متابع حالة يامن وسمعت انه بيقول ان رجليه محتاجه عمليه جراحيه كبيرة شويه بس نسبه تحسن رجل يامن تتعدى ٨٠℅

محمود بفرحه_بجد يا دكتور ؟،والعملية دى تتكلف كتيير!؟

الطبيب_اكيد يا حج هيه مش عملية سهله ،ممكن تتكلف ١٠٠الف جنيه

محمود_ الله المستعان ،المبلغ كبير جدا

الطبيب_ ربنا يوسع رزقك ياحج،عن اذنكم

يامن_انا مش محتاج عملية يا بابا ،اناالحمد لله راضى بحالى كده ،مترهقش نفسك بالتفكير فى الموضوع ده كتير ،حضرتك عندك فرح محتاجه تتجهز ،ربنا يعينى واتخرج واشتغل علشان اساعد حضرتك

محمود_ربنا يباركلى فيك يابنى ،ربنا يقدرنى علشان اسعدك انت واختك
***
جاء حسن مع والدته الى بيت محمود للاطمئنان على يامن وحددوا يوم غد لجلوس فرح مع حسن كرؤيه شرعيه بعد ما اصر يامن على ذلك رغم الحاح اخته انها لا تريد هذا الا بعد ان يتعافا كليا

كان يامن لا يزال لا يستطيع المشى ،لذا كان حازم يحضر له ما يحتاجه الى المنزل كى يذاكر من منزله

اتى اليوم المحدد لزيارة حسن

كانت نغم مع فرح لتكون بجوارها فى
مثل هذا اليوم

نغم_ها يافرح حاسه بايه

فرح_عادى يا نغم ،متوترة بس وحاسه انى مش هعرف اساله اى حاجه من الاسئلة اللى بقالى فترة برتب فيها

نغم_ايه يابنتى حيلك ،اسئلة ايه،هو داخل امتحان ؟!

فرح_الله مش لازم اعرف تفكير الشخص اللى هرتبط بيه

نغم وهى تلوى شفتها_طيب يلا يا مس ،مستر حسن منتظر برا لحد ما قرب يخلل

فرح_استنى بس هراجع الاسئلة فى دماغى

نغم_والله انا عارفاكى ،اول ما تدخلى هتتلخمى ومش هتعرفى تفتحى بؤقك حتى

فرح_طب نقطينى بسكاتك موترانى ،بعدين انتى جايه معايا ليه

نغم_طبعا علشان اشوف سى حسن بتاعتك
فرح_يابنتى مش لما اشوفه الاول

نغم_خليكى انتى على جنب ،اصلا لو معجبنيش هفركش الجوازة دى ،هوا اى حد ياخد فروح

لم تتمالك فرح نفسها من الضحك
احسان _فرح صوتك مسمع برا فى الصاله فى ايه يابنتى
فرح _اسفه يا ماما ،،خدى نغم ف ايدكى ،موترانى

احسان بامتعاض _ما هو باين انك متوترة فعلا

لكزت فرح نغم فى كتفها_شوفتى جبتيلى الكلام

نغم بتبرم_وانا مالى هوا انا اللى قلت لك اضحكى بالطريقه دى
جاء محمود_يلا يافرح
فرح بتلقائيه_ يامن فين

محمود_قاعد مع العريس ،يلا

مشت فرح مع ابيها الى حيث المكان الذى يجلس فيه يامن مع حسن ،كانت فرح ترتدى دريسا هادئا وعليه خمار من نفس اللون ولكن بدرجه افتح قليلا ،بدت مثل القمر فى ليلة تمامه ،لم تضع اى مساحيق ولا حتى كحل ورغم ذلك كانت جميلة حقا

دخلت مع والدها وعينيها ارضا م فرط خجلها ،اجلسها والدها بجوار اخيها يامن
ام احسن_بسم الله ما شاء الله ،،قمر يا عروسه
لاحظ يامن توترها فاقترب منها هامسا _ فرح حبيبتى مفيش حاجه تستدعى توترك الزايد ده ،حاولى تكونى على طبيعتك
محمود _تعالوا اتفضلو فى الصالة نسيب العرسان يتعرفوا على بعض شويه

يامن _فرح انا هقعد قصادك ف الصاله ،متقلقيش
عاون محمود ابنه على القيام ثم اجلسه مرة اخرى مقابلا لفرح فى الصاله

ظلت فرح تنظر ارضا ولا تتحدث وهو ايضا لم يتحدث
بعد فترة مل حسن من الانتظار فقرر الحديث اخيرا
حسن_انسه فرح ممكن ترفعى راسك علشان نقدر نتكلم شويه

كانت فرح فى موضع لا تحسد عليه ،فرفعت راسها الى اعلى تنظر الى يامن الجالس قبالتها فى الصاله لكنه لا يسمع ما يقولان _اشار لها يامن ان تنظر الى حسن كى تعرفه وتستطيع اتخاذ قرارها الصحيح
نظرت له نظرة خاطفه على استحياء
....
انتهت الزيارة اخيرا على انهم سيردون عليهم بعد اسبوع لاعلامهم راى فرح

نغم مسرعه _ها يافرح عملتى ايه ،اسكتى يا نغم موقف صعب اوى

نغم بضحك _مش قلت لك مش هتعرفى تتكلمى
فرح _لا سالته كم سؤال كده مش كلهم

نغم _وانتى رايك ايه؟!
فرح _قوليلى الاول ،انتى رايك ايه لما شوفتيه

نغم_مخبيش عليكى يافرح ،مش اوى ،،كنت اتمنى ليكى حد افضل
فرح_ميهمنيش الشكل قد الاخلاق يانغم

نغم_انتى عجبك
فرح_عادى يعنى ،شكله مقبول ،بس مش عارفه احدد اى شعور ناحينه ،حاسه عادى جدا مش موافقه ومش ومش رافضه ف نفس الوقت

____

نغم_عمو محمود بيقول معاكى اسبوع تفكرى ،خدى راحتك فى التفكير

بعد اسبوع ،وطوال هذه المدة لم يظهر امجد فى حياة فرح
يامن _ها يافرح قررتى ايه
فرح_مش عارفه يا يامن ،مش حاسه ب حاجه حاسه انى لسه مش عارفاه

محمود_لو تحبى اخليه يجى وتقعدى معاه تانى علشان تقررى علشان بعد الخطوبه مفيش قعاد مع بعض الا بحضورى او حضور يامن

يامن_فكرة كويسه يابابا ،بس نأجلها لبعض الامتحانات افضل علشان فرح متتشغلش بحاجه

محمود_باذن الله

******

احس انه يتهرب منها ،يتهرب من رؤيتها ،احس انه سيصبح ضعيف كلما احتك بها اكثر،لذا قرر الابتعاد عنها لفترة ،قرر الابتعاد لفترة ما بعد الامتحانات لكى يعود الى طبيعته معها فهو لن يسمح لايا كان ان يجعله ضعيف ،رقيق القلب

_ماشى يافرح ،انا سايبك بمزاجى ،بس هرجعلك تانى واقوى من الاول كمان

***
جاءت الامتحانات الاخيرة واخيرا سيتخرجون من الجامعه ويسعون نحو مستقبلهم الذى يحلمون به
كان يامن يسعى الى أن يعمل فى شركه كبيرة ويساعد والديه ،لم يفكر فى نفسه قط ولم يفكر فى الارتباط باى فتاه فمن التى سترضى به هكذا ،كان هذه وجهه نظره ،كان يريد العمل ليساعد والده فى تجهيز اخته فرح فهى على وشك الخطوبه ولم يجلبوا اى شىء لجهازها بعد ,

انتهت الامتحانات بسلام على الجميع

حازم_ياااه اخيرا خلصنا مذاكرة وامتحانات ،ونرتاح بقا

يامن_الحمدلله ،يارب بالتوفيق لينا كلنا ،اخيرا قربنا للحلم اللى بنخطط له

حازم_انت ممتاز يا يامن ،عندك افكار تحفه ،لازم تستغل ده كويس جدا

يامن_ان شاء الله عندى افكار ملهاش حدود ،اول ما النتيجه تظهر باذن الله هبتدى ادور على فرصه فى اى شركه

حازم_عمى رعد قالك أن مكانك موجود ولا نسيت

يامن_يعنى تفتكر ،هيشغلونى كده بالسهولة دى

حازم_لا طبعا لا انت ولا انا هنشتغل فى شركه الصياد بسهولة ،لازم يعملونا اختبار الاول،عمى رعد مش سهل ابدا فى الشغل ومش بيسمح بغلطه

يامن بتحدى _وانا مستعد لأى حاجه المهم انى افوز بالفرصه دى مش هضيعها من ايدى ابدا
***
_ماما انتى لسه بتتعاملى مع الست الخياطه دى

_ايوة يا امجد ،دى بقت شبه صاحبتى ست طيبه جدا انا حبيتها بجد،اول مرة اتعرف على حد من الطبقه دى واكون قريبه منه بالشكل ده

_ممم،ايه رايك تخليها تيجى الفيلا هنا بدل ما بتتقابلوا فى النادى،يعنى هنا تاخدوا راحتكم وممكن تجيبى صاحباتك هنا كمان علشان تقيسوا براحتكم

_يااه يا امجد،فكرة مش بطاله ،مفكرتش فى الموضوع ده قبل كده ،بس تفتكر هتوافق

_اقنعيها بشطارتك بقا ،مش هتغلبى يا مولى

_بس انت يعنى شاغل دماغك بالموضوع ده ليه

ارتبك امجد_ها..لا عادي ،حبيت اريحك مش اكتر

_تسلملى يا حبيبي،ها ياامجد مش هتريح ابوك وتنزل تتدرب فى الشركه معاه ،ده مناه انك تنزل معاه يا امجد

_ يووه كل شويه الشركه ،الشركه،انا بقيت بسمعها اكتر ما بسمع اسمى ،انا زهقت يامولى من الاسطوانه دى

_يا امجد ابوك محتاج لك نفسيته بقت وحشه اوى اليومين دول ،لدرجه انى بفكر اعرضه على دكتور نفسى

_مولى لو عايزة متخسرنيش ،متجبيش سيرة الشركه دى ،مش اهتماماتى ولا حاببها
_طب قولى عايز تشتغل ايه ،قول فكرة المشروع اللى بتحلم بيه وانا اعملهولك

_ممم لسه مش عارف مفيش حاجه فى دماغى

كارم وهو يغلى من الغضب _طبعا مش عارف ،هو انت عارف حاجه ولا فالح لحاجه

_اتكلم معايا باسلوب كويس

_ولد ،انت نسيت نفسك ولا ايه

_لا منستش ،بس انا مش صغير دلوقتى ومسمحش لحد حتى لو كان ابويا يهين فيا

امال ملطفه الجو_يا امجد باباك خايف عليك

امجد بحدة_وانا عارف مصلحتى كويس

كارم_تقدر تقولى ايه هيا ،ها بتنجح فى الجامعه بالعافيه وخلاص خلصت ومفيش فى دماغك حاجه غير السهر والشلة الزبالة اللى معاك

امجد_والله انا محدش له حاجه عندى وقت ما اقرر اشتغل هشتغل محدش هيجبرنى اعمل حاجه مش عايزها ثم نظر الى والده بتحدى

كاد كارم أن ينفجر غيظا من امجد ،اصبح يبغضه لا يحبه ،الان اصبح يشعر انه ليس ابنه ،اصبح يشعر أن هذا الولد ليس من صلبه لا يمت له بصله ،اصبح لا يريده ،اصبح رؤيته تثير الغضب فى نفسه ،لكن ماذا سيفعل هل سيتحدث بالحقيقه بعد هذه السنوات هل سيخسر سمعته مثل ما تنهار شركته ولا يعرف ما سبب انهيارها بهذا الشكل,,
اااه من هذا الامجد الغبى لما لا يساعدنى لما لا يكون مثل ما انا تمنيت ولدا جيدا يعاوننى فى الشركه يعتمد عليه يكون له اسما مرموقا فى عالم البيزنس,

***
فرح_رايح فين يا يامن

_خارج مع حازم شويه ،

فرح بضجر_يا سلام اشمعنى انت تخرج وانا افضل كده قاعدة فى البيت

يامن وهو يضحك _ما انتى نغم معاكى اربعه وعشرين ساعة

فرح_انا عايزة اخرج يا يامن مش عارفه بابا مش سامح بده ليه ،

يامن_ يافروح مالها قاعدة البيت ،انتى مش كل شويه كنتى تقولى امتا اخلص دراسة واقعد فى البيت وانام واصحا براحتى

فرح_بس زهقت يا يامن من حقى اخرج بقا

يامن_خلاص اوعدك لما ارجع ،اكلم بابا تانى يسمحلك تخرجى مع نغم فى اى مكان تحبوه

فرح بسعاده _بجد يا يامن ،ب
يامن_بجد يا فرحه قلب يامن،اه من حق حسن جاى الجمعه الجايه علشان تقعدى تانى معاه

فرح بلا مبالاه _ماشى يا يامن

****
امال_بقولل ايه يا احسان بدل مابنتقابل فى النادى ومش بنكون على راحتنا ،تعالى عندى الفيلا

احسان _بس يامدام امال ،صعب موضوع الفيلا ده

امال_صعب ليه انا هخلى اختى وبنتها يتعرفوا عليكى وممكن يبقوا زباينك كمان

احسان_يا مدام امال ،انتى عندك زوجك وابنك علشان كده مش هينفع اجى عندك

امال_لا من الناحية دى اطمنى خالص،امجد ابنى يعتبر مش بيجى الفيلا غير للنوم وبس ،وكارم طول اليوم فى الشركه،بعدين هنقعد فى اوضه لوحدنا
احسان _طيب هشوف محمود وارد عليكى أن شاء الله

امال_هبعت لك السواق يجيبك ويرجعك لباب البيت

احسان _ ربنا يقدم اللى فيه الخير
***
_وفيها ايه بس يا محمود لما اروح عندهم الفيلا هناك هنكون على راحتنا اكتر
_عايزة تفهمينى أن مفيش رجاله فى البيت هناك
_هنكون فى مكان لوحدنا ،كمان زوجها وابنها مش بيكونوا موجودين طول النهار
_موافق بس بشرط خدى فرح معاكى،البنت نفسها تخرج

احسان بسعاده _ربنا يباركلى فيك يارب
***
_تمام يا احسان هبعتلك السواق بكرة ان شاء الله
امجد_ بتكلمى مين يامولى
_دى الخياطه جايه هنا بكرة
امجد_جايه لوحدها ولا حد معاها
امال_هتجيب بنتها معاها
امجد بسعادة فى نفسه_كنت عارف انها مش هتيجى لوحدها ابدا، خطتى نجحت،واخيرا وهشوفك تانى ،رجعتلك قوى تانى يا..يافرح

***
جاء السائق ليقل احسان وابنتها الى فيلا كارم شرف الدين حيث تنتظرها امال هناك
_يلا يافرح وهاتى الشنطه اللى عندك وانتى جايه
_حاضر يا ماما

وصلوا الى الفيلا ،،اعجبت فرح بالتصميم العصرى للفيلا

الخادمه_اتفضلى يا مدام ،الهانم مستنياكى جوا

امال_اهلا يا احسان الفيلا نورت

احسان _منورة بأصحابها يا امال هانم

امال_ازيك ياا فرح مش كده

فرح_اه يا طنط ، الحمد لله كويسه ازى حضرتك

امال _بنتك عسولة خالص يا احسان ،بس انتى ليه ظالماها باللبس ده

احسان_ظالماها؟!
امال_ اللبس ده مكبرها اوى وكمان مدارى جمالها
احسان بابتسامة خفيفه_وده المطلوب ان ملابسها تخفى مفاتنها يا امال هانم ،ربنا أمرنا بستر جسمنا ومنلبسش الضيق من الثياب الى يصف جسمنا ويصف مفاتنه
امال_ايوة بس دى لسه صغيره مش زينا من حقها تتمتع بشابها

احسان _ من اول ما تبلغ سن التكليف يا امال هانم لازم تلبس حجاب وملابس لا تصف ولا تشف وفى نفس الوقت شيك وحلوة

امال_انا بنت اختى نودى فى سنها تقريبا ،تعالى شوفيها ملابسها كلها فاشون وكاجوال وحاجه كده واو خليهم يتمتعوا بشبابهم بعد كده يلبسوا اللى بتقولى عليه

احسان _الحاجات الواو دى مينفعش تتلبس غير لمحارمها وزوجها بس

امال_محارمها؟!

احسان_اه يعنى ابوها او اخوها ،عمها،خالها ،جدها،ابنها...
امال_اه فهمتك، بس عندنا هنا الوضع غير يقولوا علينا متخلفين ومش عالموضه

احسان _مش مهم كلام الناس،صعب ترضى الناس يا امال هانم،المهم رب الناس يكون راضى عننا

الخادمه _امال هانم ،فريدة هانم وبنتها وصلوا
امال _طيب اتفضلى يا احسان ،هروح استقبل اختى وارجعلك

فرح _برافو عليكى يا ماما انا فخورة بيكى بجد
الخادمه وهى تقدم لهم الحلوى والعصائر _اتفضلى يا فندم
احسان_شكرا يابنتى ،ربنا يكرمك
الخادمه_اى خدمه يا فندم عن اذن حضرتك
***
امال_فوفا حبيبتي وحشانى خالص ،كده مبقتيش تيجى زى الاول
فريدة _ وانتى كمان جدا معلش بقا ،سعيد كان مسافر وكنت لازم اقعد معاه قبل ما يسافر مش هينفع اسيبه فى وقت زى ده

امال _يجى بالسلامه يارب ياحبيبتى
،فين اسر ونودى اوعى تقولى مجوش ازعل منك

فريدة _لا طبعا جم معايا ،تلاقى نودى طلعت فوق لامجد واسر بيركن العربيه وهيحصلنا
امال_ماشى ،تعالى يلا اعرفك على الديزاينر بتاعتى
***

نودى_واو يا امجد ايه الشياكه دى كلها ،كل ده علشان انا جايه اكيد ،عارفه قد ايه بتعزنى

تضايق امجد من وجود نودى فى هذا اليوم الذى خطط له بلقاء فرح لذا قال متظاهرا الفرح_طول عمرى شيك يابنتى ،

نودى بسرعه _اه طبعا شيك جدا وقمر كمان ،دى كل البنات هتتهبل عليك واولهم انا طبعا
ابتسم لها امجد فى غرور _طب يلا طرقينى خلينى اكمل لبس
نودى_اوك يا ميدو هستناك تحت فى الجنينه

امجد _اه استنينى هناك ،هخلص وانزلك

بعد أن رحلت جلس امجد على الفراش_اوف الخطه كده عايزة تعديل بسببك ،ما هو انا هشوفها يعنى هشوفها

كانت نودى فى طريقها للجنيينه ،الا أن الخادمه اخبرتها أن والدتها تريدها بالداخل

نودى _ هروح اشوف مامى عايزة ايه وبعدين استنى ميدو فى الجنينه

طرقت الباب ثم دخلت _مامى انتى طلبتينى

امال_نودى حبيبتي كده تطلعى على فوق من غير ما تسلمى على انطى حبيبتك

نودى_معلش يا انطى انتى عارفه قد ايه امجد واحشنى اوى

اثار هذا الاسم انتباه فرح التى كانت منشغله بالمجلة التى ترها اياها فريده
فرح _امجد ،،ربنا يستر وميكونش هو ،تبقى مصيبه
احسان _فى حاجه يافرح
فرح_لا يا ماما انا كويسه

امال_دى بقى نودى اللى حكيتلك عنها يا احسان ،ودى مدام احسان وابنتها فرح
نودى بلا مبالاه _ هااى
فرح _اهلا
نودى كانت تنظر الى فرح نظرات غريبه ،استغربت فرح نظرات نودى لها
فرح_فى حاجه يا انسه نودى؟!

نودى _ها ،اصل عنيكى زى حد اعرفه
ضحكت امال_اه انا كمان لاحظت عينيها جميلة اوى زى عيون وامجد بالظبط ،يخلق من الشبه اربعين

نودى_ده لو عرف هيتجنن مش بيحب حد يكون زيه ،عايز يبقى فريد من نوعه هوا وبس ،وبصراحه متزعليش يافرح بردو عيون امجد اجمل

ابتسمت لها فرح مجاملة وهى تقول لنفسها_ربنا يستر كل المؤشرات بتقول انه هوا

احسان_ها يا فريدة هانم عجبك حاجه من المجلة
فريدة _اه عجبنى ده جدا تقدرى تعمليه

نظرت له احسان بتمعن _ممم اقدر أن شاء الله ،بس القماش ده مش هينفع استعمله

فريدة _ ممم لو عايزة تزودى المبلغ مفيش مشكله

احسان _لا طبعا مش بتكلم على كده ومدام امال عارفه ده كويس عنى ،انا قصدى نوع القماش ده بيلزق جدا ،علشان كده لازم اغيره

**
نزل امجد واستغل عدم وجود نودى ظنا منه انها تنتظره بالجنينه وذهب الى حيث الغرفه التى توجد بها فرح

تحجج انه يبحث عن والدته وانه يريدها فى شىء ما ،نادى على امه ومن ثم فتح الباب

قامت نودى مسرعه بمجرد سماع صوته وجرت نحو الباب _ده اكيد امجد بيسال عليا ،انا رايحه له سلام

فتح امجد الباب فوجد نودى فى وجهه
نودى_انا هنا يا امجد عارفه انك كنت بتدور عليا ،يلا تعالى نروح الجنينه شويه

حاول امجد التملص منها والنظر بداخل الغرفه لكن نودى كانت حائل دون ذلك فاضطر الى المشى معها نحو الحديقه حتى لا تنكشف خططه فلا احد يعلم معرفته بفرح
امجد فى نفسه _اووف بقا ،يادى النحس ،طلعتيلى منين يا نودى

نودى _بتقول حاجه يا امجد

امجد _لا بس كنت بسال اسر فين

نودى وهى تبحث بعينيها عن اخيها_اهو هناك بيتكلم فى الموبايل
***
فرح بفزع_يا نهار ابيض انا جيت عند الحيوان ده برجليا ،يارب مش يكون شافنى يارب

امال_روحى يافرح اقعدى مع الولاد فى الجنينه يا حبيبتى

فرح بصدمه _ايه ،لا لا يا طنط انا هنا مع ماما

فريدة _متتكسفيش ،قومى يلا

نظرت فرح الى امها لتنقذها من هذا الموقف

احسان _معلش يا فريدة هانم مش هينفع ،فى شباب برا
فريدة _وايه المشكلة هما شباب زى بعض عادى
فهمت امال _خلاص يا فريدة سيبيهم براحتهم

تنفست فرح بارتياح _ربنا يعدى اليوم ده على خير

***
عندما لمحه اسر قال_اهو امجد جه ،خد انت كلمه ،لاحسن لو كلمته انا هيخلص عليا

امجد مستفهما _بتكلم مين

اسر _ده ادهم بيسال عليك وبيقول انه رن عليك دلوقتى ومش بترد
امجد بتذكر_اه نسيته فوق
اسر_طيب خد كلمه

امجد بحب ،فهو يحب ادهم جدا ومتعلق به ،رغم فارق السن بينهم ،فاسر فى نفس عمر ادهم
وامجد فى نفس عمر نودى اى اصغر من اسر وادهم

امجد_باشمهندس ادهم ،واحشنى جدا

ادهم _وانت كمان يا امجد بجد وحشتنى

امجد _ مش ناوى ترجع بقا ،خلصت دراسه والماجستير كمان

ادهم (ده ادهم بن عم امجد وليس ادهم الصياد ركزوا)بجديه_لا مش راجع غير لما تمسك الشركه يا امجد

امجد بضيق وهو يهز برأسه فى ملل_هما قالوا لك تكلمنى انت كمان فى الموضوع ده

ادهم _يا امجد ابوك تعبان الفترة دى جدا والشركه بتمر بظروف سيئه لازم حد يمسكها والا الشركه هتنهار

امجد_اهو انت قلت بتنهار _هعملها انا ايه بقا

ادهم _امجد بطل لا مبالاه لو سمحت ،دى شركتك ،يعنى لازم تخاف عليها ،اسمع يا امجد لو ممسكتش الشركه ،مش هرجع مصر نهائى

امجد_انت بتمسكنى من ايدى اللى بتوجعنى يا ادهم ،انت عارف لولا معزتك عندى كان زمانى اتصرفت معاك تصرف تانى

ادهم_عارف ياامجد ،وانت كمان عارف انا بحبك قد ايه ،علشان كده بقولك امسك الشركه يا امجد

امجد_ يابنى همسك ايه انا مش هفهم حاجه.
ادهم_ هتتعلم يا امجد

امجد _موافق يا ادهم هروح الشركه بس شكلا بس علشان يبطلوا الزن ده يمكن ابويا يرتاح

ادهم بتنهيدة _زى ما تحب يا امجد

امجد_بس عندى شرط
ادهم_ ايه

امجد _عايز سكرتيرة جديدة

ادهم_بس كده هكلم عمى يشوفك سكرتيرة جديدة

امجد بخبث_لا انا خلاص عارف هجيب مين


تعليقات



حجم الخط
+
16
-
تباعد السطور
+
2
-
close